بييجي وقت لازم تسكت فيه , وعقلك يقولك ( خليها فى القلب تجرح , بدل ما تبان و تفضح ) .. و أوقات تحس إنك لازم تتكلم .. مش قادر تكتم و تخبي .. وإلا هتنفجر .. علشان متكلمش نفسك و الناس تقول إتجننت .. أو تخلق شخصية من خيالك تعيش معاها و تعزلك عن العالم ويقولو عليك براوي ... يبقى الحل إنك تفضفض .. اللى تقدر تتحمله خليه جواك .. و اللى متقدرش عليه .. ويفيض بيه قلبك و عقلك .. وزّعه على اللى حواليك ... هنا مش مجرد كلام و حكايات ... كل رسالة هي فيض من ( فيوض القلب والخاطر ) ....... أنا / صابرين أبوعلي

الاثنين، 2 أبريل، 2012

// حـــــيــــاهـ مـــوازيـــــه //

دخل عالمها ...استأذنها... تعرف عليها
تقاربا وشعرا بالسكن والموده
أحبته....أحبها
عشقته......عشقها
تقدم لخطبتها .... فتوسلت إليه أن يتمسك بها كى لا تطيرها الفرحه
تزوجها.....فغمرتها السعاده و ردتها إليه أضعافاً مضاعفه
ناقشها كثيراً حول الألوان والأشياء قبل أن يكون لهما منزلاً
اسكنها بيته وأسكنته قلبها
منحته روحها
ومنحها أطفالهم وإنتقى معها أسماءهم بعد جدال طويل
واشترى لهم - بصحبتها- ملابسهم وألعابهم وأدويتهم و.......
مزقهما بكاءهم وأطربتهما ضحكاتهم :)
ادخلاهم الروضة ...والمدرسه....والجامعه
لم يجبرا أحد على شئ...فلكل منهم ما يحب ويتمنى
هكذا اتفقا على تريبتهم من قبل أن يولدوا
كبر الأبناء ....تخرجوا....أحبوا ...
لم ينكروا على أبنائهم متعة الحب الحلال....فليحبوا كما أحببنا
تزوجوا و انجبوا ..
صار "هو....." جداً "، وأصبحت "هى" ....جده...
ولازالت تداعبه وتثير غيظه بكلماتها......أهناك جد يحمل مثل أسمك؟؟!!
اسم لا يحمله حتى الأحفاد...أضعت وقار الجد باســــمٍ صغير كهذا
كانت تغمر رأسه فى صدرها وتحتويه فى حزنه
وتلجأ إليه تستكين بين ذراعيه فى لحظات ألمها
مرت الأيام والشهور والسنوات......................
استوطن الثلج الابيض شعرها
ومازالت هذه المرأه
^
^
^
^
^
^
وحيده
لم يمسسها بشر ،،،ولم تنجب طفلاً واحداً !!!!
فكل عطاياه لها كانت مبعث آمالها
أحيتها أحاديث هاتف في لحظات حبٍ عابره
وصوراً سرى بها إليها خيالها
مـــحـــض حـــلــــم
لا هي أمسكته يوماً بيدها ..... ولا رأته ولو لساعةٍ واقعاَ أمام عينيها
ولا عززه هـــو ولو بوعودٍ واهيه

صدقت قولهم.....لو بطلنا نحلم نموت
فلم يحذرها أحد من الحلم
صدقت وآمنت حتى أيقنت أن الأحلام قد تقتل أصحابها عندما لا تتحقق
فاللاحلم يقتل والحلم كذلك يقتل
ولازالت تغلق عينيها على صورةٍ فى داخلها،،، صورة "له" مع أطفالهم
تعلم أنها إذا فتحتها لن ترى ما تتمناه ويسعدها
وتعلم أنها ستراه ماضٍ فى طريقه ،،، مستمراً فى حياته
وربما لن يرد على باله للحظه أن يتوقف وينظر إلى ما ترك خلفه.

...."هى" لا تلومه، ولا تحمله ذنباً لا طاقة له به؛؛؛ فعندما اختلقت عالمها الموازى ورسمت صورته بداخلها " كانت " بكامل إرادتها وقواها العقليه
وكلُ نفسٍ بما كسبت رهينه

الاثنين، 9 مايو، 2011

مين هيمد ايديه؟؟

احتمال حضراتكم متعرفوش انى بشتغل فى وظيفتين بعيدتين تماماً عن بعض واوقات بيبقوا 3 وظايف

منهم وظيفه رااااااااااااااائعه لسه يادوب مستلماها من 3 شهور بس لكن بعشقها واتمنى تكون مهمتى ورسالتى الوحيده فى الحياه...التدريس

والله العظيم اللى يعرف قيمة العمل ده ما هيفرط فيه ابداً مهما شاف منه تعب او معاناه او قلة تقدير من المحيطين،، متخيل مدى تأثير المدرس فى تلاميذه؟؟ وعلى مدار كام شهر او سنه؟؟؟

دى "اخطر واهم" مهنه موجوده فى اى بلد...مهنة غسيل المخ وبناء الشخصيات

انت بتروح للدكتور كام مره فى السنه؟؟؟ تعرف اصلاً ان فيه ناس ممكن تتولد وتعيش وتموت من غير ما ربنا يحوجها للدكتور؟؟؟

ومعظم المهن بالشكل ده،، حاجتنا اليها مش مستمره ووجود اصحابها غالباً مش مؤثرين فى حياتنا ولا فارق معانا، لكن شوف كام مدرس ومُدرسه كانوا السبب فى بناء او تحطيم عقول وشخصيات

مهاتير محمد صانع مايزيا الجديده ومفجر طاقاتها البشريه اول ما بدأ ركز على "التعليم" فى مراحله الأولى، من اول "الكتاتيب" والابتدائى ،، حط اساسات متينه يتبنى عليها بلد بحق وحقيق

أحد أهم قادة اليابان فى الحرب العالميه التانيه وبعد الهزيمه واستسلام بلاده توجه الى "تعليم الاطفال" علشان عارف ان البدايه من هناك...من الاساس،، واعتقد انى مش محتاجه اتكلم عن اوضاع وأحوال ماليزيا واليابان فى 50-60 سنه وصلوا لإيه

احنا كمان لو عاوزين يبقالنا وجود مميز فى العالم ده لازم نبدأ بالتعليم، من كام سنه لما تطوعت فى فصول محو الأميه اتخنقت من الاحباطات، فعلاً كل اللى حواليك يسخروا منك ويستهينوا بيك ويقللوا من اى مجهود بتعمله لحد ما تحبط وترفع الرايه البيضا وانت بتبكى من القهر،، تحس انك بتجرى فى سباق "لوحدك" ومفيش حد تنافسه ومع ذلك بتبذل كل جهدك وإن شاء الله هتفوز بس....كل الجمهور بيقولك "تبقا قابلنى لو فلحت"...ليه؟؟ مع ان كل مقومات الفوز موجوده؟؟ هى كده...احباطات وخلاص

المهم ربنا اكرمنى وجالى شغل الحكومه وبقيت مدرسة انجليزى اعدادى زى الفل...وقلت ربنا كريم، هبتدى من هناك ونقول يا رب

لقيتلكم بقا "الحكومه والمناهج" متحالفين ضدى، مستلمه الشغل متأخر والمنهج محدش قال فيه كلمه، والولاد مكبرين دماغهم والإداره شغاله "ترقيع" علشان المركب تمشى، والاجازات على ودنه،، مبيونوش،، كل شهر يومين تلاته اجازه دا غير اليومين الاجازه الاسبوعيه (جمعه وسبت) علشان تخرب اكتر

الحكومه ريحت نفسها و "لغت" تلت المنهج...ونعم الحلول،، قصدى ونعم الهروب وترييح الدماااااااغ،، بلا تعليم بلا بتاع،، كانوا اللى اتعلموا واخدوا شهادات فلحوا يعنى؟؟؟

بيقولوا ان من بين كل 10 أشخاص فى العالم العربى تلاقى: 1 يعمل و 2 يشكرونه على عمله و3 يشككون في نواياه و4 يرددون له يومياً:..... مفيش فايدة !!!!

حاجه تضحك صح؟؟ بس انا لو ضحكت هيبقا علشان امسك نفسى ومعيطش من الخيبه...بضحك عشان مبكيش

اعتبر نفسك بقا واحد واقف مع 9 غيرك علشان تكملوا الـ10 واختارلك دور، يا صاحب العمل او الفكره، يا اما اللى بيكتفى بالمشاهده والتشجيع من بعيد لبعيد،يا المشككين واصحاب النوايا السيئه يا إما من المُحبِطِين اللى يغيظوا....حزب مفيش فايد

ولقيت نفسى محطوطه فى وسط (العشره) يا اعمل حاجه يا اكتفى بالصمت يا اتوجه للإحباط وزيى زى غيرى،،، اشمعنا انا اللى هشيل الهم يعنى؟؟

بس بجد معرفتش والله،، استحرمت، ولقيتنى هزعل من نفسى لو معرفتش استغل الفرصه دى،، العمر بيجرى ولازم ألحق اعمل حاجه،، اعلم أنا فى الدنيا بدل ما تعلم هى عليا

مـــــــشــــــــــروعــــــــــــى

معرفتش انام لحد ما وصلت لــ"مشروع" كويس من حوالى اسبوعين،،، رتبت افكاره وتانى يوم طلعت بيه على المدير والناظر وربنا كرمنى بوجود ناس من الإداره التعليميه فى المدرسه علشان يحضروا الموقف

جمدت قلبى وبدأت اتكلم:" يافندم انا عندى مشروع واتمنى ان المدرسه تدعمنى فيه ومش عاوزه ولا مليم، ولو محتاجين منى فلوس والله مستعده؛ الموضوع بإختصار انى عاوزه اعمل منهج تعليمى متكامل فى كل المواد وكمان يتخلله سلوكيات وقيم وتوعيه عامه، ونقدم المنهج ده للطلبه والطالبات فى فترة الاجازه الصيفيه، مش اجبار ولا بالعافيه،، اللى عاوز ييجى اهلاً وسهلاً واللى مش عاوز هو حر،، الضعيف هنقويه ونديله حاجات مخصوص تنفعه فى دراسته،، والشاطر هنقف جنبه ونشجعه علشان ما يفتر حماسه،، يوم واحد كل اسبوع فيه كل المواد وفيه نشاط رياضى وورشه فنيه وكمبيوتر ،، وكمان نرشحلهم كتب للقراءه ونناقشهم فيها، ثقافه عامه،، نوسع مداركهم وننمى الوعى عندهم، من اول سلوكياتهم مع بعض ومع الكبار لحد اخلاقيتهم ودينهم ومعلوماتهم، دا غير ان المناهج عندنا بتكمل بعضها ومناهج السنه الجايه مش هتراعى المنهج اللى اتحذف السنه دى وهيكملوا ولا كأن حاجه حصلت، يبقا نجيب الولاد ونشرحلهم اللى اتلغى كمان ونتقى الله فيهم" طبعاً الاول سمعت كلمتين تحبيط وتيئيس،،من نعو (دول ما بيصدقوا المدرسه تخلص، محدش جاى ولا سائل فيكى، هتبقى لوحدك علشان بقية المدرسين مش فاضيين)....بس ربنا كرمنى بواحد من الموجهين اتحمس وقالى :"هايل، جزاكى الله خيراً واحنا معاكى وابتدى الشغل وجمعى المتطوعين،وهنجيبلك الموافقه من الاداره"

والحمدلله لقيت زمايلى متحمسين ،،حتى المتذبذب منهم ان شاء الله لما يلاقينا ابتدينا هيغير مننا وينضم لينا،، والولاد كمان متحمسين اوى، وربنا رزقنى بـ"زميلين" فى منتهى النشاط والروعه،كل يوم يضيفوا جديد للمشروع. حتى لو فكرت انى اتراجع هلاقيهم بيدفعونى اكمل،، المشروع بقا مشروعهم اصلاً،،ربنا يجازيهم كل خير ان شاء الله

هنمد ايدينا لبعض ونكمل ونساعد بعض، لو مديت ايدك انت كمان محدش هيكسفك وهتلاقى الكل مادد ايديه ليك...اطمن؛؛؛ معدش فيه حد بقا بيجرى لوحده ولا بيحارب طواحين الهوا

المهم...الفكره كبرت فى دماغى وبقول نطورها وتبقا نظام "قوافل تعليميه" يعنى نفس فريق العمل ننتقل كل يوم لمدرسه شكل فى منطقه تانيه، يعنى فى مدرستنا يوم وفى مدرسة البلد اللى جنبنا يوم تانى وهكذا من مدرسه لمدرسه، تعليم "دليفرى" ... هنعمل ايه اكتر من كدا بقا؟؟

والجميل فى الموضوع ان "المناهج حره" ومتنوعه، هنضيف مصادر ونزود معلومات وحكايات وتطبيقات،ومفيش واجبات منزليه ولا امتحانات، انت بتتعلم علشان عاوز تتعلم مش علشان تحفظ وتصب اللى حفظته يوم الامتحان فى ورقة الاجابه وخلاص على كده

ويا سلاااااااااام بقا لو الناس تطاوعنا وربنا يهديهم والكبار كمان ييجو ونعمل قسم لمحو الأميه وتعليم الكبار....ياااااا رب

لـــــــى عـــنـــدكـــم رجــــــاء...اعرضوا الفكره وانشروها بينكم وبين بعض،، اللى يقدر يتطوع يتفضل،، والمدرسين والمدرسات ميكسلوش،، سد ودانك عن اى تريقه او سخريه

فكر ان اجرك على الله وان اللى بتعمله ده علشان خاطر البلد الغلبانه دى،، التغيير عمره ما كان من الشارع ولا من النُظُم، دا من انفسنا

"ان الله لا يغير ما بقوم حتى يغيروا ما بأنفسهم"

"يأيها اللذين آمنوا عـــلــيـكــم أنـــفــســـكــــم لا يضركم مَن ضل إذا اهتديتم"

يللا نبتدى نعمل حاجه ونتحرك بدل ما احنا مقضيينها كلام وبس ومش عاجبنا حاجه ولا حد

مد إيدك وبلاش كسل من فضلك، مهما كانت مهنتك او تخصصك ،، حاول تلاقى وقت وتعمل عمل تطوعى ومش هتلاقى احسن من التعليم تخدم فيه وبيه

سيدنا محمد عليه الصلاة والسلام قال :" خيركم مَن تعلم العلم وعلمه"،، متحرمش نفسك من المتعه دى

أرجوك.....اتحرك

ويا ريت الموضوع ينتشر فى كل بلدنا العربيه مش مصر بس...ياااااا ري

أنا اخترت دورى من الـ(10) وقررت اكون اللى بيعمل وصاحب الفكره،، لو الدور كبير عليا هكبرله غن شاء الله،، المهم انى مش هنزل لدور المقطماتيه ومكسرين المجادين واللتاتين وبتوع...مفيش فايده ربنا يكفينا شرهم

ربنا بيساعد إللى "عاوزين" يساعدوا أنفسهم

صابرين أبو على

ودى صفحتى للتواصل والمشاركه والافكار الجديده

http://www.facebook.com/Sabrina.Abu.Ali.wonderland

الأربعاء، 20 أبريل، 2011

اجدعنى ولا خليكى حافيه -.-.-.-.-.-.-.--.


فيه ناس بتقول دُرر وناس بتقول ضَرر
والفرق كبييييييييييييير أوى
بين الصدق والكدب
بين الاشاعات والحقايق
ومع ذلك تلاقى الاشاعات تنتشر بسرعه مكوكيه، ولو عملوا عليها تجربه هيلاقوها أسرع من الصوت والضوء وضرورى يلاقولها وحده زمنيه أقل من الفيمتو ثانيه علشان يقيسوا سرعة انتشارها بيها

الحقيقه بقا بتاخد راحتها عاللآااااااااااااااااااااخر، على أقل من مهلها
واحده واحده
سلاحفية الحركه ،خاملة المفعول ولازملها عوامل حفازه كتير علشان ربنا ينفخ فى صورتها وتبين كرامات
فيه مثل كدا بيتقال ووالله ما كدب....جاب م الآخر

" الإشاعه تلف العالم قبل أن ترتدى الحقيقه حذاءها"

تلاقى الاشاعه "تفوط تنط" ،كيفما اتفق، لابسه مش لابسه، بجزمه ولا بشبشب ولا حتى حافيه....المهم تجرى تنتشر عالناس وتبُخ سمومها فى الآذان

الحقيقه بقا...واخده بالها من نفسها حبتين وبتحب "الحفلطه"، تلبس وتتهندم وتدور على أحلى جزمه تلبسها ومش بعيد تكون جزمه برباط علشان تطلع عنينا زياده فى انتظار طلتها علينا وخروجها للنور بالسلامه

!!!ليه؟؟؟

مع ان الاولى بالحقيقه انها تكون "الأسرع" فى الحركه والانتشار علشان ميحصلناش بلاوى وكوارث من ورا الاشاعات والكدب

تعرفوا....بيتهيألى ان "الاشاعه" مش بتدقق فى اللبس ولا الجزمه علشان "دايماً" بتلاقى إللى يسترها ويحتويها وكمان يشيلها على كفوف الراحه ينقلها من مكان لمكان من آذان لآذان
دا غير ان مفيش حد بيحقق ويدقق فيها أوى
يبقا هتلبس جزمه ليه إذا كان مش هتدوس على الارض أصلاً؟؟؟!!! ربنا يخلى المتطوعين وفاعلى الخير
خربوها وعملوا الواجب وزياده

على العكس؛ تلاقى "الحقيقه" لابسه ومستوره وييجى اللى يتعمد يعريها ويشكك الناس فيها، تبقا تعبانه من طول المشوار وايديها توجعها من التخبيط واللف من دار لدار، ومهما استغاثت وقالت إلحقونى وساعدونى...ولا حد بيعبرها
كله يسد ودانه....الحقيقه دايماً متعبه ومزعجه وبتجيب صداااااااااع

يبقا بلاها احسن

للأسف....محدش فينا فاضى يساعد الحقيقه، سيبينها لحالها
ولو فضلت بالشكل ده....يبقا ربنا يعوض علينا فى أى خبر صادق ممكن نسمعه بعد كدا

حلها الوحيد انها تساعد نفسها وتحذو حذو الاشاعه - حلوه "حذو" دى جايه من حذاء باين؟؟ :)- يعنى "متدققش" أوى ومتحبكهاش على نفسها
تنجز

تتجدعن وتهم كدا فى حركتها يا إما تلبس أى حاجه فى رجلها ولا حتى تمشى حافيه، هتتعود مع الوقت، المهم انها تلحق وقتها قبل ما تروح عليها، ولا توصل متأخره وتكون الاشاعه "ملت" الأسماع والعقول ومعدش فيها مكان لكلمة حق واحده

ولا اقولكم....لو اعرف عنوانها كنت بعتلها "ماما" تروح معاها أى مشوار، وتفضل تقولها "يللا يللا" وتشخط فيها تتحرك لحد ما تكمل لبسها عالسلم
:(

بجد والله العظيم....اتخنقت
ومعدتش فاهمه حاجه خالص بجد...قال يعنى كنت فاهمه قبل كده؟

بطلت جرايد وتليفزيون ومعدش بكلم حد ولا بتناقش مع حد، وبروح شغلى "الشغلتين" متأخره وبخرج منهم جرىىىىىىىى؛ علشان محدش يلاقينى فاضيه ويوقف يسمعنى دُرره وضرره ولو انها بقت كلها "ضرر" الايام دى

للمره الـ11 هفكركم وافكر نفسى ؛قال رسول الله صلى الله عليه وسلم :" كفى بالمرء كذباً أن يحدث بكل ما سمع" الكلام ده على كل المستويات
عام وخاص، سياسى واجتماعى

ياما كلام واشاعات خربت بيوت وجابت دولفها ، ولا كأن حد قال او عمل حاجه
عااااااااااااادى خالص

يا هووووووووووووووووه...فلتقل خيراً أو لتصمت
خنقتونا يافندم

sabrina

الأربعاء، 30 مارس، 2011

الحزم هو قمة الإرضاء




عندنا مثل بيقول "إللى عاوز تحيرُه...خيَّرُه" ودا اكيد، كل ما تعددت الإختيارات زادت الحيره وزاد التشتت

وأظن كلنا جربنا الحكايه دى قبل كدا فى مواقف حياتيه كتير

مبدأ تانى بقا جاب م الآخر وقالك ايه؟؟
"الحزم هو قمة الإرضاء"

ودا حقيقى "غالباً" لما بتاخد قرارات حازمه فى مواقف مهمه كأنك قطعت عِرق وسيحت دمه وخلصت
علشان وجع القلب والحوارات والمناهده

زيك مع اطفالك فى البيت، لو قلت كلمه ورجعت فيها هياخدوا على كدا ويستهزوا بيك، لكن لو قلت الكلمه وحمرتلهم عينك وزغرت فيهم وتوجت دا كله بالتطبيق....هتمشيهم عالعجين ميلخبطوهوش، وهيشوفوا مصلحتهم بجد

للأسف انا مضطره اقول الكلام اللى جاى ده...حقيقه ولازم نواجهها

إيديلوجيتنا كشعب بتمنحنا صفات كتيييييييييير تخلينا ننتمى للفصيله الأولى عند جداره...اللى تحيره خيره
لما بنلاقى خيارات كتير بنستهبل ونسوق فيها

شوف عزومات الأوبن بوفيه وانت تصدقنى....عاوزين من كله ومش مهم اللخبطه ولا الذوق ولا فارق معاك طعم

اعزم ولادك عالغدا برا البيت وقولهم "تحبوا نروح فين؟" ولا "نتغدى ايه؟" أراهنك لو ما رجعتوا البيت من غير غدا ولا فُسحه ويمكن حتى متخرجوش م البيت بالكل

لـــــكــــن لو من وانت فى البيت حددت وجهتكم وقولتلهم "هناكل كذا" والله لتستمتعوا بأحلى خروجه علشان مرتبه ومخطط لها

شوفوا من يوم اللى حصل فى مصر واتفتح الباب للأحزاب اتأسس كااااام حزب؟؟ والجاى اكتر

هتتشتت الافكار والتوجهات والصراعات، ليه الكل ميتفقش على "فكر معين واتجاه عام"؟؟؟ حتى نختصر الاحزاب شويه علشان منتهوش فيها والبلد تتوه معانا

وبكره يبقا فيه حزب لكل أسره، وبردو هيطلع فيهم اللى ينشق عن اسرته ويشتم عيلته
:(

امريكا ولا انجلترا فيها كام حزب؟؟؟ اتنين رئيسيين فقط، يا كدا يا كدا
وألمانيا ودولة الكيان الصهيونى وكتير من دول أوروبا او حتى كلها يا دوب حزبين تلاته، خيارات محدوده وفكر محدد واضح علشان يبنى مش يهد ولا يصارع وخلاص

وجايلك انتخابات الرئاسه والفُرجه هتبقا للرُكَب

الخوف اننا نكون داخلين على مرحلة خساره اكبر، الشعب يخسر الجيش والجيش يتخنق من الشعب

زى اتنين متواجهين كل واحد بيزؤ "بيدفع" من اتجاهه ضد الاخر، دا يزؤ ودا يزؤ والنتيجه ....محلك سر، يا إما واحد فيهم يتهور عالتانى علشان يفتحله سكه...يا رب ما نحط أنفسنا فى الموقف ده،، شوفوا جيش ليبيا واليمن ولبنان زمان وغيرهم بيعملوا ايه وعملوا ايه؟؟

أنا مع القوات المسلحه فى كل تصرفاتها، بل بالعكس نفسى يكونوا "أكثر حزماً" معانا كشعب علشان الأمور تترتب ، نصلح من نفسنا وأفكارنا ونعدل حال بلادنا بقا

علشان "تربى" ابنك لاااااازم تكون حازم معاه من وقت للتانى ولو حكمت ...تخوفه منك

بقت هوجه وفوضى ، وللأسف التاريخ هيقول بعدين ان ما حدث فى مصر كان "ثوره بالصُدفه" بدون تخطيط ولا أهداف ولا قائد، كل حاجه كانت بتطلع مع الوقت ، وليدة اللحظه والموقف، ومطالب النهارده غير بكره وكل يوم واحد يدَّعى القياده وانه "من شباب التحرير" و...و...و.... ربنا يستر

قريتوا تاريخ الصين؟؟؟

منتهى الحزم...منتهى الانجاز

الزعيم علم الشعب الأدب ورباهم وبقوا اكبر قوه اقتصاديه وبشريه فى العالم

قالهم "مفيش تسطيح على القطارات واللى هيسطح هينضرب بالنار" الناس سطحت، وقف الجيش عالكبارى واللى يشوفوه عامل كدا طاااخ مات وخلصوا من همجيته

قالهم مفيش نزول للترع والمصارف لمدة 24 ساعه علشان نقضى عالبلهارسيا...ووقف الجيش على كل مصارف الميه اللى ينزل يقتلوه ويخلصوا من قرفه

طلع المثقفين والعلمانيين فى ميدان السلام السماوى، قولهم احنا بلد بتاعة انتاج وشغل مش احتاجات واللى هيطلع هفتح عليه النار، مسمعوش الكلام وطلعوا...وراح الجيش خلص عليهم

والنتيجه...ممثل الصين فى دافوس وقف امام الدول الصناعيه الكبرى وقالهم بمنتهى الثقه" بقالنا سنين بنسمع وانتم بتتكلموا الآن حان دورنا لنتكلم وانتم تسمعوا" رجاااااااااااااااااااله

احنا بقا بنضغط عالجيش ، ونستفزه وهنضغط زياده لحد ما........تنفجر العمليه كلها
والجيش لو اتصرف بشكل غير متوقع تحت الضغط ده يبقا معاه حق
للأسف مضطرين

الناس لازم تعقل،،، والجيش لازم يكون حازم وشديد أكتر من كده علشان الناس تتلم...عيب كده

والله بقيت بخاف من يوم الجمعه، بكره يطلع للمصريين مرض نفسى اسمه "جمعه فوبيا" من كتر اللى شوفناه وهنشوفه فيها....دعوتى المعتاده يــــــــــــــا رب استر وجنبنا الخلاف والفتنه
علشان نعمر مصر ونبنيها

عارفه انى هتشتم وهتبهدل، ودا هيؤكد اننا لسه لم ننضج ديمقراطياً وثقافياً وهيؤكد كل حرف كتبته زمان ودلوأت

لازم نربى أنفسنا الأول لو عاوزين نتغير بجد
وزى ما بيقولوا...الأدب فضلوه على العلم

صابرين أبو على
http://www.facebook.com/Elma5tobeen.ahom.in.love.evenaftermarriage

http://www.facebook.com/Happenedonthisday

الخميس، 10 فبراير، 2011

جملها وكملها وزينها بالستر والعقل والأمن يا رب ومن غير ولا نقطة دم

ليس لها من دون الله كاشفه

مش قلتلكم امبارح خلاص اعتبروه مشى؟
أهو ماشى
مش مهم انه يمشى المهم ايه اللى بعد ما يمشى
الأهم لم يأتِ بعد...يا ترا هنطلع رجاله نحط ايدنا فى ايد بعض نعمر ونصلح ونكون على مستوى المسؤليه ولا هنفرج علينا العالم زى غيرنا؟
هنتلم بسرعه ولا هنبقا عقد لولى وانفرطت حباته؟؟
اللى فى التحرير هيرجعوا بيوتهم ويرحموا البلد ولا هيلاقوا اسباب جديده علشان يفضلوا قاعدين هناك؟؟
هنسيب الحكومه تشوف شغلها ولا هنقولها تمشى هى كمان ؟؟
هنتحول للحكم العسكرى ونمشى بأحكام عرفيه زى ما بيقولوا ولا هنتجاوز الازمه بسرعه؟؟
تهديد امريكا بإرسال سفن عسكريه لحماية قناة السويس هنوقفهم عند حدهم ولا هيمشوا كلامهم علينا؟؟
هنقدر نعترض اصلاًُ لو كل دوله لها مصلحه بعتت سفينه على اعتبار ان قناة السويس أرض
دوليه؟؟
الخوف وإحنا بنودع الرئيس مبارك نكون بنودع معاه حاجات كتيره أوى مكناش واخدين بالنا منا
انا عارفه ان ربنا سبحانه وتعالى هو اللى بيحمى مصر ثم جيشها وأهلها كمان بيحموها
بس الخوف من ان كل واحد "يتلهى" عن دوره الاساسى ونسيبها تضيع لا قدر الله

سامحونى..انا خايفه وكلى برتعش من الرعب والعياط
مصر وأهلها رايحين لفين؟
؟

يا رب بعد ما يمشى الناس تهدا وميحصلش اشتباك بين الناس والناس ولا بين الجيش والناس ولا نتحط فى موقف صعب

ونسيب الحكومه تحل الأزمه وتحتويها بالعقل وخصوصاً ان فيهم ناس كتير أهل للثقه وبيحاول ينقذوا البلد بجد

الوزاره فى ظروفها دى بالظبط زى واحد قالوله عندك امتحان مفاجئ حالاً فى كل المواد ومن غير مراجعه ولما ودوه اللجنه يمتحن لقى جنبه سوق ومولد ومدرسه ابتدائى وقت الفسحه ومع ذلك مطلوب منه يجاوب كل الاسئله وفى دقايق مع ان الامتحان محتاج ساعات

ربنا يستر ان شاء الله

ربنا يكفينا شر الفتنه والانقسام ياااااااااااااا رب
وشر الاحكام العسكريه وشر البلطجيه والمخربين وما يكتب علينا فوضى ولا انفلات امنى او فراغ دستورى
ربنا يهدى الناس يا رب

ادعوا ربنا من قلوبكم واتقوا الله علشان يجعل لنا مخرجاً وفرجاً قريباً
ليس لها من دون الله كاشفه

صابرين أبو على

سابقاً sabrina abu ali

ربنا يفرجها ان شاء الله

ومتنسوش...كان الله فى عون العبد مادام العبد فى عون اخيه

تحياتنا للجميع وتمنياتنا ليكم بأسعد حياه واجمل حب يدوم طول العمر ياااااا رب واللى جاى يبقا احسن من اللى فات

you can contact us:

راسلونا ،ابعتولنا مشاكلكم ومشاركاتكم...وضيفونا

elma5tobeen_ahom_facebook@hotmail.com

http://www.facebook.com/elmakhtobeen.ahom

لو مواضيعنا عجبتك ولقيتها تستحق من فضلك اعمل شير للصفحه واعزم صحابك عندنا



هيبقا مقلب تمام ولا الخلاص؟؟

السلام عليكم

أما يبقا مقلب يا جماعه لو الرئيس مبارك عملها فينا ومات وهو فى رحلة العلاج اللى بيقولوا رايحها فى ألمانيا دى؟؟

مش عارفه وقتها هيبقا مقلب للكل ولا هيبقا الخلاص علشان يريح الكل؟؟

هيبقا ضحك عالكل،سواء إللى عاوزينه أو إللى مش عاوزينه

وكمان هتتعمله جنازه عسكريه وبما اننا شعب عاطفى وكمان حرام الشماته فى الموت فهتلاقى ناس كتييييييييير طلعت تشيع الجنازه واحتمال يعيطوا ويصوتوا كمان


والناس اللى عاوزينه يتحاسب ويتحاكم كدا هيبقا نفد منهم وراح للمحاكمه الأعظم بين يدى الله عز وجل

وفى ناس هيصعب عليها العشره واحتمال تنهار :)

بس المشهد اللى هستبعده موت وهستنكره علينا ان حد يطلع يضحك ويحتفل او يشمت

احنا مش أندال واكيد عندنا اصل ودين واخلاق وكمان مؤدبين ومتربيين وأخلاقنا عاليه ومش هنشتم ولا نسب حد لأن كلنا اتربينا عالحديث النبوى الشريف" ليس المسلم بطعَّان ولا لعَان ولا فاحش ولا بذئ" الحمد لله لا نقول ولا نعمل حاجه بذيئه

اعتقد ان اى انسان مهما بلغ جبروته وقوته لما يحس بالرفض والإهانه بتموت حاجات كتير جواه او هو نفسه بيتكسر ويموت وزى ما بيقولوا....الضرب فى الميت حرام

خلاص....النهايه قربت

اعتبروه مشى

المهم الناس تلحق ترتب اوراقها ويظبطوا حالهم وإللى عاوز يترشح للرئاسه يجهز برنامجه اللى هيعرضه علينا علشان ما نقعد كتير فى فراغ دستورى وفوضى والوزاره الحاليه "تركز" شويه فى شغلها بدل التشتيت ده

لبنان سبقتنا وقعدت ييجى سنه من غير رئيس وكل ما البرلمان يحدد جلسة اختيار يجيلهم تليفون من "برا" او زياره"عاجله" تخليهم يفركشو القعده

وتونس لحد النهارده مش معمرلها حكومه ولا بانلها رئيس ولا حتى فى الأفق البعيد

ونجيب ميقاتى رغم توليه منصبه من ييجى اسبوعين إلا انه مش عارف يشكل "حكومه" لحد النهارده وامبارح فى الاخبار بيقول "نأمل" انها تتشكل خلال الايام القادمه


ومجلس الحكماء اللى كونوه عندنا فى مصر "انقسم" لأربع مجالس بآراء ووجهات نظر مختلفه،شويه مع عمرو موسى وشويه مع زويل وشويه مع محمد سليم العوا وشويا مع نفسهم .....و ربنا يستر

دا غير ان احزابنا كلها "اتعرت" وبانت عوراتها وبجد والله ولا اى حد منهم ينفع،دول اتخانقوا مع نفسهم يا جماعه!!!!يبقا هيقطعونا احنا بقا

اما بقا السياسيين الاقباط انقلبوا على البابا والكنيسه وطلع أ/ أمين اسكندر عالهوا مباشرةً وقال بالحرف" نرجو من الكنيسه عدم التدخل فى السياسه وتركها لنا ولا نريد من الثالوث المقدس إلا مباركتنا فــــقــــط" مش بقولكوا ...ربنا يستر

تعالو بقا على "مجلس النواب الشعبى" بتاع اسامه الغزالى وجورج اسحاق فدا حتى لسه مخترش رئيس لنفسه يبقا هيختار رئيس للبلد؟؟؟

عمر سليمان وزويل...ممتنعين والحمد لله

البرادعى "بيستهبل" وبيقول (مادامت الناس عاوزانى فأنا هاجى على نفسى واترشح)؛كالعاده بيتكلم بنفس التعالى وكأنه بيمن علينا لمجرد وجوده فى مصر مش مختفى برا،مع انى اكاد اجزم ان مفيش حد طايقه غير الهتيفه اللى حواليه

دا غرق العراق بجبنه وسكوته علشان يجددوله التعيين فى منصبه كرئيس لهيئة الطاقه الدوليه يبقا هيعمل فينا ايه؟؟


معرفش ليه كنت حاسه ان وجود رئيس ولو حتى شكلياً وانتقال السُلطه فى وجوده كان بمثابة "تُقيلة ورق" اللى بنحطها عالمكتب وعلى اوراقنا علشان ما تتطير وتختلط ببعضها

ملهاش أى اهميه ولا لازمه غير انها بتمنع الفوضى واختلاط الأوراق

ممكن التُقيله دى تكون اى حاجه... تمثال رخام او كريستال او حتى "زلطه" من الشارع بس اهى موجوده وخلاص لترتيب الأمور

لو مش موجوده مع حالة الأبواب والشبابيك المفتوحه علينا من كل اتجاه دى يبقا اكيد كل الاوراق هتطير وتتلخبط وبعضها هيضيع، وممكن استعين بـ"دباسه"او فتاحة جوابات او طفاية سجاير او قلم او مقص او كوبايه او اى حاجه موجوده على المكتب علشان اثبت بيها الورق وما يطير بس هبقا بعطل العمل الاساسى للأشياء اللى استعنت بيها دى؛؛؛ فاهمين أنا قصدى إيه؟



كل حاجه لها دورها واللى يقوم بدورين مش هينجز فى ولا واحد منهم

يعنى افرض انا حطيت الدباسه عالورق علشان ميطرش وجيت احتجتلها ادبس ورق هيحصل ايه؟؟؟

لخبطه تانى....لحد ما ربنا يحلها ويدبرها من عنده

يا خوفى لبعد فتره طالت ولا قصرت نحس كلنا أو معظمنا بحراره وسخونه طالعه من "قفا" كل واحد فينا وخمس صوابع وكف معلمين عليه والبصمات لمجهول

:) :(

والله أنا ما بقيت عارفه أنا عاوزه ايه وايه الصح من الغلط؟؟!!!! نخلى "تُقيلة الورق" ولا نمشيها؟؟ تموت ولا ندعيلها ربنا ينفخ فى صورتها لأجل مسمى عنده؟؟


الحال هيبقا إزاى لو مشى سواءأو مات؟؟

الناس بتوعنا هيرتبوا الأمور ويحتووا الموقف ولا هيفرجوا علينا الناس ويضحكوهم ويشمتوا فينا الأعادى أكتر واكتر؟؟؟

هتتعمل انتخابات رئاسيه مبكره ولا هتستنى فى ميعادها لآخر السنه؟؟؟

طب لو اتعملت هتبقا هى الاول ولا انتخابات مجلسى الشعب والشورى؟؟؟

إحنا "كشعب" هنطلع رجاله وأد الموقف ولا كل يوم والتانى هنلم بعض عالميدان ونطلع نغير وزير او نُسقط حكومه علشان فيها واحد شكله مش عاجبنا؟؟؟

الثوره اللى قامت علشان الحريه والديمقراطيه والفقرا والغلابه....هتحقق اهدافها "بيننا وبين بعض" ولا هنفضل منسمعش لبعض ونتقاذف التُهم أمثال عميل وخاين وجبان وغبى وساذج؟

ولا "نوهب" لبعض الألقاب أمثال بطل وشهيد وشجاع مع ان فى كل الحالات سواء سلب او ايجاب.... العلم عند الله وحده عالم السرائر والنفوس،حتى اللى يموت فى ارض المعركه ومع الاعداء لا يجوز انك تقول عليه شهيد ولكن بنقول..."نحتسبه عند الله شهيد" والله حسيبه


الفقرا والغلابه هيزدادوا فقراً وغلباً ولا هيشدوا حيلهم شويه؟؟ ربنا يستر مع تدهور الاوضاع وقلة الدخل القومى وعدد السفن الماره فى قناة السويس قل من عشرات او حتى مئات السفن يومياً الى 37 سفينه يومياً

التغيير مش "بزراير" ولا أمر إلهى "كُن فيكون" والتغيير "الأهم" لسه محصلش، اللى اتغير دا كله فى (المظهر مش الجوهر) ربنا قال"حتى يغيروا ما بأنفسهم" وقال "عليكم أنفسكم" يا ترى مستوعبين الكلام والإرشاده منه؟؟

يا ترى هنغير أنفسنا ونلتزم ويطلعلنا ضماير حيه ونتكاتف ونتكافل وكل واحد يتقى الله فى حياته وعمله ومعاملته مع الناس ولا بعد الهوجه هترجع ريما لعادتها القديمه الدميمه الذميمه؟؟

أقسملكم بالله العظيم تلاته لو ما اتغيرنا وصلحنا من أحوالنا لنتقهقر أكتر من كدا عشرات السنين ويرجعلنا نفس الظلم والفساد والمره دى ممكن اللى بعدنا يستنوا 60 سنه للتغيير مش بس 30 سنه

سيدنا محمد عليه الصلاة والسلام قال :" كيفما تكونوا يُوَّل عليكم" يعنى لو عاوز يحكمك صالح أصلح من نفسك أولاً



ارجع واقول....ربنا يستر وصدمتنا متبقاش كبيره ومشاهد غيرنا تتكرر عندنا زى ما حصل لحد دلوأت، مفيش غير أننا نأمل ونتعشم فى ربنا خير ونحسن الظن بيه ونقول..... يا رب

الحقايق والوقائع كلها مش هتتضح ولا هتبان غير يوم القيامه لما نقف كلنا نتحاسب ونختصم عند الملك مالك الملك

ووقتها هنعرف مين كان الصح ومين الغلط؟ مين حب البلد دى وحماها وخاف عليها ومن بهلدها وكشف سترها؟؟

دم إللى راحوا دول فى رقبة مين؟؟؟ الظالم ولا المظلوم؟؟

صدق الله العظيم لما قال انه يوم ب70.000 سنه مما تعدون

يوم طويل طويل طويل وكله هيتحاسب بالخردله واقل والمستخبى هيبان

كله يخاف على نفسه بقا ويستعد

ربنا يستر

Best regards,

صابرين أبو على

سابقاً sabrina abu ali

ربنا يفرجها ان شاء الله

ومتنسوش...كان الله فى عون العبد مادام العبد فى عون اخيه

تحياتنا للجميع وتمنياتنا ليكم بأسعد حياه واجمل حب يدوم طول العمر ياااااا رب واللى جاى يبقا احسن من اللى فات

you can contact us:

راسلونا ،ابعتولنا مشاكلكم ومشاركاتكم...وضيفونا

elma5tobeen_ahom_facebook@hotmail.com

http://www.facebook.com/elmakhtobeen.ahom

لو مواضيعنا عجبتك ولقيتها تستحق من فضلك اعمل شير للصفحه واعزم صحابك عندنا


الاثنين، 24 يناير، 2011

يا خوفى عليكى يا حبيبتى


السلام عليكم اعزائى
اسمحولى انى اقول كلمه محشوره فى حلقى وممكن يجرالى حاجه لو مقولتهاش

"أنا اكره القطيع "

ومش حابه اننا كشعب نكون "قطيع" نقلد تقليد اعمى وخلاص
قطيع البقر او اى نوع حيوانات لو واحده فيهم وطت اخدت حاجه من الارض كله بيوطى حتى لو مفيش حاجه تاخدها ولو اللى ماشى اول القطيع ضل طريقه محدش بيصححله المسار وكله بيمشى وراه حتى لو لحافة الهاويه

ربنا يستر

انا مش ضد اننا نطالب بحقوقنا ونغير واقعنا البشع،بس بالأدب والاحترام وبدون اساءه لبلدنا ولا لبعض...عيب

مين صاحب المصلحه فى تشويه ذكرى يوم رائع زى ده؟؟؟؟؟؟؟!!!!! من صاحب المصلحه ان الشرطه "تتلهى" فى فض اشتباكات عشوائيه ويروحوا هم ينفذولهم كام عمليه ارهابيه من اشباه حادثة اسكندريه؟؟؟ ليه التوقيت ده بالذات؟؟
مش احتمال ان العناصر الارهابيه اللى عملت الجريمه دى تكون لسه متربصه بينا علشان تعمل مصيبه اكتر؟؟؟ دا اكيد مش احتمال
اكبر دليل على اننا فى مصر والعالم العربى بنتبع سياسة القطيع هو المثل اللى بيقول

"اسأل مجرب ولا تسأل طبيب"!!!!!

يعنى افرض انت عندك نفس الاعراض اللى عند واحد تانى جارك او صاحبك فى بلدك او فى بلد تانى معقوله بدل ما تروح لدكتور يكتبلك الدوا هتسأل صاحبك وتاخد نفس العلاج؟؟
اللى شفاه ممكن يقتلك او يسببلك مضاعفات
من اول ما شفت اللى حصل فى تونس اتأكدت "انهم" هيحاولوا يقلدوه هنا
مع العلم اننا مش زى غيرنا-كامل احترامى لتونس ولكل بلد عربى- لكن فعلاً وضعنا مختلف
فى حال الناس وحال السياسه داخلياً وخارجياً

لو النظام عندنا اتهز نص ساعه بس الله اعلم ايه اللى ممكن ينتهز الفرصه وينط علينا

انا مش بحب الفاضيح ولا بحب نشهر بأنفسنا، الحقايق كلنا عارفينها ومفيش حد فينا عبيط ولا اعمى ولا جاهل بس ساكتين وعايشين وخلاص
وكمان مش بحب الطبالين والمشعللاتيه واللى بيتاجروا بهموم الغلابه ويمصلحوا من وراهم

احنا يوم ما هنتحرك هيكون علشان فعلاً ضاق بينا مش تقليد لحد ولا ثوره والسلام الله اعلم توصلنا لفين؟؟؟؟؟؟؟
اللى "نازلين" بكره دول نازلين ليه وهيعملوا ايه؟؟؟

عاوزين تغيروا؟؟ كام واحد فيكم راح ادى صوته فى الانتخابات للى يستحقه؟؟
مش دى كانت فرصه ايجابيه للتغيير؟؟
محدش يقولى تزوير علشان دايرتى اللى نجحوا فيها كلهم مستقلين وبتوع الحزب سقطوا من اول مره ودا لتالت مره...علشان احنا عاوزين كده

مصر مينفعهاش انقلاب ولا كلام من ده علشان خطورة الموقف.....مصر عاوزه الشئ ده اللى بيسموه
"الإنتقال الآمن للسُلطه"

وبرضا جميع الاطراف علشان منديش فرصه لحد يتدخل ولا يتنطط علينا
لو اللى خرجوا بكره اندس فى وسطهم ناس همج ولا مجرمين كسروا وحرقوا وخربوا ايه هيكون حال البلد؟؟؟
خراب وضحايا وربنا يستر
هننبسط لما الشرطه والجيش يمسكوا فى بعض واحنا نضيع فى النص؟؟؟؟؟
ولا احتمال الشرطه والجيش يبقوا فى جبهه واحنا فى جبهه ومصر تتقلب لساحة حرب اهليه
والله العظيم حرام عليكم يللى بتشعللوها
اتقوا الله فى البلد الغلبانه دى

عاوز تغير وتصلح...ابدأ بنفسك وغيرها للأحسن
سيدنا محمد عليه الصلاة والسلام بيقول" كيفما تكونوا يوَّل عليكم" لولا ان احنا اصبحنا قوم سوء والله ما كان جالنا حاكم سئ يسقينا الظلم والمر
كل اللى بيجرالنا مما كسبت ايدينا
كلمة حق جت على بالى وفى ضميرى يمكن تقنع حد يغير موقفه وما يشعل عود كبريت ممكن يحرقنا كلنا
خوفى عليكى يا مصر يكون خرابك على ايد ولادك اللى بيحبوكى بس مش عارفين يحبوكى ازاى

ربنا يستر ويعدى اليوم ده على خير

على فكره...لاحظتوا ان الشرطه احتفلت بعيدها بدرى 3 ايام عن موعده والرئيس اجتمع بيهم بدرى؟؟؟ علشان فى "اليوم الموعود" 25 يناير يكون كله فاضى وواخد موقعه
مين حدد اليوم والتاريخ دول بالذات؟؟؟ قصده يشوه ذكرى جميله وعظيمه مرت فى تاريخ مصر؟؟؟

خايفه اقول ان لو حصلت مصادمات هتكون التعليمات.....ياقاتل يا مقتول

اما بقا الساده اصحاب الشعارات بتاعة انزل ومتدمرش ومتخربش فأحب اقول لحضراتكم ان المجرمين والبلطجيه مش بيدخلوا نت ولا فيس بوك علشان يقروا الشعارات دى
اللى شيطانه هيقدره على حاجه هيعملها
خايفه اخبار مساء الغد تصدمنا بإقتحام "مجهولين" لبعض المنازل والمصالح الحكوميه لتدميرها ونهبها

انا نفسى نتغير للأفضل، بس واحنا محترمين ومن غير خراب
كان عندى مشوار فى القاهره يوم الخميس ومع ذلك اعتذرت عنه "من الخوف" متخيل يعنى ايه محسش بالأمان وانا فى بلدى بعد ما كنت بخرج وبسافر براحتى؟؟؟؟؟؟؟؟؟
لو ضاع الأمان هنخسر حاجات كتير

مش عاوزه اشوف مشاهد الخراب والعنف اللى فى نشرات الاخبار حيه على ارض بلدى
اسألوا اهل العراق وغزه والناس فى لبنان وقت الحرب الاهليه عن معنى الأمان وانتو تفهمونى
ربنا سبحانه وتعالى لما اتكلم عن مصر ربطها بالأمان واللجوء اليها
سواء مع سيدنا موسى او اهل سيدنا يوسف او حماية سيدنا عيسى فيها
بلد الأماااااااااااااااااااااا
اااان يا ناس
ليه نضيعه بإيدينا؟؟؟

هنتغير بس بألف طريقه غير دى....من غير همجيه ولا ايد خفيه تحركنا

ربنا يستر ويعديها على خير ان شاء الله
يشرفنى زيارتكم لصفحاتى على الفيس بوك


ربنا يحفظ بلدنا ودماءنا وما يخلع عننا ثوب الستر والأمان
يااااااااا رب
Sabrina Abu Ali