بييجي وقت لازم تسكت فيه , وعقلك يقولك ( خليها فى القلب تجرح , بدل ما تبان و تفضح ) .. و أوقات تحس إنك لازم تتكلم .. مش قادر تكتم و تخبي .. وإلا هتنفجر .. علشان متكلمش نفسك و الناس تقول إتجننت .. أو تخلق شخصية من خيالك تعيش معاها و تعزلك عن العالم ويقولو عليك براوي ... يبقى الحل إنك تفضفض .. اللى تقدر تتحمله خليه جواك .. و اللى متقدرش عليه .. ويفيض بيه قلبك و عقلك .. وزّعه على اللى حواليك ... هنا مش مجرد كلام و حكايات ... كل رسالة هي فيض من ( فيوض القلب والخاطر ) ....... أنا / صابرين أبوعلي

الثلاثاء، 27 أكتوبر، 2009

والله العظيم حصل حصل حصل

مين دااااااااااااااااااااااه تعرفوه؟؟؟
مش هتصدقوا..اه بجد
.انا قربت اموت
عرفت منين؟؟؟
بيقولوا ان لما امنياتك تبتدى تتحقق وخصوصاً المستحيل منها يبقا قربت تموت ودى حلاوة روح
تخيلوا، لأ مش هتصدقوا، انا بيتهيألى دى تهيؤات
احتمال بجد؟؟عموماً هؤول وخلاص ولو اشاعه يبقا بجملة الاحلام
قال خير اللهم ما اجعله خير وبدايه للنهايه
قال يا ولاد....لأ لأ لأ
مش قادره
حد يقرصنى
والله العظيم بجدوزير النقل والمواصلات" المصرى" مش اليابانى "محمد لطفى منصور" استقال من مهام الوزاره!!!!!!!!!!!!!!! ؟؟
عرفتوا انه خبر صدمه
ايواه ايوااااااااااه هو الحليوه اللى على ايدك الشمال اللى بتاكل بيها، تانى واحد شمال
بصوا...احتمال اجبروه،او اقنعوه "يماين" ويطاطى للريح وخصوصاً ان مؤتمر الحزب الوطنى السنوى قرب والغلطه قصدى الجريمه دى فى وشهم ولازم تتصلح،
واحتمال هيدوه منصب تانى اهم علشان موت مصريين فقرا وشحاتين وعبء على البلد ملهمش لازمه
واحتمال فتره ويرجعوه تانى
واحتمال بجد علشان استورد "جرارات" قطارات غير ملائمه للسواقين بتوعنا واشتكوا منها عشرات المرات ومفيهاش انذار
وبيعمل اعلانات ليها بملايين الجنيهات وكأن كل مصر بتركب السكه الحديد علشان تسرق حنفياتها ويفضحنا فى الوطن العربى والفضائيات
واحتمال علشان واضح ان فعلاً عدد الضحايا كبير جداً وميتسكتش عليه ولسه معتمين على العدد لحد دلوأت
ما عليناااا
المهم ان فى وزير مصرى استقال بعد ما كنا نسينا الاخبار دى
كفاره يا رجاله كفاره يا بلد
بركاتك يا مؤتمر الحزب
عؤبال ما يحاكمولهم اتنين تلاته وكمان 10 يستقيلواعؤبال البواقى و الفُضَل
قولوا آمييييييييين
قال ايه؟؟ داس على جاموسه قال
ما طول عمر القطارات بتاكلها 10-20 جاموسه فى اليوم غير البنى آدمين والعربيات والمعيز والحمير
يظهر كانت عجوزه ومقدرش يهضمها
ولا جايز علشان جرارات جايه من برا تكون نباتيه وبتاكل لحوم بش بس؟؟؟
ما علينااااااااااااااااااااااااااا
المهم قبل ما انسى بالمره انهم عينوا وزير الكهرباء والطاقه للإشراف على وزارة النقل لحين تعيين وزير-- قصدى اختيار وزير
ربنا يستر وميضيفوش"الزباله" على تذاكر الاتوبيسات والقطارات كمان وتبقى شوطه وجت فى البلد
المهم
الوزير ده شكله يدى خواجه علشان كدا عنده دم واستقال
ما علينا
الله يرحم اللى ماتوا..ربنا رحمهم من اللى جاى او جايز كانوا ماتوا بالانفلوانزا او تطعيمها انت وحظك
والباقيين فى القطار الجاى من غير مقاطعه
و............لولولولولولولولولوللولولولولولولىىىىىىىىىىىىىىىى
حلم ولا علم
حد يقرصنى يا ناس

الخميس، 22 أكتوبر، 2009

وإنتَ مالك !!!؟؟؟؟؟؟؟؟


عندنا مثل بيقول " واحد شايل دقنه والتانى زعلان ليه؟" ودا بيتقال لما تحب تحرج حد وتقول له " ملكش فيه او ميخصكش او خليك فى حالك" بس بطريقه دايره....لؤم الفلاحين بآ

مع ان المفروض يعنى ومن باب الغيره للدين والحميه لأوامر الله وسنن رسوله صل الله عليه وسلم انك فعلاً تزعل ولو شويه لما تشوف حد مسلم شايل دقنه، لأنها سنه مؤكده اطلاق اللحيه وحلق الشارب؛ بس احنا بقا مع الوقت والعصريه والحداثه والبريستيج والحشرات بقينا نطنش ونستهبل ومناخدش فى بالنا لحد الموضوع ما بقا.....عااااادى وإللى بيربى دقنه بيربيها دلع او مش لاقى حاجه تانيه يربيها او لو رباها سُنه تلاقى زمايله وقرايبه وسايس الجراج كمان يقول له "ياشيخ" وكأنها عار وفضيحته بانت عليه.
ودا بقا حالنا فى حاجات كتير؛ قانون "العادى يا جماعه" بقا هو إللى سايد وصوته عالى وإللى يخالفه حتى لو صح يبقا هو إللى مش عادى ولا طبيعى ويستحق وقفه
ومن ضمن العادى انك تلاقى كل جيل يقدم تنازلات وييجى إللى بعده يورثها على انها "عادى" وزى ما لقينا أهالينا بيعملو عملنا وطبعاً لازم نضيف لمساتنا من العادى
يعنى مثلاً، جت فتره على مصر كانت فى منتهى الإنحلال ومن غير ما ياخدوا بالهم، من كتر التدرج فى التنازلات والعادى بقا عاااادى ومفيش مشكله ومتحبكهاش، يعنى القاهره المحروسه من العين والحاسدين كان فيها حوارى "للبغاء" وكانوا بياخدوا تراخيص مزاولة مهنه و(الحكومه) المحترمه هى إللى كانت بتصرح لهم بكدا وتديهم شهادات صحيه كمان!!! شوفتوا القرف إللى كنا فيه؟؟؟ اظن محدش يصدق، زى انا كمان مكنتش مصدقه وحاسه انى قرفانه وعاوزه ارجع لما شفت جرنال قدييييييييييييييييييم من ايام الثوره والمانشيت الرئيسى فيه ان " الحكومه تقرر إلغاء البغاء" دا طبعاً لما فاقوا وافتكروا انه حرام وعيب واننا عايشين فى بلد مسلم مش فى بار ولا خماره بلدى، والسؤال بقا...يا ترى الحكومه لو مكنتش لغت القرف ده كان بقا ايه حالنا دلوأت؟؟؟ اكيد بردو كان بقا "عادى" وانتشر فى كل مدينه وقريه، ما هى "مهنه" بقا والناس بتاكل منها سم هارى وبردو علشان البطاله متزيدش والإيد البًطَّاله ....... اكيد فى الحاله دى هتكون طاهره ولو مكنتش يبقا تستاهل قطعها

الحكومه وقوانينها إللى "خاضعه لأهواء ونزوات" بشر زينا زيهم واكيد بيغلطوا بقت بتتعامل معاملة "الإله" تؤمر وتنهى وتقرر وتلغى واحنا نقول "سمعاً وطاعه" حتى لو غلط، زى الشيخ بتاع فيلم الزوجه التانيه وهو بيقول لأبو العلا وبيقنعه يطلق مراته " اطيعوا الله واطيعوا الرسول وأولى الأمر منكم" الصراحه أبو العلا رد عليه رد مفحم ينفع لكل العصور المصريه " أيوا بس انت كافر يا عم الشيخ".
سيدنا ابو بكر الصديق رضى الله عنه وأرضاه وسيدنا الفاروق عمر بن الخطاب لما خلفوا سيدنا محمد صل الله عليه وسلم فى شئون المسلمين أول حاجه طلبوها من الناس انهم ينصحوهم ويراجعوهم فى الكلام ويشاوروهم ولو غلطوا يضربوا على ايديهم. لكن احنا فى عصرنا "لأ و80 مليون لأ كمان" تؤيدها نسبة الـ99.9% على كل حاجه وبدليل مبدأ الجيش الأساسي " طيع الأوامر ولو غلط يا عسكرى" وايكش تولع
إللى يغلط ماشى وإللى يعك مفيش مانع ، ومفيهاش حاجه وملناش دعوه وكبر دماغك و......عادى بقا
اعرف ان دوله مسلمه يعنى "المفروض ولازم" يظهر دا فى شكلها العام وسلوك حكومتها وناسها، وإللى عاجبه عاجبه وإللى مش عاجبه يتحرق والله الغنى عنه، لكن إحنا بردو "لأ" علشان بقينا "مودرن" خالص فلازم يكون فيه مقابل للحداثه دى وللطبقه إللى عاوزين ننحدر لها

وفيها ايه لما السياح يدخلوا مساجدنا "يتفرجوا" وهم غير طاهرين والله اعلم شاربين ايه وعاملين ايه وبملابس غير لائقه لأى حد؟
ولا فيها ايه لما مصر يكون فيها شواطئ عُرى فى شرم وعلى الصن ديك لأى كروز بغض النظر عن العماله المصريه المسلمه إللى عليها... عادى بقا، وإللى مش عادى ان حاكم امارة الشارقه فى الامارات "يلزم" السياح بإحترام البلد إللى مستضيفاهم ومفيش لبس ولا حركات غير لائقه فى الشوارع ولا الشواطئ، اتريقوا عليه فى برامجنا المصريه المحترمه وقالوا الناس جايه "تسيح براحتها" مش جايين نخنقهم عندنا، يا ترى بقا دا "قلة أدب" ولا "انعدام أدب" ولا عااااادى يا جماعه؟؟!!

وفيها ايه لما وزارة السياحه تشترط فى الفنادق إللى عاوزه تتصنف وتاخد نجوم ان يكون فيها "بار" والنجوم على حسب خموره والعداد بيعد،مع اننا وبكلام "الله" الواضح الواحد الذى لا شريك له فى حكمه ولا امره المفروض نكون عارفين ان الخمور "حراااام" ومفيهاش جدال ولا كلام تانى والملعون فيها 10 بنَص حديث سيدنا رسول الله عليه الصلاة ،ومع ذلك "عاادى" وبقيت تدخل اوضة الأوتيل تلاقى فيها مينى بار او تلاجتك فيها كام ازازه عالماشى تحيه من الفندق!!! وحتى فندق "الحياة" إللى اشتراه سعودى ورمى خموره ولغى البار وزارة السياحه المحترمه هددوه ينزل فى التصنيف لـ3 نجوم بس، ولا حد اتكلم ولا ساند الراجل ولا قال حرام ولا حتى عيب، ليه؟؟ علشان محمد ابو سويلم مات وفيلم الارض خلص ومعدش فيه رجاله بيقفوا وقفة رجاله ولا ناس محترمه، وبقت الخمور تتباع فى المطار والمحلات والسوبر ماركت بلا حياء ولا حتى تصَنُع الاستحياء من الله وبيعها فى السر من باب عدم المجاهره بالسوء والفسوق والمعصيه، بس نقول إيه؟؟...عااادى بقا يا جماعه.

وايه يعنى لما وزارة الاعلام ما تمنع توظيف "مذيعات محجبات" فى التليفزيون المصرى وان 3 مذيعات فى القناه الخامسه يرفعوا قضيه بسبب منعهم من الظهور على الشاشه بعد الحجاب رغم اننا فى بلد "عربى مسلم" من ثوابت واساسيات دينه ان الحجاب فرض فرض فرض يللى معندكوش دم
وفيها ايه لما نلاقى الناس فى مصر فترة الستينيات والسبعينيات "مستهبلين" عالآخر والستات نسيت تلبس والرجاله لابسه محزق ومشجر وبتحط باروكه كانيش وتلاقى صور امهاتنا لابسين الفساتين الكات والحمالات والمينى والميكروجيبات ومسيبين شعرهم بيجوديه وارمنو وشينيوه وكأنهم مكانوش بيخرجو من الكوافير ودا برغم انهم مسلمين وتجاوزوا ال15 سنه وتيجى تسأل بإستغراب تلاقى رد واحد....دا كان "العادى" فى وقتها وزيك زى الناس

ولا فيها ايه لما تلاقى انحلال ومجاهره بالمعصيه فى اعلانات وافلام ومسلسلات منحطه وناس تتقصع و تحضن و.... و..... على اساس بقا زوج وزوجه ولا جوز حبيبه وعايشين الدور والمفروض نتعاطف معاهم بإسم الفن والأصح يكون بـ" إثم الفن"، مع ان دا فى الاسلام والدين ملهوش غير مسمى واحد " تحريض على الدعاره والزنا" أنا آسفه، والله العظيم بتكسف اقول كلام كده وما اعتقدش انى هتكلم فيه وجهاً لوجه مع حد لكن حتى القرآن الكريم ذكر كلمة "الزنا" فى محكم آياته الشريفه. فين بقا الشيوخ والأزهر والمسلمين علشان يثوروا لدينهم ومبادءه ووشهم يحمر غيره على دين الله وتأخذهم الحميه، حمية التضامن مش التشاحن والتباغض؟؟؟ تحسوا ان الاعلام بتاعنا بقا فعلاً له رساله واحده وبيروج لأصحاب مهنه محدده....القوادين والنخاسين، شوفوا ابسط حاجه" الاعلانات" وشوفوا بناتهم وحركاتهم وطريقتهم، شئ مقزز ومثير للقرف والغم
حتى عمرى ما سمعت عن شيخ او داعيه "رفض" يجرى لقاء او حوار او يظهر فى برنامج مع مذيعه "سافره" وملهاش اسم تانى غير ده مهما كنا معجبين بيها وبشخصيتها، دا كلام ربنا مش هنزوق فيه علشان منجرحش شعور حد، الحجاب فرض وغير كدا يبقا سفور ومحدش يقولى "ربك رب قلوب" لأن المظهر بيدل على الجوهر وزى ما بيقولوا كل اناء ينضح بما فيه، مش لابسه الحجاب اما علشان مش مقتنعه او منكراه وفى الحالتين يبقا بتنكرى كلام ربنا ومش بتنفذى اوامره فى الاساسيات فمتقنعينيش بقا انك بتنفذيه فى الفرعيات
ايه يعنى وعادى جداً لما البيه المحترم "يرقص" مراته فى الفرح ويفرج عليها الناس بحجة ان دى "ليلة العمر" وخلى الناس تفرح وتتفرج والموبايلات تصور والرايح يورى الجاى، ولا ايه يعنى لما تعمل شعرها والكوافير يكون راجل بقاله 3-4 ساعات يلعب فى وشها وشعرها وهى ما قامتش رزعته قلمين وكملت عليه بالشبشب، ولا علشان الشكل يبقا مقبول فالفستان ميكنش مقفل أوى، يعنى بحمالات او نص كم والديكولتيه واسع من على الصدر ولو محبكينها اوى يبقا هنقفل الفستان من فوق" بالشيفون او الحرير الطبيعى" علشان بردو يبقا شفاف وكاشف إللى تحته وحاجه ببلاش كده للى يحب يتفرج ويملى عينه،وزياده فى اثبات التهمه وكأننا مش مكتفيين بسجلات الملكين على اليمين والشمال..لأ، دا إحنا كمان بنسجلها على نفسنا صوت وصوره والصوره تتحط فرجه فى ألبوم أو الصالون وعلشان إللى محضرش يتفرج نحطها بالمره على الفيس بوك والماسنجر وكل برامج الشات. فين مارى منيب تيجى تؤول له " إتفوووووووه، جاتك ستين نيييييييله" وشدد على الواو والياء علشان اى حد يعمل كدا يبقا يستاهل ولا عزاء للرجاله.

المفروض لقب"راجل"ده يدوه للمذكر بعد اجراء الاختبارات اللازمه عليه ويشفوه يصلح ام لا يصلح يكون راجل بجد ولا كفايه عليه يكون قرنى فى مسرحية سكة السلامه،عنده دم كده ووشه بيحمر لما يشوف الغلط ولا بيفوت ويعديها وميخدش فى باله علشان المركب تمشى، للأسف الديوثين بقوا كتير أوى وسيدنا محمد عليه الصلاة والسلام قال ان "الديوث الذى لا يغار على عرضه"
كنت بتفرج فى محل ملابس مره ولقيت بنتين طالعين من البروفه فكرتهم نسيوا ياخدوا اللبس إللى هيقيسوه من قلة إللى مكانوش لابسينه، دورت وشى وقلت جايز علشان توكيل اجنبى يكونوا دول خواجات وكملت فرجه، الاقى الهوانم طالعين تانى ألعن من الاول وبيفرجوا "حاج كبير وحاجه كبيره لابسه طارحه" وشايلين احفادهم إللى هم ولاد البنتين دول وفى وسط الناس وعادى وايه رأيك يا بابى وايه رأك يا مامى؟؟ جاتك بو ومو انتِ وهى، فكرتهم جايبين اللبس ده يلبسوه فى البيت لكن وهم خارجين بعد ما اشتروا لقيت ان دا "العادى" بتاعهم ،بقيت اكلم نفسى، ازاى دول ابوهم وامهم وفين اخواتهم "الرجاله" وفين ازواجهم؟؟ راحوا فى الكوليرا ولا خدهم الوبا؟؟؟! والله اتقهرت وقعدت عالسلم اعيط لما الناس اتلمت عليا وكان نفسى ارقع بالصوت كمان، يا صدمة سيدنا محمد عليه الصلاة والسلام فينابقينا باردين وتنابله وجبلات، خدونا واحده واحده من الدار للنار علشان كدا محسيناش بصدمتها، تساهلات وتنازلات وعادى فى عادى

فى الاول خالص عادى ان الست تقلع "برقع الحيا" بعد ما شوفناها فى صور ثورة 1919 منتقبه وحشمه ودا كان اول ظهور علنى للمرأه المصريه المحترمه وبدايه لإنقراضها، بعد كدا بقا وشها مكشوف ونزلت الهانم- قصدى البيه- نبويه موسى بالبدله والكرافته تطالب بحريتها وبعد كدا اتجرؤوا اكتر ونزلت غيرها بالشورت فى حرم الجامعه تلعب تنس مع الشباب، وهاصت الحكايه ودى تقلد دى وبعد ما كان شئ مستهجن وشاذ انك تشوف ست مكشوفة الوجه بقا عادى انك تشوفها مكشوفة الجسم كمان
سنه ورا سنه وجيل ورا جيل ورثنا الخيبه والسلبيه والخنوع وبقينا إمعات لغيرنا وقرود فى جبلاية بيوت الازياء والقراداتيه بيرقصونا على مزاجهم ورغباتهم، اكشف من هنا واقطع من هنا وقصر من هناك وضيق من حته تانيه، بقينا مسخ من غير هويه، لا مسلمين ولا غربيين
وبعد طول الزمن لما الناس رجعت تتعدل وتلتزم ويلبسوا الحجاب خلوه "عالموضه" علشان بردو ميحتكوش وتحصل مصادمات بين الرافضين والمؤيدين، سيبوهم يغطوا شعرهم عالماشى كدا واهو نقنعهم ان دا "الحجاب" وكفايه عليكوا اوى ونعمه وفضل، احنا كنا فين وبقينا فين، دا انتوا احسن من غيركو، واتخدرنا وسمعنا الكلام علشان موافق لمزاجنا واهواءنا ونفوسنا الضعيفه
لكن بردو فضل الالتزام يزيد والناس بقت ترجع لربنا وتحكم عقلها وتستفتى قلوبها وتتبع الصح، ورجعنا نشوف المنتقبات زاينيين شوارعنا المصريه المسلمه ويدوها بعض من هويتها الحقيقيه، بس الاعلام والحكومه والمجرمين ماسابوهمش فى حالهم، مره يقولوا دا "حجاب ايرانى وبتاع الشيعه" ومره يقولوا حجه للإرهابيين ومره يقولوا مناظر شاذه فى وسط المجتمع...الصح بقا شاذ؟؟؟
عندهم حق الغرب يتجرأوا علينا ويقللوا قيمتنا، اذا كان احنا بنبهدل فى بعض ومفيش احترام لأدنى قواعد الدين و"الحريه الشخصيه" يبقا هم هيعملوا فينا ايه؟؟ قليل ان ما داسوا على رقبتنا بالجزمه ونقول لهم كمان...أعد
لما ييجى شيييييييييييييييييييييييييييييخ الازهر، المكان إللى يعتبر مناره لكل مسلمين العالم ببعثاته ووفوده وقراراته، المكان اللى بسببه الافارقه شالوا عربية عبد الناصر على اكتافهم والناس رفعت الشعراوى الله يرحمه بعربيته، المكان إللى عاش ايام الشيخ محمود شلتوت والغزالى ومحمود عبد الحليم وجاد الحق الله يرحمهم جميعاً، لما ييجى شيخه يهزأنا على اخر الزمن ومره يحلل الباروكه ومره يحلل خلع الحجاب ما دمتى فى بلد هتسببلك مشاكل وساركوزى يتصل يؤوله اعمل ايه فى موضوع الحجاب فى فرنسا يرد عليه يقول له براحتك دى دولتك ويخلى المحاكم الفرنسيه تعيد النظر فى قراراتها، ويسيب مذيعه تحاوره والطرحه على كتفها وكأنها متكبره تغطى بيها شعرها وهى فى مكان محترم زى ده، واخيراً لما جرأ السفهاء والسفيهات على المسلمات المحترمات بقراره منع النقاب فى المعاهد الازهريه. عاوزين بعد كدا يحصل ايه؟؟ هوجه متوقعه وناكل فى بعض ونضحك الناس علينا
يوم ما اعلنوا ان فى "بيان" هام هيصدر عن الأزهر يوم الخميس 8 اكتوبر، حطيت ايدى على قلبى وخفت "يمنعوا الحج" بجد السنه دى، لكن المصيبه كانت اكبر وانا بسمع القرار، فى ظاهره يبان عادى ومن حقه مادام المعهد او المدرسه كلها بنات والعاملين فيها بنات يبقا البنت تكشف وشها عادى، لكن إللى مش عادى من شيخ الازهر انه يجبر بنت فى تانيه اعدادى تخلع نقابها ويتريق عليها بقوله" اومال لو كنتى حلوه" وكمان لو المدرسه كلها بنات وستات فهو راجل وإللى معاه كانوا رجاله، ويقول فى حديثه ان "البت كان شكلها شاذ وغريب بين اقرانها" مع ان هى حره واهلها مدخلينها ازهر علشان عاوزينها ملتزمه ومصانه شكلاً موضوعاً، ليه متكلمش على معاهد الباليه والسباحه التوقيعيه ومعاهد الرقاصات لتعليم الرقص الشرقى؟؟؟ ويقول كمان انه "ليس من الاسلام فى شئ وانه عاده وليس عباده وكمان بدعه" يا نهار اسود يا ناس!!! على كدا امهات المؤمنين زوجات سيدنا محمد عليه الصلاة والسلام وكمان بناته كانوا من أهل البدع؟؟؟ والصحابيات والتابعات زيهم؟؟؟
تعرفوا ان فضلة الشيخ منع الاسئله فى اليوم ده وقال بالحرف وبشكل انفعالى واضح وكأنه قرار ديكتاتور لكل المراسلين" مفيش اسئله، انتوا جايين علشان فيه بيان واهوه البيان خدوه انشروه وخلاص" دا فى اى شرع ولا دين ده؟؟؟
والله يا فضلة الشيخ عاوزه اسألك سؤال...مسمعناش صوتك ليه لما مخرجة افلام سافله عاوزه تعمل اول قناه اباحيه مصريه وتسميها الجريئه علشان تكمل برنامج وقاحتها؟؟

قراره ده خلا الكل اتجرأ على المنتقبات، الداخليه تقول إرهاب ووزير التعليم يقول احتياطات أمن، قال يعنى الداخليه ولا بيوت الطالبات ولا الجامعات هيعجزوا يحطوا واحده عند البوابه من الموظفات المتختخات م القاعده الفاضيه، إللى موراهمش غير النميمه والهزار فى المكاتب وتقطيع خضار الغدا علشان يتحققوا من شخصية الداخلين ،بلا نيله ؛دا انا قعدت فى الكليه أد ما قعدت دراسه ودراسات عليا محدش مره قال لى فين الكارنيه غير يوم ما مرات الرئيس جت مكتبة اسكندريه حبوا يعملوا شوية حركات يحللوا المرتب

وهى إللى ربع لابسه وداخله الكليه وماشيه فى الشارع مش خطر على الأمن؟؟ متسببوش فى اعمال تحرش وفتنه وخطف وغيره؟؟ وسط البلد فى القاهره متبهدلتش بدل المره كذا مره بسبب السافرات والرقاصات؟؟؟ ايام عجيبه؛ المحترمه بقت خطر والمنحله بقت أمان
على كده السعوديه كلها ارهابيين يا رجاله!!!

دا انا الجاهله إللى معرفش ألف باء الدين ويادوب معلوماتى من القراءه والبرامج الدينيه على طشاش لما بفضى اقعد لها عمرى ما اتجرأ ولا اتهور واقول كده، انا غلطانه وعارفه انى غلطانه ولبسى مش صح ولا اسلامى بجد ونفسى اتغير وعلشان كدا "هستتر" اخذاً بالحديث الشريف " إذا بُليتًُم فاستتروا" اصلى مبقاش غلطانه وعينى بجحه،لكن مش هقاوح واجادل واقول انا صح...عيب حتى، دا الواحد يستحى من ربنا
طب والله كل ما اقرا فى المصحف الشريف واوصل لآيات الحجاب اترعب لأنى عارفه ان دى "حجه علىَّ" مش لى، ربنا لما بيقول لسيدنا محمد" يا ايها النبي قل لازواجك وبناتك ونساء المؤمنين يدنين عليهن من جلابيبهن ذلك ادنى ان يعرفن فلا يؤذين وكان الله غفورا رحيماً" آيه 59- سورة الأحزاب .بالعقل مش بالعلم....إيه إللى بيميز حد عن التانى ويخليك تعرف ان دا فلان ودا علان؟؟؟ اكيد ملامح الوش صح؟؟ يبقا ربنا لما قال " ذلك أدنى أن يُعرَفن" عاوزنا منتعرفش ولا نتميز، لا إللى ماشيه دى بيضه او سمرا تخينه او رفيعه حلوه او وحشه اهى بشر وخلاص وتتعامل على الاساس ده ولها احترامها
تكشفها ليه انت بقا وتتفرج عليها؟؟؟ تخصك دى؟؟ لك فيها؟؟؟ وبعدين انت عاوز تبص فى وشها لييييييييييييييييه؟؟ وانت مالك؟؟ حلوه لنفسها وللى هتعيش معاه ووحشه بردو لنفسها وللى هتعيش معاه. كل إللى بينها وبينك معاملة شغل أو دراسه وزماله محترمه،المهم انها حاجه محترمه وشها بقا هيفرق معاك فى ايه؟ انت بتتعامل مع عقل ولا جسم؟؟

تخيلوا واحده من إللى القرآن الكريم بيقول عليهن "قواعد" يعنى خلاص عدت الخمسين سنه وبقت جده، طالعه فى برنامج تقول على النقاب" رداء حقير"!!! يا مين يلايمنى عليها، دى اكيد مش فى وعيها ولا عارفه بتشتم فى مين ولا بتقول ايه، جاتهم القرف خناشير وبيتحايلوا على الزمن بأعمال النصب التجميليه، شد ونفخ وحقن وتلزيق، بيقاوموا الواقع، مخهم ضرب من كتر الليزر والسيلكون والكولاجين إللى بيتعاطوه، ربنا يقول عليهن" والقواعد من النساء اللاتي لا يرجون نكاحا فليس عليهن جناح ان يضعن ثيابهن غير متبرجات بزينه وان يستعففن خير لهن والله سميع عليم" يعنى خلاص المفروض "تحترم نفسها وسنها" وتستعفف بم انها على وش آخره يعنى، ودول بردو مستهبلات ومنكوشات بكل الألوان، عاوزه تكملى حياتك العمليه ومتندفنيش بالحيا فى البيت يبقا بردو بإحترامك يا تحطى لسانك فى بؤك وتخليكى فى حالك، يعنى لا منك ولا كفاية شرك يا شيبوبه منك لها؟؟؟!!!

مين قال ان فيه تعارض بين النقاب وبين الدراسه والعمل والاندماج فى الحياه العامه؟؟؟ زوجات سيدنا محمد عليه الصلاة والسلام كن يروين الحديث عنه والسيده رفيده أول طبيبه فى الاسلام كانت خيمتها الطبيه فى قلب المسجد والرسول هو اللى أمر بكدا عليه الصلاة والسلام، النساء ايام سيدنا عمر كانت بتحضر خطبة الجمعه ومجالس العلم ومحدش ينسى موقف المرأه اللى جادلت سيدنا عمر فى قراره بعدم المغالاه فى المهور وغلطته وقال بعدها" اصابت امرأه واخطأ عمر"
والمنتقبات فى ايامنا دى فيهم ناس فى منتهى الروعه وجديرات بالاحترام فعلاً، الطبيبه ودكتورة الجامعه والداعيه الاسلاميه والمدرسات وسيدات اعمال كمان، بشوفهم حوالى فى كل حته، فى المطعم والنادى وعلى البحر وسايقه عربيتها بتوصل او بتجيب ولادها من المدرسه او رايحه شغلها، لا حد يعاكس ولا حد يغلس عليها ولا يبحلق فيها لحد ما تتكعبل وتؤع على وشها من الاحراج ويبآ هاين عليها تدب صوابعها فى عنيه وتريحه منها للأبد

صحيح انا مش منتقبه بس بحترم المنتقبات وبتكسف من نفسى لما اقابل واحده منهن، والله بتمنى انتقب من سنييييييين طويله وبدعى ربنا يهدينى وكتير بطلبها منكم تدعولى بيه، احساس حلو انك تكون ماشى "مع الله" لا شاغلك حد ولا ناس ولا كلام فاضى، حوار متصل ودائم إلى الله سبحانه وتعالى، انك تكون فى "المعيه" مش بالساهل تقدر على نفسك وتوصل لها. دا غير ان المنتقبه مصانه عن العيون واصحاب النفوس المريضه، مش ملكيه عامه ولا مشاع للى رايح وجاى، لو مقدرتش تمنع عيون الناس عنها فأضعف الايمان انها هتبعد بنفسها عن عيونهم لأن محدش يستاهل ولا يستحق ياخد حاجه مش ملكه.

يا بخت المنتقبات ويا بخت الازواج إللى زوجاتهم منتقبات، ربنا يزيد عليهم نعمه وفضله ويهدينا زيهم

الحاجه إللى انا مستغربالها هى "ليه؟؟؟" ولمصلحة مين دا يحصل؟؟ يعنى هم اتدخلوا فى كل حاجه حتى مواعيد نومنا وصحيانا باقى لبسنا عاوزين يفرضوه علينا؟؟؟ واحده عاوزه تزيد من الاحترام وانت مالك؟؟؟ عاوز منها ايه؟؟؟

الوحيد إللى كان بيعافر علشان "يعرى" البشر ويكشف سترهم هو الشيطان، من أول سيدنا آدم وامنا حوا وهو بيحرب ويحارب علشان يكشف عورات الناس ويلهيهم، عارف انها بداية كل شر ورذيله، اقرا حتى كلام ربنا :" فوسوس لهما الشيطان ليبدي لهما ما ووري عنهما من سوءاتهما وقال ما نهاكما ربكما عن هذه الشجره الا ان تكونا ملكين او تكونا من الخالدين" يبقا بقا ننضم لحزب الله ولا حزب الشيطان؟؟ للى بيدعو للحشمه ولا إللى بيدعو للعُرى؟؟ للى يحب الستر ولا يحب الفضيحه؟؟ إللى ينادى بالحشمه والفضيله ولا السفور وقلة الحياء؟؟
ننضم لمين يا اصحاب العقول والقلوب السليمه والفطره الصحيحه؟؟؟ غلبك كلام الشيوخ وتعارضهم....استفت قلبك
"ونفسِ وما سواها . فألهماها فجورها وتقواها. قد أفلح من زَّكاها. وقد خاب مَن دَّساها" ربنا يكفينا شر الخيبه ومفتعليها
قلبى حاسس وتقريباً متأكد ان فى بلوى جايه فى الطريق إلينا، اثارة موضوع زى دى وإلهاء الناس بيها مع اشتغاله تانيه زى بتاعة الانفلوانزا الجديده وارهاب الناس بالشكل ده وراه حاجه
هى فى انتخابات قريبه ولا حاجه؟؟ او جايز فى تعديلات دستوريه؟؟ ولا جايز مصيبه اكبر
عموماً واحتياطى متنسوش تدعو" اللهم لا تجعل مصيبتنا فى ديننا"وربنا يستر بقا من إللى جاى
وبردو متنسوش تدعولى ربنا يهدينى ويتفضل عليا بلبس النقاب ان شاء الله يا رب

الثلاثاء، 20 أكتوبر، 2009

إنتِ مين؟؟؟

يا درة حفظت بالأمس غالية واليوم يبغونها للهو واللعب
يا حرة قد ارادوا جعلها أمَةً غربية العقل، لكن اسمها عربي
هل يستوي من رسول الله قائده دوماً، وآخر هاديه ابولهب؟
وأين من كانت الزهراء اسوتها
ممن تقفت خطى حمالة الحطب ؟؟
اختاه لست ببنت لا جذور لها ولست مقطوعةً مجهولةَ النَسبِ
انت ابنة العرب والاسلام عشت به في حضن أطهر ام من أعز أب
فلا تبالي بما يلقون من شبهِ وعندك العقل ان تدعيه يستجب
سليه: من أنا؟ ما أهلي؟ لمَن نسبي؟
للغرب أم أنا للاسلام والعرب؟
لمَن ولائي؟
لمَن حبي؟
لمَن عملي؟
لله ام لدعاةِ الاثم والكذب؟؟؟؟؟
لِـــــــــــــــــــــــــــمَـــــــــــــــــــــــــــــــــــــــن؟؟؟؟؟؟؟؟؟؟

الاثنين، 12 أكتوبر، 2009

البقاء لله

انا عاوزه اعترف لكم بحاجه
انا اكبر كدابه وممثله فى الدنيا، من كتر ما اتعودت على الكدب بقيت بخاف من الصراحه والحقيقه واهرب منهم ،بكرههم، وكأنها غيلان أو وحوش مرعبه
بس زهقت من الكدب وزهقت من الإدعاء والتمثيل والضحكه المزيفه والابتسامه المصطنعه والكلمات إللى ما بتجبش همها، وتّصَنُع العقل والهدوء والتفاؤل والفرح

عضلات وشى بقت بتوجعنى من الضحك الغشاش والابتسامات السطحيه،عيونى بتستغيث من الجدران الزجاج إللى حطاها عليها علشان تفضل تلمع بغض النظر وراها دموع ولا ابتسامات،أهى تلمع وخلاص يمكن تفرح إللى يشوفهم. حتى قلبى بيئن زى حصان عجوووووز اجبروه يطلع قمة الجبل وهو بيجر أطنان من الصخر، صهيله صرخات ألأم اكتر منها صيحات انتصار وشحذ لقواه
معدتش عاوزه أقول ولا اسمع كلام حلو، محدش يضحك علىَّ تانى ولا يجبرنى انى اضحك واكدب عليه، من كتر كمية الكدب إللى اكتشفتها جوايا حاسه انها نيران لو فتحت بؤى هحرق كل إللى حوالى زى التنين أو حتى كأنها سم وبردو لو فتحت بؤى هقتل إللى حوالىَّ بيه.

حاسه إنى عندى ثورة جنان مفاجئه، عاوزه اصرخ وابكى بأعلى صوت واكسر اى حاجه ألاقيها، لا حد يقول لى بس ولا كفايه، زهقت وقرفت وعاوزه اتعالج من نوبات التفاؤل الكاذب إللى بعيش نفسى فيه،لو أنا من الناس إللى حوالىًَّ كنت شكيت فىَّ انى بتعاطى افيون أو حتى مخدر أقوى علشان احافظ على البرواز ده.
كان كل إللى يتكلم فى سيرة الغم والهم والانحطاط إللى بقينا عايشين فيه اثور وانفعل عليه واقول بكره احسن، بكره اجمل، متفقدوش الأمل
ليه بستخبى بدموعى؟؟خايفه ولا مكسوفه أبين خيبة أملى وانكسارى؟؟ جايز مش عاوزاهم يعايرونى ويقولولى "احنا كنا صح وانتى كنتى بتحلمى وعايشه فى الوهم"
.
فجأه حسيت انى بكره كل حاجه وكل الناس، حتى بكره نفسى وايامى والزمن إللى عايشه فيه وخايفه ييجى علىَّ يوم اكره اسباب وجودى فى الدنيا دى، وكأنى فقدت شهيتى للحياه، الحاجه الوحيده إللى مش عارفه اكرهها هى البلد دى،حتى لو كان حبها اكبر ذنب مش عاوزه اتوب عنه ولا عاوزه ربنا يغفرهولى.

ماشيه عادى، ايام وسنين اتعودت على كدا وخلاص، لما بضعف واحب اعيط او اصرخ ببعد عن العيون، بعضها هيشفق علىَّ ويقول مسكينه وبعضها هيضحك ويقول مجنونه وبعضها هيبص بإستهزاء ويقول وانا مالى
لكنى فجأه اتحاصرت ،لا عارفه اهرب ولا اكمل تمثيل وضحك وإدعاء، الظروف حاصرت ضعفى علشان يظهر ويعلن عن نفسه فى أسوأ صوره
إللى بشوفه وبسمعه يخليك تبكى مش عارف من ايه بالظبط؟ من الفخر ولا من العجز؟؟ حتى محاولاتى للسخريه والتريقه علشان اهرب من مشاعرى وامنع دموعى تنزل فشلت ولقيتنى غرقانه فى نحيب ونشيج، وجع السنين كله زاد وفاض وانفجر
هو احنا فعلاً عدت علينا أيام كنا كده؟؟ كان لسه فى ناس بتحس؟؟

يا ترى الناس إللى عبرت القنال ودمها اختلط بميته وروى رماله لو عرفوا ان المستقبل إللى حاربوا علشانه هيكون بالصوره المقرفه إللى احنا عليها دى كانوا حاربوا ولا تعبوا نفسهم؟؟؟ كانوا استغنوا عن مستقبلهم وقعدوا سنين فى الجيش سايبين اشغالهم واحوالهم بيشتروا أيامنا بأعمارهم وأجزاء من اجسامهم؟؟؟

لو كانوا عرفوا ان كل إللى هيبقا منهم أفلام واغانى ويوم اجازه كانوا دخلوا الحرب وانتصروا؟؟؟ هم عملوا كدا علشان احساسهم بالواجب والمسؤليه وخوفهم من ان أولادهم يحاسبوهم ويقولوا لهم "فرطتوا فى ارضنا ليه"؟ ولا عملوا كده علشان بيحبوا "الارض" دى بجد وما هانت عليهم تتنجس؟؟
ذكريات أيام معدش فاضل منها غير كام اغنيه وفيلم ويوم اجازه، اختى الصغيره بتؤولى يعنى ايه " سته اكتوفر" وشدد عالفاء؟؟ وبعد ما غلبت من الشرح والايضاح وطردنا الصهاينه الاوغاد و..و..و... قالت لى مش هم دول اللى بيضربوا غزه؟؟ قلت لها اه، قالت لى يعنى احنا مشيناهم من عندنا علشان يروحوا فلسطين؟ اتكتمت فى قلبى، سألتنى مش احنا دلوأت بقينا فى سلام؟؟ يعنى هم ممكن يزعلوا لو قلنا عليهم انهم كانوا اعداءنا واننا هزمناهم وكمان عاوزين نمشيهم من فلسطين، يعنى يعيشوا فين بقا؟؟؟؟؟؟؟ سؤال وجيه والله، ما ان شا الله عنهم ما عاشوا، يتحرقوا بجاز، آدى البرامج والمدارس وإللى عملوه فى العيال، بقوا خايفين على مشاعر السفاحين يزعلوا لو قلنا عليهم اعداء
مش احسن لو المدارس عملت 6 اكتوبر ده "اجازه داخليه من الدراسه" العيال يروحوا المدرسه من غير الشنط والكتب ويشغلولهم افلام تسجيليه عن اليوم ده وما قبله وافلام عن سيناء ومدن القنال وحرب الاستنزاف والثوره وعدوان 56 ويعرفوهم عدوهم بجد ويعرفوهم قيمة اليوم ده وان لولاه كنا بقينا مع غزه فى نفس مانشتات الجرايد، حصار وقتل ودمار وتشريد وأسر وقصف واستيطان، بالله عليكم مش كان بقا احسن؟ حتى مكناش هنخاف ييجى يوم محدش يبقا عارف هو ايه ولا ليه 6 اكتوفر وكمان ايه....يتكسفوا يقولوا عليهم اعداءنا علشان منزعلهمش، التطبيع مسمع يا جدعان ، يظهر انه بجد معدش فيه فايده
آه...حد يلحقنى، انا هتشل خلاص
هو إحنا ليه مفضلناش ناس عندها دم؟؟؟!
وليه قدرنا جابنا فى الزمن ده؟؟ سنين عجاف ؛ سواد يجر سواد وقهر ماسك فى ايد قهر وكأنهم متعاهدين يحاصرونا فى دايرة حزن طول سنين عمرنا
خايفه اموت وانا فى الحزن ده من غير ما اشوف حاجه تفرحنى ولا اقول انها حصلت فى ايامى، عندى يقين ان عمرى هيتقصف بدرى وان السنين إللى وصلت لها دى فضل من ربنا وجت معايا كده
حد كدا يشاورلى على أى حاجه عدله شايفها.....بس بجد من غير بقا شعارات وتهجيص ، ومصر الأمان والسلام والحضاره و7000 سنه والناس الطيبين والكلام إللى بنضحك بيه على بعض وبنصبر بيه نفسنا
خلاص....شبعت من الكلام ده وكان ممكن أألف فيه كتب واغزل على منوال مشاعركم واخدركم زى ما بخدر نفسى وادينا عايشين لحد ما..........لحد ما...........؟؟ لحد ما ايه ؟؟؟ حد عارف؟؟؟
انا بحسد كل الناس إللى عندها اكتر من 40 سنه ولو حد فيهم يحب يبادل معايا معنديش مانع، بس متأكده انهم هيرفضوا، محدش يرضى يبادل ايام فخره وعزه بأيام ذل ومهانه وخيبه تقيله
كان نفسى اتولد زمان، سنة 50 مثلاً..يادوب سنتين وتيجى الثوره وتبدأ ايام الحماس والحياه إللى بيجرى فيها الدم مش إللى اطرافها بارد ومشلوله وتستحق البتر؛ واتربى على كلمات وافعال لها معنى، تأميم وبناء واصلاح زراعى وجلاء وعدوان ونهاية عدوان حتى ايام النكسه كنت هستمتع وافخر بيها، يكفى ان الناس فى وقتها مقعدتش وحطت ايدها على خدها فى انتظار ربنا يحلها ،بقا فى حرب استنزاف وتبرع للمجهود الحربى وتطوع فى الجيش او الهلال الاحمر ، حياه حياه حياااااه
ناس عندها هدف ومفيش حاجه بتعطلها ولا بتأجل تحقيقه، إللى بيبنى بيكمل بناء واللى بيزرع موقفش وإللى بيدرس تفوق علشان يبقا راجل أد المسؤليه وإللى بيحارب متفائل وعمره ما حس بيأس فى انتظار اليوم الموعود علشان ياخد بتار أللى راحوا فى ابو زعبل ونجع حمادى وبحر البقر ومدن القنال وسيناء، الكل كان جواه نار تخلى دماهم تغلى علشان يتحركوا، نار ما يطفيها إلا النار والدم
حوالينا ناس تحترمنا وتخاف مننا وتعمل لنا ألف حساب، وكلمه مسموعه وقمم تنعقد اساميها بس تخوف وتخلى العدا يرتعشوا أومال اهدافها كانت بتعمل فيهم ايه؟؟؟
!!

وحاربوا وانتصروا واتنقلنا للخيبه، وكأنهم عملوا فينا "جميل" العمر و"معروف" ما يتنسيش من حقهم علينا بعده انهم يمرمطونا ويسففوا الشعب التراب، وبدأت الخيبه يوم ما اطلقوا على الناس إللى طالبت بحقها فى رغيف العيش انهم " رعاع" وان دى "ثورة حراميه" وبدأنا الانحطاط على ايامنا السوده
استفتاء مش انتخاب، وخصخصه بدل التأميم، وبعد ما كنا بنساعد بقينا بنشحت ونستجدى المعونات، ومصانع ناجحه وشغاله تتقفل ومشاريع فاشله تتعمل ، والارض إللى فى الصحرا وكنا عاوزينها تبآ خضرا جت بصفرها وجرادها على شوية الاخضر اللى كانوا حيلتنا
وتعليم خربان والحصه نص ساعه وإلغى سنه وحط سنه وانهب جيوب الغلابه، وصحه فى النازل وزباله اكوام اكوام وفيروس كبدى متوطن وامراض دم وحرق دم واطفال تتولد بالسرطان او حتى نموها ميكملش وتسقط اجنه من الهرمونات إللى بقت فى كل حاجه حتى يمكن الهوا
واخلاق انحطت ومبادئ وقيم انعدمت وأمان مستنى ناخد فيه العزا من يوم البيوت ما بقت تُقتَحَم والناس تتقتل علشان 400جنيه وتليفون محمول، حتى غطيان البلاعات بقت تتسرق علشان يبيعوها وياكلوا بتمنها
وصفر فى الاختيار من ضمن احسن 150 جامعه فى العالم وصفر فى المونديال علشان سوء التنظيم والتخطيط وصفر للوزير المقموص إللى قال على اليونسكو واعضائه"كوخه" لما منجحش فى انتخاباته، وصفر فى البحث العلمى اللى عاوزين يقللوا ميزانيته دا لو كان له ميزانيه أصلاً ، وصفر فى مواقف الجدعنه لا جوا ولا برا ، صفر صفر صفرررررررررررررررررررر
خيبه خيبه خيبه بالكوووووووووووووووووم، فى كل حاجه

تيجوا انكد عليكو شويه؟؟ يللا بقا بجملة النكد، والله العظيم انا بيتهيألى اننا عاوزين "معدده وندابه" شوفتوهم فى الافلام القديمه ومسلسلات الصعيد؟؟ الصراحه عاوزين طقم معددين وندابات ولولا انهم حرام كنت اجرتهم ودفعتلهم من معايا مع انى بردو متأكده انهم كانوا هيتطوعوا وسكان البلد كلهم هتاخدهم الحماسه ويقعدوا معاهم، فى نص مصر بالظبط وشويه يصوتوا وشويه يعددوا وشويه يندبوا ويلطموا ويعفروا عليهم بالتراب، وكل ما هنفكر فى خيبتنا هتاخدنا الحماسه وندوس بنزين

فكروا فى الانحطاط والانحدار إللى بقينا فيه؛ لا أخلاق ولا دين- طشاش يعنى- ولا عِلم ولا فن ولا ثقافه ولا تقدم فى اى حاجه ولا صحه ولا أمل ولا عمر؛ أصل أمل على أى اساس؟؟؟ إللى يقول فيه امل ده بالله عليه يشاور لى على حاجه واحده بس ايجابيه تخليه يقول كده
وعلى قول القائل............إن الأسوأ لم يأت بعد وإحنا داخلين على أيام سووووووووووووده يا جماعه وإوعوا حد فيكوا يفك الحزام لحسن هيتلسوع بيه

والله العظيم انا نفسى اضحك بجد، نفسى حد يفكرنى بالضحك الحقيقى من غير ما حاجه تعكره، ابقا كدابه لو قلتلكم انى مش بضحك او بهرج احياناً، بس "كدا وكدا" علشان ما يقولوش ايه البت الغتيته دى وعلشان مبقاش شاذه وسط الناس وشاغله نفسى بحاجات ملهاش فيها، زى يا عينى صلاح الدين الايوبى لما عاهد نفسه طول حياته ما يبتسم والاقصى حزين، الله يرحم الرجاله، عادى بقا..دلوأت بيضربوا بانجو وحشيش علشان ينسوا
يعنى تخيلونى قاعده فى فرح مثلاً وعلى وشى كآبة الدنيا، وجه حد سألنى مالك بمنتهى البساطه برد " بالله عليك ليهم نفس يرقصوا ويغنوا ويتجوزا واحنا حالنا كده؟؟" اوقات بستجدع ابو العلاء المعرى لما وصى يتكتب على قبره " هذا جناه علىَّ ابى وما جنيته على احد" لا اتجوز ولا خلف، بس الواحد يطلع بنفسه من الحشره المهببه اللى احنا فيها دى
كل ما اسمع اغنيه وطنيه من بتوع زمان دى يصعب عليا حالنا، حاجه تكسف، قارن كده اى اغنيه من بتوع زمان مع اى واحده من بتوع دلوأت
زمان كانوا بيغنوا للوطن والارض والجيل الصاعد والناس كلها، وإللى بيغنى لنفسه كان بيقول "فدائى واهدى العروبه دمائى" او يقول بقا عنده بندقيه وعاوز يروح فلسطين يستشهد، حتى الاغانى خابت وبقوا يغنوا لواحد ،رافع راية الحريه ومقوى الوحده الوطنيه مش متجبر ولا متكبر وبقولها ورزقى على الله، كأنه مثلاً بيقول عليه حاجه وحشه ومستبيع ورزقه على الله، حتى النفاق فاشلين فيه، مش بؤولكوا خيبه
خلااااااااص، خلص الكلام بس مش علشان البندقيه تتكلم ولا علشان دقت ساعة العمل الثورى والناس مش فاضيه للكلام وعاوزه تشتغل، لأ....خلص علشان معدش في حاجه يغنوا علينا بيها
ارحمونى يرحمكم ربنا، وتعاونوا معايا نوجه نداء لكل القنوات والمحطات لا يجيبوا اغانى ولا افلام وطنيه تانى علشان دمى يروق شويه ،قصدى بقايا دمى إللى نشف من الغليان، اسمع واعيييييييييط وانتفض من العياط والناس تضحك علىَّ او ماما تشتمنى وتؤولى "جاتها خيبه إللى عاوزه خلف" والله عندها حق وخصوصاً لو هتخلف حد زي
بس انا قررت اتعالج، ايواان، هتعالج وهبطل انكد على نفسى وههرج واضحك وأهيس زياده واى حاجه متعجبنيش هسمعها بالعكس
ودلوأتى بهديكم اغنية وطنى الاكبر كأول مراحل العلاج، وعلشان تناسب المرحله إللى احنا فيها ممكن تبدل كل كلمة الاكبر بكلمة "النونو" او "النوغه" ، أمجاده= خلافاته ، انتصاراته = انكساراته، بيكبر وبيتحرر= بيصغر وبيتدمر
وطبعاً لما تيجوا لمقاطع زى " الحب والوحده والقوميه والشعب العربى" فكروا فى حاجه واحده بس، اننا حتى ما اتفقناش على بداية رمضان ولا حتى اول يوم العيد وكل دوله مشت بدماغها وافتكروا بردو اننا لحد دلوأت لما نحب نروح "بلد عربى" لااااااااااااااااااااازم تتلطع على باب السفاره وتبوس الأيادى والـ..... علشان تاخد التأشيره، أما بقا المجد والخلود فنكتفى بإطلاقهم على اسماء المواليد من باب الدعابه، وبخصوص الصوت "الحر العربى إللى لا هو صدى غربى ولا شرقى" فدى بقا كانت محطة اذاعه اسمها "صوت العرب" وبيتهيألى يكونو لغوها دلوأت او بقت اذاعه كوميدى، المقطعين الآخيرين فيهم شئ من الحقيقه، فعلاً وطنا محسود والعين صابته، والمحسود اكتر بقا هم حكامه على النعمه إللى هم فيها، تكيه والكل هايص فى خيرها وفعلاااااااااً وطننا زاااااحـــــــــف على ايديه ورجليه وبطنه كمان ومش عارف حتى يرفع راسه
اسيبكوا بقا مع الأغنيه وأروح اكشف علشان عندى اشتباه فى قرحه فى المعده، ضريبة الحب يا جماعه، وحسبنا الله ونعم الوكيل
وطني حبيبي .. الوطن الاكبــــــــر
يوم ورا امجاده بتكبــــــــــــــــــر
وانتصراته ماليه حياتـــــــــــــــــه
وطني بيكبر وبيتحـــــــــــــــــــرروطني .. وطني
عبدالحليم حافظ :
وطني يا مالى بحبك قلبــــــــــــــــي
وطني يا وطن الشعب العربــــــــي
يللى ناديت بالوحده الكبـــــــــرى
بعد ما شفت جمال الثـــــــــــــوره
انت كبير
واكبر كتيرمن الوجود كله ..
من الخلود كلــه
يا وطني
..صباح
:حلو يا مجد يا مالي قلوبنـــــــــــــا
حلو يا نصر يا كاسى رايتنا
حلوه يا وحده يا جامعه شعوبنـــــا
حلوه يا احلى نغم فى حياتنايا
نغم ساري بين المحيطيـــــــــــن
بين مراكش والبحريـــــــــــــــــــن
في اليمن ودمشق وجـــــــــــــــده
نفس الغنوه لأجمل وحــــــــــــــده
وحدة كل الشعب العربــــــــــــــــي
فايده كامل
:قوميتنا اللي بنحميهـــــــــــــــــــــا
اللي حياتنا شموع حواليهــــــــــــا
جنه بتضحك للي يسالـــــــــــــــــم
وجحيم ثاير على اعاديهـــــــــــــا
شوفوا بيروت بعد العـــــــــــدوان
الاستعمار فين والطغيــــــــــــــــان
قِدر الشعب وقوتــــــــــــــــه سادت
وبورسعيد حكايتها اتعــــــــــــــادت
عاش وانتصر الشعب العربـــــــــي
شاديه :
وطني يا اغلى وطن في الدنيــــــــا
وطني يا قلعه للحريـــــــــــــــــــــه
انت الباني مع البانييـــــــــــــــــــن
وانت الهادم للعبوديــــــــــــــــــــه
الصوت صوتك حر وعربى
مش صدى شرقي ولا صدى غربـــــــــي
ياللي ترابك كحل لعينــــــــــــــــــي
ياللي هواك عطره بيحينــــــــــــــي
انت حبيبي ياوطني العـــــــــــــربي
وردة :
وطني يا ثوره على استعمارهــــــم
املى جزايرك نار دمرهــــــــــــــــم
لو نستشهد كلنا فيــــــــــــــــــــــك
صخر جبالنا راح يحاربهــــــــــــــم
الاستعمار على ايدنا نهايتــــــــــــه
راح من الدنيا زمانه وقتــــــــــــــه
لا في الجزائر ولا في عمـــــــــــان
تهدى الثوره على الطغيـــــــــــــان
الا بنصر الشعب العربـــــــــــــــــي
نجاة الصغيرة :
وطني يا جنه الناس حاسدينهـــــــاعلى امجادها وعلى مفاتنهـــــــــــا
يللي قنالك رجعت ملكــــــــــــــــك
وانت لخير الدنيا صاينهـــــــــــــــا
علي السد وخد من خيـــــــــــــره
صنع وازرع وابني فى نـــــــــــــوره
ياللي علاك في قلوبنا عبـــــــــــاده
يا وطن كل حياته سيــــــــــــــــاده
وطن العزه الوطن العربــــــــــــــي
عبدالحليم :
وطني يا زاحف لانتصراتــــــــــــك
يللي حياة المجد حياتـــــــــــــــــك
في فلسطين وجنوبنا الثائــــــــــــرحنكملك حرياتــــــــــــــــــــــــــــك
احنا وطن يحمي ولا يهـــــــــــــدد
احنا وطن بيصون مايبـــــــــــــــدد
وطن المجد يا وطني العربــــــــــي
إيييييييييييييه، دنيا، وما دايم إلا وجه الله ، الفااااااااااااااااااااااااااتحه على روح المرحوم
فاكرين الحاجات دى...دى على روح الفقيد