بييجي وقت لازم تسكت فيه , وعقلك يقولك ( خليها فى القلب تجرح , بدل ما تبان و تفضح ) .. و أوقات تحس إنك لازم تتكلم .. مش قادر تكتم و تخبي .. وإلا هتنفجر .. علشان متكلمش نفسك و الناس تقول إتجننت .. أو تخلق شخصية من خيالك تعيش معاها و تعزلك عن العالم ويقولو عليك براوي ... يبقى الحل إنك تفضفض .. اللى تقدر تتحمله خليه جواك .. و اللى متقدرش عليه .. ويفيض بيه قلبك و عقلك .. وزّعه على اللى حواليك ... هنا مش مجرد كلام و حكايات ... كل رسالة هي فيض من ( فيوض القلب والخاطر ) ....... أنا / صابرين أبوعلي

الأربعاء، ٢٩ أكتوبر ٢٠٠٨

على سبيل الأدب




من أكثر الأشياء "المستفزه" والمغيظه بالنسبه لى لما ايدى توزنى وأقلب محطات التليفزيون علشان أبص على نشرات الأخبار وألاقى مذيع أو مذيعه بيقول " وقد تفضل أصحاب الجلاله والفخامه والسمو ومعالى الساده الوزراء بـــ...." ولحد كدا مش بكمل لأن هتبدأ معايا نوبة سخريه واستهزاء تؤدى إلى إرتفاع فى ضغط دم "جَنابى"...إشمعنا أنا!!
بالله عليكم فى حد من كل أصحاب الألقاب دى يستحقها؟؟؟!! على الأقل مش كلهم، ممكن 1% بس منهم لما يكون محترم أوى وكمان ما من حقه يُلَقَبْ بالصفات دى؛ إزاى يكون بشرى خطَّاء ومع ذلك نتجرأ ونقول عليه "صاحب الجلاله والسمو"!!! ودا بقا إللى ممكن نسميه "إساءة أدب مع الله سبحانه وتعالى".


ينفع كدا؟؟!! ينفع واحد ممكن يكون-قصدى أكيد- بيكدب وينافق وممكن بيشرب حاجات مش كويسه فى نفس القعده إللى اتوصف فيها بإنه "صاحب الجلاله" وحد يتجرأ ويهبه الصفه دى. مش عاوزه أتهور وأقول انه كدا بيشرك أحد البشر مع الله جل جلاله فى إحدى صفات جلاله وكماله عز وجل.


فى حين بقا تلاقى الناس واخده الأمور ببساطه وعامله "البساط أحمدى" فى تعاملها وكلامها مع الله ورسله وخاصةً سيدنا محمد صل الله عليه وسلم وكمان آل البيت رضى الله عنهم وأرضاهم أجمعين. توصل لدرجة "إساءة الأدب" بجد من غير ما يقصدوا ولا يهتموا فى إنتقاء ألفاظهم.زى الكلمه إللى ذكرتها دى كمان، يعنى ايه البساط أحمدى؟؟!! يعنى عشوائيه وهمجيه؟؟!! يعنى إستهانه؟؟ يعنى تبسط إلى حد الإنحطاط فى الكلام؟؟؟!! أعتقد أنها مش من باب الأدب أبداً والله أعلم.

الأمثله على كدا كتيره فى تجاوزنا للأدب مع الله والمرسلين عليهم السلام وكمان شعائر الله، ويا ريت قبل ما نقرا ونقارن ونفكرنحط فى إعتبارنا الآيتين الكريمتين من سورة الحج، قال تعالى:" ذلِكَ ومَن يُعَظِم حُرمات الله فهو خيرُُ له عند رَبِه..." آيه 30 و قال تعالى:" ذلِكَ ومَن يُعَظِم شعائرَ الله فإنها من تقوى القلوب" آيه 32
مع الأخذ فى الإعتبار إنها كلها ملاحظات شخصيه بتضرر منها لما بتحصل وإنى مش بتكلم فى حرام أو حلال لأنى معرفش، أنا بس بتكلم فى تأدُب وتقديس لله ورُسُلِه وشعائره عز وجل.

عندك..تدخل الفرح من دول تلاقى المعازيم ضحك وفرفشه وحاجه حلوه خالص، والفرقه أو الدى جى –علشان متدينيين- يشغلوا "أسماء الله الحسنى" فى بداية الفرح وكمان المعازيم يصقفوا مع الإيقاع، دا كلام!!! ويادوب الأغنيه تخلص يفتح عالرابع وتلاقى سعد الصغير ينط فى وشك "عللى الدى جى ياله" وأوووأوووأووو ويهيص الفرح ويرقص المعازيم، بالله عليكم دا تعظيم ولا إستهانه بشعائر الله؟؟؟!!!!!
ولو سألتونى عن رأيى يبقا منشغلش الأغنيه دى خالص علشان لكل مقامِِ مقال


حاجه كمان بتستفزنى جداً؛ وهى ما يُسَمَى بـ" الأغانى الدينيه" مطربين ومطربات كانوا فى كليبات مقرفه وتلاقيهم لابسين أبيض وايشاربات بيضه وتمثيل وإدعاء خايب، مش مراعيين حتى أبسط قواعده..."الإتقان" يعنى تلاقي المطربات مزحلقين الايشاربات خالص وكمان بمكياج كامل!!! دا غير طبعاً اعتراضى الأساسى على تسمية "الأغنيه الدينيه"، إنشاد أو إبتهالات ماشى وكمان بإيقاع محترم وآداء فيه تعظيم مش إدعاء.


تلاقى بقا ناس كاتبه على بيوتها من برا آيات قرآنيه أو على العربيات "صل على النبى" او حاجات مماثله، وممكن العربيه تكون مش نضيفه أو جيرانك متغاظين منك قلبوا عليها الزباله، أو المطره بهدلتها،أو إنت مشغل الكاسيت عالآخر، أو بعد الشر العربيه تتكسر تلاقى الحاجات دى فى الأرض ،ينفع كدا؟؟!! إحفظ الله فى قلبك واذكره فى نفسك لو كان دا أفضل وأكثر إحتراماً. وكله كوم والمصحف على التابلو كوم تانى، يتبهدل وييجى عليه التراب ولونه يتغير ويدبل من الشمس لحد ما يشتكيك لـ"الله" وإنت ولا هنا،دا يصح؟؟؟!!


كمان بنستهين كتير فى الصلاه وبـ"الصلاه"،بينى وبينكم كدا،مش كتير بنشوف ستات البيوت بتصلى بأى حاجه لبسها وخلاص؛يعنى تكون هدومها فيها بقع أو مش نضيفه من مكان الطبخ ووقفة المطبخ وريحة البصل،ومع ذلك تصلى بيها عادى،فى حين لو سمعت صوت ضيوف جايين هتجرى تغير وتلبس أجمل حاجه وتتبرفن كمان، طب ما الأولى والأجدر نعمل كدا فى الصلاه وإحنا رايحيين نقف بين أيادى الملك العظيم، اعملى جلباب حلو للصلاه وبس، ودا بردو نوع من تعظيم شعائر الله وكمان على سبيل الأدب مع الله عز وجل.


كان فى حد معدى من تحت بلكونة بيتنا وسمعته بنادى على حد تان بمنتهى الأدب ودار بينهم الحوار ده:
-
يا أستاذ، لو سمحت، ممكن أعطلك شوى؟
- اتفضل
- حضرتك كنت بتصلى معانا فى المسجد دلوأت؟
- مظبوط، خير فى حاجه؟
- لو حضرتك ما تعتبرها إساءة أدب منى ممكن أقول لحدضرتك حاجه؟
- اتفضل..خد راحتك
- حضرتك يصح تدخل المسجد وتقف تصلى أمام الله عز وجل وإنت لابس بنطلون قصير أوى كدا؟؟!
- عادى، والرسول عليه الصلاة والسلام كان بيقصر ثوبه، دى سُنه.
- بس
حضرتك مش عاملها سُنه، دى موضه. والله يا أستاذ أنا عمرى ما خرجت من بيتى قاصد المسجد إلا وأنا فى أحشم ثوب، وما بتخلى عن البنطلون تحت الجلباب حياءً من الله ومخافة رجلى تبان او الثوب يكون خفيف، بحترم المسجد وبتهيأ لمقابلة الله سبحانه وتعالى.
الشخص الآخر إتلجم، ودار بينهم حديث طويل أنتهى بصوت كله خجل وحياء وإعتذار من أبو بنطلون قصير. غلبنى الفضول وبصيت عليهم، لقيت الطرف الأول رجل فلاح فى منتهى البساطه،والطرف التانى شاب خريج جامعه ولابس بنطلون" برموده" يصلى بيه!!!


ونفس الموقف اتكرر بشكل تانى مع ابن الصايغ إللى بنتعامل معاه، المغرب أذنت وما كان حد موجود غيره، قال لى "بعد إذنك استنينى عؤبال ما أصلى وآجى" ،قلت بضحك "هتصلى كدا يا أشرف؟؟! شكلك رايح البحر مش الجامع" أحرجنى لما لقيته بيفتح الخزنه ويخرج منها جلابيه يصلى بيها لأنه بردو كان لابس بنطلون بس حشمه شوى عن البرموده، "بنتاكور" وقال لى ببشاشه " عيب ،دا أنا رايح أقابل ربنا" والله كسفنى من نفسى، من كذا جهه، أولاً أول ما سمع الآذان استأذن يمشى فوراً، ثانياً "بيعظم" الشعيره ومجهز عدتها، ثالثاً أنا لو مكانه مش هسيب المعرض دا كله بمئات الآلافات لأى حد حتى لو كان أنا، بس هو سابه علشان...يصلى ويعظم شعائر الله، شفتوا الناس؟؟!!!


من كام سنه كدا قلت لأختى على سبيل الإقتراح إن الحروف العربيه وخصوصاً بالخط الكوفى أو الأندلسى تنفع نقوش هايله على العبايات والملابس فى العالم العربى بدل من الحروف الأجنبيه، ومرت الأيام وفعلاً اتحققت توقعاتى وكانت النقوش فوق من رااائعه وخلابه، لكن إتوعدنا بالمفسدين إللى إفسدوها بإنهم "كتبوا آيات قرآنيه" على الملابس، ودا بردو ميصحش، ممكن تدخل التواليت بيها او الهدوم دى تقدم وتترمى أو حاجات كتير كلها "مهينه" وتستحى إنك تعملها وانت لابس حاجه عليها الكتابات دى، وكمان-من غير ما تقولوا انى متشدده- أنا بستحى وبخاف أشترى أى دهب أو إكسسوار منقوش عليه أسماء الله الحسنى أو من القرآن أو إسم سيدنا محمد عليه الصلاة والسلام،لأنها بردو كلها حاجات معرضه للبهدله وترميها فى أى حته وانها تبلى مع الزمن.


كمان إحنا كتير بنتجاوز فى كلامن عن "الله" سبحانه وتعالى وكمان عن سيدنا رسول الله عليه الصلاة والسلام، تلاقى الواحد من دول عمال يقول "الله قال ،الله فعل" من غير ما يذكر صفات الجلاله، ولا يقول مثلاً "الله سبحانه ولا تُقالُ إلا له"، وبردو ممكن حد يقول "محمد" عادى كده وكأنه مش سيد الخلق اجمعين وإللى سيدنا آدم عليه السلام أقسم به على الله سبحانه وتعالى ليغفر له بعد ما عرف مقام سيدنا محمد عليه السلام لما لقا اسمه الشريف مكتوب على عرش الرحمن
ممكن تلاقى شيخ او داعيه بيتحدث عن سيدنا "محمد" وتلاقى المستمعين ولا هم هنا، ولا حتى يصلوا عليه ودول إللى وصفهم صل الله عليه وسلم بإنهم أبخل الناس.


عارفين...والله العظيم أنا بستحى أقول الجزء الأخير فى التشهد من غير ما اقول "سيدنا" قبل اسمه عليه السلام؛يعنى لازم أقول "اللهم صل على سيدنا محمد وعلى آل سيدنا محمد كما صليت على سيدنا ابراهيم وعلى آل سيدنا ابراهيم" وفى حديث شريف مش عارفه صح ولا لأ بيقول عن سيدنا محمد صل الله عليه وسلم " لا تسيدونى فى الصلاه" ولحد ما اعرف صحة الحديث من ضعفه ما هغير طريقتى وربنا يسامحنى ان شاء الله. حتى المرات إللى ماما زارت فيها الروضه الشريفه وخرجت تكلمنى بالتليفون تقوللى " انا سلمت لك علي سيدنا محمد،قلت له بنتى "صابرين" بتسلم عليك" وقتها فرحت وبكيت وقلبى انتفض من مكانه ،بس اتكسفت من نفسى، كنت خايفه ليكون وقت ماما ما بلغته السلام أكون أنا نايمه ولا شكلى غير لائق، والله ما لشئ غير حياءً منه صل الله عليه وسلم.لأن ربنا سبحانه وتعالى بيرد عليه روحه الشريفه علشان يرد السلام.


مش قادره استوعب الوقحيين إللى بيتجرؤوا فى الكلام والحديث عن سيرته الشريفه دا إزاى!!!؟؟؟ولا الهابط إللى فى وسط أغنيه يقول "صلوا ع النبى" أو حاجات مشابهه.دا مش من باب الأدب خاااالص.
مره بنتكلم عنه عليه الصلاة والسلام أنا وماما وكانت بتحكى لى عن بيته ورحلته والمسافه من الطائف للمدينه كل كلامها على استحياء علشان ما تقول كلمه ما توفيه حقه، وبعدين اتكلمنا على حالة سيدنا محمد الماديه،فضلت تكرروتعيد فى كلمه واحده"مع انه كان..كان ..كان"،ابتسمت وقلت لها "ياماما انتِ مكسوفه تقولى انه كان فقير؟؟ الفقر مش عيب، ولو مكسوفه ممكن تقولى "رقيق الحال" )عجبتها الكلمه أوى،وقالت دى أحسن بردو علشان هو عليه الصلاة والسلام كان رقيق أوى فعلاً، بذمتكوا كتير من إللى بتسمعوهم عندهم الحياء والتعظيم ده؟؟؟


بابا وماما قالولى ان فى ستات معتمرات معندهمش وعى دينى وبيتصرفوا بهمجيه، من الآخر كدا فى "منهن" أول ما بتدخل الروضه الشريفه "تزغرد"،فضحونا وكسفونا الستات، بقا معقوله عمرهم ما قروا ولا سمعوا الآيات الكريمه فى سورة الحجرات :" يا أيها اللذين أمنوا لا تُقَدموا بين يدى الله ورسوله واتقوا الله إن الله سميعُ عليم (1) يا أيها الذين أمنوا لا ترفعوا أصواتَكُم فوق صوت النبى ولا تجهروا له بالقولِ كجهرِ بعضكم لبعض أن تحبط أعمالكم وأنتم لا تشعرون (2) إن الذين يغضون أصواتهم عند رسول الله أولئك الذين امتحن الله قلوبهم للتقوى لهم مغفرةُ وأجرً عظيم(3)". إنتوا متصورين يعنى إيه حد يبقا واقف فى حضرة رسول الله وسيد الخلق عليه الصلاة والسلام؟؟؟!! يا الله، أكيد شعور لا يمكن وصفه، وأقل ما يمكن تقديمه هو منتهى الإحترام والسكينه والهدوء المناسبين لرهبة الموقف، ربنا يكتبهالنا جميعاً يا رب.


احيان كتيره تلاقى "الست الداعيه" لابسه آخر بهرجه كأنها عروسة المولد وألوان فاقعه آخر استهبال،والله العظيم مره واحده من إللى بينادوهم "ماما"كذا على الفضائيات كانت لابسه عبايه بيضا شفافه واديكوا انتوا حتى بتشوفوهم عاملين إزاى، دا بقا يبقا تعظيم لله ورسله وشعائره؟؟؟!!!


النظر "للكعبه المشرفه" عباده فى حد ذاته، بس تنظر وتتمعن وتتفكر، والمفروض إنك بتقول "اللهم زد هذا البيت تعظيماً وتكريماً وتشريفاً وزد مَن زاره تكريماً وتشريفاً" ، مش بقا إللى بيطوف وهو بيتكلم فى التليفون أو بيدفع الطائفين علشان "ينجر" ويخلص الأشوات وخلاص،فين التعظيم والخشوع؟؟!!


من الحاجات المثيره للإستفزاز كمان... بعض"المنتقبات"، صحيح أنا مش محجبه شرعى أوى ولا منتقبه بس ربنا يهدينى ليه يا رب، ومع ذلك يوم ما هنتقب مش هكون زى كتير من يللى بشوفهم فى الشوارع والمناسبات،" نــقــاب يعنى خلوه مع الله سبحانه وتعالى، عزله إرتضيتها بكامل إرادتى، عاوزه أكون فى "معية الله" جل وعلا، من غير لفت إنتباه، تلاقى منتقبات ولابسين عبايات ضيقه،أو راسمين عيونهم بشكل ملفت جداً أو حاطين بارفان أو لابسن كعب عالى وصنادل مفتوحه،،، حاجه مش مقنعه خالص وتلفت الإنتباه أكتر من غيرها وكمان بتثير السخريه والنقد والتعليق غير اللائق على الحجاب والمحجبات، المفروض الحجاب ده "شعيره" من شعائر الله والنقاب أعلى درجاته يعنى له تقديره وتعظيمه الخاصين بيه عن غيره، صح ولا إييييييييييه؟؟؟!!


كلنا المفروض نحب "آل بيت" رسول الله صل الله عليه وسلم،جداً. لكن إحنا بنخرج من الحب للتجاوز، بس المره ده مش تجاوز بالتقليل،لأ..دا تجاوز بالتضخيم، خايفه يكون إللى عملناه فى مصر من وجود لأضرحة ومقامات بعض آل البيت فى المساجد يكون لا قدر الله نوع من التجاوز والشرك بالله، الرسول عليه الصلاة والسلام أوصى بحبهم مش بتقديسهم؛ يعنى ميصحش إللى بعملوا نذور أو يطوفوا بالمقام أو يولعوا شمع أو يقولوا كلمة"مدد"دى ، علشان مفيش "مولى" غير الله عز وجل وما فى وسيط بيننا وبينه.حتى آل البيت أنفسهم ما يرضوا عنها. وكمان سيدنا رسول الله قال فيما معناه:" إنما أهلك الذين من قبلكم أنهم اتخذوا قبور صالحيهم مساجداً" يعنى إحنا بيللى بنعمله دلوقتى نكون إيه؟؟؟!!! صح ولا غلط؟؟؟ بنعظم ولا بنُشرِك؟؟!!!


ربنا يعلم محبة آل البيت فى قلبى ونفسى، وهقول لكم على سر حياتى وأغلى أمنيه عندى فى الدنيا كلها، علشان لو حد فيكم "غار" منى وعمل زيى ربنا هيشاركنى معاه فى الثواب إن شاء الله


زمان وأنا صغيره لما عِرفت إن ممكن تعمل عمره لحد فارق الحياه وتهديها له، فكرت أعمل عُمره لحد من آل بيت الرسول عليه الصلاة والسلام، فكره ساذجه؟؟! وهتقولوا محدش محتاجها منى؟؟! بس على العموم دى هديه ولو عرفتوا ههديها لمين كمان، ههديها لحد من آل البيت ومن أعظمهم مكانه فى قلب ونفس حبيبى وسيدى محمد عليه الصلاة والسلام وكمان ما حضر أى عُمره ولا حج، عرفتوا مين؟؟؟ ...أمى "السيده خديجه بنت خويلد" زوج وحب رسول الله صل الله عليه وسلم.
قررت أعمل لها عُمره هديه، وهسأل شيخ ثقه إن كان ينفع أعمل عُمرتها قبل عُمرتى ولا لأ، لأنى بردو أستحى أقدمها لنفسى قبل ما أقدمها لها رضى الله عنها وأرضاها، خير نساء العالمين وسيدة نساء الجنه. ولو قدرت أحج عنها كمان والله ما هتردد لحظه.


كل إللى قلته وأكتر كمان والله ما بقصد بيه غير لفت الإنتباه لحاجات مش بناخد بالنا منها وبنستهين بيها، جايز مش حرام، بس أنا مستعيباها وشايفه إنها مش من باب الأدب مع الله ورسوله وشعائره المقدسه.
عاوزه منكم بس قبل ما تعملوا أو تقولوا حاجه تفكروا الأول...يا ترى دى أدب مع الله ولا لأ؟؟؟ تعظيم للشعائر ولا إستهانه بيها؟؟!!!
هل تصرفاتنا دى "على سبيل الأدب" ولا منافيه للأدب؟؟؟


طولت عليكم؟؟ بس عساها تكون بفايده إن شاء الله وتنفعنا دينا وآخره عند رب العالمين


sabrina abu ali


ممكن تلاقونى وتسألوا عنى فى العنوان ده

^

^

^

^

الأحد، ٢٦ أكتوبر ٢٠٠٨

أنا وهـــــــــــو و...هـــــــــــى


الخايبه والغايبه (أنا وهو وهى)..ه


والله العظيم بحبه وعمرى ما حبيت ولا هحب حد زيه دا لو أصلاً فى حد زيه........هو كدا، وبغض النظر عن الصوت إللى عمَّال يزن ويعلى جوايا بكلمة "غبيه" بس مش مهم، غبيه غبيه وبردو بحبه.


من قبل ما يطلع لى مخ ف راسى وحتى بعد ما طلع وأنا بحبه ، فتحت عينى عليه وما أعرفش حد غيره ممكن يستحق كل الحب ده، أنا أصغر منه بقا أو أكبر متفرقش معايا ، 26 سنه حُب تخيلوا؟؟ دا حتى لو مكنش حب يبقا إدمان وصعب جداً العلاج منه فى المرحله المتأخره دى؛ بئيت حاله ميئوس منها.
أنا كدا وصلت "إفريست" الغباء بالحب ده خصوصاً وإنى عارفه إنه ف الآخر مش بتاعى وهيروح لواحده تانيه ، حتى هو نفسه اتخنق منى وقالهالى بكل وضوح :" شوفى لك حد تانى أخنقيه غيرى"، شوفتوا "الآسى"؟!..هان عليه الحب دا كله؟ وعِشرة السنين دى كلها شوفوا فيها كااام ساعه ضحك وقلق واختلاف واتفاق وخناق ممكن يوصل لشد الشعر والضرب والعض كمان...كل دا ينساه علشان خاطر واحده يا دوب لسه بيعرفها جديد؟؟!!
هتعرفه زيي دى؟!!! هتحس بيه وتخاف عليه زيى؟؟ هتعامله زى ما بعامله؟؟ دا أنا بسمع كلامه أكتر من بابا وبستأذنه قبل ما حتى بابايا ومامتى يعرفوا انا عاوزه إيه.
استحملت أوامره ونواهيه وعمرى ما قاوحته، أرد على أى حد بس هو لأ؛ يقفل النقاش بكلمتين:"كبري مخك" وبس خلاص،،، يا سلام لو حصل يوم وخرجنا سوا...يبقا يوم عيد ،مع انها بتبقا خروجه مرعبه من كتر "النظرات والزغرات" لو حصل منى أى حاجه كدا ولا كده ولا حتى اتكلمت وهو معايا..يوه..قصدى وأنا معاه، إيه الإرهاب ده؟؟ مين يستحمل كدا، دا أنا لو مراته مش هستحمل الإستبداد دا كله.
عينى عليه فى الرايحه والجايه، بستنى طلته زى هلال رمضان ،تنطبق علىَّ أغنية "م الباب للشباك رايحه وجايه وراك"، دا حتى يوم ما قال يا جواز كنت عاوزاه يتجوز كل البنات علشان إللى ما يلاقيه فى واحده تكمله التانيه...شوفتوا السذاجه.
عارفين حكاية الست إللى "الحجاج" حبس جوزها وابنها واخوها وقالها تختار واحد بس يفرج عنه فقالت:" الزوج موجود والابن مولود لكن الأخ –بعد الشر بعد الشر بعد الشر- مفقود" واختارت اخوها ، آهى دى بقا الستات ولا بلاش. شوفتوا الحب، باعت جوزها وابنها علشان خاطر اخوها، فين بقا الست هانم مراته كانت تيجى تخلصه وزمانه بعد ما خرج من السجن جرا عليها......رجاله!
الدنيا كانت ماشيه عادى وجميله أوى، وفجأه..نظره ففكره فموعد مع باباها فدبلة خطوبه..وخلاص بقا، ظهرت عليه*** "الأعراض" بتاعة المرض إياه؛؛ سرحان وابتسامات مع نفسه كدا من غير سبب، انشكاح وانشراح،مكالمات مفتوحة المده، مظاهر طفوله متأخره بانت فى الدباديب والبالونات وقلوب كل الألوان مع إنه رايح جاى يؤللى "كبرى مخك يا ميس" ،وخلص الكلام....
بقا كل إللى بينا "إزيك؟ وحشتينى" ولذقه على الخد ده وزيها ع الخد التانى وياخد التليفون ويعتزلنا، اشمعنا دلوقت فاضى؟؟ ولا صعبان عليك المصريه للإتصالات وعاوز تنفعها بعد ما المحمول وقف حالها؟؟!! ما كنت الأول على طول خارج مع صحابك أوى عندك شغل، أنا عارفه إن الكلام ده بينطبق عليكوا كلكوا وفيكوا إللى بيبتسم وفيكوا المكسوف من نفسه وهو بيفتكر كدا إن آخر مره قعد فيه مع أسرته واتجمعوا بجد كانت يوم العيد الكبير الصبح علشان خاطر عيون الفته واللحمه. بذمتك مش صح؟؟
هو أنا باين علىَّ "غيرانه" ولا إيه؟؟ جايز..ما أنا عندى حق بردو، أصله بحبه بغباوه.

الأخ دا حاجه كبيره أوى ، مفيش حد ممكن يبقا زيه مهما كان كويس،عمرى ما قلت لحد "إنت زى أخويا" ولا بحب حد يقولها، مينفعش حب العمر تقارنه مع وافد جديد عليك.
بصوا كدا فى القرآن الكريم والسنه الشريفه..مش هتلاقى أى آيه أو حديث بيوصي الإخوات ببعض، أصلها من الفطره؛ حاجه كدا ربانى محدش له يد فيها وبتتولد معانا، اتخانقوا واتضاربوا واتخاصموا..بس حد يؤول كدا كلمه على اخوك أو اختك ولا حد يتخانق معاه، هتنسى كل حاجه مهما كانت وهتجرى عليه، خليه كدا يؤل "آه" ماديه أو معنويه..أراهنك لو نمت الليل قبل ما تعرف انه خلاص بقا كويس،يمكن هو يطمن على حاله وهتفضل انت قلقان عليه.
والله دى مش مبالغه..دا العادى جداً واقل من العادى كمان، حُب يا ناس حُب ،مُنّزه من غير أغراض.
بين الاخوات فى "رابط" ضخم جواه روابط كتييييييير صغننه، دقات قلب واحده إتكّوِنا على صوتها ،رحِم واحد ضمنا وحمانا لحد ما نخرج للدنيا ،نفس الحبل السُرى إللى أكِلنا قبل ما نعرف ناكل ،ونفس فصيلة الدم إللى بتجرى فى عروقنا وتغذى المخ والقلب وكل حته فينا، شالتنا نفس الأيادى وضمتنا نفس الأحضان، تربيه واحده بكل مبادئها وأخلاقياتها واتجاهاتها،عشنا بين نفس الجدران إللى كل واحد فينا له أثار شخبطه وتفانين عليها، زكريات حلوه ومره، ضحك وبكا، لعب وتنطيط وكسور وجروح ،صغير بيتأثر بكبير وكبير بيخاف على صغير ويحتويه ويكون له الأب والأم والصديق ومستودع الأسرار....ياااااااااه ملايين الحاجات لو افتكرت حاجه واحده منها هتفكر مليون مره قبل ما تغلط فى حق أخوك .
عارفين؟ أنا مش غيرانه والله إنه بيحب وهيتجوز ويعيش مع واحده تانيه، أنا بس بحاول ألاقى حجج علشان أزعل نفسى منه وأعمل إنسحاب تكتيكى مُشَّرِف قبل ما هو يعلن الاستقلال التام ويطالبنى بالجلاء الكامل، أنا بجد ساعات بحس إنى خنقاه من المراقبه والقلق...دا أنا مره عملت له فضيحه و خرَّجت كتائب تدور عليه لما اتأخر ساعتين...لو جوزى كان طلقنى.
مـــــــــواقف وطـــــــــرائف:
إللى يغيظ بقا فى الموضوع هو "التفريق" فى المعامله بينى وبينها؛ دا ممكن مواقف ووجهات نظر تتغير بالكامل من النقيض للنقيض، هوريكوا شوى منها:
1- أنا: يللا نخرج نتمشى ؛زهقانه، نروح فى اى حته
هو: معلهش مش فاضى. –أو (والناس اللى ميعرفوش انك اختى يقولوا علينا ايه؟) ه
انا:بسيطه...نخرج مع بابا وماما كمان
هو: آه ونعمل زفه ف الشارع ؟؟طب ما تريحينى وتخرجى معاهم وتسيبينى ف حالى
شوفتوا الكبسه؟؟
لو معاها بقا:
هى: أنا زهقانه
هو: يللا نخرج نتمشى شوى ،وعلشان ما نبقاش لوحدنا هناخد باباكى ومامتك واخواتك كمان إيه رأيك؟
هى: هؤول لبابا واشوف
ويا رب باباها ما يوافق والكبسه المره دى تبقى ليه هو
2- موقف تانى:
أنا: عاوزه أكمل دراسات عليا
هو"بخنقه طبعاً": إنت مش هتبطلى اختراعات؟؟ هتعملى إيه بيها؟، كفايه عليكى الشغل، وكمان الدراسه بتبقا متأخر وهترجعى بالليل.
أنا: علشان خاطر ربنا و..و..و.. (وبعد طول محاولات اقناع مستميته)ه
هو"بمنتهى الزهق": طيب ..خلاص..إنت حره، بس يا رب تسقطى ولا تطلعى بماده علشان متكمليش تانى.

معاها بقا الآيه مقلوبه:
هو: يا بنتى ذاكرى بدل ما تطلعى بماده ويقولوا إن خطيبك هو إللى خيبك
هى: حاضر..هحاول
(طب وانا مش هيؤلوا ان أخويا هو إللى دعا علىّ وخيبنى؟؟)

وهكذا بقا...قيس على كل حاجه ، وكل واحد يفتكر مع نفسه يا ظلّمّه...هى آه وأختك لأ؟؟ تانى بردو استبداد وتسلُط؟ ولا علشان عارف ان انا كدا كدا أختك؟؟ يعنى لا هينفع تطلقنى ولا هنفع أخلعك...مدبسين فى بعض طول العمر إن شاء الله.
كان وسيكون:
عمره ما نسى عيد ميلادى، ورد وهديه وكل سنه وانت طيبه وعيشه يعنى، صحيح هو كان بيخلى زميلته تشترى لى الهديه علشان معندهوش وقت،والأوفيس بوى بيجيب له الورد،بس المهم انه افتكرنى. بذمتكوا بقا اى واحد مع خطيبته هيعمل كدا؟؟لااااا وألف لا، دا انت بتنزل تلف البلد على هديه وبوكيه الورد بتختاره ورده ورده ومش بعيد تقيم الليل لمدة اسبوع وتدعى ربنا ان السما تمطر برفان والعصافير بدل ما تصوصو تعزف البلو دانوب فى صباح ميلادها...عينى ف عينك كدا .وإوعى تقول مبيحصلش.
وطبعاً أختك بعد كدا بتتنسى ولا حتى هتفتكرها بورده مجففه أو حتى صناعيه.
· معاها الصوت واطى ومنتهى الرقه والرومانسيه يا نحنوح يا مسهوك، مع أختك بتنططها لو قالت لك "لأ" ، كل موضوع معاها قابل للمناقشه ومع أختك "السكك مقفله"، كان فى واحده ست زمان أخوها كان متجوز وحده اسمها حُسنه بيكون معها نسمه ومطيع أوى ومع باقى أهل البيت بيشخط وينتر وعامل لهم رعب ،آخر ما زهقت قالت إيه؟؟"أسدٌ علينا أرنوبٌ لحُسنه"، وربنا يستر..مفيش ملوخيه" باللأُسود" لكن فى ملوخيه بالأرانب.
أنا كل مره بكتب ببقا عاوزه أوصلكوا حاجه مهمه بس بدعابه ومن غير غلاسه..يعنى كل إللى بقوله دا مش للتسليه، لما بكلم الولد أو البنت ببقا طمعانه ان الرساله توصل ونحاول نعيش مع بعض حياه أفضل زى بتاعة زمان، سوا إخوات أو متجوزين أو جيران أو أصدقاء. المره دى بردو أنا بتكلم لمصلحة البيت المسلم؛لو الرجاله أخدوا بالهم من تصرفاتهم وما بالغوا فيها مش هيحصل مشاكل، مش قصدى الحاجات التافهه اللى قلتها قبل كدا، انا قصدى الحاجات الكبيره وإللى بتشعل النار فى كل بيت، الراجل هو إللى بإيده يخلى مامته وأخته "حما" لمراته أو أم تانيه ليها لما يكون ذكى كفايه فى التعامل معاهم.
للأسف الواقع و خبرة السنين فى مجتمعنا مفيهاش اى إنصاف للإبن وزوجته..جايز علشان الغالبيه العظمى كدا، فى مثل بيقول إيه: "الأخ أخ مراته والخايبه تحلف بحياته" يعنى مجرد ما يتجوز بينسى ان له إخوات، والله أنا مش لوكال ولا بيئه..بس بحب الأمثال الشعبيه وبتشدنى جامد،ولى معاها قصه ممتعه، فوقتوا من المثل الأولانى
؟
طب خدوا المثل التانى بالمره بقا:" ربى يا خايبه للغايبه" يعنى الأم بتربى وبتيجى مرات الإبن إللى لسه فى علم الغيب تاخد ع الجاهز
على فكره...والله دى "رساله فانتازيه" واستفزاز..كلام كل يوم بقوله لأخويا من يوم ما خطب علشان مش يقع فى الأخطاء دى، دا أنا بمووت فى خطيبته والله بحبها أوى، لأن حبى لها على أد حبى ليه، بس تقولوا إيه فى صوابعى إللى بتاكلنى ورغبتى المستمره فى استفزاز كل الناس وخصوصاً إللى بحبه...داء فى دى. بكره أعقل لما آخد علقه محترمه .
دا الرجاله دول نسمه...هم بيغلطوا أبداً ،إحنا إللى ما بيعجبناش العجبيللا بقا..سلام، واشوفكوا على خير وماحدش يتهور علىّ فى الردود لو سمحتوا ؛ إقروا بتأنى
ولو حد فيكوا بيغلط وبيعمل كدا مع اخوتهن،أرجوكم يراجع نفسه، والله دا إحنا غلبانيين وكلمه ترضينا وشخطه فرحنا وابتسامه ممكن تجيب لنا سكته قلبيه من الفرحه او نعمل علشانها صلاة شكر
best regards,
sabrina abu ali

الخميس، ٢٣ أكتوبر ٢٠٠٨

يللا نتكلم فى الأزمه











محاوله لفهم الأزمه

أولاً عاوزه أؤول لحضراتكم ان فى ملف باوربوينت ملحق خاص بالرساله دى هتلاقوه عربى وانجليزى على صفحة الجروب المتميز

analyse_this

ومعاه كام ملحوظه وصوره كدا عالماشى. اكيد كتير فهمتوه انجليزى ، بس أنا قلت النبى عربى وكفايه نعمل لهم قيمه ما بيستحقوها....أتمنى يوضح الصوره اكتر

كان نفسى أتكلم فى حكاية أزمة الإقتصاد الأمريكيه-العالميه دى من أول ما بدأت، بس اتكسفت منكم وخفت أعُك وتقولوا إيه الجنان والتهييس ده؟
بس رجعت قلت "إن مكنتش هخَرَج جنانى هنا هوديه فين؟!!" وكمان أخدت أمر بالكلام فماصدقت علشان أطلَع إللى فى نفسى

أول حاجه حبيت أعملها لما سمعت وقريت أخبار الإنهيارات الإقتصاديه دى إنى كنت عاوزه أطلع لسانى لكل العالم وأغيظه بشماته وأهتف بأعلى صوت.....تـــســـتــاهــل.
العالم أو الدول والحكومات هى إللى عملت فى نفسها كدا، هم إللى وافقوا على وجود "قطب اقتصادى واحد" بإيديه كل الموازين، يعدل ويقلب ويرفع ويخفض بمزاجه.
ويمكن طبيعة شغلى خليتنى أفكر فى الحكايه دى كتير ومن زمان، فعلاً مفيش أى عُمله فى العالم لها نفس القيمه زى الدولار ولا تقدر تنافسه، دا حتى انجلترا او روسيا لما بيستوردوا او يصدروا بيتعاملوا بالدولار!!! ومحاولة أوروبا انها تتكتل ويكون لها عُمله مُوَحدَه كانت بردو علشان يكون فى حد يقدر يقف أؤودام العملاق الأمريكى الورق. لكن دوراليورو فى النهايه اقتصر على المستوى الداخلى بين افراد دول الاتحاد المتعامله بيه، لكن لما ييجوا يتعاملوا برا بيكون بالدولار، ودا واقع لأننا بنصدر لبعض دول الاتحاد الأوروبى بالدولااااااار الأمريكى
.
فين ومين بقا إللى يقدر يواجه؟؟؟ محدش فكر لو الدولار ده انهار هيحصل إيه للعالم؟؟ محدش حسب حسابه على ان امريكا دى ممكن تختفى فى يوم أو حتى ميلاقوش "ورق" يطبعوا عليه عملتهم "بهزر" بس بردو بتكلم جد.افرض يا سيدى،معندكش خيال؟؟

العالم دا كله ماشى بنفس النظام على مستويات مختلفه، نظام "القطبيه والإنفراد" سواء انفراد اقتصادى أو سياسى أو عسكرى، كله عاوز يبقا هو وبس والباقى يدور من حواليه فى انتظار عطفه واحسانه.

فاكرين الإشاعات إللى طلعت على صحة الرئيس؟ وقتها البورصه اتهزت والإقتصاد انضر، علشان واحد بس، بشرى مش إله وممكن يموت فى أى لحظه وإللى خايفين منه يحصل، علشان مفيش غيره ومفيش بدلاء جاهزين ياخدوا الدور.
نفس الحكايه بس من منظور عالمى فى أمريكا ودولارها، احنا عندنا قيمة الاقتصاد بالحاكم لكن عندهم قيمة الحاكم بإقتصاده.

مفيش بديل يقدر ينافس أو حتى يحل محله فى حالة الاختفاء أو الإنهيار. وبعده بقا كل الدول تحس انها عيال تايهه من أمهاتها فى المولد، كله بيعيط ويصرخ ويخبط فى بعضه، مش عارفين راسهم من رجليهم.
ليه كل دوله متعملش لنفسها ولعُملتها قيمه مُعتَرَف بيها دولياً؟؟!!ليه نتعامل بعملات غيرنا ونديها أعلى من يللى تستحقه؟؟!!! ليه الناس بتقبض بالدولار فى بعض الشركات؟؟!! وليه فى بعض المصالح بنتعامل معاها بالعمله الصعبه؟؟!!ليه نبقا فى قلب بلدنا وفى سلع بنشتريها بالدولار وباليورو كمان؟ فين الجنيه؟ الله يحرق إللى غرقوه

إيه قلة القيمه وإنعدام الانتماء إللى احنا فيه ده.

مره كنت بتكلم مع شخصيه مهمه ومدير فى إحدى الهيئات الدوليه الإقتصاديه، لقيت الراجل بيعاملنى على إنى عيله من دور أحفاده فقلت مفيهاش حاجه لو بالمره كلمته عن إللى بيدور جوايا ولو قال علىَّ عبيطه مش مهم، عيله وغلطت
وقتها كنا بنتكلم فى الإقتصاد الأمريكى وإن فى ايديهم كل الخيوط، يعلوا الدولار وينزلوه بمزاجهم ويغطوا العالم بيه أو يعروه من غيره بردو بمزاجهم، واتحدانى ان ماكان معظم الموجودين جيوبهم فيها دولارات....هيمنه كامله وإحكام للسيطره حتى على الأفراد داخل بلادهم.
قلت له :" حضرتك هى أمريكا جابت الفلوس دى كلها منين؟؟!! هى مش زيها زى دول العالم لازم يكون لكل دولار بتطبعه قيمه بتغطيه من الدهب قابله للسداد عند الطلب فى أى وقت ؛لأن الدهب فعلاً هو الحاجه المُعترَف بقيمتها عالمياً حتى فى البرارى والغابات ومجاهل العالم؟؟ هل دا معناه ان أمريكا عندها غطاء الدهب دا كله إللى تسدد بيه ولا هى معتبره إن "الجيب واحد" وان البنوك المركزيه والمناجم فى العالم كله ملكها تكبش منها وقت ما تحب؟؟!!
لقيت الراجل سكت، قلت أكمل إستهبال وإديته بقيت إللى فى نفسى :" بيتهيألى إن أمريكا بتطبع وتوزع وخلاص، حتى لو ماعندها الغطاء الكافى، أصل مين هيحاسبها ويقول لها رايحه فين؟؟ يعنى تخيل حضرتك شخصيه محترمه ورجل اقتصاد معروف ومليونير، فى كل الأماكن إللى بتتعامل فيها حد مره فكر يبص فى الفلوس إللى بتديهاله يشوفها سليمه ولا مزيفه؟؟ أو مره فضلت تاخد طلبات وتاكل وتشرب من أغلى حاجه وفوق طاقتك بطريقه مثيره للشك وبصيت لقيت المتردى أوتيل جاى يقولك كفايه كدا او الحساب لو سمحت علشان بسلم الشفت؟؟ مستحيل طبعاً، لأنك ثقه والكًل متصور ان مش ممكن يصدر عنك حركة نصب.
ضحك بسخريه وقال لى :" إنتِ كدا بتتكلمى عن أفراد أو عصابات وشيوخ منصر مش عن دول وسياسات، مفيش دوله "تجرؤ" على التلاعب بإقتصاده ومقادير العالم بالشكل التهور ده، محدش هيسمح لها ، دى أقوى قوه فى العالم ومستحيل تنهار،فى إللى يسندها".

خفت يضحك علىَّ ويعلى صوته واتفضح فقلت اسكت أحسن وأديها ماشيه

وعلى رأى الست "ثومه" ،ودارت الأيام ومرت الأيام وطلعت مش عبيطه، حتى أخويا ابن أمى وأبويا ضحك علىَّ وقال لى بطلى هبل لما قلت له إن أوروبا بدأت "الترقيع" علشان تخرج من أزمتها حتى لو بالكدب، منكوا يعنى ان الـ79 مليار جنيه استرلينى إللى الساسه فى الداوننج ستريت قرروا يطرحوهم فى 3 بنوك لتنشيط الاقتصاد ومحاولة انقاذه هل لهم كلهم"غطاء دهب" يكفيهم؟؟؟!! ولو فى ليه ما طرحوهمش من بدرى وسابوا أمريكا تستعبدهم؟؟!! ولا كانوا شايلينهم يبيضوا فى الصناديق؟ أو جايز خايفين عليهم من الحسد؟؟
؟!!!
نفس المأساه بتتكرر، مستنيين إللى ينقذنا وياخد بإيدينا حتى لو للهلاك، لو نجحت محاولات الاتحاد الاوروبى وانجلترا يبقا هينتهى عهد الدولار علشان يبدأ عهد اليورو والاسترلينى، وكله ترقيع وضحك علينا، واحنا بمنتهى العبط نمشى ورا أى حد "معاهم معاهم،عليهم عليهم" عاش الملك...مات الملك
إللى عاوزه أقوله انى متغاظه أوى علشان انضحك علينا، تخيلوا بقا ان كل الخدمات والسلع إللى كنا بنقدما مقابل الدولار دى قدمناها "مجاناً" مقابل ورق لا يساوى قيمة الحبر إللى مطبوع بيه، يعنى احنا معانا شيكات بددون رصيد أو عملات مزيفه و........ب
الــــــــقـــــــــانــــــــون لا يـــــــحـــــــمــــــــى الــــمـــغــــفـــلــيــن


دَوَر بقا شوف هتاخد حقك من مين؟؟؟ هأهع
إضحكوا معايا على اللعبه، أمريكا بتشترى الذهب الاسود "النفط" من العرب والاسيويين بورق عديم القيمه يعنى ببلاش،


المضحوك عليهم ياخدوا الورق ده يشتروا بيه عقارات ودهب ويتفسحوا وياكلوا ويشربوا فى أوروبا ويدفعولهم بالورق بالورق الفاضى ده، أوروبا بقت بنوكها متخمه بالولارات "إكوام إكوام و رزم رزم" تيجى تحوله دهب علشان ما يحصل كساد من كتر العُمله وتقول لأمريكا إدفعى أمريكا تقول.....بح، مفيش
أوروبا بقا وغيرها تروح تولع الورق ده وتدفا بيه بدل البترول
الأهم إن أمريكا شغلت مصانعها وطياراتها ومدافعهل وبوارجها الحربيه ودفت بيوتها بالبترول العربى المجانى ، وكله من فلوسنا وشقانا يا بلطجيه يا......انتوا عارفين الباقى


بس سوريا مطلعتش مغفله وللأسف ملف الباور بوينت مجبش حاجه عنها فإضطريت اضيف حاجه عنها عالماشى، مع إنها تستحق الاحترام والتقدير، عارفين أمريكا بتلكك لها ليه؟؟ علشان الرئيس الرجل بشار الأسد أوقف التعامل بالدولار من يوم ما تولى وعمل "تدويل" للعمله، بردو هو كمان يتعامل بأى عُمله حتى لو "الزباطه" بتاعة "زكيه زكريا" فى برنامج رمضان المهم انه ما يتعامل بالدولار
ولأن لازم تدور على حد قوى تتحامى فيه وتمشى فى ضله، فنلاقى سوريا ماشيه مع إيران على طول الخط وبدأوا "يأنتموا" سوا، وايران تقول لو حد مد صوبع على سوريا أنا إللى هرد عليه، وعلشان سوريا "ترد الجميل" فتحت الباب على وسعه أمام "الشيعه" وصور الخمينى وحسن نصر الله بقت على جدران معظم المبانى فى دمش وغيرها من مدن سوريا، رغم ان طول عمرهم مقعدين الشيعه على جنب وكاتمين نفسهم، بس نقول إيه، الفلوس بتغير النفوس والسياسع ما بتخلى حد على حاله
ناس كتير ما انضرت بالأزمه دى، زى سوريا وإيران واحتمال الأردن علشان مظبطين نفسهم داخلياً وكافين خيرهم شرهم
بس إحنا بقا........هنتظبط ، شنيور ورشق فينا، لا هيبطل دوشه ولا حفر لما يجيب قرارنا ويطلع من نفوخنا.

عاوزين تعرفوا قيمتنا كام والجنيه إللى معاك ده قيمته إيه؟؟ جرام الدهب تقريباً بـ130 جنيه ،يعنى جنيهاً ميجبش فتفوتة دهب ،ممكن يجيب "شمه" من بعيد لبعيد، ودا كمان على أساس إيه؟؟ إننا يعنى عندنا الغطاء ده ومش بيتنصب علينا زى غيرنا. الجنيه بتاعنا ده المتغطى بيه كأنه متغطى بورقة شفاف، لا بتستر ولا بتدفى دا غير لو حبة هوا أو مطره جم عليه هيبوشوه أو يطيروه أو يغرقوه
الله يرحمك يا جدتى، كان جرام الدهب بـ80 قرش...شفتوا الفرق
مش قلت لكم إن كل زمن بقيمة إللى فيه!! وعجبىوقبل ما حد يتهمنى بأى صفه كدا ولا كدا، أحب أقول لكم انى مش دارسه اقتصاد، يادوب قراءات عالماشى وماده أخدناها جنب المواد العلمى فى الثانوى على حبة فقاقه وتشغي مُخ ودُمتُم

best regards,
sabrina abu ali

الاثنين، ٢٠ أكتوبر ٢٠٠٨

خليك فى حالك وملكش دعوه


if u r "free" & have nothing good do say or do, just come & gossip with us



قالولنا إن "الإنسان" حيوان إجتماعى، ومع إن الصفه دى مشتركه بينه وبين كائنات كتيربردو بتعيش فى جماعات إلا إنه من الواضح ان
"الاجتماعيه" دى هى أكتر حاجه مؤثره فى حياة البشر

بيتهيألى كمان إنها "أسوأ" حاجه فى صفاتنا كـ"ناس"، لأننا بنستغل وجودنا فى "مجتمعات" أسوأ وأشر إستغلال. لدرجة إنى أحيان كتيره بتصور لو كنا بنعيش فى "مُنعَزَل" أو "مُنفَصَل" كان هيبآ أهون من وجودنا فى "مجتمع".
بجد ؛ الناس ما وراهاش غير المشاكل. وكأننا عايشيين مع بعض علشان نؤذى بعض. وعلشان نِقلِق ونؤلم بعض.
فى حد بيغنى "كلام الناس لا بيقدم ولا يأخر" ، ودى مقوله ساذجه جداً، صحيح ان كلام الناس مش بيقدم، لكنه والله العظيم "بيأخر" كتير أوى أكتر مما نتصور.

يكفى إنك دايماً بتكون عامل ألف حساب لــ"كلام الناس"، ياما مشاريع وأفكار بتتأجل أو حتى تتلغى بسبب"كلام الناس"، وبردو بيوت بتتخرب ومشاكل بتحصل وأوجاع بتقتل بسبب "كلام الناس".

دايماً حاسس إنك متراقب وإن أفعالك ممكن تكون مُنتَقَضَه أو حتى مرفوضه كلياً بسبب الناس وكلامهم ، مع إنها ممكن تكون حاجات عاديه وطبيعيه جداً لكنها بتختلف من بيئه للتانيه ومن تفكير لآخر، مع ملاحظة إنها مش عيب ولا غلط ولا حرام، بس "الناس" شايفين كدا.

فى آيه فى سورة الأحزاب بتؤكد فعلاً اننا بنعمل حساب كبير للناس وممكن خوفاً منهم ما نعمل الصح، الآيه كانت على موقف سيدنا محمد عليه الصلاة والسلام والسيده صفيه وزوجها زيد ابن حارثه –إللى كان سيدنا محمد متبنيه-رضى الله عنهما،قال تعالى :" وإذ تقولُ للذى أنعمَ اللهُ عليه وأنْعَمْت عليه أمسِك عليكَ زَوجَكَ واتقِ اللهَ وتُخفى فى نفسِك ما اللهَ مُبديه وتخشىَ الناسَ واللهُ أحقُ أن تخشاه...." سوره الاحزاب آيه 14

كلنا عارفين القصه والحكمه من وراها وتحريم التبنى،المهم علشان ما أدخلكوا فى متاهات، قصدى أقول إن ما تخلى كلام الناس يمنعك عن فعل شئ إنت شايفه صح وما بيخالف الدين والشرع، يعنى انت بتخاف من الناس أكتر ما بتخاف من ربنا سبحانه وتعالى؟؟؟!!! هترضى مخلوق وتعصى الخالق؟؟!!
كتير بنتوقف عن عمل شئ صح مخافة الناس وكلامهم، هيلوموا وينتقضوا ويتريقوا ويسخروا، حاجات مش عجباهم وقوانينهم وتقاليدهم حرمتها بغير سبب منطقى أو عقلانى وبحسابات بشريه بحته بعيد عن أى قانون إلهى أو شرعى؛ والأمثله على كدا كتييييير أوى

مثلاً تلاقى المجتمع بيرفض وبشده إن المطلقه أو الأرمله ترتبط بواحد تكون هى أول زوجه ليه، و يلوموا على الشاب لو تزوج مطلقه أو أرمله وتكون هى "أول بخته" زى ما بيقولوا ويا سلام بقا لو عندها طفل، تبقا جنازه مش جوازه وكل العيله والاصحاب والجيران يلوموه ويقولوا كلام مش كويس علشان يمنعوه من الجوازه دى، وممكن كمان العكس؛ ان بعض الناس ترفض ارتباط الآنسه من المُطَلَق أو الأرمل،إيه يعنى، هو مرض ولا وباء؟؟ حرام عليهم يتجوزوا تانى؟؟ دا قسمه ونصيب وترتيب ربنا مش تدبير الناس. كمان الناس بيرفضوا جداً إن الزوجه تكون أكبر من الزوج ولو بيوم واحد أو يكون الزوج أكبر بكتير من الزوجه.

ومع إن الدين مش بيحرم الزيجات دى ولا حتى بيكرهها، إلا إننا بنلاقى عليها مشاكل بالكوم من "كلام الناس" وتدخلهم فيما لا يعنيهم؛ والله العظيم بيحولوا حيوات الأشخاص أصحاب الحالات دى إلى جحيم وعيشه غم ونكد. مع إن أبسط مثال ممكن أقوله هو إن سيدنا محمد صل الله عليه وسلم تزوج السيده خديجه وهى أول زوجه له واختارها بشخصه كبشر قبل صفته كـ"نبى" وكانت أكبر منه بـ15 سنه، ومتزوجه ومخلفه قبله وهى الوحيده إللى ربنا رزقه منها الأولاد والبنات مع انها كانت تجاوزت الأربعين،كان بيقول " رُزِقت حبها" وثار على السيده عائشه لما قالت له " قد أبدلك الله خيراً منها" . وتبص تلاقى الناس تقول أمثال غريبه زى " من همه اتجوزها أد أمه" ودى بعتبرها إساءة أدب من الناس. ويقولوا حجج غير منطقيه بالمره، دى هتعجز قبلك، دى هتقتلك من غيرتها عليك، دى ممكن ما تنجب أطفال بسهوله، دى لو أنجبت مش هتلحق تربيهم!!! حاجه تجنن والله العظيم، وإنتوا كنتوا دخلتوا فى علم ربنا!! ياما صغيرين ربنا ما قسم لهم الإنجاب أو حتى الحياه علشان يربوا أولادهم وسابوهم للأجداد يربوهم، وياما عواجيز وأنجبوا بدليل الست إللى عندها 72 سنه وخلفت توأم وجت فى الجرايد، فى ناس زمانها بتتريق دلوقت وبتقول نفس التعليق " ودى هتلحق تربيهم إمتى؟" وهرد عليهم رد غلس... وإنت مالك؟؟ لك فيه ده؟؟ ربنا إدالك علمه؟؟ ما جايز لسه لها عمر وربنا مديها صحه أكتر منك، هو يعجز سبحانه وتعالى عن كدا؟؟!!! خليك فى حالك أحسن

ونفس الكلام يتقال للبنت لو حبت تتجوز واحد أكبر منها،وتكون مقتنع بيه جداً وبتحبه بس كلام الناس بيفرق بينهم ولو اتجوزا مش هيعمروا مع بعض....نادر ما بيحصل.
مادام الاتنين مقتنعين ببعض ومتوافقين، إحنا مالنا، يا رب يكون مختارها من متحف الشمع وتكون مختاراه من الأنتيكخانه، هم إللى هيصبحوا ويمسوا فى وش بعض، يعنى نطلع احنا منها.

تعرفوا إن أكتر من 80% من حالات تأخر الإنجاب فى السنوات الأولى بترجع لأسباب نفسيه!! بردو بسبب كلام الناس، تلاقى المتطفليين والحشريين من تانى إسبوع وبمنتهى الوقاحه يسألوا الزوجين بخباثه " إيه؟؟ مفيش حاجه جايه فى السكه؟؟" أو يبصوا على الزوجه بطريقه متفحصه تستاهل قلمين،المؤدبين هيتكسفوا ومش هيردوا لكن الجرئ شوى ممكن يبص لصاحب السؤال بطريقة "شذراً" أو بقرف وبعدين يسيبه ويمشى، تلاقى المتزوجين فى منتهى السعاده ومش على بالهم ولاد غير لما ربنا يريد، بس كلام الناس يقلقهم ويوترهم ويكون سبب فى التأخير أكتر. واعرف حالات كتيره أوى اتأخرت سنين وكان تعليل كل الدكاتره " حاله نفسيه"، ومره واحده راحت تعمل فحوصات بعد 5 شهور من الجواز، الدكتور قال لها بسخريه " انتِ لازم تكشفى على عقلك الأول " ضحكت وقلت والله عنده حق. بس تعمل ايه، الناس جننتها وعكننت حياتها.

لو بنشتغل أد ما بنتكلم ما كان دا حالنا، دى اتجوزت ودى اتطلقت ودى مش عاجبها حد ودول خلفوا ودول لسه.
مره واحده ست محترمه راحه تجامل فى مناسبه اجتماعيه حلوه وفرحانه وآخر انبساط، فجأه تلاقى واحده بتدحلب من طرابيزه للتانيه بحجة السلامات وتوصل لها وتقول بمنتهى الخباثه " هى بنتك بترفض العرسان ليه، مش عاجبها حد؟؟ أكيد فى حد مالى دماغها وانتوا متعرفوش" بس خلاص، هى كدا قامت بدور القنبله النوويه فى هيروشيما وناجازاكى وروحت المدام معيطه وبُناء عليه تحول البيت الجميل إلى غم ونكد وإكتئاب، عرفتوا ليه بقا بيقولوا ان فى ناس لسانهم زى "العقربه" وعقربه مؤنثه مش مذكر، قاااااااااااااااااااتله، لسعه واحده كفايه.

تدخُلنا فى حياة بعض بيخرب علينا عيشتنا، تلاقى كل البيوت مقفوله على هموم ومشاكل بسبب انها سمعت لكلام الناس وعملت بيه، مع إن إللى بيتكلموا دول تلاقى فيهم بلاوى ، يؤلك هش الدبانه وهو حجره وجيوبه مليانين عقارب وحيات. الحكمه بتقول "إللى بيته من زجاج ما يرمى الناس بالحجاره" وسيدنا عيسى عليه السلام بيقول " من كان منكم بلا خطيئه فليرمها بحجر". كله بيرمى كله وكله بيكسر بيوت كله،علشان كدا تلاقى رجول وأجساد وقلوب وكمان نفوس كتيره أوى مجروحه وبتنزف. لو كل واحد فكرنا بالمبادئ دى قبل ما نجيب فى سيرة الناس كان كل واحد حط لسانه فى بؤه وسكت وانتهت 99% من مشاكلنا. اشغل نفسك بحالك ومــــلــــــكــــش دعوه بحد. زى البنت الصينيه ما قالت لهنيدى " ملناش دأوه، كل واهد فى هالُه".

كلنا متصورين ان الستات بس هى إللى بتجيب فى سيرة الناس وتطلع إشاعات، بس بقا واضح ان الرجاله بينافسوهم فى المجال ده وبقوا من احسن إللى يجيبوا فى سيرة الناس ويطلعوا اشاعات، مش بؤول لكم إن معدش فى حد بيشتغل، كل واحد حل مشكلته وفضى لحل مشاكل غيره.

المجتمع بتاعنا عاوزك تكون حاجه من اتنين،،،
يا إما مستسلم لإرادته وماشى على هواه وإللى يختاره لك علشان يرضى عنك ويحطك تحت جناحه، بس مش متأكده انك هتكون سعيد ولا لأ وكمان مش ضامنه ان الناس مش هتتكلم عليك، أصلهم كدا كدا بيتكلموا ويقطعوا فروتك ويسلخوك ويكلوك هم هم على الحيا ولا هيهمهم دموعك ولا دمك ولا صرخاتك.
أو إنك تكون جرئ ولا مبالى بكلام الناس، ما دمت ما بتعمل شئ غلط أو حرام أو عيب ، يبقا ولا يهمك، كبر دماغك وسد ودانك وغمض عيونك عن كلامهم ونظراتهم ،تجاهل كل ما يؤذيك منهم لحد ما ييأسوا منك ويبطلوا يتكلموا عليك،دايماً فكر بطريقة ان "كُتر السيره من الغيره" يعنى إللى بيجيب فى سيرتك أكيد غيران منك وبيحقد عليك علشان مش عارف يكون زيك ما دمت ما بتعمل حاجه حرام أو غلط.
فى بقا نموذج تالت من الناس، وهم الغالبيه العُظمى "المغلوبين على أمرهم"، مش عارفين يتكيفوا مع تقاليد غلط ، ولا عارفين يتجرؤوا ويتمردوا، فبيكون الحل الأمثل بالنسبه لهم " الإنـــــســــحــــاب" ،كل ما يحبوا يعملوا حاجه ويلاقوا الناس بتعترض عليها يتقهقروا، يعنى لا ينفذوا رغباتهم الخاصه ولا رغبات الناس، يعيشوا "كدا" كيفما اتفق، لا ليهم ولا لغيرهم. لا هعمل إللى يفرحنى ولا إللى يفرح الناس.

أنا بكتب الكلام دا من قهرتى،وحزنى على حالات كتير قابلتها فى حياتى من كل النماذج إللى حكيت لكم عنها واكتر،كلها تنفع أفلام عربى دراميه بنهايه مفجعه.وكلها خربت بسبب الناس والخوف منهم. حاسه إنى كرهت الناس وتدخلاتهم وكلامهم فى الفاضيه والمليانه، وحتى كرهتنى علشان أوقات بعمل زى غيرى وبحكم بطريقة رسام الكاريكاتير، باخد الظواهر وأبرزها، مع إن العاقل مفروض يحكم بطريقة "النحات" يدقق ويركز فى التفاصيل علشان يخرج بصوره صح.
الناس بتعمم الخاص وبتشيع المحدود،يعنى لو كبيراتجوز واحده صغيره وفشلوا يبقا كل الحالات المشابهه هتفشل زيهم، ولو واحده اتجوزت وما خلفت يبقا كل بنات عيلتها كدا أو كل إللى فى سنها زيها، ولو واحد كبير خلف ومات قبل ما يربى ولاده يبقا قاعده عامه على الكُل...خلاص، الناس نصبت نفسها آلهه تحط القوانين وتتحكم فى الناس بعقولها المحدوده وأفكارها الخيبه.

هحكى لكم حدوتة الرساله، اتنين بيحبوا بعض أوى، مع انها أكبر منه بـ4 سنين، بس متوافقين بشكل غريب، ومع ان العائلتين بينهم زى ما بين عائلتى روميو وجوليت وكمان قاتلين من بعض(والله حقيقى مش كدب) إلا إنهم صمدوا وصمموا على الجواز واتجوزوا من 5سنين، ولأنه جواز الكاره من الجانبين ،محدش سابهم فى حالهم، وربنا زود عليهم الاختبار وطلعت الزوجه عندها مشاكل فى الإنجاب، كملت المأساه وزاد الزن وكتر الكلام، ولإنى شفته مره وهو بيبكى وراكع جنبها على ركبته بيبوس راسها وإيديها علشان تسامحه لما زعلها ف يوم تلاقونى مصدومه دلوأت وحاسه إنى فى كابوس من وقت ما عرفت إن مامته واخواته بيدوروله على عروسه جديده
أكيد هو وهى زهقوا وتعبوا من المشاكل والمقاومه وقرروا يسلموا خيوط حياتهم لصوابع الناس تحركها زى ما تحب. عمرى ما هنسى دموعها وصوتها المبحوح من النحيب وهى بتقول :" والله لو الناس تسيبنا فى حالنا هنكون أسعد اتنين؛ إحنا مش عاوزين غير بعض، لو ربنا يرحمنى أموت قبل ما أشوفه بيتجوز واحده تانيه" شفتوا الناس وكلامهم بيعملوا إيه؟؟؟ قد إيه إحنا سعداء بالــ"المجتمع" الرائع إللى عايشين فيه!!!
ودانك وغمض عيونك وعيش مع نفسك فى عالمك الخاص ، ملكش دعوه بحد ولا تتكلم على حد ولا تتدخل فى شئونه ،فى الحزن ساند وفى الفرح جامل وبس،اشغل نفسك بحالك وشغلك وبس.تجنب المناسبات الاجتماعيه علشان تبعد عن كلام الناس.خليك قليل أو حتى عديم الذوق ولو حد جه يكلمك عن حد تانى قول له "ملناش دعوه"، كلمه دايماً بكررها فى نفسى وبصوت عالى " الحمد لله إن "ربنا" هو إللى بيدبر أمورنا وبيمشينا، لو كان بشر بمقاييسهم المحدوده كان زمانها خربت من زمان" كنا هنمشى على مزاجهم وأهواءهم، يسعدوا ده ويحزنوا ده، يجوزوا ده ويطلقوا دى، يدوا لده البنات والولاد وغيره ولا حاجه....مش لحكمه فى التدبير، بس علشان مزاجهم عاوز كدا ومعندهمش ضمير.

فيلم مجنون بس رائع وكله ترميز واسقاطات شفته لأول مره فى حياتى إمبارح، اسمه "سمك لبن تمر هندى"، البطل بيقول فى مشهد وهم بيبنجوه فى العمليات علشان يغسلوا مخه وكل اعضاءه ويرضى بمجتمعه قال: " بالذمه يا دكتور دا مجتمع يستاهل إننا نتكيف معاه؟؟؟؟!!!!!!"
سؤال فى محله وجه فى وقته بالظبط
مثل شعبى سمعته وعجبنى أوى: " أردب ما هو لك ليه تحضر كيلُه تتعفر دقنك وينوبك شيله" يعنى لو فى ناس بتوزن دقيق أو أى نوع غله وملكش فيه وما تخصك، ليه تحضر بينهم وتتحشر فيهم، افرض فى اسرار، عمواً بحشريتك دى هتتعفر وممكن يشيلوك كمان ويقطموا ضهرك...تستاهل
عمواً تحياتى للجميع وأتمنى إننا كلنا فعلاً ناخد بالنا من ألسنتنا علشان هى إللى هتدوينا فى داهيه ،أو كما قال رسول الله صل الله عليه وسلم " وهل يكُب الناس على وجوههم فى النار إلا حصائد ألسنتِهِم" صدق رسول الله عليه الصلاة والسلام
thanks & best regards,
sabrina abu ali