ســـــــــوق الــزوجــات

إترددت كتير وأنا بكتب العنوان وإترددت أكتر علشان أعرضه وأعرض مضمونه عليكوا، كل يللى بعرفهم قالوا إنى"غلط" ومكبره الحكايه؛ بس أنا شايفه إنها فعلاً "كبيره" وضخمه كمان.

عندى أمل إنكوا لما تقروا اللى جاى ده حد فيكوا يأيدنى وإللى يعارضنى يا ريت يقوللى ليه ويقنعنى ويريحنى. ندخل فى الموضوع علشان كل واحد يختار الجبهه إللى ينضم ليها

الحكايه" سوق الزوجات" ودا الإسم الوحيد إللى لقيته مناسب للموقف وفيه لباقه ومش بيجرح ولا يهين ما حبيت استفزكوا بكلمه اكبر من كدامع بداية الصيف وموسم الأجازات والعائدين من الخليج وأجواره بتسبقهم أو بتيجى معاهم ظاهره غريبه وبشعه كمان-دا من وجهة نظرى- وهى إن الأساتذه والباشمهندسين والدكاتره العاملين فى الخارج قبل ما يرجعموا بيكون كل واحد فيهم مكلم مامته أو أخته أو خالته أو حتى الجيران والمعارف يشوفوله "عروسه" حالاً وياريت يكونوا متفقين على كل حاجه علشان هو ييجى "يخلص" ويتجوز على طول فى شهرين الأجازه

.وعلى إعتبار أنه "عريس لؤطه" فتلاقى فرَق البحث انتشرت علشان يلبوله طلبه و"يخدموه" خدمة العُمر.ناس كتير ممكن تقول ان دا "طبيعى وعادى جداً" ،على اعتبار انه معذور فى غربته وان اهله أدرى ببنات البلد ومفيش حاجه لما الأهل (مش الجيران هه) يختاروا لإبنهم ، وأنا كمان معاكوا فى النقطه دى ولعبت الدور دا قبل كدا فى إنى"أوفق راسين فى الحلال" وخصوصاً انى اعرفهم كويس وكنت حلقة الوصل بينهم،،لكن إعتراضى على باقى القصه أو تحريفها وتحولها إلى نسخه مشوهه ومسخ مهين.تلاقى العريس" مكسل" أو"مستخسر" ينزل يخطب ويشوف العروسه، فالأسره تختار وتتفق ويتكلموا بلسان الإبن عن مميزاته الماديه والإجتماعيه المغريه ،والطرف التانى يوافقوا وتيجى "مامة" العريس تلبس العروسه الشبكه ،وتكون كل علاقة البنت بزوج المستقبل "دبله عليها اسمه" و"كلام تليفونات".... كام شهر ويشرف عريس الغفله (والإسم لايق جداً فى الحاله دى) وبسرعه يتجوزوا قبل الأجازه ما تخلص ، وطبعاً الأمرميسلمش من إن الوقت يضيع فى باقى التجهيزات والحجز وبروفات الفستان وبس خلاص...بين يوم وليله بقا اتنين أغراب متجوزين ومطلوب منهم يكونوا اسره صحيه نفسياً واجتماعياً ودينياً مبنيه على "الحب والتعاون والمشاركه والإحترام

وبعد الاجازه ما تخلص يرجع البيه لشغله وممكن يسيب "المدام" حامل وتتلهى هى فى الحمل والولاده لما تسألها فين البيه تقول "سابلى إللى أحسن منه"!!!!!؟
سمعتها بودانى من دكتوره
والشهور تعدى وممكن سنه.. سنه ونص ويشرف البيه فى الأجازه التانيه وبردوا كام اسبوع ويرجع بردوا سايب المدام حامل وتتكرر الدوامه، إيه رأيكوا فى واحده اقسمت انها ما شافت جوزها فى 4 سنين جواز غير 3 شهور واسبوع وعندها ولدين؟؟!!!؟دا يبقا "جواز"؟؟؟ولولا ضيق المكان كنت حطيت مليون علامة استفهام وتعجب
ممكن العريس ياخدها معاه وغالباً لما تروح بتتصدم بالشخص الغريب إللى عايشه معاه فى بيت واحد،،أو حتى ممكن يكون هو المصدوم فى الكائن ده إللى دفع فيه فلوسه واختاروهوله من "سوق الزوجات" أو جوازة النت والتليفونات، خسارة شقاه
الحكايه بدأت جميله وتقليديه شوى وكان الشخص "بيرجع" يخطب ويتعرف على خطيبته وبعد سنه او اكتر او اقل بيتجوزا،، لكن الميزان اتقلب والعرسان اتجننت او ما تعرف جرالها ايه؟ يظهر بيوفروا الهدايا بتاعة الخطوبه ويجيبوا من الآخر،، والبنات كمان اتجننت ورخصت نفسها.الحكايه بقت "سوق عرض وطلب" ،زاد فيه الطمع واللامبالاه ومعاملة كيان حيوى "الأسره" كشئ هامشى عديم القيمه.إللى لاحظته بقا ان الحكايه مش مقتصره على فئه معينه،لااااا..دا فى كل حته
وهوريكوا نماذج؛؛؛؛؛؛؛ صيدلى عاوز يتجوز بالمراسله وهى تروحله بعد ما أهله يختاروها!! دكتور بشرى ما عنده وقت للأجازات وعاوز يتجوز حاالاً!!! مهندس بترول معندهوش أجازات بس "طالبه" معاه جواز!!! محاسب نازل يتجوز فى شهر و18 يوم ودا أول شرط ليه فى العروسه..انها تقبل كدا!! والمدرسيين بقا كتييير وبردوا جايين يتجوزوا "فى السريع" وخلص يا عم فى مستقبل بيضيع هناك...وهنا كمان

يعنى لا إللى بيعرض غبى أو جاهل ولا إللى بيقبل العرض غبى أو محتاج. بس "جوازه والسلام"!!!؟

واحده صحبتى بتقوللى "وفيها ايه؟؟ مشفتيش فيلم "جاى فى السريع"؟؟ ممكن يحبوا بعض بعد كدا وبعدين إنت عاوزه تعرفيه ليه؟؟ انت ساذجه ومتصوره ان الخطوبه بيتعرف الطرفين على بعض؟؟؟!!!بس أنا بقول إن حياتنا مش "فيلم" وانا مش هستنى يمكن تحبه ويمكن ما تحبه،، والمعرفه لازم.

. صحيح مش كله بيبان لكن على الأقل تقدر تستشف بعض حاجات من تصرفاته فى فترة الخطوبه وعلشان هو كمان مايتظلمش.إزاااااااااااااااااااااااااااااااااى؟؟؟؟؟؟؟؟؟؟؟؟؟؟؟؟؟؟؟

إزاى الزوجه "تربى" ابن واحد متعرفهوش؟؟!، هتعلمه أنهى مبادئ؟؟ وهتعلمه إزاى يحب بابا إللى هى اساساً مش بتحبه؟؟ هتقوله عنه إيه وهى متعرفش حاجه؟؟ "الأب" هنا مجرد اسم فى شهادة الميلاد و"ممول" للأسره- أقصد الست وإبنها أو ولادها بعد كدا- يعنى ممكن أى حد يحل محله.وممكن يتركن بسهوله وتنتريه من حياتك

وهى هتعيش إزاى مع حد"غريب" عنها؟

كان عندى فكره ساذجه وعبيطه إن "الأولاد" هم "أبناء الحب والعشره الطيبه
ثمره خرجت من شجره مقدسه فى أرض كلها صلابه وإخلاص ومشاركه وسكينه وإطمئنان.فين كل ده؟؟؟؟؟؟
الزوجه هنا مجرد "وعاء" اشتراه "الممول" بفلوسه ، إتجوز ليه؟؟ يمكن علشان سنه تسمح بالجواز أو خلاص بقا جاهز ويقدر "يصرف" على بيت ،،أو جايز عاوز ورثه يشيلوا اسمه ، والأرجح إن باباه عاوز كدا ومامته عيطت له فى التليفون ، أو كل شباب العيله اتجوزوا والدور عليه وهيبقا شكله وحش وسطهم
.فين البيت (الزوج والزوجه والأولاد) والجدران إللى بتضمهم؟؟ فين الدفا والأمان والسكينه والوحده؟؟ ومعنى الأسره؟؟
منكوا كدا يبقا فيه "إنتماء" لبعض؟؟ يعنى لو الزوج أو الزوجه جرا لهم حاجه ولا هتفرق مع الطرف التانى،، لو حد فيهم إتألم أو اشتكى التانى مش هيحس بيه؟ نموذج الزوجين دول ممكن فى يوم يوحشوا بعض أو يحسوا انهم فعلاً "مفتقدين" بعض والبُعد عامل لهم فراغ؟؟؟؟؟
أنا حاسه إنى "هبله" وبتكلم فى أفلام عربى قديمه ، أحلام خايبه معششه فى عقل قديم.
تعليق سمعته على موقفى خلانى أضحك لدرجة البكاء وبيقول إيه؟؟ :( يا بنتى الجواز ده زى واحد ماشى فى حاله وفجأه "انضرب بالقلم" ميعرفش القلم جاله منين ولا إزاى؟! فى قلم بيوجع بس بيهدا بعد كدا ،وقلم بيدوخك وما تحسى بشئ بعده لفتره طويله وقلم يفضل معلم على وشك وقلم يفوقك على حاجات كتير مكنتيش تعرفى انها موجوده فى الدنيا...انت بقا خُديلك "قلم" واخلصى...بدل ما تفضلى متوقعه انه يجيلك من أى حته وعايشه مرعوبه) دا كلام؟؟إحنا جرا لنا إيه؟؟ إتجننا؟!!الدنيا اتقلبت ولا اتعدلت؟؟
ليه المعايير والمقاييس اتغيرت وبقينا بنعامل "الحياه" بالشكل ده؟؟! إحنا كلنا مرضى؟؟ مرضى فى أخلاقنا وسلوكياتنا وديننا وعقولنا وطريقة تفكيرنا.إزاى بقينا نقبل حاجات مهينه كدا؟؟ إزاى تشترى زوجه ؟ وإنتى إزاى تقبلى تتباعى؟؟ أغرتك الدبله الدهب والمحبس الألماظ والخاتم السوليتير؟؟ وبعد كدا؟؟!"
الجواز لازم يكون مبنى على الحب والإحترام، فلو دبلت وردة الحب هتفضل شجرة الإحترام تضلل على العيله ويتربى فى ظلها الأولاد" لكن لو بالماده يبقا هيجيب غيرك زى ما جابك مادام ظروفه تسمح وانتى مش فارقه معاه
الزواج لازم يكون فيه حب، مش واحد والسلام ولا زواج علشان أى سبب
زواج بحد فارق معاكى وتستحملى علشانه أى حاجه وكل حاجه
الحمد لله..فخوره إنى "بنت" لكن لما واحده تتصرف بالشكل ده بكره نفسى وبقرف من جنسى.
كل حاجه فى البنت "غاليه" عليها وعزيزه أوى وما بتسمح لحد يقرب منها بسهوله،، إزاى بقا هتسلم كل حاجه تملكها لحد غريب ممكن يكون بيفكر فيها من جواه انه "امتلكها" بفلوسه مش بكلمة الله واسمه .بنات كتير مش عاوزه "ممول" يصرف عليها لأنها مش محتاجاله ،لكن محتاجه "حصن" تتحامى فيه ويكون "قدوه" لأولادهم ويستحق كلمة "بابا" بكل معانيها وسلطاتها وكمان يستاهل أنها تضحى علشانهم وتربيهم احسن تربيه ،البنت عاوزه تكتفى بدور "ست البيت" مش "سته وسيده" فى نفس الوقت؟؟
مش هقول حاجه غير إنى بجد "مكبوسه" وأول مره أكتب لكوا من غير ابتسامه أو شعور داخلى بالفكاهه لإستفزازكوا، حاسه إنى مخنوقه وقرفانه من الحال اللى وصلناله فى حاجات كتير.محدش يقول إنى "مش عاجبنى حاجه" وبنقد كل حاجه، أنا عارفه ومتأكده إننا "أُمه" تستحق "الكمال" إللى بعتهولنا ربنا بالفطره "اليوم أكملت لكم دينكم وأتممت عليكم نعمتى ورضيت لكم الإسلام دينناً" ونحن أحق بالكمال الأخلاقى والسلوكىلو حلينا مشاكلنا الشخصيه والإجتماعيه هنبقا "أسوياء" نفسياً وهنتفرغ للعمل والإنجاز ووقتها بس ممكن نتقدم ونوصل للكمال ونخرج من الخندق المعتم ده
تمنياتى ليكم بالسعاده والحب يا رب
sabrina abu ali

عزيزه...فى قلوبنا كلنا

عزيزه بنت البلد غاويه إللى يعشق مصر

حلفت تكون للولد إللى يجيب النصر

خُطابها من غير عدد بس إللى ترضى بُه

من ضمنهم فارس، يسلم لنا شبابُه

راجل ومتهندم وزينة أصحابه

عقله بيوزن بلد ولا عمره يخلى بُه

عزيزه قالت "نعم"؛ راجل وهيصونى

أخلاق مروءه وأدب ولاعمره هيخونى

وقت الصعاب فارس، وقت السلام حارس

وقت الكلام سامع، وقت الفِعال مقدام

ينقلنا أنا والبلد 2000 سنه لقُدَّام

عزيزه فرحت وبكيت من قلبها الموجوع

فاقت على مخدتها...مغرقاها الدموع

sabrina abu ali

مش عارفين نحلم؟؟؟!؟

مش أول مره أشوف أو اسمع أو اقرا لقاء أو حوار مع د/ محمد البردعى، ومن غير زعل ولا حد يتعصب علىَّ اسمحولى اقول انى عمرى ما حسيت بالحماس إنى اكمل الحوار حتى امبارح(21 قبراير2010) فى برنامج العاشره مساءً مع الاعلاميه منى الشاذلى

كنت متحمسه إنى اشوف آراءه بقت إزاى بعد ما قرر"بجواب نهائى"-مشروط- انه هيرشح نفسه للإنتخابات،المره دى تمنيت إن الموضوع يكون مختلف وتكون عنده ردود حاسمه وعلى الأقل خطوط عريضه لخطه أو برنامج انتخابى واضح بس بردو حسيت ببعض من الفتور وقلت النوم أحسن خاصةً فى صراعى الشرس مع دور برد متمكن وعِشرى ورافض يسيبنى، ولكن بعضاً من نفسى ألَّح علىَّ بمتابعة الحوار وطلَّعها فى دماغى إنى اتصل بيهم واسأله الحاجات إللى نفسى أسألهاله يمكن يكسبنى بعض الحماس تجاهه أو يقوى دوافعى بإنى مش هديله صوتى لو حصل وكمل للآخر،ولأنى مقدرش أرفضلى طلب خرجت تانى اتابع البرنامج واتصل بيهم

لكن كل محاولاتى باءت بالفشل،مصر كلها كانت عاوزه تكلمه إمبارح؛ بس بالنسبه لى مكنش الموضوع كله فاشل أوى يعنى

استفدت شويه واهم حاجه ان ضميرى ارتاح فى وجهة نظرى وفكرتى عنه الراجل فعلاً طيب ومسالم لأقصى درجه،وديع بزياده

ومن متابعته خلال الحوار تحس انه بيبان عليه "علامات الإرهاق والتعب" بسرعه؛متعرفش بيحس بالملل أو الزهق أو ان باله مش طويل ونفسه قصير،بالعاميه كدا وزى ما بسمعها "مش مدوحر" معندوش القدره على مجاراة إللى أؤودامه بنفس القوه وصفاء الزهن من البدايه للنهايه،بيتخنق اعتقد ان طباعه بتميل أكتر للعالِم مش للسياسى، مش بتاع مشاغبه وصراعات

من أول ما سمعت اشاعات الترشيح دى من السنه إللى فاتت وانا مش مقتنعه،مع كامل احترامى ليه والله بس مش هديله صوتى

وسامحونى لو قلت ان بردو "السن" له أحكام، ده داخل على الـ67، هتقولولى أرحم من أبو 80 إللى معانا، هؤلكم مفيش حاجه اسمها "ده أرحم من ده" فى حاجات مينفعش فيها أنصاف حلول ولا الباب المتوارب،إللى معانا ده طلعنا لقيناه كده أمر واقع لكن الجاى بإيدينا نختاره وبعدين كان داخل علينا بصحته بردو إحنا إللى بهدلناه يا حرام

حسيت ان د/البرادعى بينظر لـمِـصـر وشايفها "الفقيره المريضه الجاهله" ، هو دا إللى جاى علشان يعمله؛يعالج الست الغلبانه ويعلم الجاهل؟؟؟

مصر عاوزه اكبر واكتر من كدا بكتير، عاوزه راجل ناشف وخشن، انطحن واندعك فى شوارعها وحواريها

رجل شاف الغلب والقهر على ملامح أهلها وشاركهم فيه، مش كان بيشوفه من بعيد لبعيد على الفضائيات لأكتر من 30 سنه

راجل بيؤمن بالقوه والموقف الثابت، راجل داخل وناوى على اصلاحها حتى لو بالصدمه؛زى الإعلان بتاع السيراميك (انسف.....تخلص من حمامك القديم) فاكرينه؟

مصر عروسه عاوزه عريس؛ رجل...فيه عنفوان الشباب وفوران قوته ،وحكمة الشيوخ ورجاحة عقلهم، رجل له إيد من حديد فى جوانتى حرير،جامد بس ناعم، و دراع من صلب ميتلويش، وقلب من صخر،بس صخر بركانى ملهلب بحبها وبيتفجر منه أنهار تروى عطشها لحاجات كتييييييييييير أوى

مصر شابه،صبيه، امرأه وانثى مكتمله، مطمَع وعاوزه إللى يصونها ويحميها ويملى عينها وإللى يطلب ايديها لازم يكون عظيم فى كل حاجه علشان تقف وراه وجنبه وهى واثقه ومطمنه

مصر عروسه أهلها مستعجلين عليها والخوف انهم يقبلوا بأى عريس والسلام، لمجرد انهم يرتاحوا من همها أو تغيير وخلاص وزى ما تيجى وأهى عيشه والسلام،خايفينها تعنس على حالها ناسيين ان الزمن بيشيب بس هى بترجع صبيه

مصر مش عاوزه واحد ييجى يتصدق عليها أو يمُن ويستكثر بنفسه إنه تنازل وقبل يكون قائد وزعيم للرجال فيها،مش عاوزينها شفقه أو احسان، عاوزينها يقين وإيمان

مش عاجبك الحال وجاى تصلح، يبقا تقولى هعمل كذا وكذا وكذا، تحط برنامج واضح وخطه محددة الأهداف ببرنامج زمنى

خربش وعافر وأدخل بصدرك ولو اقنعتنا هنكون حواليك مش بس وراك

حسيت ان د/ البردعى لسه "بيطبطب" عالحكومه ومش عاوز يزعلها بالكلام وكأنه لسه محسمش موقفه، لسه ترشيحه مشروط بتغيير مواد الدستور المعدله 76،77،78 ، ولسه "هو" بنفسه متحركش ماشى مع الطوفان، ناس تطلعها فى الأول اشاعه، وبعدين هو يقول للصحافه والاعلام انه لسه مقررش، وبعدين شويه آه وشويه لأ، وبعدين جرفه تيار المشجعين والمؤيدين فدخل التجربه

وخصوصاً ان حواليه "بعض" المثقفين واصحاب الأقلام والآراء، بس بردو مش إللى يتسمعلهم واعتقد ان العقلاء منهم لسه بيفكروا وبعضهم حسم موقفه بـ"لا" صريحه من غير هجوم لو فعلاً د/ البردعى مقرر بشكل نهائى كان لقاءه امبارح هيكون مختلف عما رأيت وسمعت

كنت متوقعه حوار قوى، جرئ ونظرات ثابته وشفاه تحمل ابتسامة ثقه تثبته وتهز موقف الآخرين وكأنه لقى الناس بتقوله "يللا" فمحبش يكسفهم للأسف ناس كتير مننا مندفعين ومتحمسين مش علشان البرادعى وان كان يصلح أو لا يصلح؛ بس علشان هو الوحيد إللى "تجرأ" وأعلن رغبته فى الترشيح، حتى لو مكنش بقوه وإقادم، أهو لمح بيها والسلام

واحنا علشان "ماصدقنا" ونفسنا نجرب حاجه جديده ونشوف وجوه مختلفه وندوق طعم الانتخابات والممارسات الحره للديمقراطيه بنقول "آمين" من غير ما نحسبها صح مش عارفين نحلم؟؟!!!!!!!!؟؟

أهو حاجه وخلاص،مش مهم إيه إللى هيترتب بعد كده، بنعاند فى الحكومه وحزبها ولا بنعاند فى نفسنا ناس تانيه صعبان عليها ان الـ80مليون مفيهمش حد يصلح للرئاسه، بس العقول الفاهمه قالت "لأ، هى فيها ناس تصلح بس مفيهاش ناس تجرؤ" ودى المشكله بس بعتقد ان دا مفتاح الحل والبدايه

يوم ما يكون فى واحد يصلح وشايف نفسه يصلح يبقا أكيد أكيد هيجرؤ ويقدر ويعملها ويقدم نفسه وروحه مهر للعروسه، هيعرف إزاى يجمع الناس حواليه ويشكلوا عوامل ضغط بجد

احنا بنظهر لما حد "يستاهل نعمل علشانه" يحتاجنا، وقتها مش بس الشعب هيغير مادتين تلاته فى الدستور؛ دا ممكن يغير الدستور والنظام كله الراجل العريس الفارس إللى هيتقدم لمصر الصبيه مش هيخاف،هيتحامى فى حبها وفى الناس، بس المهم يكون راجل بجد ونقتنع بيه بجد

امبارح كان نفسى اسأله : يا ترى ترشيحه ده "قابل للمساومه"؟؟ يعنى لو اتعرض عليه منصب مهم فى الدوله هيقبله؟؟ لو بقا وزير التعليم أو فى مجلس الدوله أو مستشار خاص للرئيس أو بدل دكتور مفيد شهاب يا ترى يتنازل عن الترشيح؟؟؟

وليه لأ ما دام هدفه هو "الإصلاح" وإللى عاوز وناوى بيصلح فى أى مكان يكون فيه، مش لازم يعنى يكون رئيس مادام هو شايفها "تضحيه" منه

كنت عاوزه اسأله كمان لو كان مؤيد لإمتلاك مصر للقوى النوويه ما دمنا نقدر عليها؟ بردو ليه لأ ما دمنا "كبار" كفايه ومش هنتصرف زى الأطفال وان دا حقنا زى أى دوله تانيه بتملك نفس عناصر القوى؟؟ ويا ترى هيفضل بردو من "دعاة السلام" فى موقفه مع فلسطين؟ ولا هيأجل النشاط السياسى الخارجى لحد ما يظبطنا داخلياً؟؟

وليه متنازلش لحد دلوأت عن جنسيته التانيه مادام فعلاً عاوز يرشح نفسه للرئاسه؟

بينى وبينكم د/ البرادعى زعلت منه أكتر من مره فى الموقف أو- اللاموقف- من حرب امريكا على العراق، المفروض ان ده صاحب أعلى سلطه تقدر تقول وتجزم ان كانت العراق عندها ولا معندهاش سلاح نووى؛ كان ممكن يكون له دور اكتر من كدا فى وقف الحرب عليها ولو بحشد أصوات المجتمع الدولى بناءً على تقريره بعد التفتيش، لكنه معملش حاجه وقتها قلت انه "استسهل وريح دماغه" الراجل متجدده مرتين والتالته على وشك وفعلاً اخدها بعد ما اتعلق الاختيار لفتره، وبعدها فاز بـ"نوبل للسلام"!!! والأولى بيها يسموها جائزة الحياد واللاموقف

وكمان موقفه من الملف النووى الإيرانى ، صحيح "لمح" انه لن يستمر فى وظيفته لو أمريكا ضربت ايران، بس دا علشان واثق ان امريكا مش هتعملها وان إيران اكبر من كده إللى انا خايفه منه اننا "نعاند" نفسنا، يعنى ننتخب أى حد من المرشحين وخلاص ،المهم نغير، التغيير من أجل التغيير وليس من أجل الإصلاح

ولو فعلاً الاسماء إللى بتتردد دى هى بس إللى هترشح نفسها فللأسف هتكون دى المره الوحيده فى حياتى من يوم ما طلعت بطاقه انتخابيه انى مستخدمهاش، أو جايز أروح وأعلم على كله علشان أفسد صوتى بدل ما حد يستغله

اعتبرونا قاعدين نفضفض فى كافيه مع بعض، تنتخبوا مين؟؟ عمرو خالد ولا البرادعى ولا عمرو موسى ولا زويل ولا مبارك/جمال مبارك؟؟؟

كل حد فيهم ممكن يكون ناجح فى مجاله بس مش لدرجة انى اتمناه وأحارب علشان يكون زعيم وقائد ورئيس لمصر

مصر "عزيزه" تريد فارساً، رجلاً بكل حروف ومعانى ودلالات الكلمه

شخصيه لها من الهيبه والهاله والمكانه ما يجعلها جديره بالإحترام والحب والخوف منها أحياناً

كاريزما تعلِم مع الناس برا وجوا

حد يتكلم فيتسمع ويأمر فيُطَاع واحد ننتخبه علشان عاوزينه وفارق معانا مش واحد وخلاص ولا علشان صعبان علينا أو احنا صعبانيين عليهولا كيداً فى غيره

ولا علشان مش عارفين نحلم بأفضل من كده

لسه عندى أمل ان فى الكام شهر دول يجد فى الأمور أمور

وعلى فكره، مش عيب ولا غلط اننا "نشخص" القضيه والفكره فى شخص يحملها ويتقمصها، يعنى مش كارثه ولا ضيق فكر اننا نتمنى ان القادم يكون فى ايديه حاجات كتيره وهيغير ويصلح كتير ياما أشخاص فرقوا فى حياة بلدانهم

اقرب وأصدق مثال لينا هو "مهاتير محمد" المسلم فى دوله ناميه فقيره جاهله مريضه ،شوفوا ماليزا كانت ايه وبقت ايه

وشوفو أردوغان وعبد الله جول بيعملوا ايه فى تركيا دلوأت، ولا بشار فى سوريا،ولا غيرهم فى كل بلد وعلى طول التاريخ

لو حد فيكم شايف نفسه "يصلح ويقدر" يللا،إبدأ جهز نفسك ربنا سبحانه وتعالى إدى قوم سيدنا موسى مهله 40سنه لما يطلع فيهم جيل يستاهل يرجع للأرض المقدسه، احنا بقا احسن منهم وربنا خلقنا وميزنا بالفطره والدين، الدور والباقى عليك جهز نفسك واستعد واقول "أنا أهوه" واحنا معاك ووراك بس اقنعنى الأول وخليك أكبر من حلمنا المتواضع إللى صعب على ناس كتير ومش عارفه تحلمه

ولازلت متمسكه بحلمى أنه يوماً ما سيظهر "فارس" مصر

صابرين أبو على

أومال لو اسمك اشرف؟؟!؟

أومال لو اسمك اشرف؟؟!!؟

قبل أى حاجه اوعدونى ان محدش يزعل،مش معقول بعد الغيبه دى أرجع أزعلكم منى
والله الكلام ده أنا مش قصدى بيه تريقه أو سخريه، مش عارفه أسميها ايه....بس كالعاده اعتبروها "فضفضه" معاكوا مع انى عارفه إنى ممكن أخبط فى ناس كتير وربنا يستر
إحنا ناس "مستفزين" بجد؛ بنتعمد إغاظة نفسنا، زى بالظبط إللى قطع مناخيره علشان يغيظ وشه، مش عارف انها جت على دماغه وكل ما يبص فى المرايه هيتعكنن
مش عارفه أجيبهالكم إزاى؟؟ هى مُخاطره وهعملها ورزقى على الله وان شاء الله مخسرش حد فيكم وإللى تمسه الرساله يتقبل اعتذارى مقدماً
عمرك قابلت حد اسمه غريب؟ أكيد حصل، سواء بشكل مباشر أو غير مباشر، يعنى ممكن تكون "إنت" صاحب الاسم الغريب او قريبك او جارك أو حتى الدكتور بتاعك أو استاذك أو مديرك،وممكن كمان نشوف العجب فى لافتات الشوارع والمحلات وتترات الأفلام والمسلسلات
شعب بيتفنن فى اختيار الأسماء الغريبه والمحرجه والمنرفزه
تلاقى دكتور محترم ومشهور واسمه "كذا الحيوان" والله جد مش هزار، ولما صحبتى بتسألنى عن اسمه اتكسفت اقوله روحت كتباهولها،الله يكون فى عونه هو بقا
تلاقى كمان الغشيم، والحلوف والبغل- لا مؤاخذه يا جماعه- والله محرَجَه بس غصب عنى، الله يكون فى عون أصحابها
وانت مزنوق فى أى اشاره ما عليك غير انك "تنظر حولك" وتقرا اللافتات، وواحد يقعد جنبك يصور تعبيرات الإذبهلال إللى هتظهر على وشك كرد فعل لكل لافته
ضاقت بينا الدنيا واتزنقنا فى خانة اليَّك وملقيناش غير الأسامى دى؟؟
وتسمع مبررات غريبه وتحرق الدم،قال إيه.... مامته مبيعشلهاش اطفال فسمته اسم غريب علشان يعيش، او علشان ميتحسدش سمته اسم يخزى العين، مش عارفه انها كدا ممكن تخزيه هو شخصياً وتحرجه مع الناس
من كام يوم سمعت اسم حد (.....عفون) مش هؤولكم تعبيرات وشى، لقيتنى بقول من غير ما احس " بجد الله يسامح أهلك" الموجودين ضحكوا، وهو ضحك، رجل اعمل محترم واسمه كده؟؟؟ حتى مش المعفن ويتعالج بعد كده، لا...دا العفن نفسه
متصورين ان الاسماء دى انقرضت؟؟ والله ابداً
لسه فى ناس مخها مش مظبوط ومش بتفكر اصلاً، جهل ولا خيبه ولا إيه متعرفش؟؟!!
ميعرفوش ان من حق "الولد" على "والده" حُسن اختيار الاسم؟؟ مفكروش فى شكله وتعامله مع الناس بعد كده؟؟ ليه يسببوا لأبنائهم أذى نفسى ومعنوى ؟ مش حرام عليهم كده؟
ربنا سبحانه وتعالى هو إللى بيحمى وبيصون مش حركات الجهل دى، يا خوفى مره أقابل واحد اسمه سوسن ولا حسنيه
ربنا يهديهم ويهدينا

عارفين اغنية "اهلاً بالعيد" بتاعة صفاء ابو السعود، كنت بسمعها تقول "سعد نبيهه بيخليها ذكرى جميله لبعد العيد" اقول يا خبر!!! راجل اسمه "سعد نبيهه" مش نبيه؟ أخويا قالى زمانه مخرج الاغنيه او مؤلفها، ربنا ستر وطلعت فاهمه غلط، والحقيقه انها "سعدنا بيها" يعنى فرحتنا بيها

من الحاجات المستفزه كمان عندنا هى " أسماء الساندويتش"،شاطر ومشطور وبينهما حشوه

ييجى 80% من اسماء الولاد فى بلدنا مكرره على اسم الجد، زى ما تقول بيجيبوا منه كتير فى الرُخص قبل الاسماء ما تغلى
تعرفوا لو اسم كويس نقول عادى، الراجل عاوز يخلد اسم باباه فسمى ابنه على اسمه، مع انه كدا كدا شايله يبقا لزمته ايه؟؟ لكن المشكله فى الاسماء القديمه إللى معادتش متداوله وكمان غريبه او تقيله
واحده صحبتى خلفت ولد زوجها صمم يسميه على اسم والده "جابر" وهى عاندت فى الولد التانى وسمته على اسم باباها"شوقى" الولد التالت بقا ربنا ستر والدكتور قريبهم جرى سماه "أمجد"...هناك فرق، الولد دا هياكل ضرب من اخواته من غيظهم منه، ربنا معاه بقا، بس كدا أرحم مما لو سموه على اسم جدهم " رحومه"!!!! الضرب أهون
فى ناس بقا "غلسه" زياده وبتموت فى الكوره وبتحلم بـ"الهاترك" الواد وابوه وجده بنفس الاسم، وممكن ياخدوا بونص والرابع هديه، يعنى مثلاً بسيونى واضرب فى تلاته أو بسيونى تكعيب أو حتى أُس تلاته، ليه تنكدوا على العيال وتكرهوهم فى حياتهم؟ الخوف بقا ان الحكومه تاخد ضريبه على الاسامى دى بعدين

ولا الظريف إللى مسمى ابنه " خفيف شايل روحه" والله ما بقيت عارفه أضحك ولا أزعل، دا مبقاش اسم مُركَب، دا بقا "إثم مُركَب" الله يسامح أهله، الراجل ده زمانه اخد وهياخد حياته كلها تريقه وبهدله ومش بعيد مدرس العربى فى الفصل قال للعيال "يعربوه" وطبق عليه قواعد النحو
ويا سلام بقا على الاسماء الهايفه، شوفتوا هنيدى لما سأل الواد فى الفيلم اسمك ايه؟ قاله بمنتهى الفخر : تفاهه
قاله : أومال لو اسمك اشرف كنت عملت ايه؟
فى ناس لسه بتسمى "حماده وسوسو وميمى" للولاد، ومش اسامى دلع، بيكون الاسم الحقيقى، واعرفهم التلاته والله
ليه يا عمو الحاج انت وطنط الحاجه تعملوا فى عيالكم كده؟؟ انتوا جايبينهم علشان تبهدلوهم وتعملوهم مضحكه للناس؟!؟

صحيح اننا ممكن نغير اسماءنا، بس دا بيتطلب اجراءات ومشاكل كتير، دا غير ان الفتره الاولى من حياتنا هناخدها تريقه والاسم هيلزق فينا حتى لو غيرناه
صحبتى فضلت لحد الثانوى اسمها "رتيبه" على اسم جدتها، والله كانت بتعيط لما عينها تورم من تعليقات المدرسين، ابسط حاجه تتقال لما حد يسمع اسمها ويشوف حجمها الصغنن ووشها الجميل " ليه يا بنتى كدا بعد الشر؟ دا مرض مؤقت ولا علطول" وحاجات فى منتهى السخافه والاستظراف
غيرته بقا "ريهام" بص صحباتنا إللى كانوا يعرفونا فى اعدادى لسه بينادوها رتيبه، وكمان والله العظيم واحده تانيه كان اسمها "ستهم" ، كانت بتغيب من المدرسه من الاحراج، عرفت انها غيرته وبقت "دعاء" طب ما كان م الأول، بس باباها كان معاند معاها وخايف جدتها تزعل
باباك ومامتك مش هيزعلوا لو اخترت لأولادك اسامى حلوه، مش لازم اساميهم،وخليهم هم يختاروا يا سيدى علشان ميزعلوش، ربنا يخلى اصحاب الاسامى ويبارك فى اعمارهم وكفايه اسم واحد فى كل عيله من غير تكرار بايخ، ارحمونا من اسامى الساندويتش بقا
فاكرين "خلف الدهشورى خلف" أهو دا ساندويتش يمغص

يا ريت الاستفزاز فى بلدنا كان توقف على المستوى الشخصى وبينا وبين بعضينا، ألا دا تجاوزنا وبقا على مستوى الجمهوريه كلها واسامى مدنها وقراها
حكومتنا على مر العصور كانت ولا تزال مستفزه جداً
الحس الفنى والذوق معدومين بدرجه كبيره ؛ وحل مكانهم الحس الفكاهى والاستظراف،اتضحلى ده فى طريق الذهاب والعوده من وإلى القاهره
طريق كوميدى تقريباً، اسامى القرى والمحليات رهيييبه،

متعرفش من قلة الانجازات او الأحداث المهمه او الشخصيات المؤثره إللى ممكن نخلدها ونطلقها على الشوارع والقرى دى ولا ايه؟؟؟!!!؟
والله أهل البلد وناسها وتراب البلد نفسها على عينى وعلى راسى، بس بردو مينفعش كده
ليه بلد اكيد ناسها كلهم محترمين وتتسمى "زفتى"؟ ولا "ميت غمر" ولا "ميت نمله" او ميت ابو الكوم؟ يعنى ايه "ميت" دى أصلاً؟؟ جايز معناها الرقم 100؟ يبقا اللى قبلها 99 غمر وإللى بعدها 101غمر
وعزبة "السفرجى" وعزبة" الطباخ" وقبلهم بقا "عزبة الباشا" طب افرض الباشا جعان ولا عنده ضيوف،لسه هيستنى الطباخ والسفرجى لما ييجو بالسلامه؟؟ متلموش ليه مع بعض فى عزبه واحده وريحونا؟؟!!
المفروض يشوفوا المتميزين من اهل البلد او المحافظه ويسموا بلده بأسمه او بأعماله

المصيبه بقا فى الاسامى الحرام،

ماشيه فى أمان الله وبطرف بعينى كده خبطتنى لافته مكتوب عليها "خماره" اتفزعت وتلقائياً قلت " استغفر الله العظيم" السواق وولاد خالتى ماتو من الضحك
قالولى تخيلى بقا لو انتى ساكنه جنب موقف البلد دى وطول النهار السواقين ينادو "خماره خماره خماره" وانا أردد وراهم "استغفر الله العظيم"، المصيبه الأكبر ان بلد تانيه اسمها " سكران" والله بجد مش هزار
طبيعى، بلد قبلها خماره يبقا إللى بعدها عاوزينها ايه؟ دى فضيحه، أهل البلد دى بيكتبوا محل الميلاد او الاقامه ايه فى البطاقه؟؟؟؟ ولما يروحوا الجامعه او يسافروا برا يبقا موقفهم ايه؟ حاجه تكسف
ولا أنا والعملا الأجانب بتوعى إللى ببعت السواق يجيبهم من القاهره، ما هم اكيد بيعدوا على القرى والبلاد دى، افرض واحد فيهم سألنى اسمها ايه البلد دى؟؟

اقوله خماره يعنى

inn

وسكران يعنى

drunk

من شدة فخرنا بحاجه حرام اطلقنا اسميها على بلدنا؟!!!؟

وفى كمان على نفس خط البحيره بلد اسمها "خربتها" آه والله، مع العلم انها البلد الوحيد فى الجمهوريه إللى فيها أعلى نسبة متعلمين ومفيهاش ولا "أمى" واحد كلهم بيعرفوا يقروا ويكتبوا وابحثوا عالنت لو مش مصدقينى

عيب يا حكومه وعيب يا محافظه وعيب يا محليات، مش معقول كل اعضاء المجالس المحليه مفيهومش واحد مفكرش يغير الاسامى دى؟؟؟
شوية حياء وذوق من فضلكم
الشوارع والمدن والقرى واسماء الميادين كلها "تأريخ" لحال البلد وناسه، وبتحمل جزء أو كتير من ملامح البلد وإيدلوجياته، يبقا لازم نختار صح، دا حق بلدنا علينا وحقنا على المسؤلين كمان
تعرفوا ان "حارة اليهود" فى اسكندريه ودمنهور مفيهاش ولا يهودى، يبقا ليه اسمها يفضل كده؟ وتعرفوا ان فى كل مصر فى شوارع على اسم "ديليسبس وقمبيز" وغيرهم من الخونه أو المحتلين والمحتالين، مش عارفه ايه الخيبه دى؟؟ ولا اسامى الشوارع إللى بقت "أرقام" دا احنا عندنا تاريخ واحداث وشخصيات تملى شوارع وحارات وميادين قاره بحاله مش بلد مساحتها مليون كيلو متر مربع واحد بس
فى حاجات كتيره فى بلدنا عاوزه تتغير، كبيره وصغيره، هايفه او عظيمه
ممكن حد يقول انى هايفه وانها مجتش على دى يعنى، بس اسمك واسم بلدك دا جزء من شخصيتك ولو حلو هيشرفك ولو وحش هيكسفك ويحرجك مع الناس
إللى يقدر يعمل حاجه يعملها، بدايةً من اختيارك لإسماء أولادك، او طلب تقدمه للمجلس المحلى أو المحافظه مع أهل قريتك او مدينتك لتغيير اسمها لو غير لائق

والله ممكن وحصلت وبتحصل، بس عاوزه ناس تتحرك وتشغل نفسها بدل اللامبالاه إللى احنا فيها دى
ولى رجاء، ليه منرجعش نسمى أولادنا وبناتنا على اسماء الصحابه والصحابيات وآل بيت سيدنا محمد عليه الصلاة والسلام؟ تيمناً وتبركاً بيهم حتى وكمان اسماء لها معنى
تخيلوا ان واحده صحبتى مسميه "جودى"؟؟ اصلاً دا اسم الجبل اللى رست عليه سفينة سيدنا نوح، يعنى اسم بنتها اسم جبل،دا يبقا اسم مؤنث ولا مذكر
ولا ايه " ريتاج" ان اعرف ان الريتاج فى اللغه العربيه يعنى القفل او الترباس، حاجه بيتقفل بيها، دا بقا ولد ولا بنت؟؟
مالها " خديجه وفاطمه ومريم وعائشه ورقيه وزينب وجويريه و نُسَيبَه، ولا ماله ابراهيم واسماعيل وعيسى وسليمان وخالد وعمر وعمرو، وأنس ومعاذ وساجد وصهيب ويحيى وأبو بكر......إلخ
اسامى فخمه ولها معنى وتاريخ وتشرف صحابها، ولا يا سلام بقا على "عبد العزيز وعبد الملك" اسامى كدا تستبشر بأصحابها من قبل ما تشوفها
فى اسامى تسمعها تحس انك هتقابل "مؤسسه" مش مجرد شخص وفى اسامى تانيه تسد نفسك قبل ما تعرف صحابها

قبل ما تسمى ابنك او بنتك حط فى اعتبارك حاجه مهمه جداً ؛إن لكل امرئ من اسمه نصيب
وكمان معناه بعد كدا وتقبُل الناس ليه إزاى؟ بنفور ولا بإستبشار وترحاب

الاسامى الغريبه والغير تقليديه حتى الحلو منها لا تعنى شياكه او انتقال او "تمحك" بطبقه اجتماعيه معينه، زى إللى بيتنططوا ويسموا اسماء تركيه او غربيه ميعرفوش معناها وممكن يطلع معناها بشع
خلينا فى إللى نعرفه احسن، وكل الناس بقت بتسمى أى حاجه وكل حاجه، هى الاسامى بفلوس يعنى؟
ممكن لو اى حد قابل اسم غريب او اسم بلد غريب او وحش يبعتهولى؟ بعمل عليهم دراسه احصائيه
طولت عليكم...بعوده الأيام فى انتظار تعليقاتكم مهما كانت هتقبلها
اشكركم ،مع خاص تقديرى واحترامى لحضراتكم
صابرين أبو على
شوفتوا الأسامى، "صابرين" يعنى مش صابر واحد كفايه،لأ...دول جمع مذكر سالم و "ابو على" أهو دا بيفَّوِل على ابنه يجيب ولد ويسميه على

زى الفل....قصدى كان

أكتر كلمه كنت بحب أسمعها أو أقولها لوصف أو تمنى شئ كامل وجميل ومُريح.."زى الفُل"

؛ إزيك؟ زى الفُل00 صباح الفل00نهارك زى الفُل00كل حاجه تمام وزى الفُل.
وبغض النظر عن تعليق أمى إن دا اسلوب "بتوع القهاوى" بس بردو كنت بقول الكلمه دى، فرحتى وبهجتى فيها وخصوصاً لو تعرفوا الفُل "البلدى" الحقيقى بتاعنا؛ هتحسوا أد إيه فعلاً إن التشبيه بالفل شئ مُعَبِر وجميل أوى.

لما قابلت أول "فُله" فى حياتى إنبهرت ،كائن صغنون أبيض شاهق فى منتهى الصفاء والبراءه،ورقها مدفوس ومتنبك كأنه بيحضن بعضه،ورقها أخضر زمردى بيلمع من النضاره، عطرها بقا ميتوصفش أقل حاجه تتقال عنه إنه "سِحر" ولا إرادياً بتغمض عنيك علشان تستطعمه وتلاقى نفسك بتتنهد..إمممممممم ،وبعد كل ده مش عاوزينى أقول على كل جميل ورائع فى حياتى إنه زى الفُل؟؟!!!
واشتريت أول شجرة فل فى حياتى، اهتميت بيها وراعيتها؛ أسابيع وأنا أسقيها وأغسل ورقها ،مستنيه على نار أول "أولادى" الفُل، وبانت البشاير..قلوب بيضه صغننه مقفوله على أسرار من البراءه والسحر، والمفاجأه إن بعد ساعات قليله جداً لقيتها فتحت وعطرها انتشر فى البيت وجريت أفتح له كل باب علشان يطوف براحته وما خيب ظنى فيه، لما رجعت للزهره الوليده ما ملكت نفسى من قولة سبحان الله وانحنيت عليها أبوسها وألمسها بكل حذر علشان ما أجرحها أو أأذيها.
لكن زى ما الشاعر بيقول:
لكلِ شئٍ إذا ما تم نُقصانُ فلا يُغَر بطيبِ العيشِ إنسانٌ
أقصر الزهور "عُمراً" هو الفُل...،بيتولد علشان يموت
يادوب سويعات إللى بيفرح فيها بحياته ويعيشها، أقل من يوم بكتييير، وزى ما إنتشار شذاه بيقول إنه إبتدا بردو إختفاء عطره بيقول ان النهايه قربت.
زيه زي كل حاجه حلوه وبريئه ونقيه فى حياتنا.......عمرها قصير، بتتولد علشان تعلقنا بيها وبعدين تموت، فرق كبير بين فرحة البدايه وآلم النهايه، بين بهجة الأبيض النقى وحزن وانكسار الأصفر الدبلان. على قد السعاده بييجى الحزن أضعاف وأضعاف.
وخلاص...انتهى عمر الفُله ودبلت ووقعت على الأرض، مش هتعنيك حتى إنك تبصلها، إلا لو كنت شفت البدايهغريبه دنيتنا دى..مصممه تعلمنا دروس إحنا فى غِنىً عنها وعن قسوتها، دروس ممكن نعيش عمرنا من غير ما يكون فى داعى ولا حاجه ليها، مينفعش تسيبنا فى سلام نَفسى؟؟!!! كان كفايه أوى حد ينبهنى إن "الفُل" عمره قصير علشان ما أعلقش نفسى بيه، مكنتش أتمنى أبداً اشوف نهايته ولا أعيش آلامها

خُفت على كل حاجه إتمنتها أو حبيتها تكون "زى الفُل" ..قلبى إنقبض؛ كان لازم أتمناها تكون "زى الصبّار"؛ فرق كبير بين الإتنين ، الأولى بكل براءتها ونعومتها وجمالها وسحرها وحلو عطرها بس عمرها قصير وكمان مش هتعرف تدافع عن نفسها ولا حتى تقاوم الأيام والأذى، والتانيه بكل قسوتها وخشونتها ومرارتها وشوكها ،إلا إنها أصلب وأبقى وأقدر على المقاومه وحماية نفسها ،سواء بالشوك إللى يمنع عنها الأيادى وحتى العيون أو بجذورها الطويله القويه الممتده لأعمق أرض تثبتها وتأمن لها حياتها وتوفرلها مقومات البقاء.
الصبار مع الأيام ممكن يطرح ورد...صحيح مش بجمال الفل ولا بالسهل بس "بالصبر".

لو سألتك تانى "إزيك؟" أو حياتك عامله إيه؟ يا ترى هتؤول زى الفل ولا زى الصبّار؟؟ عاوز الجمال والنعومه والبراءه وسحر الخيال والعُمر القصير ولا الصلابه والأمان والبقاء بغض النظر عن الإعتبارات التانيه؟؟!!!؟

كتير مننا هيتمنوا حياة الصبّار ويتحمل شوكها ومرارتها ويكَيَِف نفسه عليها بس يضمن الإستمرار من غير ذبول وآلم النهايه السريعه الغير متوقعه.
لو سألتونى نفس السؤال مش هعرف أجاوب...خلاص الأمنيه إتحققت وماعدش ينفع تتغير.
زمان لما كنت بشوف الفُل أو أسمع اسمه كنت بجد بفرح و قلبى بتتغير فيه حاجه وعيونى بتلمع بإبتسامه دلوأتى بردو لسه قلبى بتتغير فيه حاجات وعيونى لساها بتلمع...بس بالدموع .
وأهو درس واتعلمته.."كل حاجه جميله وبريئه فى حياتنا بالتأكيد بتكون زى الفل، من أول سحرها ولحد عمرها....القصير أوى"
صدق إللى قال ان كل حاجه حلوه عمرها قصير
خد بالك من امنياتك وزى ما حذرونا زمان:
TAKE CARE OF WHAT YOU WISH, IT COULD BE THE LAST WISH

Sabrina abu ali

مبروووووووووووووك يا مصر

هدية حسين الجسمى لمصر

بعد ماتش الخميس 28 يناير2010، جمعه مباركه على الجميع ان شاء الله
وعؤبال ما نبارك بالكاس يااااا رب

"فرحان بمصر"

والله واحنا كمان فرحانين

http://www.youtube.com/watch?v=TH66avs69mY

بينى وبينها ذكريات وحنان جميع الأمهات

بتحبنى وبحبها والحب يعمل معجزات

*************

والله وعملوها الرجاله ومعلهمهم

الفرحه طعمها حلو أوى

كنت متصوره انه مش فارق معايا

بس اكتشفت انه فارق كتيييييييييييييييييير اوى

كان نفسنا نفرح ولو بأى حاجه

انا فرحانه علشان دا دليل قوى اننا لما اتهزمنا فى السودان كان فعلاً غصب عننا

وكمان ان رجالتنا بيلعبوا كويس ويستاهلوا يمثلونا فى العالم كله

الماتش كان اكتر من رائع وبمستوى مذهل

تمكُن تام وآداء مشرف بجد

إللى يضايق بقا....لما احنا نعرف نلعب كدا ونكون كدا

ليه بتمر علينا فترات تخازل؟؟؟

المهم.....ألف مليون مبروك يا مصر

حتى لو مجاش تانى،احنا كدا فرحانين ومبسوطيييييييييين اوى والحمدلله

خلى غيرنا يفرح زى ما فرحنا

متشكريييييييييييييين يا رجاله

كفيتوا ووفيتوا حقنا وزياده

عؤبال ما نلاقى رجاله يخدولنا حقنا فى الحاجات التانيه وبردو هنقف معاهم ووراهم

شكراً من كل مصرى فرحتوه وربنا جعلكوا سبب لجبران خاطره

http://www.youtube.com/watch?v=TH66avs69mY

عؤبال ما نبارك بالكاس ورجوعكم بالسلامه ان شاء الله

sabrina abu ali

لحظة ضعف.....

ويل لك اذا تحالفت عليك الضعيفتين
مجرد لحظه...ونقطه
"لحظة ضعف ونقطة ضعف"
"ياااه إزاى عملت كده؟!عقلى كان فين؟! أكيد إتجننت أو مكنتش فى وعيى

كتير بنقول الجمله دى أو بنسمعها ،لوم وعتاب وتأنيب وندم ..وأكيد خجل من "لحظه"مرت
ربما دفعتك نتائجها إلى الإكتئاب وسجن نفسك داخل أسوار من الشعور بالذنب وتأنيب الضمير وربما الشعور بالقرف والتقزز.
كل ده بسبب "لحظة ضعف"،ممكن الجزء الصغير ده من الزمن يعمل كل ده؟؟!
أيوه ممكن ،وخصوصاُ لو اللحظه دى اتكررت أو كبرت معاك حبتين، وآآه لو فى مره "إتعرَّفِت لحظة ضعفك على نقطة ضعفك"
وقتها أنت هالك لا محاله
ولكنهما ( مجتمعين )هل تستحقان تلك المعاناه بعدهما مهما كانت السعاده التى يعرضانها عليك فى حينها؟؟؟
إعرف ما قد تسببه لحظة الضعف وبعدها أجب على السؤال.......

لحظة ضعف...قد تخرج فيها كلمه من فمك لا يمكنك استردادها أبداُ، قد يحاسبك عليها الآخرون أو تحاسبك نفسك لما بقى لك من عمر،
فهل أنت على إستعداد للعيش فى مَساءله دائمه وكلمة "ليه وإزاى" تصم أَذنيك؟؟

لحظة ضعف...قد تكون دقيقه أو ساعه أو حتى شهر،ولكنك فى النهايه تصنفها كـ"لحظه" لأنها بالقياس إلى سنوات عمرك قد لا تشكل قدراً زمنياً،
ولكن بداخل نفسك تصنع فارقاً وكأنه صدع لا يمكن إغفال الطرف عنه

لحظة ضعف...قد تحولك من احترامك لنفسك واحترام الآخرين لك ،إلى الإحترام الخارجى فقط،الناس تحترمك؟..نعم
،لكنك لا تنظر بنفس عين الاحترام إلى ذاتك ،وقد لا تنظرإليها مطلقاً خجلاً مما ستراه فى عينيك ولا يراه الناس.

لحظة ضعف...يمكنك بعدها أن تحكم على نفسك الحكم الصحيح؛ فكل مبادئك وقيمك وأخلاقياتك فى "مأمن" مادامت لم تقع تحت الإختبار
،فأنت شريف..كريم..مؤدب..قوى الإراده ولا يمكن لمبادئك أن تَزعزع
ولكن حين تتعرض لـ"لحظة ضعف" وتضع أشياءك الثمينه على المحك ،يمكنك بعدها أن تشكر تلك اللحظه التى أكدت مزاعمك عن نفسك ،
أو تلعنها وتلعن نفسك التى عرفتها على حقيقتها بعد سنوات من خداعها لك

لحظة ضعف...تقَّدِمك إلى نفسك الحقيقيه التى تعيش معها ولا تعرفها،وبعدها تعيشان معاً إمّا فى توافق واحترام وسعاده،
أو فى صراع دائم لرغبة كل منكما فى تسويس أو تسييس الآخر كما يريد ويهوى..."وأمّا من نهى النفس عن الهوى فإن الجنة هى المأوى"

لحظة ضعف...هى النعيم أو الجحيم الذى تصنعه اليوم لتقضى فيه أيامك القادمه ،أو ربما عرفت معاناة الجحيم وآلامه
فسعيت إلى إصلاح ما يمكن إصلاحه لتعود بنفسك إلى النعيم.

لحظة ضعف...قد تضعك فى "قبضة أحدهم" الذى يدرك أنه هو حُبَك.... " نقطة ضعفك"، وعندها لا يمكنك التمييز بين ما إذا كان يحسن إليك أو يسئ إستغلالك الى اقصى درجه،
أو قد يعرض عليك كل ما يسئ إلى نفسك ولن تملك حق الرفض ما دمت لازلت رهينة نقطة ضعفك

لحظة ضعف...هى الاختبار الحقيقى للشخص الذى تراه فى مرآتك،ذلك الاختبار يعكس ما بداخله ويقارنه بوجهه ،بيوت عناكب وطحالب تملأ الممرات وتخشى الاقتراب منها حتى لا تصيبك رائحتها العطنه
،أم ممرات نظيفه أو على الأقل يمكن تنظيفها ، أو خليط بين هذا وذاك ولا ندرى لأيهما ستكون الغلبه.

والآن .....هل يمكنك أن تتحمل نتيجة "لحظة ضعف" أو "نقطة ضعف"؟
وهل يوجد مَن أو ما يستحق أن يكون بمثل تلك الأهميه التى لـ"لنقطة الضعف"؟؟ مال أو حب أو لَّذَه أو رغبه عابره؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟
يا كل لحظات ضعفى......أشكرك وألعنك ،ألعنك لأنك أريتنى ما لم أحب أبداً أن أراه من نفسى..
وأشكرك..لأنك أذقتنى طعم الضعف والخساره والندم فقررت حينها ألاّ أعيش شعور الخاسر أبداً،
وأشكرك لأنكِ جعلتنى دائماُ فى حالة "تعبئه عامه واعلان الطوارئ" مُشهرةً كل أسلحتى فى كل وقت ،فلا أعرف متى ستخرجين لمواجهتى

لحظات ضعفى..اعلمى أنى لك،ولن اكون فريستك مره أخرى ،فتلك الضعيفه التى عرفتها يوماُ ما عادت موجوده فى عالمنا
قتلتها يوماً إحدى اخواتك..
كفانى الله وإياكم شر لحظات الضعف وكذا نقاطها
Sabrina Abu Ali thanks & best regards,
Sabrina Abu Ali