بييجي وقت لازم تسكت فيه , وعقلك يقولك ( خليها فى القلب تجرح , بدل ما تبان و تفضح ) .. و أوقات تحس إنك لازم تتكلم .. مش قادر تكتم و تخبي .. وإلا هتنفجر .. علشان متكلمش نفسك و الناس تقول إتجننت .. أو تخلق شخصية من خيالك تعيش معاها و تعزلك عن العالم ويقولو عليك براوي ... يبقى الحل إنك تفضفض .. اللى تقدر تتحمله خليه جواك .. و اللى متقدرش عليه .. ويفيض بيه قلبك و عقلك .. وزّعه على اللى حواليك ... هنا مش مجرد كلام و حكايات ... كل رسالة هي فيض من ( فيوض القلب والخاطر ) ....... أنا / صابرين أبوعلي

الثلاثاء، 6 يناير 2009

خذونى معكم








خذونى معكم

كنت عارفه انى ممكن اخسر ناس كتير برساله زى إللى بعتها كدا بخصوص غزه وموقف مصر من فتح المعبر
انا مش هعتذر عن الكلام اللى قلته ولا هسحبه زى ما ناس طلبت منى لأنى مجرد بناقش وجهة نظر وكمان متأكده ان اللى زعل فهمنى غلط، بدليل ان لى اصدقاء كتير من فلسطين ما زعلوا منى وقالولى انهم فاهمين قصدى كويس

مش هقول انى خايفه نعانى من مشاكل بعد كدا من وجود النازحين زى ما حاصل فى نهر البارد ومشاكل الاردن ولا سوريا مع الحدود الفلسطينيه، لكن هؤولكوا اننا "لما بنرتاح بننسى" دا غير ان الصهاينه ما بيصدقوا يخرجوا ولو فرد واحد علشان يخلصوا وتروق لهم، يقفلوا عليهم فى الحته اللى هم فيها وحلينا بقا لما تبقا المساعى الدوليه تتحرك وتحل أى موقف.
صعبان علىَّ حالنا وتخاذلنا ، يصعب علىَّ نسيبهالهم كدا بسهوله مهما كانت الارواح اللى راحت والدماء اللى سالت...كله مش مهم، بيقولوا الدم غالى لكن انا الوطن أغلى وأغلى وأغلى.
زمان كانت الجزائر هى اكبر بلد فى عدد شهدائها بسبب الاحتلال الفرنسى لها وقالوا انها بلد المليون شهيد، دلوأت العراق فى حوالى 6 سنين بقت صاحبة الـ1.300.000 شهيد، وفلسطين من قبلها ، وشباب ونساء واطفال مصر اللى راحوا من اول الزمان لدلوأت، شهداء ودماء بتروى الارض علطول التاريخ وعرضه، افكركم بإيه..بإن الايطاليين ربطوا الليبيين فى الطيارات ومثلوا بجثثهم ولا لبنان اللى فضلت 22 سنه يروح منها ناس ولا الاردن ولا سوريا ولا البوسنه والهرسك ، لا الناس خلصت ولا الأرض هانت ولا الظلم دام ،افكركم بإن الصهاينه توغلوا لحد نجع حمادى وابو زعبل والشرقيه وضربوا المدارس وان مدن القنال عدت عليها ايام كانت خراب وسكنتها الغربان ، ولسه سايبين لحد دلوأت اثار الضرب فى المستشفيات وهى مخرمه بطلقات المدافع والطيران... سابوها وعمروا حواليها علشان يقولوا ان مفيش شئ بيبقا على حاله والخراب بيتعمر والحياه بترجع...بس المهم تكون فى أرض لسه موجوده علشان تحيا عليها
انا مش حابه ان فرد واحد حتى يخرج من غزه ولا اى شبر فى فلسطين، احنا اللى نروح لهم ونحارب معاهم ونموت هناك بشرف علشان اللى ييجوا بعدنا يلاقوا كرامه يفتخروا بيها وارض تمنها غالى يحافظوا عليها.
احنا مش احسن من اللى راحوا ولا دماءنا اغلى منهم ولا اعز على الله من اى شهيد ضحى لأجل بلده.
بنتكلم وايدينا فى الميه البارده، حياتنا ماشيه عادى، ايه يعنى اتبرعت بشوية دم ولا مال ولا بصوم كل يوم وادعى ربنا ينصرهم ولا حتى بكيت لحد ما عيونك ورمت ،بردوا اخر اليوم رجعت بيتك اكلت وشربت وحليت ونمت مع مراتك واولادك فى هدووووووووء علشان الدوشه بتقلق نومك، وممكن كمان تكون شغلت التكييف ولا الدفايه علشان الجو برد وقلت نكته وضحكت على مشهد وحضرت حفله او فرح ومش بعيد تكون احتفلت برأس السنه،وكلمت حبيبتك فى التليفون وبعت رسايل تهنئه بالعام الجديد. حياتنا عادى رغم الصرخات اللى بنسمعها والدموع اللى بتنزل على قلوبنا كأنها مية نار والمشاهد اللى خلت جوا كل واحد فينا بركان ثاير ممكن ينفجر فى اى لحظه ويقتلك بسكته دماغيه او قلبيه من كتر القهره، بحس بكدا فى كل لحظه
عندى اموت هناك فى غزه ومع المقاومه بشرف وموتى يكون له ثمن ولا انى اعيش هنا بحياه عديمة القيمه واخرتها موته تليق بالجبناء فقط. وقالها خالد بن الوليد .... ألا نامت أعين الجبناء
من كل قلبى بدعى وبتمنى ان الحرب فى غزه ما تنهتى وان النار تزيد وتستمر ويكون لها ذراع فى كل ارض عربيه وان مصالح الصهاينه تنضرب فى كل مكان واللى يلاقى صهيونى يكسر رقبنه او يقتله بأى حاجه ، خلوها حرب شوارع ومن بيت لبيت، مش مجلس الامن قال ان دا "عدوان ضد عدوان" ساوى العُزَل والاطفال بيللى داخل مدجج بسلاحه ومتحصن فى مدرعاته ودباباته وطيرانه وسفنه الحربيه؟؟!! خليها نار ما تهدا ولا تنطفى لآخر الزمان ولحد ما يصدق فينا ولينا وعد ربنا، مش شر منى ولا حباً فى الحرب ولكن علشان جربنا كتير حالة اللا سلم واللا حرب، احتلال موجود ومتعايشين معاه هنا وهناك ،ناس بتمارس حياتها طبيعى ومستسلمه للأمر الواقع، يكفيهم من دنياهم الاكل والشرب والنوم حتى لو "بتصاريح" وتفتيش واهانه ومذله، أى حياه دى اللى ما اكون فيها حره واتمتع بكل شبر فى بلدى مش جزء آه وجزء لأ!!!!!
لو تلاحظوا نفس الفيلم بيتكرر كل سنه، محاوله ترقيص عضلات من الصهاينه وبيفرجونا انهم موجودين، شوكه فى قلب وضهر كل واحد فينا، المقاومه موجوده طول السنه بس لازم يقرصوا ودان العالم العربى خاصه والمجتمع الدولى عامه، وكأن عندهم فائض من الاسلحه والزخائر وعاوزين يخلصوها او يجربوها او انهم عاوزيين يخلصوا من القديم علشان مخازنهم تتخم بالجديد من حلفاءها،متصوره ان الناس بقت تحتفظ بلافتات التنديد والشجب بتاعة السنه اللى تفوت علشان اكيد هنحتاجها السنه الجايه، والقنوات بتذيع نفس الافلام التسجيليه والتقارير والصور والاغانى، لدرجة ان نفس العناويين بتتكرر" غزه تحت النار" ويحطوا عداد للأيام وكمان حفظنا انواع صواريخ المقاومه ووزن ومدى كل واحد...خلااااااااااااااص، اتخنقنا وملينا واتحشينا كلام ، عاوزيين فعل ..فعل
طالت ولا قصرت مش هتخلص غير بحرب ،، يبقا خلاص،، نتوكل على الله والعمر واحد بيد ربنا الواحد

حتى قادتنا وجامعتنا العربيه عجزوا عن مجرد انهم يتفقوا على مكان او حل وحولوا القضيه لخائبى الرجا وعديمى النفع، ليه نلجأ لمجلس الأمن وعندنا بيت للعرب ، مش عارفين نقطع علاقات ونبعت مساعدات ونفتح باب التطوع بجد لكل شاب عربى وبكامل ارادته؟؟!!!
الصهاينه فى أيام يحشدوا 35.000 جندى مشاه واحنا 22 دوله عربيه ميخرجش واحد حتى من كل بلد؟؟؟ ايه القرف ده!!!
خلاص رضينا ان دا يكون واقعنا ورضينا بوجودهم وسطينا ونتعايش ونطبع معاهم وهم مغتصبين وقتله ومجرمين واوغاد ،مجرد انى افكر فى وجودهم بيننا بحس انى عاوزه اتقيأ، متخيله اللى يكون بيقعد معاهم ويسلم عليهم اكيد يكون بجم ومعندهوش دم ولا احساس ولا ضمير ولا دين.
كنت عاوزه اشارك واتطوع فى بعثات الاغاثه لكن قالوا انهم ما بياخدوا بنات، خلاص...ياخدونا فى مكان اهم ،هناك مع الشرفاء الصامدين، عار لو نسيبهم وحدهم ، سمعت اغنيه بتقول "اصبح عندى الآن بندقيه..إلى فلسطين خذونى معكم" صحيح ما عندى بندقيه لكن عندى ايمان وإراده ويقين هقاتل بيهم ،ومعانا حجارة المساجد والكنائس والبيوت اللى هدمها المجرمين، قلتلكم قبل كدا ان بعد حرب 73 وجدوا ان بعض جنود الصهاينه ماتوا بآثار "العض" والقتال اليدوى ،الناس من كتر الغل والقهره والشعور بالظلم ممكن تتحول لأقوى سلاح... اقسم لكم بالله العظيم انى عاوزه أروح والنهارده قبل بكره، من غير حتى شنطة هدوم وكفنى لبساه، المقاومه مجهزه 200 استشهادى خليهم 201 والله من غير ذرة تردد ولا شك ان دا فى سبيل الله .
يا ناس يا عالم يا خلق الله، محدش بيخرج من الدنيا حى، كله ميت، الفرق فى نوع الموته وقيمة حياتك ،والله الذى لا إله إلا هو قابض الأرواح مالك الملك لا تهنى لنا نومه ولا أكله ولا شربة ميه ولا فرحه واخواتنا واهلنا فى غزه بيعانوا ما يعانوا ويشربوا المر والقهر ودماهم لو وزعت على العالم لأغرقته،عيب علينا، احنا اكتر من مليار يعنى لو بس صرخنا فيهم هيموتوا من الرعب، قاتلوهم يعذبهم الله بإيديكم ويشف صدور قوم مؤمنين، مينفعش نكتفى بالدعاء، فاكرين "اللهم ارفع المائده" ربنا مش هينزل يحركلك الطربيزه بس لو انت سعيت هيديك القوه علشان تحركها وتشيلها وترميها فى جهنم كمان مش بس فى البحر. اقروا سورة آل عمران لونسيتوا كلام ربنا واقروا اول سورة الاسراء لو عندكوا شك فى وعد الله للمؤمنيين اللى بجد.
يا نموت بشرف يا نعيش بكرامه
اللهم ارزقنا الجهاد والشهاده فى سبيلك،اللهم استخدمنا ولا تستبدلنا.....اللهم استخدمنا ولا تستبدلنا

Sabrina Abu Ali

هناك تعليقان (2):

محمد سيد يقول...

بارك الله فيكي يا صابرين والله كلنا زيك ونفسنا حتى ولو نحارب بإيدينا وسنانا بس محتاجين اللي يورينا الطريق.... مستنيين قائد يجمعنا ويصحي الأمة من غفوتها اللي طولت أوي.

مع إني مازلت مختلف معاكي في الرأي من البوست الأولاني.... الموقف المصري والعربي أكثر من سلبي العملية بوخت أوي وبقى منظرنا زي الزفت

إمبارح مثلا الحدود المصرية كانت مفلقة أمام وفد من الأطباء المهرة اللي رايحين بس يداوو الجرحى

الموقف المتخاذل من زعمائتا اللي همهم بس يدافعوا عن نفسهم ولد فينا مرارة فظيعة وحسسنا بالضعف والمهانة بجد مش حاسس إن احنا الجيل اللي ربنا هينصر بينا الإسلام والمسلمين

اللهم استخدمنا ولا تستبدلنا

اللهم اهزم اليهود بأيدينا

‏.‏ اللهم قاتل الكفرة الذين يكذبون رسلك، ويصدون عن سبيلك، واجعل عليهم رجزك وعذابك‏.‏ اللهم قاتل الكفرة الذين أوتوا الكتاب، إله الحق

EL-Kalamangiah يقول...

هانت يا محمد
الاستعمار قعد عندنا 74 سنه ودول بقالهم 61 سنه وان شاء الله مش هيكملوا
قول يا رب
كلنا قائد