بييجي وقت لازم تسكت فيه , وعقلك يقولك ( خليها فى القلب تجرح , بدل ما تبان و تفضح ) .. و أوقات تحس إنك لازم تتكلم .. مش قادر تكتم و تخبي .. وإلا هتنفجر .. علشان متكلمش نفسك و الناس تقول إتجننت .. أو تخلق شخصية من خيالك تعيش معاها و تعزلك عن العالم ويقولو عليك براوي ... يبقى الحل إنك تفضفض .. اللى تقدر تتحمله خليه جواك .. و اللى متقدرش عليه .. ويفيض بيه قلبك و عقلك .. وزّعه على اللى حواليك ... هنا مش مجرد كلام و حكايات ... كل رسالة هي فيض من ( فيوض القلب والخاطر ) ....... أنا / صابرين أبوعلي

الاثنين، 31 مايو، 2010

بــيـــت أُمُــــــه

بيت ميييييين ده؟؟؟!!!؟

لو حد سألكم عن "الرومانسيه السياسيه الساذجه" تقدروا وبكل ثقه تدلوه عليا ييجى يضحك شويه من قلبه

لسه مقتنعه ومؤمنه إن قراراتنا فى ايدينا وإننا لو نوينا نغير هنتغير ونغير من حوالينا بجد

احتمال علشان أنا اتربيت على كده ولقيت إللى يلعب فى دماغى من صغرى ويشكلنى عالحلم والأفكار دول، واحتمال علشان زمان بردو اتحطتلى أساسات مش عارفه اتخلص منها

فاكرين إنتخابات رائد الفصل والأمين والأمين المساعد والأعضاء؟ متضحكوش...بس والله كانت بدايات صح وفى منتهى الصدق والشفافيه

وكنا بنقوم بمهامات بجد وإللى عاوز ينجح السنه الجايه لازم يكون قد المسؤليه السنه دى وتكون له بصمه، وبعدها عملولنا انتخابات البرلمان الصغير على مستوى المحافظه و كل واحد يتكلم بلسان مدرسته ومحافظته،دا غير جمعية المناظره العامه واتحادات الطلبه ومعسكرات إعداد القاده إللى خدناها زحف من اسكندريه لبور سعيد والاسماعيليه وسيناء

حبيت الموضوع واندمجت فيه وآمنت إن "تأييد الناس" ووجودهم حواليك هى القوى المحركه لأى إنسان عاوز يصلح ويكون له دور بجد.وفعلاً فى حاجات كتير عملناها وغيَّرناها.كبرنا وروحنا الجامعه ودخلنا اتحاد الطلبه واعترضنا لما كان "بالتعيين" مش بالانتخاب وقدمنا شكاوى، اتعودنا يكون لنا دور من صغرنا فمش معقول هيهمشوه أو يلغوه لما نكبر وتفكيرنا يكون اعمق...حقنا ولازم ناخده


علشان كدا خايفين...متستهنش بقوة صوتك ودوره فى التغيير

يمكن تضحكوا عليا لما تعرفوا انى كنت بستنى وبتمنى أكبر، يوم ما كملت 16 سنه تانى يوم روحت طلعت بطاقه شخصيه، ويوم ما كملت 18 سنه تانى يوم طلعت بطاقه انتخابيه، مأمور القسم بقا مذهول وقعدنى فى مكتبه، كانت حاجه غريبه ان حد يروح يطلع بطاقه انتخابيه،مكنتش الناس عرفتها، وبعت معايا ظابط لحد الموظف المختص علشان يعملهالى.تصدقونى لو قلتلكم انى شُفت فى عنيه وكلامه الاعجاب؟! وادانى تليفون البيت وعرفنى على مراته وولاده كمان، حسيت يومها فعلاً ان الشرطه لسه فى خدمة الشعب

ولسه مستنيه لما ابقا 33 سنه علشان أواصل الحلم، دا سن الحد الأدنى لعضوية مجلس الشعب، ألحقها
الدورهالجايه كمان 5 سنين ان شاء الله لو لينا عُمر

مجنونه؟؟! أومالو، احسن ما اكون روح ميته فى جسد حى

فكرت تجيبه وتقراه وتعرف إللى لك وإللى عليك؟؟؟؟؟

حلم...واحتمال يفضل طول عمره فى مرحلة الحلم، بس على الأقل أنا بحلم ومحجرتش على أفكارى وخيالى،بحلم وأنا نايمه وأنا صاحيه حتى وأنا عيانه وبموت بردو هحلم، كتير ممكن يسخروا من حلمى ومتصورينه مستحيل، بس أدينى بحاول و فى نفس الوقت أوعدكم وأوعد نفسى إنى لو وقت ما اترشحت كان فى راجل مترشح وأصلح منى وله أهداف بجد وقتها أنا إللى هديه صوتى واجمعله اصوات كمان

فى ناس هتقولى حلمك قرب يتحقق مع وجود افتكاسة "مقعد المرأه"هقولهم...مش أنا إللى أدخل (بيت الأُمَّه)
من الأبواب الخلفيه

أو بصوره غير شرعيه، صحيح انا مش دارسه قانون ويادوب قريت الدستور وشوية هوامش كده لكن ممكن استنتج ان المقعد ده غير دستورى بالمره، طول عمرنا نعرف ان مجلس الشعب 50% عمال وفلاحين والباقى فئات دا غير الـ10 المُعيَّنين من قِِبَل رئيس الجمهوريه وإللى مش عارفه ولا فاهمه ليه؟؟؟؟ يعنى إحنا (الشعب) يادوب اتنين من كل دايره سواء مركز ولا بندر، يبقا ليه هو لوحده له 10 نواب؟؟؟ وبعدين اكيد له نائب او اتنين عن دايرته، يعنى كدا الريس لوحده له 12 نائب فى المجلس؟؟؟!!!! اشمعنا؟

يا سلام يا سلااااام "نعم"بالعافيه

دا غير ان مقعد المرأه ده هيكون على حساب مقاعد تانيه،انا مش عارفه أرتب افكارى من حرق الدم لكن هحاول

هعتبر نفسى مكان حكومة الحزب الوطنى – لا قدر الله بَعد الشر- وهحاول اوصلكم أنا عملت إيه علشان أقضى على أحلام الناس وعشمهم فى "بيت الأُمه" محاولة مواطنه ساذجه عمرها ما هتوصل لدرجة الدهاء المطلوبه

الحكومه اتصدمت فى الانتخابات لما لقت المعارضه طلعلها ناب والناس بتميل لهم،حتى لو مش مقتنعين بيهم أهو عِند وغيظ فى الحكومه وعدو عدوى يبقا صديقى وفوقنا على وجود 84 مقعد للإخوان فى المجلس دا غير المعارضه،كدا الناس ممكن تاخد بالها ان صوتها لو استخدمته بإيجابيه هيكون له تأثير كبير على ترتيب البيت من جوا ومن برا فكان لازم يشغلوا مخهم ويفتحوا عيونهم كويس أوى علشان الكارثه الديمقراطيه دى متتكررش تانى

الأول هنزود عدد المحافظات علشان تزيد الدواير إللى ممكن يكون لنا فيها أصوات،وبعدين هننزل بمشروع يرضى المرأه وتيته سوزان وطنط فرخنده ونعمل "مقعد عموله للمرأه" غير مُقَنن ولا مُنَظم أصلاً،يعنى مش محدد كام واحده من كل دايره ولا هتكون على مستوى المحافظه أو منطقتها بس ولا إيه؟ وفى دواير اصلاً مفيهاش مقعد للمرأه بإختصار ممكن تلاقى المقاعد المقرره للمرأه كل إللى فيها اسماء معروفه مسبقاً او من منطقه واحده ونخلص، مقاعد المرأه دى بقا فايدتها إيه؟؟؟ اقولكم

هو دا اخرنا....

هتظبط الميزان أو هتميله للحكومه لو احتاجت اصوات،يعنى افرض انهم بيناقشوا قانون ما ولقى معارضين ومستقلين وممتنعين عن التصويت يبقا مين إللى هيصوت ويرضى الحكومه علشان لها إيادى بيضا عليه؟؟ دا حتى المثل بيقول اطعم الفم تستحى العين،مش معقول الحكومه هتبقا هى إللى حطانى هنا وآجى أنا اقولها لأ؟؟!! دا حتى كدا يبقا قلة أصل

هتلاقى المرآت كلهم صوتوا لصالح القانون ومعاهم الـ10 بتوع الريس دا غير الهتيفه بتوع الحزب واتمرر القانون حتى لو كان إيه كدا ان شاالله حتى تغيير الدستور وتحويلنا من جمهوريه إلى ملكيه،حد هيقدر يعترض؟؟ إذا كان دا قرار صادر من مجلس الشعب، بيت الأُمَه يا ناس

لو لقى إللى يدافع عنه ويتكلم باسمه ويعرف حقوقه مكنش اتعمل فيه كدا ولا كانت قوات الاحتلال الحكومى قتلت كرامته

حد هيقولى إنتى عبيطه، طب ما الريس والحكومه لو عاوزين حاجه بيعملوها وبيفرضوها بالأمر مش مستنيين اصوات والدليل "تمديد قانون الطوارئ" من كام يوم بغض النظر عن المعارضين صدر "قرار رئيس الجمهوريه بمد العمل بقانون الطوارئ و....." اتحرقوا،ايكش تولع،عاوزينى اسيبلكم الحبل عالغارب علشان صوتكم يطلع؟؟ طلعت روحكم قبلها

بس دا قرار"شكله وِحِش" علشان جاى بالغصب مش بالهتاف والتصفيق، بريستيجنا ميسمحلناش بكدا أؤودام العالم إللى بنحاول نوهمه بديمقراطيتنا وحريتنا حماها الله

فلازم وحتماً ولابد ميتكررش الموقف دا تانى حفظاً لماء الوجه ، يعنى لا هيبقا فى دم ولا ماء؟

الستات دول بقا جايين يقعدوا فين؟؟؟ يعنى هل لهم دِكك ومصاطب تحت القبه زى باقى النواب ولا مفيش مكان
ولازم نوسعلهم علشان ميصحش يقعدوا جنب الرجاله ويزنقوهم؟

عيب...ليدز فرست،يعنى إحنا نهش شوية رجاله مزعجين وندخل الستات الحلوين دول ينوروا مكانهم ويخلوا ريحة المجلس حلوه

طب نمشى مين؟؟ وإزاى؟؟؟

المُتعبيييييييين..كل يوم من ده


بسيطه...نلغى دواير وندمج دواير وندوخ الناس حوالين نفسها علشان ميعرفوش راسهم من رجليهم ونعرف نلمها فى الكرتونه-فاكرين نكتة الكتاكيت؟- وطبعاً معروف كويس جداً إيه هى الدواير إللى هتتلغى، أى حته فيها لبش أو صوت عالى أو مكان للمعارضه أو الإخوان تتمسح بأستيكه أو نولع فيها خالص ونجيب غيرها

وبانت البشاير فى إلغاء دايرة مصطفى بكرى...ولسه، ما خفى كان أفدح، ملعوبه يا حكومه والله

وتخلص الانتخابات ب454/صفر لصالح الحكومه وممكن يكونوا اكتر لو حسبناها بالنقاط مش بالأهداف


وكدا بقا مبقاش مجلش الشعب سيد قراره، دا بقا القرار هو إللى سيده وتاج راسه، ولا بقا "بيت الأُمَه" دا بقا "بيت أُمُه" يا أدهم


أُم مين؟؟؟ الله أعلم، ولا اعرف، جايز أُم الخلول أو أُم اربعه وأربعين، واحتمال أُم ابراهيم ولا أُم أحمد ، ولا بيت العز يا بيتهم....المهم إنه بيت أُمُه

وانتوا عارفين طبعاً الواحد بياخد راحته فى بيت أُمُه قد إيه، يطرد ده ويدخل ده، ويجيب دوكهت ويشيل دهوت


شوفوا السهم عالجزمه المشهوره...معدش حيلتنا غير الجزم تاخد حقنا وتدافع عننا؟؟؟؟؟


تعرفوا...لو مجلس الشعب دا اتصلح حاله والناس عرفت تختار إللى يتكلم بلسانها والله والله والله ليتغير حالنا لعكس الموجود دا خالص، هننضف ونبقا أُمَّه محترمه علشان مجلسها وبيتها الموقر محترم وإللى فيه محترمين مش نايمين ولا بيضربوا بعض بالأقلام والجزم ولا بيصوروهم فى صالات قمار ولا بيتمسكوا بتهريب موبايلات فى المطارات ولا بيتاجروا فى دم الشعب وامراضه علشان يصرفوا ملايين علاج على نفقة الدوله

لو الناس اختارت الشخص إللى يعرف يحاسب بجد وميخفش إللى يخدم البلد ويشجعوه مش إللى بنختاره علشان
يجيبلنا توقيع على ورقه ولا واسطه لوظيفه مكنش دا بقا حالنا

لو الناس عرفت قيمة اصواتها وبطلت تتخاذل وتطنش والله صوتك ليجيب نتيجه واسألوا مجرب

المعارضين بيسكتوا ويسيبوا الهتيفه يصوتوا بدالهم وفى الآخر نستغرب من النتيجه ونقول تزوير


نفسى أدخل مجلس الشعب...بيت الأُمه ، براس مرفوعه من بابه الرئيسى وميكنش فى معتصمين جعانين وعرايا على رصيفه

نفسى ألاقى فيه جيل جديد محترم وعاوز يصلح مش يتمصلح ويعمل شغل

هقدم طلب للمجلس بإلغاء الحصانه عن كل النواب...حصانه من مين وضد مين وليه؟؟؟ للأسف الحصانه بقت بتُستَخدَم ضد الناس، الشعب إللى اداهم صوته بيتعالوا عليه بالحصانه وبيسرقوا وينهبوا وينصبوا ويقتلوا بالحصانه
إللى اديناهالهم

الخايف والمستغل بس هو إللى هيرفض لكن إللى داخل وغرضه يساهم ويصلح هيوافق ويأيد



إزاى نكون فى بلد محترم وفيه حريات ولما حد يعمل "حزب" ميعترفوش بيه؟؟!!! فين التعدديه الحزبيه؟؟


نائب الشعب من حقه يستجوب ويحاسب أى حد حتى رئيس الجمهوريه ،حصانته مستمده من اسمه كمتحدث بالنيابه عننا، احنا إللى نقوله يوافق أو ما يوافقش مش الحكومه إللى تزغرله بعينها ولا تقرص عليه وتلوى دراعه وتفرض قرارات تخدمها

الشعب هو الأغلبيه والحكومه وممثليها وحز
بها هم الأقليه


نائب الشعب جاى يخدم الشعب مش يخدم الحكومه ولا مصالحه ولا يبقا عبد المأمور

مجلس الشعب هو "السُلطه التشريعيه" فى البلد،يعنى هو إللى يقترح القانون من قلب الشارع ومدى حاجة الناس ليه ويناقشه ويفرضه على الحكومه كمان ،ولو الريس اقترح قانون يبقا يتناقش ويترفض لو غلط او يؤذينا

عمركوا شوفتوا خادم بيدى لسيده أوامر؟؟؟ عجبى

وكمان مفيش 10 معينين من رئيس الجمهوريه..ليه؟؟ عاوزهم ليه؟؟ واشمعنا هو لوحده يكون له 10 يتكلموا
بإسمه؟؟ مش كفايه نواب الحزب الحاكم والحكومه؟؟

وكمان معدش يبقا مسموح لأى وزير أو مسئول فى الحكومه انه يرشح نفسه لمجلس الشعب، هو عنده مكان يتكلم منه ويصلح فيه، عاوز كرسى ليه فى المجلس؟؟؟!!! وكمان افرض الوزير معموله استجواب مين هيستجوبه ولا مين هيوافق عليه؟؟؟ بتحصل عندنا دى؟؟ عارفين ليه؟ علشان كله سلف ودين ولو استجوبتك النهارده هتستجوبنى بكره فتسكت احسن وخلى الطابق مستور،وكمان لو استجوبتنى مش همضيلك على القرارات والتسهيلات إللى عاوزها منى

ومفيش حاجه اسمها حزب غير معترف بيه او جماعه محظوره...عيييييب



بحلم....بمجلس شعب محترم مش مطبخ، بحلم ببيت الأُمه لنا كلنا مش بيت أُمُه لوحده

لولا انهم عارفين ومتأكدين اننا نقدر نغير مكنوش حطوا قدامنا كل العوائق دى ولا كل يوم يفننوا قانون شكل يسحبوا بيه سُلطتنا....سُلطة الشعب

بحلم ببرلمان فيه التصويت بنزاهه وشفافيه واقتراع إلكترونى يظهر على شاشات لكل الناس تبين الموافقين والمعارضين وعددهم من كل حزب ، مش تصويت "بوئيئى" ولا شفوى و" الموافق على هذا يتفضل برفع يده...موافقه" ،حتى من غير ما يكلف خاطره ويرفع راسه يعد "الأيادى" المرفوعه بالموافقه زى تلاميذ المدارس

أنا يوم ما هدخل مجلس الشعب هدخله بموافقة الناس وبصفتى كنائبه عنهم مش بشخصى كمرأه رمولها حاجه تسهى فيها ويطالبوها بالتمن بعد كدا

مش هكون معاهم معاهم عليهم عليهم

مش هزعق ولا هعلى صوتى ولا هرفع جزمتى فى وش حد، ولا هنام ولا هقزقز لب وسودانى ولا هلعب جيمز
عالموبايل تحت قبة المجلس الموقَر

مش هغيب ومش هصرف بدلات واخد امتيازات مفروض تكون من حق اصحاب السُلطه الحقيقيين إللى حطونى فى المكان ده، مش ههتف واصقف لوزير واتكالب عليه علشان يمضيلى ورقه بقلم احمر ويكسر عينى بعدها



مش هتعالى على الناس وابصلهم بقرف واتكلم عليهم كأنهم رعاع شحاتين غوغاء

هفضل أرفض واحلم واحاول واتكلم.....يمكن أنا معرفش اوصل للمكان ده بس حد من إللى بيسمعنى تكون فرصته أكبر ويوصل اسرع منى

هل من مُشَمِر؟؟؟ هل من خادم للشعب؟؟؟ هل من فدائى؟؟

عارفاكى وَلاّده يا مــــصـــــر

Sabrina Abu Ali