بييجي وقت لازم تسكت فيه , وعقلك يقولك ( خليها فى القلب تجرح , بدل ما تبان و تفضح ) .. و أوقات تحس إنك لازم تتكلم .. مش قادر تكتم و تخبي .. وإلا هتنفجر .. علشان متكلمش نفسك و الناس تقول إتجننت .. أو تخلق شخصية من خيالك تعيش معاها و تعزلك عن العالم ويقولو عليك براوي ... يبقى الحل إنك تفضفض .. اللى تقدر تتحمله خليه جواك .. و اللى متقدرش عليه .. ويفيض بيه قلبك و عقلك .. وزّعه على اللى حواليك ... هنا مش مجرد كلام و حكايات ... كل رسالة هي فيض من ( فيوض القلب والخاطر ) ....... أنا / صابرين أبوعلي

الاثنين، 19 يوليو 2010

إنت الأهم....صدقنى

ما لك وما لك وما لك و....ما عليك
البدايه من عندك والنهايه بردو عندك


فى مثل بيقول "اعرف عدوك" دا علشان ما يصيبك منه اى أذى وتتوقع كل تحركاته ونقوله يا نحله لا تقرصينى ولا عاوز عسل منك،وكدا تبقا حققت فايده وتجنبت الاذى
فما بالك بقا لو عرفت"صديقك" أوخادمك؟؟ اكيد هتعرف تتعامل معاه اكتر وتستفيد منه لأقصى درجه...يبقا لازم تعرف يعنى ايه مجلس شعب وانه معمول علشان خدمتك وخدمة بلدك "بشكل عام" مش فى المصالح الخاصه او يجيبلك توقيع ولا وظيفه ولا اعفاء من الجيش
دا الحكايه اكبر من كدا بكتيييييييييييييييييييييييييييييييير اوى
يكفى انك تعرف ان مجلس الشعب هو أعلى وأهم سُلطه فى البلد وان اعضاءه بيستمدوا سلطته منه واللى سلطة المجلس اصلاً بأعضاءه يمنحها لهم من هم أعلى وأهم منهم واصحاب الحق الفعلى فى البلد دى.....الشعب
يعنى حضرتك أهم واحد فى البلد دى، اهم من الريس ومن عضو مجلس الشعب
والدستور هو إللى هيعرفك ما لك وما لك وما لم و..... ما عليك

وعلشان تعرف إللى لك وإللى عليك هننزلكم وظائف ومهام مجلش الشعب(المجلس التشريعى) وبالتالى ما ينطبق على الكل ينطبق على الجزء،بمعنى ان عضو مجلس الشعب اللى بتنتخبه حضرتك له كل السلطات دى....اعرف بقا انت بتدى صوتك لمين وهيعمل بيه ايه واختار صح
دا الجزء الاول.....التعريف بالمجلس واختصاصاته ومهامه وصلاحيااااااااااااااته


التعريف العام بمجلس الشعب : السلطة التشريعية فى مصر :
مجلس الشعب هو السلطة التشريعية بجمهورية مصر العربية ويتولى اختصاصات مختلفة ورد النص عليها فىالباب الخامس من الدستور، فوفقا للمادة 86 يتولى المجلس سلطة التشريع واقرار السياسة العامة للدولة والخطة العامة للتنمية الاقتصادية والاجتماعية والموازنة العامة للدولة، كما يمارس الرقابة على أعمال السلطة التنفيذية كما هو مبين بالدستور. ويقوم بترشيح رئيس الجمهورية ويقبل استقالته
فى إطار دستور 1971 اصبح البرلمان المصرى يحمل اسم " مجلس الشعب " وهو يتولى سلطة التشريع ويقر السياسة العامة للدولة والخطة العامة للتنمية الإقتصادية والإجتماعية والموازنة العامة للدولة كما يمارس الرقابة على أعمال السلطة التنفيذية .

يقدم رئيس الجمهورية استقالته إلى مجلس الشعب الذى يعلن خلو منصبه ، كما يختص المجلس كذلك بالتصديق على المعاهدات والموافقة على مد حالة الطوارئ وإعلان حالة الحرب.

مقر مجلس الشعب مدينة القاهرة ، ويحدد القانون الدوائر الانتخابية التي تقسم إليها الدولة ، وعدد الأعضاء المنتخبين على ألا يقل عن ثلاثمائة وخمسين عضوا نصفهم على الأقل من العمال والفلاحين ، ويكون انتخابهم عن طريق الانتخاب المباشر السري العام ، ويجوز لرئيس الجمهورية أن يعين في مجلس الشعب عدداً من الاعضاء لايزيد على عشرة .

مدة المجلس خمس سنوات ميلادية من تاريخ أول اجتماع ويجرى الانتخاب لتجديد المجلس خلال الستين يوما السابقة على انتهاء مدته.

وضع الدستور مجموعة من الضمانات للحفاظ على استقرار السلطة التشريعية اهمها، لا يجوزلرئيس الجمهورية إصدار قرار بحل مجلس الشعب إلا عند الضرورة ، وإذا حل المجلس في أمر فلا يجوز حل المجلس الجديد لذات الأمر.

فضلاً عما سبق فإن المجلس هو الذي يختص بالفصل في صحة عضوية أعضائه ولا يجوز إسقاط عضوية أحد أعضاء المجلس إلا إذا فقد الثقة والاعتبار أو فقد أحد شروط العضوية أو أخل بواجبات عضويته ويجب أن يصدر قرار إسقاط العضوية من مجلس الشعب نفسه بأغلبية ثلثى أعضائه كما أن المجلس هو الذى يقبل استقالة اعضائه


كما قرر الدستور أيضا مجموعة من الحصانات لأعضاء المجلس تتمثل فى عدم مؤاخذة أعضاء مجلس الشعب عما يبدونه من الأفكار والأراء فى اداء أعمالهم فى المجلس أو فى لجانه . ولا يجوز فى غيرحالة التلبس بالجريمة اتخاذ أية اجراءات جنائية ضد عضو مجلس الشعب إلا بإذن سابق من المجلس.

قرر الدستور - فى إطار العلاقة بين السلطتين التشريعية والتنفيذية ورغبةً في تحقيق التوازن المنشود - عدداً من الصلاحيات للسلطة التشريعية فى مجال السلطة التنفيذية وصلاحيات للسلطة التنفيذية فى مجال السلطة التشريعية .

ومن أمثلة الصلاحيات الأولى التى نظمها الدستور تلك المتعلقة باختصاص مجلس الشعب فى استقالة رئيس الجمهورية و خلو منصبه وإقرار الخطة العامة للتنمية الاقتصادية والاجتماعية وكذا الموازنة العامة للدولة وحقه فى الرقابة على اعمال الحكومة وتقرير مسئوليتها والتصديق علي الإتفاقيات والمعاهدات الدولية .

ومن أمثلة الصلاحيات الثانية التى نظمها الدستور ما قرره لرئيس الجمهورية بشأن دعوة مجلس الشعب للانعقاد للدور السنوى العادى قبل يوم الخميس الثانى من شهر نوفمبر من كل عام فإذا لم يدع المجلس حتى ذلك اليوم يجتمع فى نفس اليوم من تلقاء نفسه بحكم الدستور وكذلك حق رئيس الجمهورية فى فض دور الانعقاد العادى للمجلس شريطة ألا تقل مدته عن سبعة أشهر وبعد اعتماد الموازنة العامة للدولة وحقه فى دعوة المجلس لاجتماع غير عادى فى حالة الضرورة وأيضا حقه فى حل مجلس الشعب عند الضرورة

ان شاء الله هتابع مهام وصلاحيات المجلس واعضاءه على اجزاء علشان ما اطول عليكم
وكله هيبقا من الدستور علشان محدش يقول انى بألف كلام من عندى

يا رب نستفيد ونفوق ونعرف أهميتنا بجد
إنت الأهم والله بس لو عرفت قيمة نفسك

Sabrina Abu Ali

هتلاقونى هنا كمان فى حاجات مختلفه خااااااااااااااااااااااااااالص
http://www.facebook.com/Elma5tobeen.ahom.in.love.evenaftermarriage

السبت، 3 يوليو 2010

نتكلم بالعقل

محدش فى مصر كلها مهزتهوش حادثة الشاب اللى اتقتل او مات فى اسكندريه وصوره نزلت على النت بشكل مثير للفزع من المستقبل والحاضر ومثير بردو للتقزز من الشعور الوهمى بالأمان اللى بنحاول نعيش فيه

كلنا اتحمسنا للإنضمام للجروبات والفانات اللى طالبت بالثأر لخالد ونزلناها على المدونات وعلى صفحاتنا كمان وبقينا ننفخ فى النار مع اللى بينفخوا
ودى اسوأ عاداتنا...التقليد الأعمى من غير تقصى الحقيقه
مع ان الحكمه بتقول...لا تصدق كل ما تسمع ولا نصف ما ترى ،لأن اكيد المستخبى وإللى متقلش اكتر كتييييييييييير من اللى بان واتقال والعلم عند ربنا سبحانه وتعالى
دلوأت حد يطلع يقولى حرام عليكى الافترا ده ترضى يتعمل فيكى ولا فى حد من اهلك كده؟؟؟
هقوله نتكلم بالعقل ومن غير انفعال علشان الشراره صحيح بتولع بسرعه لكن ملهاش عمر،واحنا نارنا بتنطفى بسرعه اوى

هاج موضوع خالد وكتر الكلام واختلطت الحقيقه بالكذب، واهله يقولوا وجيرانه يقولوا وصحابه والداخليه يقولوا وعلى قول المحامى فى مسرحية "شاهد مشفش حاجه"....قالوووووووووووووووووله، يعنى ماشفش ولا سمع يا سيادة القاضى
كان المفروض نتكلم بالعقل من البدايه ، اللى خلانا محموقين كدا على واحد ما كان الأولى والأجدر بينا نتحمق علشان بلد بأكمله اتحط فى سجن كبييييييييييييييييييييير يحكمه قانون الطوارئ، مفيش واحد حرؤ يعلى صوته ويقول نعمل وقفه احتجاجيه على قانون الطوارئ ده، اشمعنا الحاله دى؟؟ مين كبرها ونفخ فيها؟؟؟ احتمال علشان اخواته الاتنين معاهم الجنسيه الأمريكيه؟؟؟ الله اعلم
الموضوع بقا بشع وغير منطقى وكدبه كتير وحقايقه تايهه وفى الاول والآخر احنا اللى توهنا وضعنا وخسرنا وهنخسر كتير

افرضوا ا ن جه اطباء شرعيين دوليين واعادوا تشريح الجثه، وثبت انه فعلاً مات من ابتلاعه اللفافه اللى بيقولوا عليها دى موقفنا كشعب مع بعض هيكون ايه؟؟؟؟؟؟؟؟؟؟؟ فقدان تام للثقه، يعنى لو حد حصله ابشع من كدا بعدها وكان مظلوم بجد واهله صرخوا بأعلى صوتهم محدش فينا هيصدق ويجرى عليهم
وهنقولهم قديمه اتلعبت علينا قبل كده ،خلاص لا بنصدق الحكومه ولا هنصدق بعضنا
زى الولد اللى كان بيضحك على الناس كل يوم ويجرى يصرخ يقول ديب ديب هياكل الغنم وتجرى الناس تنقذه تلاقيه كداب لحد ما يوم جه الديب بحقيقى والولد صرخ بس ما حد صدقه
الديب اكل الاغنام ويمكن اكل الولد كمان

وافرضوا ان الاطباء الدوليين قالوا انه ميت بسبب الضرب والتعذيب، يا ترى كدا هننبسط ونرتاح؟؟؟؟ هنرتاح لما نعرف ان حتى الطب الشرعى ممكن تزوير نتايجه؟؟؟؟؟؟؟؟؟؟؟؟؟؟؟؟!!!!!!!!!!!!!!! الله يعوض علينا فى آخر فتافيت الشعور بالأمان إللى كنا بنقتات عليها ونتشدق بيها ورايحين جايين نتغنى بإن مصر بلد الأمن والأمان
مش بقولكم احنا كدا كدا خسرانين؟؟؟؟؟؟؟؟؟؟؟؟

انا محتاره ومش عارفه اعمل ايه؟؟؟ اصدق ولا ما اصدقش؟؟ اشارك ولا لأ؟؟؟
ووصلت لشبه قرار احتمال يريحنى، مش هنفخ فى النار ولا هقلد غيرى بشكل اعمى، وقفات الحداد ولبس السواد مش من الاسلام يعنى هبقا بعمل حاجه حرام وكمان مش هترجع اللى راح، لكن لو الناس ومصر كلها عملت وقفه احتجاجيه ضد"قانون الطوارئ" بوجه عام هشارك فيها وهعلن عنها فى كل صفحاتى وفى المدونه ،هدف عام ماشى لكن خاص الله اعلم بأغراضه وبإللى وراه يبقا لأ
ربنا مش بيسيب حق المظلوم وبينتقمله مهما طال الوقت ودا اللى مطمنا شويه ومخلى عندنا أمل

وبردو ربنا بيسلط ناس على ناس وابدان تخلص من ابدان

اقولكم ايه بس................ربنا يسترنا احياءً وامواتاً ويكفينا السوء يا رب
ونبطل تقليد أعمى بقا
sabrina

الجمعة، 11 يونيو 2010

مين عليه الدور؟؟؟؟؟؟؟؟؟؟؟؟؟

بسم الله الرحمن الرحيم
{ وَلاَ تَحْسَبَنَّ اللّهَ غَافِلاً عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الأَبْصَارُ (42) مُهْطِعِينَ مُقْنِعِي رُءُوسِهِمْ لاَ يَرْتَدُّ إِلَيْهِمْ طَرْفُهُمْ وَأَفْئِدَتُهُمْ هَوَاء (43) وَأَنذِرِ النَّاسَ يَوْمَ يَأْتِيهِمُ الْعَذَابُ فَيَقُولُ الَّذِينَ ظَلَمُواْ رَبَّنَا أَخِّرْنَا إِلَى أَجَلٍ قَرِيبٍ نُّجِبْ دَعْوَتَكَ وَنَتَّبِعِ الرُّسُلَ أَوَلَمْ تَكُونُواْ أَقْسَمْتُم مِّن قَبْلُ مَا لَكُم مِّن زَوَالٍ (44) وَسَكَنتُمْ فِي مَسَـاكِنِ الَّذِينَ ظَلَمُواْ أَنفُسَهُمْ وَتَبَيَّنَ لَكُمْ كَيْفَ فَعَلْنَا بِهِمْ وَضَرَبْنَا لَكُمُ الأَمْثَالَ (45) وَقَدْ مَكَرُواْ مَكْرَهُمْ وَعِندَ اللّهِ مَكْرُهُمْ وَإِن كَانَ مَكْرُهُمْ لِتَزُولَ مِنْهُ الْجِبَالُ (46) فَلاَ تَحْسَبَنَّ اللّهَ مُخْلِفَ وَعْدِهِ رُسُلَهُ إِنَّ اللّهَ عَزِيزٌ ذُو انْتِقَامٍ (47) يَوْمَ تُبَدَّلُ الأَرْضُ غَيْرَ الأَرْضِ وَالسَّمَاوَاتُ وَبَرَزُواْ للّهِ الْوَاحِدِ الْقَهَّارِ (48) وَتَرَى الْمُجْرِمِينَ يَوْمَئِذٍ مُّقَرَّنِينَ فِي الأَصْفَادِ (49) سَرَابِيلُهُم مِّن قَطِرَانٍ وَتَغْشَى وُجُوهَهُمْ النَّارُ (50) لِيَجْزِي اللّهُ كُلَّ نَفْسٍ مَّا كَسَبَتْ إِنَّ اللّهَ سَرِيعُ الْحِسَابِ (51) هَـذَا بَلاَغٌ لِّلنَّاسِ وَلِيُنذَرُواْ بِهِ وَلِيَعْلَمُواْ أَنَّمَا هُوَ إِلَـهٌ وَاحِدٌ وَلِيَذَّكَّرَ أُوْلُواْ الأَلْبَابِ (52)} صدق الله العظيم
سورة إبراهيم

اقنعتونا بيها زمان ان الشرطه فى خدمة الشعب....هى دى الخدمه؟؟؟؟؟؟؟؟؟؟!!!!!!!!!!
رجل الشرطه المحترم له مكانه وتاريخ واهميه كبار جداً فى حياتنا كلنا، ليه نسيب بعض الفاسدين والمتوحشين والمجردين من الانسانيه يشوهوا كل جميل فى حياتنا
يا كل الشرفاء من رجال الشرطه حماة الوطن

احنا بنحترم ونوقر كتير من رجال الشرطه وبندعى للصالحين منهم ربنا يحميهم ويكتر من امثالهم
لكن المجرمين الساديين منهم مفروض ميتسكتش عليهم، مش بس من الناس ،لا الأولى والأحق بيهم ان الشرفاء من رجال الشرطه هم اللى يثوروا فى وجه الفاسدين منهم علشان ما يشوهوا سمعتهم وياخدوا العاطل بالباطل
يا كل رجل شرطه نزيه شريف محترم يتق الله
...سواء مسيحى او مسلم
ارفض الظلم وزى ما بتحمونا احموا انفسكم من المجرمين المسيئين لكم أولاً

خالد محمد سعيد
شاب مصري عنده 28 سنه من منطقة كليوباترا بالاسكندريه
و صاحب مكتب استيراد و تصدير
كان قاعد في سايبر في وقت متاخر بالليل
و دخل بتوع المباحث بيفتشو كل اللي قاعدين باستخدام قانون الطوارئ
خالد اعترض و قال احنا بنتفتش ليه
كان تمن السؤال البرئ ده ان اتنين مخبرين مسكوه و نزلو في ضرب في المحل و في الشارع و في مدخل عماره جنب السايبر قعدو يرزعو وشه في الرخام بتاع السلم و في مدخل العماره الحديد
و خدو جثته و حطوها في البوكس و بعد 15 دقيقه رجعو رموها ف الشارع و مشيو
كل واحد فينا ممكن يكون خالد
حنسكت ؟

لينك الخبر في اليوم السابع و الشروق
http://www.youm7.com/News.asp?NewsID=239233

http://www.shorouknews.com/ContentData.aspx?ID=245294
ودا الجروب الرسمى للشرطه المصريه
http://www.facebook.com/group.php?gid=250478545333&ref=mf#!/group.php?gid=250478545333
=*=*=*=*=*=*=*=*=*=*=*=*=*=*=*=*=

It's a tragic story about a young man, he was brutally murdered ! why ? because he refused to be treated inhumanly by two savage Cops who had no right to do what they were doing ; to treat people like sheep and consider the citizens inferiorly .
The story began on 7th June 2010 when Khaled Saeed went to his usual Internet cafe in Sidigaber ... See MoreAlexandria Egypt.
Then two wild detective cops - Mahmoud Alfallah and Awaad Elmokhber/the detective - ambushed that cafe asking people for their IDs which is totally out of their authority and without legal permission He - Khaled - did reject that way of inhumane treatment and conequently was attacked so viciously , was kicked in his chest and belly severely, and his skull was smashed with the marble bar before all people and witnesses in the cafe while khaled was bleeding. Then savage cops abducted khaled and put him inside the police vehicle to continue torturing him to death in the police station .Finally, they had thrown his corpse in the street to claim that he was attacked by some strangers in order to avoid responsibility.

According to the what we have known that there's systematic campaign to terrify the witnesses and prevent them from testifying what they saw in the cafe....

Khaled's not and won't be the only case, there are lots of people who had the same fate and disappeared and became dead on arrival.
All of this is a result for the oppression system that Mubarak control Egypt under emergency law which gives the police the upper hands to treat the residents as slaves.

Thus we the group of the change in Egypt supporters urge you to interfere and to force the authorities to investigate and explain what happened to the public and to condemn it strongly
تخيلوا مدى القسوه والاجرام والوحشيه اللى تخلى ناس تتجرد من انسانيتها وتحول وشه للشكل ده؟؟؟؟؟؟؟ عملوا فيه ايه؟؟
مسمعوش صرخاته؟؟ مفكروش فى اهله؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ معندهمش اطفال ولا شباب زيه؟؟؟؟؟؟؟؟؟؟
ميعرفوش ربنا؟؟؟؟؟؟؟؟؟؟؟؟

حـــــــــسـبــنــا الله ونــــــــــعـم الــوكــيــل


الاثنين، 31 مايو 2010

بــيـــت أُمُــــــه

بيت ميييييين ده؟؟؟!!!؟

لو حد سألكم عن "الرومانسيه السياسيه الساذجه" تقدروا وبكل ثقه تدلوه عليا ييجى يضحك شويه من قلبه

لسه مقتنعه ومؤمنه إن قراراتنا فى ايدينا وإننا لو نوينا نغير هنتغير ونغير من حوالينا بجد

احتمال علشان أنا اتربيت على كده ولقيت إللى يلعب فى دماغى من صغرى ويشكلنى عالحلم والأفكار دول، واحتمال علشان زمان بردو اتحطتلى أساسات مش عارفه اتخلص منها

فاكرين إنتخابات رائد الفصل والأمين والأمين المساعد والأعضاء؟ متضحكوش...بس والله كانت بدايات صح وفى منتهى الصدق والشفافيه

وكنا بنقوم بمهامات بجد وإللى عاوز ينجح السنه الجايه لازم يكون قد المسؤليه السنه دى وتكون له بصمه، وبعدها عملولنا انتخابات البرلمان الصغير على مستوى المحافظه و كل واحد يتكلم بلسان مدرسته ومحافظته،دا غير جمعية المناظره العامه واتحادات الطلبه ومعسكرات إعداد القاده إللى خدناها زحف من اسكندريه لبور سعيد والاسماعيليه وسيناء

حبيت الموضوع واندمجت فيه وآمنت إن "تأييد الناس" ووجودهم حواليك هى القوى المحركه لأى إنسان عاوز يصلح ويكون له دور بجد.وفعلاً فى حاجات كتير عملناها وغيَّرناها.كبرنا وروحنا الجامعه ودخلنا اتحاد الطلبه واعترضنا لما كان "بالتعيين" مش بالانتخاب وقدمنا شكاوى، اتعودنا يكون لنا دور من صغرنا فمش معقول هيهمشوه أو يلغوه لما نكبر وتفكيرنا يكون اعمق...حقنا ولازم ناخده


علشان كدا خايفين...متستهنش بقوة صوتك ودوره فى التغيير

يمكن تضحكوا عليا لما تعرفوا انى كنت بستنى وبتمنى أكبر، يوم ما كملت 16 سنه تانى يوم روحت طلعت بطاقه شخصيه، ويوم ما كملت 18 سنه تانى يوم طلعت بطاقه انتخابيه، مأمور القسم بقا مذهول وقعدنى فى مكتبه، كانت حاجه غريبه ان حد يروح يطلع بطاقه انتخابيه،مكنتش الناس عرفتها، وبعت معايا ظابط لحد الموظف المختص علشان يعملهالى.تصدقونى لو قلتلكم انى شُفت فى عنيه وكلامه الاعجاب؟! وادانى تليفون البيت وعرفنى على مراته وولاده كمان، حسيت يومها فعلاً ان الشرطه لسه فى خدمة الشعب

ولسه مستنيه لما ابقا 33 سنه علشان أواصل الحلم، دا سن الحد الأدنى لعضوية مجلس الشعب، ألحقها
الدورهالجايه كمان 5 سنين ان شاء الله لو لينا عُمر

مجنونه؟؟! أومالو، احسن ما اكون روح ميته فى جسد حى

فكرت تجيبه وتقراه وتعرف إللى لك وإللى عليك؟؟؟؟؟

حلم...واحتمال يفضل طول عمره فى مرحلة الحلم، بس على الأقل أنا بحلم ومحجرتش على أفكارى وخيالى،بحلم وأنا نايمه وأنا صاحيه حتى وأنا عيانه وبموت بردو هحلم، كتير ممكن يسخروا من حلمى ومتصورينه مستحيل، بس أدينى بحاول و فى نفس الوقت أوعدكم وأوعد نفسى إنى لو وقت ما اترشحت كان فى راجل مترشح وأصلح منى وله أهداف بجد وقتها أنا إللى هديه صوتى واجمعله اصوات كمان

فى ناس هتقولى حلمك قرب يتحقق مع وجود افتكاسة "مقعد المرأه"هقولهم...مش أنا إللى أدخل (بيت الأُمَّه)
من الأبواب الخلفيه

أو بصوره غير شرعيه، صحيح انا مش دارسه قانون ويادوب قريت الدستور وشوية هوامش كده لكن ممكن استنتج ان المقعد ده غير دستورى بالمره، طول عمرنا نعرف ان مجلس الشعب 50% عمال وفلاحين والباقى فئات دا غير الـ10 المُعيَّنين من قِِبَل رئيس الجمهوريه وإللى مش عارفه ولا فاهمه ليه؟؟؟؟ يعنى إحنا (الشعب) يادوب اتنين من كل دايره سواء مركز ولا بندر، يبقا ليه هو لوحده له 10 نواب؟؟؟ وبعدين اكيد له نائب او اتنين عن دايرته، يعنى كدا الريس لوحده له 12 نائب فى المجلس؟؟؟!!!! اشمعنا؟

يا سلام يا سلااااام "نعم"بالعافيه

دا غير ان مقعد المرأه ده هيكون على حساب مقاعد تانيه،انا مش عارفه أرتب افكارى من حرق الدم لكن هحاول

هعتبر نفسى مكان حكومة الحزب الوطنى – لا قدر الله بَعد الشر- وهحاول اوصلكم أنا عملت إيه علشان أقضى على أحلام الناس وعشمهم فى "بيت الأُمه" محاولة مواطنه ساذجه عمرها ما هتوصل لدرجة الدهاء المطلوبه

الحكومه اتصدمت فى الانتخابات لما لقت المعارضه طلعلها ناب والناس بتميل لهم،حتى لو مش مقتنعين بيهم أهو عِند وغيظ فى الحكومه وعدو عدوى يبقا صديقى وفوقنا على وجود 84 مقعد للإخوان فى المجلس دا غير المعارضه،كدا الناس ممكن تاخد بالها ان صوتها لو استخدمته بإيجابيه هيكون له تأثير كبير على ترتيب البيت من جوا ومن برا فكان لازم يشغلوا مخهم ويفتحوا عيونهم كويس أوى علشان الكارثه الديمقراطيه دى متتكررش تانى

الأول هنزود عدد المحافظات علشان تزيد الدواير إللى ممكن يكون لنا فيها أصوات،وبعدين هننزل بمشروع يرضى المرأه وتيته سوزان وطنط فرخنده ونعمل "مقعد عموله للمرأه" غير مُقَنن ولا مُنَظم أصلاً،يعنى مش محدد كام واحده من كل دايره ولا هتكون على مستوى المحافظه أو منطقتها بس ولا إيه؟ وفى دواير اصلاً مفيهاش مقعد للمرأه بإختصار ممكن تلاقى المقاعد المقرره للمرأه كل إللى فيها اسماء معروفه مسبقاً او من منطقه واحده ونخلص، مقاعد المرأه دى بقا فايدتها إيه؟؟؟ اقولكم

هو دا اخرنا....

هتظبط الميزان أو هتميله للحكومه لو احتاجت اصوات،يعنى افرض انهم بيناقشوا قانون ما ولقى معارضين ومستقلين وممتنعين عن التصويت يبقا مين إللى هيصوت ويرضى الحكومه علشان لها إيادى بيضا عليه؟؟ دا حتى المثل بيقول اطعم الفم تستحى العين،مش معقول الحكومه هتبقا هى إللى حطانى هنا وآجى أنا اقولها لأ؟؟!! دا حتى كدا يبقا قلة أصل

هتلاقى المرآت كلهم صوتوا لصالح القانون ومعاهم الـ10 بتوع الريس دا غير الهتيفه بتوع الحزب واتمرر القانون حتى لو كان إيه كدا ان شاالله حتى تغيير الدستور وتحويلنا من جمهوريه إلى ملكيه،حد هيقدر يعترض؟؟ إذا كان دا قرار صادر من مجلس الشعب، بيت الأُمَه يا ناس

لو لقى إللى يدافع عنه ويتكلم باسمه ويعرف حقوقه مكنش اتعمل فيه كدا ولا كانت قوات الاحتلال الحكومى قتلت كرامته

حد هيقولى إنتى عبيطه، طب ما الريس والحكومه لو عاوزين حاجه بيعملوها وبيفرضوها بالأمر مش مستنيين اصوات والدليل "تمديد قانون الطوارئ" من كام يوم بغض النظر عن المعارضين صدر "قرار رئيس الجمهوريه بمد العمل بقانون الطوارئ و....." اتحرقوا،ايكش تولع،عاوزينى اسيبلكم الحبل عالغارب علشان صوتكم يطلع؟؟ طلعت روحكم قبلها

بس دا قرار"شكله وِحِش" علشان جاى بالغصب مش بالهتاف والتصفيق، بريستيجنا ميسمحلناش بكدا أؤودام العالم إللى بنحاول نوهمه بديمقراطيتنا وحريتنا حماها الله

فلازم وحتماً ولابد ميتكررش الموقف دا تانى حفظاً لماء الوجه ، يعنى لا هيبقا فى دم ولا ماء؟

الستات دول بقا جايين يقعدوا فين؟؟؟ يعنى هل لهم دِكك ومصاطب تحت القبه زى باقى النواب ولا مفيش مكان
ولازم نوسعلهم علشان ميصحش يقعدوا جنب الرجاله ويزنقوهم؟

عيب...ليدز فرست،يعنى إحنا نهش شوية رجاله مزعجين وندخل الستات الحلوين دول ينوروا مكانهم ويخلوا ريحة المجلس حلوه

طب نمشى مين؟؟ وإزاى؟؟؟

المُتعبيييييييين..كل يوم من ده


بسيطه...نلغى دواير وندمج دواير وندوخ الناس حوالين نفسها علشان ميعرفوش راسهم من رجليهم ونعرف نلمها فى الكرتونه-فاكرين نكتة الكتاكيت؟- وطبعاً معروف كويس جداً إيه هى الدواير إللى هتتلغى، أى حته فيها لبش أو صوت عالى أو مكان للمعارضه أو الإخوان تتمسح بأستيكه أو نولع فيها خالص ونجيب غيرها

وبانت البشاير فى إلغاء دايرة مصطفى بكرى...ولسه، ما خفى كان أفدح، ملعوبه يا حكومه والله

وتخلص الانتخابات ب454/صفر لصالح الحكومه وممكن يكونوا اكتر لو حسبناها بالنقاط مش بالأهداف


وكدا بقا مبقاش مجلش الشعب سيد قراره، دا بقا القرار هو إللى سيده وتاج راسه، ولا بقا "بيت الأُمَه" دا بقا "بيت أُمُه" يا أدهم


أُم مين؟؟؟ الله أعلم، ولا اعرف، جايز أُم الخلول أو أُم اربعه وأربعين، واحتمال أُم ابراهيم ولا أُم أحمد ، ولا بيت العز يا بيتهم....المهم إنه بيت أُمُه

وانتوا عارفين طبعاً الواحد بياخد راحته فى بيت أُمُه قد إيه، يطرد ده ويدخل ده، ويجيب دوكهت ويشيل دهوت


شوفوا السهم عالجزمه المشهوره...معدش حيلتنا غير الجزم تاخد حقنا وتدافع عننا؟؟؟؟؟


تعرفوا...لو مجلس الشعب دا اتصلح حاله والناس عرفت تختار إللى يتكلم بلسانها والله والله والله ليتغير حالنا لعكس الموجود دا خالص، هننضف ونبقا أُمَّه محترمه علشان مجلسها وبيتها الموقر محترم وإللى فيه محترمين مش نايمين ولا بيضربوا بعض بالأقلام والجزم ولا بيصوروهم فى صالات قمار ولا بيتمسكوا بتهريب موبايلات فى المطارات ولا بيتاجروا فى دم الشعب وامراضه علشان يصرفوا ملايين علاج على نفقة الدوله

لو الناس اختارت الشخص إللى يعرف يحاسب بجد وميخفش إللى يخدم البلد ويشجعوه مش إللى بنختاره علشان
يجيبلنا توقيع على ورقه ولا واسطه لوظيفه مكنش دا بقا حالنا

لو الناس عرفت قيمة اصواتها وبطلت تتخاذل وتطنش والله صوتك ليجيب نتيجه واسألوا مجرب

المعارضين بيسكتوا ويسيبوا الهتيفه يصوتوا بدالهم وفى الآخر نستغرب من النتيجه ونقول تزوير


نفسى أدخل مجلس الشعب...بيت الأُمه ، براس مرفوعه من بابه الرئيسى وميكنش فى معتصمين جعانين وعرايا على رصيفه

نفسى ألاقى فيه جيل جديد محترم وعاوز يصلح مش يتمصلح ويعمل شغل

هقدم طلب للمجلس بإلغاء الحصانه عن كل النواب...حصانه من مين وضد مين وليه؟؟؟ للأسف الحصانه بقت بتُستَخدَم ضد الناس، الشعب إللى اداهم صوته بيتعالوا عليه بالحصانه وبيسرقوا وينهبوا وينصبوا ويقتلوا بالحصانه
إللى اديناهالهم

الخايف والمستغل بس هو إللى هيرفض لكن إللى داخل وغرضه يساهم ويصلح هيوافق ويأيد



إزاى نكون فى بلد محترم وفيه حريات ولما حد يعمل "حزب" ميعترفوش بيه؟؟!!! فين التعدديه الحزبيه؟؟


نائب الشعب من حقه يستجوب ويحاسب أى حد حتى رئيس الجمهوريه ،حصانته مستمده من اسمه كمتحدث بالنيابه عننا، احنا إللى نقوله يوافق أو ما يوافقش مش الحكومه إللى تزغرله بعينها ولا تقرص عليه وتلوى دراعه وتفرض قرارات تخدمها

الشعب هو الأغلبيه والحكومه وممثليها وحز
بها هم الأقليه


نائب الشعب جاى يخدم الشعب مش يخدم الحكومه ولا مصالحه ولا يبقا عبد المأمور

مجلس الشعب هو "السُلطه التشريعيه" فى البلد،يعنى هو إللى يقترح القانون من قلب الشارع ومدى حاجة الناس ليه ويناقشه ويفرضه على الحكومه كمان ،ولو الريس اقترح قانون يبقا يتناقش ويترفض لو غلط او يؤذينا

عمركوا شوفتوا خادم بيدى لسيده أوامر؟؟؟ عجبى

وكمان مفيش 10 معينين من رئيس الجمهوريه..ليه؟؟ عاوزهم ليه؟؟ واشمعنا هو لوحده يكون له 10 يتكلموا
بإسمه؟؟ مش كفايه نواب الحزب الحاكم والحكومه؟؟

وكمان معدش يبقا مسموح لأى وزير أو مسئول فى الحكومه انه يرشح نفسه لمجلس الشعب، هو عنده مكان يتكلم منه ويصلح فيه، عاوز كرسى ليه فى المجلس؟؟؟!!! وكمان افرض الوزير معموله استجواب مين هيستجوبه ولا مين هيوافق عليه؟؟؟ بتحصل عندنا دى؟؟ عارفين ليه؟ علشان كله سلف ودين ولو استجوبتك النهارده هتستجوبنى بكره فتسكت احسن وخلى الطابق مستور،وكمان لو استجوبتنى مش همضيلك على القرارات والتسهيلات إللى عاوزها منى

ومفيش حاجه اسمها حزب غير معترف بيه او جماعه محظوره...عيييييب



بحلم....بمجلس شعب محترم مش مطبخ، بحلم ببيت الأُمه لنا كلنا مش بيت أُمُه لوحده

لولا انهم عارفين ومتأكدين اننا نقدر نغير مكنوش حطوا قدامنا كل العوائق دى ولا كل يوم يفننوا قانون شكل يسحبوا بيه سُلطتنا....سُلطة الشعب

بحلم ببرلمان فيه التصويت بنزاهه وشفافيه واقتراع إلكترونى يظهر على شاشات لكل الناس تبين الموافقين والمعارضين وعددهم من كل حزب ، مش تصويت "بوئيئى" ولا شفوى و" الموافق على هذا يتفضل برفع يده...موافقه" ،حتى من غير ما يكلف خاطره ويرفع راسه يعد "الأيادى" المرفوعه بالموافقه زى تلاميذ المدارس

أنا يوم ما هدخل مجلس الشعب هدخله بموافقة الناس وبصفتى كنائبه عنهم مش بشخصى كمرأه رمولها حاجه تسهى فيها ويطالبوها بالتمن بعد كدا

مش هكون معاهم معاهم عليهم عليهم

مش هزعق ولا هعلى صوتى ولا هرفع جزمتى فى وش حد، ولا هنام ولا هقزقز لب وسودانى ولا هلعب جيمز
عالموبايل تحت قبة المجلس الموقَر

مش هغيب ومش هصرف بدلات واخد امتيازات مفروض تكون من حق اصحاب السُلطه الحقيقيين إللى حطونى فى المكان ده، مش ههتف واصقف لوزير واتكالب عليه علشان يمضيلى ورقه بقلم احمر ويكسر عينى بعدها



مش هتعالى على الناس وابصلهم بقرف واتكلم عليهم كأنهم رعاع شحاتين غوغاء

هفضل أرفض واحلم واحاول واتكلم.....يمكن أنا معرفش اوصل للمكان ده بس حد من إللى بيسمعنى تكون فرصته أكبر ويوصل اسرع منى

هل من مُشَمِر؟؟؟ هل من خادم للشعب؟؟؟ هل من فدائى؟؟

عارفاكى وَلاّده يا مــــصـــــر

Sabrina Abu Ali


الثلاثاء، 23 مارس 2010

أنـــــا كــــده ودا لــــــــونــى

كتير لما بكتب بكتب لنفسى،مجرد أوراق و"مبعثرات" هنا وهناك
وغالباً مش بحب أبعتها ولا أزعج القارئ بيها؛لأنى أحياناً كتير بقرا حاجات وبعد ما أخلصها بقول لنفسى "وأنا مالى، دى حاله خاصه وما تهمنى" علشان كدا بفكر وبتردد كتير قبل ما ابعتلكم حاجه علشان ما تزعجكم منى
بس بردو بحب أشارككم حاجات بحس بيها، بحبها أو بكرهها،بتضايقنى أو بتفرحنى،يمكن يكون فى حد يشاركنى نفس الإحساس ويفرحه إنى اتكلم عنه
وبعد ما شفت إعلانات مشروب السخافه "أنا كده وداعبطى...قصدى ستايلى" قلت مجتش عليا بقا،حتى مش هنطلكوا زى عفريت العلبه فى الفواصل من الشاشه منكوشه ولا بصرخ ولا حد بيؤولك..مُدَرسه مُدَرسه مًُدرِسااااااااااااه
*********
من أكتر الحاجات إللى بتشدنى وتفرحنى وتخلينى فى منتهى البهجه والسعاده هى "الألوان" إللى بتدى معنى ووجود للحياه وتنطقها
كل الألوان وأى ألوان، مبعرفش أمسك نفسى أؤودامها، ويوم ما جاتلى شنطة ألوان كامله" خشب وفلوماستر وشمع وميه" كنت هتجنن من السعاده وكل شويه أروح افتح الشنطه اتفرج عليها مع انى كنت كبيره ومتخرجه من الكليه بس عقل عيال بعيد عنكم،ولسه "بتنح" أؤودام الألوان لحد النهارده وما بعرف أقاومها وعندى أكوام منها
بعشقها فى كل حاجه حواليا،من أصغر حاجه ممكن تكون فى إيدك ولحد اكبر شئ ممكن تشوفه عنيك
وبشتريها واشترى دفاتر تلوين واخبيها بعيد عن العيال علشان ميلعبوش معايا بيها

وبحب الناس إللى بتلبس ألوان مبهجه وبفرح باللوحات والرسم وحتى الشخبطه،وبستنى شم النسيم علشان اسهر ألون البيض واصحى بدرى علشان اكمله
وصلت بى درجة الهوس لهاجس مرعب إنى فى يوم من الأيام-لا قدر الله- مش هشوف ولا هستمتع بالألوان....هتعمى
دايماً الحكايه دى مخوفانى،والله أوقات أصحى من النوم وافضل مغمضه عيونى وأقوم واتحرك فى الأوده والبيت واجرب اتعرف على الحاجات باللمس أو الإحساس
وكتير بجرب اقعد فى الضلمه واتعود عليها، بتكون حياه هاديه ومريحه من غير إزعاج ولا مشاهد تؤلمك
بس بردو رعب وكآبه،بيخلونى عاوزه أملا عيونى بصور كل حاجه وأشوف ألوان على قد ما أقدر واقرا كل كتاب تطوله إيدى
هو أنا مخى قرب يضرب ولا إيه؟
نغير الموضوع ونرجع للألوان.....حبى الطفولى
أكيد فى حب "عام" وحب "خاص"،وزى ما فى حد مميز فى حياتك أكيد بردو فى لون بيشدك عن غيره، وكل ما تيجى تشترى حاجه تسأل ان كانت متوفره باللون إللى بتحبه ولا لأ

وحبيبى المميز بقا هو اللون "الأزرق"....بحبه بعشقه وأموت فيه بكل درجاته وخلطاته،من أول اللبنى السماوى الفاتح واللازوردى والكحلى"الروعه" والزهرى"المذهل" و لحد التركواز الساحر(ازرق مخلوط بأخضر)تحفه
أهو هو دا بقا
مش عارفه بحبه ليه؟؟! جايز علشان بيتدرج من منتهى الهدوء لقمة الجنون ومن قمة البهجه إلى قاع الكآبه؟؟!
وجايز علشان لون"متسلط ومسيطر" بيحاصرنا فى كل حاجه بمنتهى الشياكه والرقه والذوق
بيفرض نفسه علينا وبنستقبله ونستمتع بيه كأعز زائر وصاحب بيت مش حد فارض نفسه عليك

لون متورطين فيه بشكل لذيذ وناعم أوى؛من أول حصاره لينا بكبرياء فى السما والبحر ولحد إنحصاره فى عيون زرقا لشخص غريب غصب عننا تجذبنا وكتير نبتسم لها
الأزرق لون التناقضات والمشاعر المتقلبه، كتير يسحرنا بوجوده الهادى البرئ وياما بيزعجنا بثوراته وهياجه،أحياناً معاك وأحياناً عليك
الأخصائيين النفسيين بينصحوا ان تكون فى أوده على الأقل لونها أزرق فى البيت علشان بتهدأ الأعصاب وتفك التوتر والضغط وبتخلى الشخص فى حالة هدوء وإرتياح نفسى، حتى لو لك مزاج تتخانق مش هتتخانق
وأنا بكتب الموضوع ده عملت بحث على فوائد اللون الأزرق فى حياتنا، علشام ميبقاش كلامى كله بلا معنى ويمكن تستفيدوا منه شويه
لقيت إن اللون الأزرق بيُنصَح بيه فى ديكور العيادات والمستشفيات وبعض غرف المنازل زى النوم والليفينج والمكتبه وأود الأطفال وكمان الحمامات،بس أودة السفره الأحسن تكون لون نارى أو من درجات البرتقالى علشان تفتح النفس
كمان اللون الأزرق بيساعد على تخليق مواد كيميائيه فى الجسم تحسسه بالإسترخاء وينام بسرعه
كمان بيزيد القدره على الإبداع،ويوصى بيه فى ديكور الشركات والمكاتب لأنه بيزيد من طاقة الموظفين فى العمل!!!!مش قلتلكم لون متناقض؛إزاى استرخاء وإزاى طاقه زياده؟؟!! سبحان الله فى إبداع خلقه وكونه
وكمان فى صالات الرياضه علشان بيزود النشاط العضلى للجسم، والأغرب بقا انه بيُستخدَم فى علاج الإدمان وخلل الأكل والإكتئاب
سبحان الله فى خلقه بجد، تخيلوا علاج طبيعى حوالينا فى كل حته،أرض وبحر وسما، متخيلين لو السما كانت اخضر مثلاً والبحر أحمر أو بنى...يا ستيير يا رب،الحمدلله رب العالمين

ربنا بيحبنا والله وعاوز سعادتنا...بس إحنا إللى بنحب الكآبه
وفى نصيحه تقولك لو رايح اجتماع أو عندك مقابلة عمل إلبس بدله زرقاء - كحلى لأنها توحى بالثقه
الأجمل بقا إن معظم الأحجار الكريمه لونها أزرق(فيروز، لازورد،توباز،زفير،أكوامارين، جشمت)، ناس كتير تفتكرنى بحبها علشان تمنع الحسد والكلام العجيب ده لكنى والله بحبها وبقتنيها علشان فعلاً جذابه وفى منتهى الروعه
وعرفت دلوقت إن لها تأثير إيجابى على إللى بيلبسها،وبتمتص المشاعر السلبيه وبتخلق نوع من التوازن العاطفى،وتقلل الخوف والتوتر والاكتئاب ودا ثابت فى نوع علاج اسمه" العلاج بالأحجار الكريمه" وثابت كمان فى الإبتسامه إللى وجعتلى عضلات وشى ومش راضيه تريحنى شويه حتى وأنا زعلانه
والأحجار الزرقا كانوا بيستخدموها زمان لطرد ومنع الأرواح الشريره



احتمال ده بسبب فكر موجود عند الناس يربط اللون الأزرق "لون السما" بكل ما هو روحانى
ملاحظين كمان إن مهن كتيره مرتبطه باللون الأزرق؟ زى البحريه والبوليس وبعض فرق القوات المسلحه والطيارين وحتى الأفرول بتاع العمال والبيريهات والكابات وغيرها حاجات كتير بتحتل اللون الأزرق وكل درجاته وتتحلى وتتميز بيه...لون جبااااااااار بجد
حتى الطبقه الأرستقراطيه والملكيه فى أوروبا بيسموهم
blue blood
لأنهم من كتر الرفاهيه والتربيه فى قصوره تحجبها الشمس كانت بشراتهم شفافه ونقيه لدرجه تبين عروقهم الزرقا، يعنى دا لون ملكى مأصل

والقمر المكتمل الساحر فى تمامه لما يبقا بدر فى أوقات معينه فى السنه الشمسيه
بيسموه
blue moon
وبيستخدموه كمسطلح للحاجات الساحره والكامله والمستحيله
مش بقولكم بعشقه، إياك ربنا يوعدنى بمحلل نفسى دلوأت يقولى شكلك بتحبى السُلطه والهيمنه مش مجرد حب وإرتياح للون وإيحاءاته النفسيه بالسلام والهدوء
وتعرفوا كمان ان واحده من أِشيك غرف العالم واشهرها
واكثرها أناقه فى البيت الأبيض هى
the blue room
ودى صوره جانبيه منها
وفى كل الحالات الأزرق بكل درجاته وألوانه فعلاً جذاب ولما ييجى مع أى لون تانى بيميزه ويوضحه ويبرز جماله،الموضه كل سنه لا تخلو من اللون الأزرق، سواء الساده او بتدريجات ألوانه أو بيطعم لون تانى
فاكرين الفتره إللى ساد فيها الأزرق والاصفر؟ خليط من الطبيعه، كأنهم الصحرا والسما أو البحر ورمل الشط أو حتى الصحرا والبحر...تناغم رائع فى كل الحالات وهارمونى تنسجم معاها بمنتهى السلاسه
الأزرق مع البُنى كمان مهووول، وفضلنا فتره كانت أزياء البنات لا تخلو من التركواز المطعم بالبُنى
أما بقا الأزرق والأخضر فدول حبيبين واجتمعوا ولكم أن تتخيلوا سحرهم، بياخد من العقل،ولا ينافسنى فى حبى اللون الأزرق غير اللون الأخضر والبنفسج بدرجاتهم....رووووووووووووعه
والأزرق والروز كمان هايلين مع بعض،ومع الأبيض والأحمر
سبحان الله العلى العظيم
لحاف يفتح النفس ويجيب الاحلام الحلوه
ويا سلام عليه مع الأسود، منتهى الغموض والرجوله والقوه،فاكرين ملابس فرسان المائده المستديره
فى فيلم first knight بتاع شون كونرى وجولى اورموند وريتشارد جير
رهيييييييييييييييييييييبه،حاجه تليق بفرسان بجد

أنا لو فضلت أقولكم عن حبى وعشقى للأزرق والأخضر والبنفسج هتتعبوا وانا كمان هتعب،بس الازرق بفوايده الطبيه والنفسيه يستاهل إنه يتعرف وتقع فى غرامه زى حالاتى
يقولوا بقا لون هادى ولا هايج،لطيف ولا متقلب، ناعم ولا خشن، واضح أو غامض، مبهج ولا حزين، متفائل ولا كئيب....مش مهم، المهم ان دا "لونى" وبحبه بكل متناقضاته
مصحفى أزرق ومدونتى زرقا والفيس بوك أزرق وصفحات إميلاتى والسما والبحر وصوابعى فى البرد وهدوم النونوهات الولاد
أنا كدا ودا لونى.....منفسنه منفسنه منفسناااااااااااااااااااه
الحاجه الغريبه بقا إنى "لا أجرؤ" على اقتناء أى شئ أزرق إلا بعد معركه جدليه حاميه مع مامتى إللى ما بتطيق الأزق وبتعتبره لون كئيب ومش بناتى على الإطلاق ،ولو جبت حاجه زرقا لازم أخبيها لفتره وامهدلها عند ماما قبل ما اخرج عليها بيها وأنا بدعى فى سرى...استر يا رب
أحلى واشيك من الريد كاربت بتاعة الاوسكار مليون مره
شوفتو أزهى عصور الديمقراطيه إللى بنتمتع وبنعيش فيها؟؟!!! حتى ألوان هدومى مقدرش اختارها لوحدى،ولو اخترتها لازم افكر فى رد الفعل المنتظرنى بسببها
ولازلت أعشق الألوان وأهيم فى بهجتها وفرحتها وشقاوتها ووقارها ولمساتها إللى بتدى لحياتنا معنى ووجود،وعلى رأسها الملك وساعديه

الأزرق والأخضر والبنفسج...حد عنده اعتراض؟؟
ودى شوية حاجات زرقا بموووت فيها ،يمكن تعجبكم وتبهجكم


مش قولتلكم انه لون ساااااااحر
BMW اوعدنا يااااا رب
شياكه وأناقه
ركزوا فى عمق اللون وبس
لون ملوكىودا بقا طقم بدرجات التركواز جمعته وصورته ومتأكده إنه هيعجب كل البنات وممكن جيب بدل البنتاكور والاكسسوار البنى بينطقه جداً
أتمنى أكون حببتكم زياده فى اللون الأزرق علشان تكونوا معايا "جبهه" ضد ماما ونقنعها بيه أو على الاقل متحسسنيش بالذنب كل ما اجيب حاجه زرقا
دمتم بكل خير وراحه وهدوء وسعاده وثقه وقوه و...م الآخر دمتم أزرق
واوعوا حد يفهمنى غلط ومتزعلش من إللى يقول لحد يومك أزرق
ههههههههههه،ربنا يستر
Sabrina Abu Ali