بييجي وقت لازم تسكت فيه , وعقلك يقولك ( خليها فى القلب تجرح , بدل ما تبان و تفضح ) .. و أوقات تحس إنك لازم تتكلم .. مش قادر تكتم و تخبي .. وإلا هتنفجر .. علشان متكلمش نفسك و الناس تقول إتجننت .. أو تخلق شخصية من خيالك تعيش معاها و تعزلك عن العالم ويقولو عليك براوي ... يبقى الحل إنك تفضفض .. اللى تقدر تتحمله خليه جواك .. و اللى متقدرش عليه .. ويفيض بيه قلبك و عقلك .. وزّعه على اللى حواليك ... هنا مش مجرد كلام و حكايات ... كل رسالة هي فيض من ( فيوض القلب والخاطر ) ....... أنا / صابرين أبوعلي

الاثنين، ٢٤ يناير ٢٠١١

يا خوفى عليكى يا حبيبتى


السلام عليكم اعزائى
اسمحولى انى اقول كلمه محشوره فى حلقى وممكن يجرالى حاجه لو مقولتهاش

"أنا اكره القطيع "

ومش حابه اننا كشعب نكون "قطيع" نقلد تقليد اعمى وخلاص
قطيع البقر او اى نوع حيوانات لو واحده فيهم وطت اخدت حاجه من الارض كله بيوطى حتى لو مفيش حاجه تاخدها ولو اللى ماشى اول القطيع ضل طريقه محدش بيصححله المسار وكله بيمشى وراه حتى لو لحافة الهاويه

ربنا يستر

انا مش ضد اننا نطالب بحقوقنا ونغير واقعنا البشع،بس بالأدب والاحترام وبدون اساءه لبلدنا ولا لبعض...عيب

مين صاحب المصلحه فى تشويه ذكرى يوم رائع زى ده؟؟؟؟؟؟؟!!!!! من صاحب المصلحه ان الشرطه "تتلهى" فى فض اشتباكات عشوائيه ويروحوا هم ينفذولهم كام عمليه ارهابيه من اشباه حادثة اسكندريه؟؟؟ ليه التوقيت ده بالذات؟؟
مش احتمال ان العناصر الارهابيه اللى عملت الجريمه دى تكون لسه متربصه بينا علشان تعمل مصيبه اكتر؟؟؟ دا اكيد مش احتمال
اكبر دليل على اننا فى مصر والعالم العربى بنتبع سياسة القطيع هو المثل اللى بيقول

"اسأل مجرب ولا تسأل طبيب"!!!!!

يعنى افرض انت عندك نفس الاعراض اللى عند واحد تانى جارك او صاحبك فى بلدك او فى بلد تانى معقوله بدل ما تروح لدكتور يكتبلك الدوا هتسأل صاحبك وتاخد نفس العلاج؟؟
اللى شفاه ممكن يقتلك او يسببلك مضاعفات
من اول ما شفت اللى حصل فى تونس اتأكدت "انهم" هيحاولوا يقلدوه هنا
مع العلم اننا مش زى غيرنا-كامل احترامى لتونس ولكل بلد عربى- لكن فعلاً وضعنا مختلف
فى حال الناس وحال السياسه داخلياً وخارجياً

لو النظام عندنا اتهز نص ساعه بس الله اعلم ايه اللى ممكن ينتهز الفرصه وينط علينا

انا مش بحب الفاضيح ولا بحب نشهر بأنفسنا، الحقايق كلنا عارفينها ومفيش حد فينا عبيط ولا اعمى ولا جاهل بس ساكتين وعايشين وخلاص
وكمان مش بحب الطبالين والمشعللاتيه واللى بيتاجروا بهموم الغلابه ويمصلحوا من وراهم

احنا يوم ما هنتحرك هيكون علشان فعلاً ضاق بينا مش تقليد لحد ولا ثوره والسلام الله اعلم توصلنا لفين؟؟؟؟؟؟؟
اللى "نازلين" بكره دول نازلين ليه وهيعملوا ايه؟؟؟

عاوزين تغيروا؟؟ كام واحد فيكم راح ادى صوته فى الانتخابات للى يستحقه؟؟
مش دى كانت فرصه ايجابيه للتغيير؟؟
محدش يقولى تزوير علشان دايرتى اللى نجحوا فيها كلهم مستقلين وبتوع الحزب سقطوا من اول مره ودا لتالت مره...علشان احنا عاوزين كده

مصر مينفعهاش انقلاب ولا كلام من ده علشان خطورة الموقف.....مصر عاوزه الشئ ده اللى بيسموه
"الإنتقال الآمن للسُلطه"

وبرضا جميع الاطراف علشان منديش فرصه لحد يتدخل ولا يتنطط علينا
لو اللى خرجوا بكره اندس فى وسطهم ناس همج ولا مجرمين كسروا وحرقوا وخربوا ايه هيكون حال البلد؟؟؟
خراب وضحايا وربنا يستر
هننبسط لما الشرطه والجيش يمسكوا فى بعض واحنا نضيع فى النص؟؟؟؟؟
ولا احتمال الشرطه والجيش يبقوا فى جبهه واحنا فى جبهه ومصر تتقلب لساحة حرب اهليه
والله العظيم حرام عليكم يللى بتشعللوها
اتقوا الله فى البلد الغلبانه دى

عاوز تغير وتصلح...ابدأ بنفسك وغيرها للأحسن
سيدنا محمد عليه الصلاة والسلام بيقول" كيفما تكونوا يوَّل عليكم" لولا ان احنا اصبحنا قوم سوء والله ما كان جالنا حاكم سئ يسقينا الظلم والمر
كل اللى بيجرالنا مما كسبت ايدينا
كلمة حق جت على بالى وفى ضميرى يمكن تقنع حد يغير موقفه وما يشعل عود كبريت ممكن يحرقنا كلنا
خوفى عليكى يا مصر يكون خرابك على ايد ولادك اللى بيحبوكى بس مش عارفين يحبوكى ازاى

ربنا يستر ويعدى اليوم ده على خير

على فكره...لاحظتوا ان الشرطه احتفلت بعيدها بدرى 3 ايام عن موعده والرئيس اجتمع بيهم بدرى؟؟؟ علشان فى "اليوم الموعود" 25 يناير يكون كله فاضى وواخد موقعه
مين حدد اليوم والتاريخ دول بالذات؟؟؟ قصده يشوه ذكرى جميله وعظيمه مرت فى تاريخ مصر؟؟؟

خايفه اقول ان لو حصلت مصادمات هتكون التعليمات.....ياقاتل يا مقتول

اما بقا الساده اصحاب الشعارات بتاعة انزل ومتدمرش ومتخربش فأحب اقول لحضراتكم ان المجرمين والبلطجيه مش بيدخلوا نت ولا فيس بوك علشان يقروا الشعارات دى
اللى شيطانه هيقدره على حاجه هيعملها
خايفه اخبار مساء الغد تصدمنا بإقتحام "مجهولين" لبعض المنازل والمصالح الحكوميه لتدميرها ونهبها

انا نفسى نتغير للأفضل، بس واحنا محترمين ومن غير خراب
كان عندى مشوار فى القاهره يوم الخميس ومع ذلك اعتذرت عنه "من الخوف" متخيل يعنى ايه محسش بالأمان وانا فى بلدى بعد ما كنت بخرج وبسافر براحتى؟؟؟؟؟؟؟؟؟
لو ضاع الأمان هنخسر حاجات كتير

مش عاوزه اشوف مشاهد الخراب والعنف اللى فى نشرات الاخبار حيه على ارض بلدى
اسألوا اهل العراق وغزه والناس فى لبنان وقت الحرب الاهليه عن معنى الأمان وانتو تفهمونى
ربنا سبحانه وتعالى لما اتكلم عن مصر ربطها بالأمان واللجوء اليها
سواء مع سيدنا موسى او اهل سيدنا يوسف او حماية سيدنا عيسى فيها
بلد الأماااااااااااااااااااااا
اااان يا ناس
ليه نضيعه بإيدينا؟؟؟

هنتغير بس بألف طريقه غير دى....من غير همجيه ولا ايد خفيه تحركنا

ربنا يستر ويعديها على خير ان شاء الله
يشرفنى زيارتكم لصفحاتى على الفيس بوك


ربنا يحفظ بلدنا ودماءنا وما يخلع عننا ثوب الستر والأمان
يااااااااا رب
Sabrina Abu Ali