وحشتنى بجد وحشتنى،، أول مره اشتاق لك أوى كدا لما تغيب، اشتياق ولهفه وانتظار مؤلم، كل حواسى كنت معلنه حالة التعبئه العامه فى انتظارك ، وكل يوم أقول يا رب يا رب "اللهم بلغنى رمضان" حتى لو يوم واحد بس فيه ، المهم انى ألّحقُه.الساعات بتزحف بمنتهى البطء ،وأخيراً جت صلاة العشاء وسمعت بابا بيقول "كل سنه وانتم طيبين؛ النهارده هنصلى التراويح" آدى أول بشاره ،بس لسه بردو...لازم ييجى "بُكره" وأصوم علشان أتأكد إننا فى رمضان.
يااااه ،أخيراً بقينا بُكره وجه رمضان والحمد لله، جريت أدور على فانوسى القديم أبو شمعه ولعته وأنا ببتسم لكل ذكريات زمان، ووقفت فى الشباك أبص ع الهلال وعنيه دمعت وأنا بكلمه" اللهم أهله علينا باليمن والإيمان والسلامة والإسلام...ربى وربك الله" فرحانه فرحه غريبه ، فرحة غريق جت له فرصة النجاه على آخر لحظه بعد ما يأس.
مش عارفه ليه اتخيلت "رمضان" فى صورة جدى الله يرحمه، الوقار والهيبه والوش الجميل والدقن البيضا والابتسامه الهاديه والعيون الحلوه اللى بتلمع، حاسه انى عاوزه اترمى فى حضنه واعيط بجد بدموع تغسل كل ذنوب وأخطاء الـ11 شهر اللى فاتو ،عاوزه اتعلق بتوبه وما أخليه يفارقنا أبداً.مجرد الاحساس اننا عايشين أيامه دا كفايه ،ياااااااه.. الفرض بـ70 فرض والنوافل بتتحسب فروض؟؟!! ياما انت كريم يا رب...يمكن نعرف نعوض حاجه من اللى فاتوا.
الدنيا اتغيرت بين يوم وليله؛ النهارده جميل وبكره أجمل وأجمل؛ إتأكدت من كدا لما شُفت ملامحه على وشوش الناس فى الشوارع وكله بيبتسم لكله حتى لو ما يعرفه وبيقول "كل سنه وانت طيب ،تعود لها بخير" وكمان لّما ودانى سمعت صوت "الهدوء" لأول مره من زمن بعيييد، مفيش أغانى بصوت عالى ،ولا كاسيتات عربيات تهز الطريق كله،حتى طريقة لبس الناس إتغيرت لا مكياج ولا ضيق ولا فاقع ولا متقطع ولا ساقط.. ...صحيح إنك "شهر الصيام والإحترام".
هَلِّت بشاير خير وكرم ربنا فيك يا شهر الإحسان...موائد الإفطار فى معظم الشوارع ،،ربنا يزيد ويبارك ويتقبل من الجميع.
الله..الله..الله...حتى زمايلى فى الشغل هاديين بشكل غير طبيعى وعلامات تسامح جميله على وش كل واحد فيهم.
كل يوم وقت صلاة الظهر كنت بستخبى ورا الشباك أعد المُصليين إللى داخلين المسجد واتحسر، ببقا عاوزه أنزل أشد الناس بالعافيه يدخلوا يلبوا نداء ربنا ، النهارده حد غيرى راح شدهم ..."رمضان" قام بالمهمه بدالى ،كنت بحلم بلوحة "مغلق للصلاه".. النهارده الناس راحت تصلى بس ما علقوها، حاسيين بالأمان،، أصل إللى يؤدى أمانة الله مش هيهون عليه يفرط فى أمانة عبد الله. وكمان الناس بتصلى كل الفروض فى المسجد...أخيراً بقا فعلاً "جامع" حتى فى صلاة الفجر..هات من بركاتك هات يا عم رمضان.
شوفتوا المنظر دا كمان...كل الناس فى ايديهم مصاحف،فى الشغل وفى المحلات وفى كل حته على الأقل فى مصحف مفتوح ، الناس بجد كلها مقاطعه التليفزيون ، قوينا وكملها لنا على خير واتقبل منا يا رب.
يا سلاااام على بيتنا الجميل...كلنا بين راكع وساجد وذاكر لله وأكيد دا حال كل بيوت المسلمين.حتى أخويا الصغير إللى ماما مسمياه "عاصى" من شقاوته لقيت حاله اتقلب؛؛ أقصد إتعدل، أخد تمر وحلويات ونزل يفطر الناس فى الشارع وقت المغرب، وأخويا الكبير قفشه فى المسجد بيصلى الفجر وكمان بيقرا قرآن!! معقول يا شهر القلوب والنفوس الطيبه كل دا فضل فيك من ربنا؟؟!! الحمد لله.ناس كتيير كل يوم بالليل بشوفهم لابسين أبيض وراكبين اتوبيسات والناس بتسلم عليهم بدموع فرحانه ؛ رايحين "عُمرة" رمضان، معقول كل دى ناس رايحه قاصده ربنا ومع كل التعب ده مش طالبه حاجه غير رضاه!!!، وأجمل ما فيهم ان معظمهم شباب، خلاص..الحج والعمره مابقوش للشيوخ وكبار السن بس ،الناس بقت بتفهم.
بذمتك ما بتيجى عليك لحظات كتيير تحب تسجد شكر لله حتى لو فى الشارع ووسط الطريق من كتر ما انت شايف من خير حصل فى الناس وبالناس؟؟!!
أنــا بـــحـــبــك أوى يـــــا رب
نغمشه غريبه جوا قلبى كأنها شرارات كهربا.....هى دى بقا السعاده إللى بسمع عنها؟؟! دا احساسها حلو وطعمها جميل أوى، وبيزيد كل ما بشوف الحياء والإستحياء على وشوش الناس وف تصرفاتهم ، الناس اتعلمت إزاى تتأدب مع الله ، يا رب دايماً.هو إيه إللى عمل فينا كدا وغيرنا بالشكل ده؟؟ لأ..إحنا متغيرناش، إحنا كدا أساساً بس بنستنى الفرصه ، لو حد إلتزم فى غير رمضان ممكن الناس تتريق عليه ويقولوا "استشيخ" وكأنه عيب ، لكن فى رمضان بنكون "كلنا" مع بعض ، على قلب واحد ونفس واحده ، كله بيسعى للهدوء والسكينه والسماحه وكأنهم "مطلب جماعى" ،بيتوحدوا عليه علشان كدا بيحققوه.
طب ما دام احنا عاوزين وحابين الحياه بالشكل ده...منعرفش نكون كدا على طول؟، ليه منكملش بالشكل ده حتى بعد رمضان؟ هو إحنا بنعبد الشهر ولا رب الشهر؟؟!!! ليه منكملش أيامنا وشهورنا على نفس الحاله؟ أخيراً فهمت دعوة الشيوخ لما بيقولوا "اللهم لا تجعلنا من عُبَّاد رمضان" ،هو احنا فعلاً كدا؟ يعنى بنعبد الشهر مش رب الشهر؟ أصل الله هو الله الواحد وهو رب كل الشهور ليه التفريق دا بقا؟؟؟؟؟؟؟؟؟
ليه مينفعش تقول "اللهم انى صائم" فى غير ايام رمضان؟ حتى لو مش صايم قولها وفكر نفسك بيها ، قولها لما تيجى تغلط او تتخانق او تشوف حاجه مش كويسه ، قولها لما تكون هتتكلم عن حد او تستخدم كلمه بذيئه ، قولها لما تيجى تكسل عن عمل خير أو آداء واجب، قولها لما تحس ان ضميرك عاوز ينام او يستريح شوى . كلنا بنقول ان الصيام مش امتناع عن اكل وشرب بس، دا امتناع عن كل حاجه، ربنا عودك تمنع نفسك عن الحلال علشان ترضيه الشهر ده فمش هتخسر حاجه لما تمنع نفسك عن الغلط والحرام فى بقية الشهور.
شوفتوا السيده مريم لما قالت لقومها "إنى نذرت للرحمن صوماً فلن أكلم اليومَ إنسياً".......يللا احنا كمان نعمل نذر بالصيام طول العمر عن كل ما يغضب ربنا ويزعله مننا، نحاول نكمل رمضان على طول.
خايفه لما يخلص ونقعد فى البيت فى اجازة العيد آجى أخرج للشارع بعد كدا معرفش...هخاف من وشوش الناس والماسكات اللى هتقع بعد رمضان.
قولوا معايا "ياااااااااااااااا رب رمضان ما يخلص أبداً"
وبالله عليكم ادعولى ربنا يهدينى يااااا رب ويكتب لى العُمره السنه دى يااا رب
"وما أُبرئُ نفسى إنَّ النفسَ لأمارةٌ بالسوء"
كل سنه وانت بكل خير وصحه وعافيه وربنا راضى عنكم ان شاء الله
