بييجي وقت لازم تسكت فيه , وعقلك يقولك ( خليها فى القلب تجرح , بدل ما تبان و تفضح ) .. و أوقات تحس إنك لازم تتكلم .. مش قادر تكتم و تخبي .. وإلا هتنفجر .. علشان متكلمش نفسك و الناس تقول إتجننت .. أو تخلق شخصية من خيالك تعيش معاها و تعزلك عن العالم ويقولو عليك براوي ... يبقى الحل إنك تفضفض .. اللى تقدر تتحمله خليه جواك .. و اللى متقدرش عليه .. ويفيض بيه قلبك و عقلك .. وزّعه على اللى حواليك ... هنا مش مجرد كلام و حكايات ... كل رسالة هي فيض من ( فيوض القلب والخاطر ) ....... أنا / صابرين أبوعلي

الثلاثاء، 23 مارس، 2010

أنـــــا كــــده ودا لــــــــونــى

كتير لما بكتب بكتب لنفسى،مجرد أوراق و"مبعثرات" هنا وهناك
وغالباً مش بحب أبعتها ولا أزعج القارئ بيها؛لأنى أحياناً كتير بقرا حاجات وبعد ما أخلصها بقول لنفسى "وأنا مالى، دى حاله خاصه وما تهمنى" علشان كدا بفكر وبتردد كتير قبل ما ابعتلكم حاجه علشان ما تزعجكم منى
بس بردو بحب أشارككم حاجات بحس بيها، بحبها أو بكرهها،بتضايقنى أو بتفرحنى،يمكن يكون فى حد يشاركنى نفس الإحساس ويفرحه إنى اتكلم عنه
وبعد ما شفت إعلانات مشروب السخافه "أنا كده وداعبطى...قصدى ستايلى" قلت مجتش عليا بقا،حتى مش هنطلكوا زى عفريت العلبه فى الفواصل من الشاشه منكوشه ولا بصرخ ولا حد بيؤولك..مُدَرسه مُدَرسه مًُدرِسااااااااااااه
*********
من أكتر الحاجات إللى بتشدنى وتفرحنى وتخلينى فى منتهى البهجه والسعاده هى "الألوان" إللى بتدى معنى ووجود للحياه وتنطقها
كل الألوان وأى ألوان، مبعرفش أمسك نفسى أؤودامها، ويوم ما جاتلى شنطة ألوان كامله" خشب وفلوماستر وشمع وميه" كنت هتجنن من السعاده وكل شويه أروح افتح الشنطه اتفرج عليها مع انى كنت كبيره ومتخرجه من الكليه بس عقل عيال بعيد عنكم،ولسه "بتنح" أؤودام الألوان لحد النهارده وما بعرف أقاومها وعندى أكوام منها
بعشقها فى كل حاجه حواليا،من أصغر حاجه ممكن تكون فى إيدك ولحد اكبر شئ ممكن تشوفه عنيك
وبشتريها واشترى دفاتر تلوين واخبيها بعيد عن العيال علشان ميلعبوش معايا بيها

وبحب الناس إللى بتلبس ألوان مبهجه وبفرح باللوحات والرسم وحتى الشخبطه،وبستنى شم النسيم علشان اسهر ألون البيض واصحى بدرى علشان اكمله
وصلت بى درجة الهوس لهاجس مرعب إنى فى يوم من الأيام-لا قدر الله- مش هشوف ولا هستمتع بالألوان....هتعمى
دايماً الحكايه دى مخوفانى،والله أوقات أصحى من النوم وافضل مغمضه عيونى وأقوم واتحرك فى الأوده والبيت واجرب اتعرف على الحاجات باللمس أو الإحساس
وكتير بجرب اقعد فى الضلمه واتعود عليها، بتكون حياه هاديه ومريحه من غير إزعاج ولا مشاهد تؤلمك
بس بردو رعب وكآبه،بيخلونى عاوزه أملا عيونى بصور كل حاجه وأشوف ألوان على قد ما أقدر واقرا كل كتاب تطوله إيدى
هو أنا مخى قرب يضرب ولا إيه؟
نغير الموضوع ونرجع للألوان.....حبى الطفولى
أكيد فى حب "عام" وحب "خاص"،وزى ما فى حد مميز فى حياتك أكيد بردو فى لون بيشدك عن غيره، وكل ما تيجى تشترى حاجه تسأل ان كانت متوفره باللون إللى بتحبه ولا لأ

وحبيبى المميز بقا هو اللون "الأزرق"....بحبه بعشقه وأموت فيه بكل درجاته وخلطاته،من أول اللبنى السماوى الفاتح واللازوردى والكحلى"الروعه" والزهرى"المذهل" و لحد التركواز الساحر(ازرق مخلوط بأخضر)تحفه
أهو هو دا بقا
مش عارفه بحبه ليه؟؟! جايز علشان بيتدرج من منتهى الهدوء لقمة الجنون ومن قمة البهجه إلى قاع الكآبه؟؟!
وجايز علشان لون"متسلط ومسيطر" بيحاصرنا فى كل حاجه بمنتهى الشياكه والرقه والذوق
بيفرض نفسه علينا وبنستقبله ونستمتع بيه كأعز زائر وصاحب بيت مش حد فارض نفسه عليك

لون متورطين فيه بشكل لذيذ وناعم أوى؛من أول حصاره لينا بكبرياء فى السما والبحر ولحد إنحصاره فى عيون زرقا لشخص غريب غصب عننا تجذبنا وكتير نبتسم لها
الأزرق لون التناقضات والمشاعر المتقلبه، كتير يسحرنا بوجوده الهادى البرئ وياما بيزعجنا بثوراته وهياجه،أحياناً معاك وأحياناً عليك
الأخصائيين النفسيين بينصحوا ان تكون فى أوده على الأقل لونها أزرق فى البيت علشان بتهدأ الأعصاب وتفك التوتر والضغط وبتخلى الشخص فى حالة هدوء وإرتياح نفسى، حتى لو لك مزاج تتخانق مش هتتخانق
وأنا بكتب الموضوع ده عملت بحث على فوائد اللون الأزرق فى حياتنا، علشام ميبقاش كلامى كله بلا معنى ويمكن تستفيدوا منه شويه
لقيت إن اللون الأزرق بيُنصَح بيه فى ديكور العيادات والمستشفيات وبعض غرف المنازل زى النوم والليفينج والمكتبه وأود الأطفال وكمان الحمامات،بس أودة السفره الأحسن تكون لون نارى أو من درجات البرتقالى علشان تفتح النفس
كمان اللون الأزرق بيساعد على تخليق مواد كيميائيه فى الجسم تحسسه بالإسترخاء وينام بسرعه
كمان بيزيد القدره على الإبداع،ويوصى بيه فى ديكور الشركات والمكاتب لأنه بيزيد من طاقة الموظفين فى العمل!!!!مش قلتلكم لون متناقض؛إزاى استرخاء وإزاى طاقه زياده؟؟!! سبحان الله فى إبداع خلقه وكونه
وكمان فى صالات الرياضه علشان بيزود النشاط العضلى للجسم، والأغرب بقا انه بيُستخدَم فى علاج الإدمان وخلل الأكل والإكتئاب
سبحان الله فى خلقه بجد، تخيلوا علاج طبيعى حوالينا فى كل حته،أرض وبحر وسما، متخيلين لو السما كانت اخضر مثلاً والبحر أحمر أو بنى...يا ستيير يا رب،الحمدلله رب العالمين

ربنا بيحبنا والله وعاوز سعادتنا...بس إحنا إللى بنحب الكآبه
وفى نصيحه تقولك لو رايح اجتماع أو عندك مقابلة عمل إلبس بدله زرقاء - كحلى لأنها توحى بالثقه
الأجمل بقا إن معظم الأحجار الكريمه لونها أزرق(فيروز، لازورد،توباز،زفير،أكوامارين، جشمت)، ناس كتير تفتكرنى بحبها علشان تمنع الحسد والكلام العجيب ده لكنى والله بحبها وبقتنيها علشان فعلاً جذابه وفى منتهى الروعه
وعرفت دلوقت إن لها تأثير إيجابى على إللى بيلبسها،وبتمتص المشاعر السلبيه وبتخلق نوع من التوازن العاطفى،وتقلل الخوف والتوتر والاكتئاب ودا ثابت فى نوع علاج اسمه" العلاج بالأحجار الكريمه" وثابت كمان فى الإبتسامه إللى وجعتلى عضلات وشى ومش راضيه تريحنى شويه حتى وأنا زعلانه
والأحجار الزرقا كانوا بيستخدموها زمان لطرد ومنع الأرواح الشريره



احتمال ده بسبب فكر موجود عند الناس يربط اللون الأزرق "لون السما" بكل ما هو روحانى
ملاحظين كمان إن مهن كتيره مرتبطه باللون الأزرق؟ زى البحريه والبوليس وبعض فرق القوات المسلحه والطيارين وحتى الأفرول بتاع العمال والبيريهات والكابات وغيرها حاجات كتير بتحتل اللون الأزرق وكل درجاته وتتحلى وتتميز بيه...لون جبااااااااار بجد
حتى الطبقه الأرستقراطيه والملكيه فى أوروبا بيسموهم
blue blood
لأنهم من كتر الرفاهيه والتربيه فى قصوره تحجبها الشمس كانت بشراتهم شفافه ونقيه لدرجه تبين عروقهم الزرقا، يعنى دا لون ملكى مأصل

والقمر المكتمل الساحر فى تمامه لما يبقا بدر فى أوقات معينه فى السنه الشمسيه
بيسموه
blue moon
وبيستخدموه كمسطلح للحاجات الساحره والكامله والمستحيله
مش بقولكم بعشقه، إياك ربنا يوعدنى بمحلل نفسى دلوأت يقولى شكلك بتحبى السُلطه والهيمنه مش مجرد حب وإرتياح للون وإيحاءاته النفسيه بالسلام والهدوء
وتعرفوا كمان ان واحده من أِشيك غرف العالم واشهرها
واكثرها أناقه فى البيت الأبيض هى
the blue room
ودى صوره جانبيه منها
وفى كل الحالات الأزرق بكل درجاته وألوانه فعلاً جذاب ولما ييجى مع أى لون تانى بيميزه ويوضحه ويبرز جماله،الموضه كل سنه لا تخلو من اللون الأزرق، سواء الساده او بتدريجات ألوانه أو بيطعم لون تانى
فاكرين الفتره إللى ساد فيها الأزرق والاصفر؟ خليط من الطبيعه، كأنهم الصحرا والسما أو البحر ورمل الشط أو حتى الصحرا والبحر...تناغم رائع فى كل الحالات وهارمونى تنسجم معاها بمنتهى السلاسه
الأزرق مع البُنى كمان مهووول، وفضلنا فتره كانت أزياء البنات لا تخلو من التركواز المطعم بالبُنى
أما بقا الأزرق والأخضر فدول حبيبين واجتمعوا ولكم أن تتخيلوا سحرهم، بياخد من العقل،ولا ينافسنى فى حبى اللون الأزرق غير اللون الأخضر والبنفسج بدرجاتهم....رووووووووووووعه
والأزرق والروز كمان هايلين مع بعض،ومع الأبيض والأحمر
سبحان الله العلى العظيم
لحاف يفتح النفس ويجيب الاحلام الحلوه
ويا سلام عليه مع الأسود، منتهى الغموض والرجوله والقوه،فاكرين ملابس فرسان المائده المستديره
فى فيلم first knight بتاع شون كونرى وجولى اورموند وريتشارد جير
رهيييييييييييييييييييييبه،حاجه تليق بفرسان بجد

أنا لو فضلت أقولكم عن حبى وعشقى للأزرق والأخضر والبنفسج هتتعبوا وانا كمان هتعب،بس الازرق بفوايده الطبيه والنفسيه يستاهل إنه يتعرف وتقع فى غرامه زى حالاتى
يقولوا بقا لون هادى ولا هايج،لطيف ولا متقلب، ناعم ولا خشن، واضح أو غامض، مبهج ولا حزين، متفائل ولا كئيب....مش مهم، المهم ان دا "لونى" وبحبه بكل متناقضاته
مصحفى أزرق ومدونتى زرقا والفيس بوك أزرق وصفحات إميلاتى والسما والبحر وصوابعى فى البرد وهدوم النونوهات الولاد
أنا كدا ودا لونى.....منفسنه منفسنه منفسناااااااااااااااااااه
الحاجه الغريبه بقا إنى "لا أجرؤ" على اقتناء أى شئ أزرق إلا بعد معركه جدليه حاميه مع مامتى إللى ما بتطيق الأزق وبتعتبره لون كئيب ومش بناتى على الإطلاق ،ولو جبت حاجه زرقا لازم أخبيها لفتره وامهدلها عند ماما قبل ما اخرج عليها بيها وأنا بدعى فى سرى...استر يا رب
أحلى واشيك من الريد كاربت بتاعة الاوسكار مليون مره
شوفتو أزهى عصور الديمقراطيه إللى بنتمتع وبنعيش فيها؟؟!!! حتى ألوان هدومى مقدرش اختارها لوحدى،ولو اخترتها لازم افكر فى رد الفعل المنتظرنى بسببها
ولازلت أعشق الألوان وأهيم فى بهجتها وفرحتها وشقاوتها ووقارها ولمساتها إللى بتدى لحياتنا معنى ووجود،وعلى رأسها الملك وساعديه

الأزرق والأخضر والبنفسج...حد عنده اعتراض؟؟
ودى شوية حاجات زرقا بموووت فيها ،يمكن تعجبكم وتبهجكم


مش قولتلكم انه لون ساااااااحر
BMW اوعدنا يااااا رب
شياكه وأناقه
ركزوا فى عمق اللون وبس
لون ملوكىودا بقا طقم بدرجات التركواز جمعته وصورته ومتأكده إنه هيعجب كل البنات وممكن جيب بدل البنتاكور والاكسسوار البنى بينطقه جداً
أتمنى أكون حببتكم زياده فى اللون الأزرق علشان تكونوا معايا "جبهه" ضد ماما ونقنعها بيه أو على الاقل متحسسنيش بالذنب كل ما اجيب حاجه زرقا
دمتم بكل خير وراحه وهدوء وسعاده وثقه وقوه و...م الآخر دمتم أزرق
واوعوا حد يفهمنى غلط ومتزعلش من إللى يقول لحد يومك أزرق
ههههههههههه،ربنا يستر
Sabrina Abu Ali

الثلاثاء، 16 مارس، 2010

أموت واعرف مين؟؟؟؟؟؟؟

حلو أوى كده...هنبتدى المشوار، وامريكا لازم تقوم بالدور،ان مكنش بشكل سياسى مُعلَن فبشكل إعلامى مُبطَن وكله بيصب فى نفس البلاعه ليه صحيفه زى الواشنطن بوست تنزل مقال زى ده؟ هم مالهم، وهينفعنا بإيه ترحيبهم بدور د/ البرادعى من حياتنا من عدمه، بيحبولنا المصلحه أوى ولا هدفهم يزرعوا فى نفوسنا الشك من ناحية الراجل لما نلاقي أمريكا بتحبه او بتأيده؟؟!!؟
ليه ترحب بدور البردعى؟علشان لو الطلقه صابت وبقا رئيس يبقا حبيب امريكا وداعى الديمقراطيه، ولو عيارهم مصبش يبقا هيدوشنا شويه بأنهم يحشروا نفسهم فى إللى ملهمش فيه ويشككونا ولو شويه فى إن اللى بيحصل ده سيناريو مصرى بحوار امريكا، يعنى يا جماعه واحد يضرب والتانى يلاقى،ومش بعيد مربطينها مع بعض دا غير انهم "همشوا" دور القوى الشعبيه والحزبيه فى مصر بدرجه بينتنا أطفال قُصَر مستنيين حد ييجى ياخد بإيدينا، وقال ايه البرادعى حشد كل قوى المعارضه "خلفه" بما فيهم الاخوان وأيمن نور!!!ه
هو فين دكتور البرادعى أصلاً علشان تتحشد خلفه القوات!!!!!!!!!!!!؟
واقروا كمان الجمله المستفزه موووووووووووت دى من مقال الصحيفه :"وأضافت أن وزارة الخارجية الأمريكية صاغت بشكل حذر بيانا الشهر الجاري عن الوضع في مصر قالت فيه إنها "ترغب في رؤية صعود عملية سياسية أكثر شمولا في مصر" لكن هذه في النهاية "قرارات يجب أن تقوم مصر باتخاذها" هه
يا حرااااام...امريكا نفسها يا عينى ان مصر تشوف موقف سياسى متفاعل متكامل فى مصر،اصلنا لسه "نوغه" فى السياسه وماشيين تاتا تاتا،وفى النهايه يا جماعه إحنا جايين "نهدى النفوس"والقرار فى الأول والآخر قرار مصرى بحت وإحنا ملناااش دعوه،انتوا أحرار....طبعاً أحرار يا....ولا بلاش،خلينا احنا عندنا أصل
واضحكوا معايا على دى كمان.." وقالت الصحيفة في افتتاحيتها الاثنين تحت عنوان "فرصة مصر في التغيير" إن البرادعي "أطلق فورة من الجنون في مصر بمجرد الإشارة إلى أنه ربما يكون مهتما بالترشح لمنصب الرئيس في انتخابات حرية وعادلة" بالله عليكم ايه الدور الفعال الملموس للبرادعى؟
لقاء فى العاشره مساء؟؟ وندوه"مصغره" مع بعض المثقفين وهم إللى دعوه ليها،مع انه ممكن يعمل كتير، من أول حوارات الجرايد والقنوات ولحد مقالات خاصه بيه توضح رؤيته وبرنامجه، ودعوته لعقد مؤتمرات حزبيه او التقدم بطلب رسمى لتغيير مواد الدستور مع كل مَن يهمه الأمر من اصحاب السلطه السياسيه والحضور الشعبى فى البلد...إللى عاوز بيتصرف ويتهور أحياناً
وبعدين البرادعى "لم يطالب" بتغيير مواد الدستور، الراجل لسه بيتكلم "على إستحياء" ويادوب بيستشير الحكومه ان كانت هتغيرها ولا لأ وبعد كدا يشوف ان كان هيتنازل ويقبل التضحيه ويرشح نفسه علشان ينقذنا من الفقر والجوع والمرض دا غير أن د/ البرادعى مش فى مصر أصلاً،رغم اننا فى عز التفاعل السياسى والحزبى فى مصر ومؤتمر "المحاكمه الشعبيه لممارسات الحزب الوطنى" اللى كان من 10 ايام وبجد مفاجأه غير متوقعه سواء من المفكريين أو السياسيين المعارضين أو الأحزاب وان الحزب الوطنى يبعت ممثلين ليه ومحامين عنه علشان ترد على الاتهامات دى رغم ان كان فى ايدهم يتجاهلوه بحجة ان "الظرف مش مناسب" وان الريس وكبير الحزب بيعمل عمليه والراجل تعبان ومش وقته يعنى،نطمن الأول وبعدين نرد محضرش المحاكمه ولا حضر كمان اجتماع حزاب المعارضه وغيرهم اللى كان امبارح لتقديم وثيقه او ورقه رسميه للمطالبه بتغيير مواد الدستور76،77،78 ، الراجل شكله مش مهتم أصلاً،هو بيعمل بأغنية حليم" جئتُ لا اعرف من أين ولكنى أتيت،ثم أبصرت أمامى طريقاً فمشيته"

فكرنى بسمير غانم"مسعودى" فى مسرحية المتزوجون لما "لينا" مراته المرفهه بنت الناس بتقوله" انا حبيتك علشان بطل وانقذتنى لما رميت نفسك فى "البلاعه" ورايا علشان تنقذنى" ،قالها "آه بس لو أعرف مين إللى زقنى؟" أنا كمان هموت وأعرف
سؤال عالماشى......حاجه كمان عاوزه اعرفها بالمره
هو حبكت يعنى الريس يعمل عملية" المراره" دلوأت؟؟؟
وفى ظروف البلد دى والهجوم الفظيع على حكومته وحزبه والفساد إللى ظهر مؤخراً لوزير الإسكان السابق وتجاوزات الحكومه معاه،دا غير الموعد اللى حددته قوات الاحتلال الصهيونى لبناء هيكل سليمان يوم 16 مارس وانتهاك حرم القدس الشريف !!!!!!!!؟
هل دا كان الحل للهروب من المواجهه واعلان رفضنا "الرسمى" للى بيحصل واعتراض مصر الأخت الكبيره المهمه عليه؟؟ وعؤبال ما يرجع بالسلامه تكون خربت مالطه وإللى حصل حصل ومرفعناش حتى دبوس إبره ندافع بيه عن بداية هدم الأقصى الشريف؟؟؟!!!؟
بصوا يا جماعه....أنا ظالمه ومفتريه ونيتى سوده ومحدش ياخد على كلامى، يعنى هو فى حد بيجيب لنفسه المرض؟ دا سيدنا محمد عليه الصلاة والسلام بيقول " لا تمارضوا فتمرضوا فتموتوا" يعنى الريس مش بيفَّوِل على نفسه،هى جت كده...من محاسن الصُدَف، الراجل يا وِلداه مستحملش إللى بنعمله فيه وضغوط جوا وبرا مرارته وجعته مننا، كتر خيره إنه اتحملنا السنين إللى فاتت دى كلها ولسه منفجرتش
ما هو بصراحه إللى بيحصل ده...حاجه تفقع المراره
sabrina abu ali

الجمعة، 5 مارس، 2010

ســـــــــوق الــزوجــات

إترددت كتير وأنا بكتب العنوان وإترددت أكتر علشان أعرضه وأعرض مضمونه عليكوا، كل يللى بعرفهم قالوا إنى"غلط" ومكبره الحكايه؛ بس أنا شايفه إنها فعلاً "كبيره" وضخمه كمان.
عندى أمل إنكوا لما تقروا اللى جاى ده حد فيكوا يأيدنى وإللى يعارضنى يا ريت يقوللى ليه ويقنعنى ويريحنى. ندخل فى الموضوع علشان كل واحد يختار الجبهه إللى ينضم ليها
الحكايه" سوق الزوجات" ودا الإسم الوحيد إللى لقيته مناسب للموقف وفيه لباقه ومش بيجرح ولا يهين ما حبيت استفزكوا بكلمه اكبر من كدامع بداية الصيف وموسم الأجازات والعائدين من الخليج وأجواره بتسبقهم أو بتيجى معاهم ظاهره غريبه وبشعه كمان-دا من وجهة نظرى- وهى إن الأساتذه والباشمهندسين والدكاتره العاملين فى الخارج قبل ما يرجعموا بيكون كل واحد فيهم مكلم مامته أو أخته أو خالته أو حتى الجيران والمعارف يشوفوله "عروسه" حالاً وياريت يكونوا متفقين على كل حاجه علشان هو ييجى "يخلص" ويتجوز على طول فى شهرين الأجازه
.وعلى إعتبار أنه "عريس لؤطه" فتلاقى فرَق البحث انتشرت علشان يلبوله طلبه و"يخدموه" خدمة العُمر.ناس كتير ممكن تقول ان دا "طبيعى وعادى جداً" ،على اعتبار انه معذور فى غربته وان اهله أدرى ببنات البلد ومفيش حاجه لما الأهل (مش الجيران هه) يختاروا لإبنهم ، وأنا كمان معاكوا فى النقطه دى ولعبت الدور دا قبل كدا فى إنى"أوفق راسين فى الحلال" وخصوصاً انى اعرفهم كويس وكنت حلقة الوصل بينهم،،لكن إعتراضى على باقى القصه أو تحريفها وتحولها إلى نسخه مشوهه ومسخ مهين.تلاقى العريس" مكسل" أو"مستخسر" ينزل يخطب ويشوف العروسه، فالأسره تختار وتتفق ويتكلموا بلسان الإبن عن مميزاته الماديه والإجتماعيه المغريه ،والطرف التانى يوافقوا وتيجى "مامة" العريس تلبس العروسه الشبكه ،وتكون كل علاقة البنت بزوج المستقبل "دبله عليها اسمه" و"كلام تليفونات".... كام شهر ويشرف عريس الغفله (والإسم لايق جداً فى الحاله دى) وبسرعه يتجوزوا قبل الأجازه ما تخلص ، وطبعاً الأمرميسلمش من إن الوقت يضيع فى باقى التجهيزات والحجز وبروفات الفستان وبس خلاص...بين يوم وليله بقا اتنين أغراب متجوزين ومطلوب منهم يكونوا اسره صحيه نفسياً واجتماعياً ودينياً مبنيه على "الحب والتعاون والمشاركه والإحترام

وبعد الاجازه ما تخلص يرجع البيه لشغله وممكن يسيب "المدام" حامل وتتلهى هى فى الحمل والولاده لما تسألها فين البيه تقول "سابلى إللى أحسن منه"!!!!!؟
سمعتها بودانى من دكتوره
والشهور تعدى وممكن سنه.. سنه ونص ويشرف البيه فى الأجازه التانيه وبردوا كام اسبوع ويرجع بردوا سايب المدام حامل وتتكرر الدوامه، إيه رأيكوا فى واحده اقسمت انها ما شافت جوزها فى 4 سنين جواز غير 3 شهور واسبوع وعندها ولدين؟؟!!!؟دا يبقا "جواز"؟؟؟ولولا ضيق المكان كنت حطيت مليون علامة استفهام وتعجب
ممكن العريس ياخدها معاه وغالباً لما تروح بتتصدم بالشخص الغريب إللى عايشه معاه فى بيت واحد،،أو حتى ممكن يكون هو المصدوم فى الكائن ده إللى دفع فيه فلوسه واختاروهوله من "سوق الزوجات" أو جوازة النت والتليفونات، خسارة شقاه
الحكايه بدأت جميله وتقليديه شوى وكان الشخص "بيرجع" يخطب ويتعرف على خطيبته وبعد سنه او اكتر او اقل بيتجوزا،، لكن الميزان اتقلب والعرسان اتجننت او ما تعرف جرالها ايه؟ يظهر بيوفروا الهدايا بتاعة الخطوبه ويجيبوا من الآخر،، والبنات كمان اتجننت ورخصت نفسها.الحكايه بقت "سوق عرض وطلب" ،زاد فيه الطمع واللامبالاه ومعاملة كيان حيوى "الأسره" كشئ هامشى عديم القيمه.إللى لاحظته بقا ان الحكايه مش مقتصره على فئه معينه،لااااا..دا فى كل حته
وهوريكوا نماذج؛؛؛؛؛؛؛ صيدلى عاوز يتجوز بالمراسله وهى تروحله بعد ما أهله يختاروها!! دكتور بشرى ما عنده وقت للأجازات وعاوز يتجوز حاالاً!!! مهندس بترول معندهوش أجازات بس "طالبه" معاه جواز!!! محاسب نازل يتجوز فى شهر و18 يوم ودا أول شرط ليه فى العروسه..انها تقبل كدا!! والمدرسيين بقا كتييير وبردوا جايين يتجوزوا "فى السريع" وخلص يا عم فى مستقبل بيضيع هناك...وهنا كمان

يعنى لا إللى بيعرض غبى أو جاهل ولا إللى بيقبل العرض غبى أو محتاج. بس "جوازه والسلام"!!!؟
واحده صحبتى بتقوللى "وفيها ايه؟؟ مشفتيش فيلم "جاى فى السريع"؟؟ ممكن يحبوا بعض بعد كدا وبعدين إنت عاوزه تعرفيه ليه؟؟ انت ساذجه ومتصوره ان الخطوبه بيتعرف الطرفين على بعض؟؟؟!!!بس أنا بقول إن حياتنا مش "فيلم" وانا مش هستنى يمكن تحبه ويمكن ما تحبه،، والمعرفه لازم.
. صحيح مش كله بيبان لكن على الأقل تقدر تستشف بعض حاجات من تصرفاته فى فترة الخطوبه وعلشان هو كمان مايتظلمش.إزاااااااااااااااااااااااااااااااااى؟؟؟؟؟؟؟؟؟؟؟؟؟؟؟؟؟؟؟
إزاى الزوجه "تربى" ابن واحد متعرفهوش؟؟!، هتعلمه أنهى مبادئ؟؟ وهتعلمه إزاى يحب بابا إللى هى اساساً مش بتحبه؟؟ هتقوله عنه إيه وهى متعرفش حاجه؟؟ "الأب" هنا مجرد اسم فى شهادة الميلاد و"ممول" للأسره- أقصد الست وإبنها أو ولادها بعد كدا- يعنى ممكن أى حد يحل محله.وممكن يتركن بسهوله وتنتريه من حياتك
وهى هتعيش إزاى مع حد"غريب" عنها؟
كان عندى فكره ساذجه وعبيطه إن "الأولاد" هم "أبناء الحب والعشره الطيبه
ثمره خرجت من شجره مقدسه فى أرض كلها صلابه وإخلاص ومشاركه وسكينه وإطمئنان.فين كل ده؟؟؟؟؟؟
الزوجه هنا مجرد "وعاء" اشتراه "الممول" بفلوسه ، إتجوز ليه؟؟ يمكن علشان سنه تسمح بالجواز أو خلاص بقا جاهز ويقدر "يصرف" على بيت ،،أو جايز عاوز ورثه يشيلوا اسمه ، والأرجح إن باباه عاوز كدا ومامته عيطت له فى التليفون ، أو كل شباب العيله اتجوزوا والدور عليه وهيبقا شكله وحش وسطهم
.فين البيت (الزوج والزوجه والأولاد) والجدران إللى بتضمهم؟؟ فين الدفا والأمان والسكينه والوحده؟؟ ومعنى الأسره؟؟
منكوا كدا يبقا فيه "إنتماء" لبعض؟؟ يعنى لو الزوج أو الزوجه جرا لهم حاجه ولا هتفرق مع الطرف التانى،، لو حد فيهم إتألم أو اشتكى التانى مش هيحس بيه؟ نموذج الزوجين دول ممكن فى يوم يوحشوا بعض أو يحسوا انهم فعلاً "مفتقدين" بعض والبُعد عامل لهم فراغ؟؟؟؟؟
أنا حاسه إنى "هبله" وبتكلم فى أفلام عربى قديمه ، أحلام خايبه معششه فى عقل قديم.
تعليق سمعته على موقفى خلانى أضحك لدرجة البكاء وبيقول إيه؟؟ :( يا بنتى الجواز ده زى واحد ماشى فى حاله وفجأه "انضرب بالقلم" ميعرفش القلم جاله منين ولا إزاى؟! فى قلم بيوجع بس بيهدا بعد كدا ،وقلم بيدوخك وما تحسى بشئ بعده لفتره طويله وقلم يفضل معلم على وشك وقلم يفوقك على حاجات كتير مكنتيش تعرفى انها موجوده فى الدنيا...انت بقا خُديلك "قلم" واخلصى...بدل ما تفضلى متوقعه انه يجيلك من أى حته وعايشه مرعوبه) دا كلام؟؟إحنا جرا لنا إيه؟؟ إتجننا؟!!الدنيا اتقلبت ولا اتعدلت؟؟
ليه المعايير والمقاييس اتغيرت وبقينا بنعامل "الحياه" بالشكل ده؟؟! إحنا كلنا مرضى؟؟ مرضى فى أخلاقنا وسلوكياتنا وديننا وعقولنا وطريقة تفكيرنا.إزاى بقينا نقبل حاجات مهينه كدا؟؟ إزاى تشترى زوجه ؟ وإنتى إزاى تقبلى تتباعى؟؟ أغرتك الدبله الدهب والمحبس الألماظ والخاتم السوليتير؟؟ وبعد كدا؟؟!"
الجواز لازم يكون مبنى على الحب والإحترام، فلو دبلت وردة الحب هتفضل شجرة الإحترام تضلل على العيله ويتربى فى ظلها الأولاد" لكن لو بالماده يبقا هيجيب غيرك زى ما جابك مادام ظروفه تسمح وانتى مش فارقه معاه
الزواج لازم يكون فيه حب، مش واحد والسلام ولا زواج علشان أى سبب
زواج بحد فارق معاكى وتستحملى علشانه أى حاجه وكل حاجه
الحمد لله..فخوره إنى "بنت" لكن لما واحده تتصرف بالشكل ده بكره نفسى وبقرف من جنسى.
كل حاجه فى البنت "غاليه" عليها وعزيزه أوى وما بتسمح لحد يقرب منها بسهوله،، إزاى بقا هتسلم كل حاجه تملكها لحد غريب ممكن يكون بيفكر فيها من جواه انه "امتلكها" بفلوسه مش بكلمة الله واسمه .بنات كتير مش عاوزه "ممول" يصرف عليها لأنها مش محتاجاله ،لكن محتاجه "حصن" تتحامى فيه ويكون "قدوه" لأولادهم ويستحق كلمة "بابا" بكل معانيها وسلطاتها وكمان يستاهل أنها تضحى علشانهم وتربيهم احسن تربيه ،البنت عاوزه تكتفى بدور "ست البيت" مش "سته وسيده" فى نفس الوقت؟؟
مش هقول حاجه غير إنى بجد "مكبوسه" وأول مره أكتب لكوا من غير ابتسامه أو شعور داخلى بالفكاهه لإستفزازكوا، حاسه إنى مخنوقه وقرفانه من الحال اللى وصلناله فى حاجات كتير.محدش يقول إنى "مش عاجبنى حاجه" وبنقد كل حاجه، أنا عارفه ومتأكده إننا "أُمه" تستحق "الكمال" إللى بعتهولنا ربنا بالفطره "اليوم أكملت لكم دينكم وأتممت عليكم نعمتى ورضيت لكم الإسلام دينناً" ونحن أحق بالكمال الأخلاقى والسلوكىلو حلينا مشاكلنا الشخصيه والإجتماعيه هنبقا "أسوياء" نفسياً وهنتفرغ للعمل والإنجاز ووقتها بس ممكن نتقدم ونوصل للكمال ونخرج من الخندق المعتم ده
تمنياتى ليكم بالسعاده والحب يا رب
sabrina abu ali