بييجي وقت لازم تسكت فيه , وعقلك يقولك ( خليها فى القلب تجرح , بدل ما تبان و تفضح ) .. و أوقات تحس إنك لازم تتكلم .. مش قادر تكتم و تخبي .. وإلا هتنفجر .. علشان متكلمش نفسك و الناس تقول إتجننت .. أو تخلق شخصية من خيالك تعيش معاها و تعزلك عن العالم ويقولو عليك براوي ... يبقى الحل إنك تفضفض .. اللى تقدر تتحمله خليه جواك .. و اللى متقدرش عليه .. ويفيض بيه قلبك و عقلك .. وزّعه على اللى حواليك ... هنا مش مجرد كلام و حكايات ... كل رسالة هي فيض من ( فيوض القلب والخاطر ) ....... أنا / صابرين أبوعلي

الجمعة، 23 يناير، 2009

خطة حرب



خطة حرب


خساره ان رسالينا مش بتوصل ميديا صوت وصوره، كانت وصفت الاحساس اللى انا فيه دلوأت وانا بجبر نفسى وصوابعى علشان تمسك الكى بورد وترص الكلمات. بس ما لقيت على اللوحه الزرار اللى يبعت زفره حاره او تنهيده من القلب ورغبتى الشديده فى انى ما ارفع عيونى من على الأرض علشان ما اواجه اى حد
مكنتش عاوزه اكتب علشان دمى بقا تقيل موت، اتقل من الأول بكتير وطالبه معايا نكد بزياده، حتى مش عارفه اكتب لكم ايه بس هكتب وخلاص من باب الفضفضه وعلشان عارفه ان اللى بيزهق بيقفل الميل او يلغى الرساله ويريح دماغه؛ يعنى كأنى بكلم نفسى

من اكتر من اسبوع كنت بتفرج على التليفزيون- قنوات الاخبار كالعاده- وكأنه نوع من الماسوشيه إللى بيسموها (حب تعذيب الذات) قلت أغير من محطاتنا العربيه واشوف برا بيبصوا للى حاصل فى غزه إزاى، جبت على السى ان ان

CNN

ولقيت لقاء مع ميجور من جيش الصهاينه "واحده ست" وخبير عسكرى أمريكى والناس عايشه الدور على الآخر ومش مكسوفين من نفسهم ولا حاجه، ورسم وتخطيط حربى وبمنتهى الفخر بيعلنوا انهم " رابع اكبر قوه بريه وخامس اكبر قوه عسكريه فى العالم مش بس فى المنطقه وان قوة حماس لا تعادل 1% مما لديها) دا غير ان أمريكا بدأت فى شحن 375 كونتينر من مينا استاكوس فى اليونان كلها اسلحه وزخيره للصهاينه ، فى الوقت إللى احنا مش عارفين نبعت لهم "نبله" ولا حتى بندقية رش ناهيك عن الادويه والاكل والميه!!!
حسيت ان فى لوح زجاج انشرخ جوايا وبدأ يتفتت وشظاياه تنتشر بين ضلوعى وفى ضهرى ألام بشعه ومفيش ولا ذرة اكسجين راضيه انى اتنفسها وكأنها عرفت انى من جنس عربى واستخسرت نفسها فىَّ، أزمه أسلمتنى ليد الطبيب، متعرفش بقا زبحه صدريه ولا ازمه قلبيه ولا حتى انفجار فى المراره المهم انى "اتشتمت" والدكتور قال لى "موتى، وهو موتك هيعمل لهم ايه يعنى؟؟!! دا حتى القاده والساسه ما حلوها يبقا انتِ هتحليها؟؟".
بعد ما اخدت المهدئات والمسكنات فكرت افتح التليفزيون تانى أشوف آخر التدهورات ويظهر انى كنت عامله دماغ عاليه أوى من إللى اخدته وخصوصاً انى حديثة عهد بالأدويه واقل حاجه بتظبطنى بسرعه، ولقيت خيالى بيسرح وبحاول احط نفسى مكان رئيس مصر –بعد الشر- مع وجود بعض الدم الحار والاحساس وتجنيب المصالح والأهواء على حبة ضمير واحساس والكثير من "الاستبياع" وقلت يا ترى ممكن اعمل ايه؟؟
بسيطه،،هجمع الناس حوالى على كلمه واحده وهدف محدد وقضيه يعيشوا ليها غير لقمة العيش ،وارجع كل العلاقات بينى وبين جيرانى زى زمان واكتر، وقت ما كان فى حلم بالوحده العربيه والاجتماع الدورى" لقادة اركان حرب الجيوش العربيه" –اسم يخض مش كده؟- وكلمه مسموعه ومؤثره واخت كبيره وام حضنها كبير عمرها ما ترد اللى يلجأ ليها. حتى على الاقل احس انى مسنوده ومش لوحدى حتى لو بالكلام
قلت اعمل جوله مكوكيه على دول الوطن العربى وانسق معاهم "خطة الحرب"، ونظبط كدا نشوف مين هيقاطع ومين هيجهز جيشه ويضرب معانا ومين هيوقف تصدير بترول ومين هيبعت الفلوس ويجهز الجيبوش ومين هينهى وجود قوات اجنبيه فى ارضه و الله المستعان
خدوا بالكم انى بتكلم على "مستوى الرؤساء مش الشعوب ولا الافراد، يعنى محدش يزعل
نبدأ بسوريا...ويللا نرجع ايام زمان،صحيح الريس هناك مكنش مدينى وش لما قلت له عاوزه ازوره بس قلت أقايس وزى ما تيجى وانا فى الطياره فكرت شوى، اذا كان فى ضغائن بينا يبقا هيسمعنى؟ دا "ايران" واكله الجو خالص وعلشان بلده متبقاش مع امريكا بقت مع ضدها والدفه اتحولت على الشيعه اللى عاوزيين يحشروا نفسهم فى كل حاجه ومش بعيد اقوله على الخطه من هنا يروح يقولهالهم ويعترضوا او يقولوا فيها لأخفيها ويبدأوا يستعرضوا وينتهى الموضوع قبل ما يبدأ، خلاص..نخلى سوريا للآخر واشوف حته تانيه
نقول "لبنان"....هروح أكلم مين؟؟؟ الحكومه الرسميه اللى فضل برلمانها شهور وشهور مش عارف يحسم امره فى اختيار رئيس للبلد وكل اجتماع تيجى لهم أفعى تزروهم او تكلمهم فى التليفون وتأجل القرار ولا اتكلم مع الجنوب و"حزب الله" وابقى بعترف بيهم وبزيد شعبيتهم واعجاب الناس بمواقفهم رغم انهم على الباطل، خلينا نتكلم بصراحه؛ مش الشيعه دول اللى بيشككوا فى ان الرساله ما كانت لسيدنا محمد عليه الصلاة والسلام وانها كانت لسيدنا على بن ابى طالب كرم الله وجهه وكمان بيعيبوا فى بعض آل البيت ولو تقرا كتبهم تلاقى عجب العجاب، بيخلفوا الدين فى بعض اصوله يبقا دا إسلام؟؟؟؟!!!! يبقا دول اتفق معاهم وبعد كدا الناس تقول ما دام انتصروا يبقوا على حق ويتحولوا كلهم الى "شيعه"؟؟ الصراحه اتفزعت وانا بتخيل مراسم يوم عاشوراء فى كل الوطن العربى وإللى بيعملوه فيه ،لا لا لا، بلاش لبنان دلوأت، نشوف حته تانيه نبدأ بيها
الأردن، حتى لها اكبر حدود مع فلسطين وهتسهل علينا امور كتير، بس الجماعه هناك مكبرين دماغهم ومريحين نفسهم داخلياً وخارجياً معقول هيجيبوا القلق بإيديهم لنفسهم؟؟ دا غير ان الكبير بتاعهم "مطبع" وآخر تمام والاحصائيات بتقول ان اكبر دوله عربيه بتستورد من اسرائيل هى الأردن، والكبير بتاعهم عندى صوره ليه وهو بيسلم ويبوس المقرفه بتاعة الخارجيه الأمريكيه، هيخسرهم بالسهوله دى؟؟ ييييه...بلاش الاردن دلوأت
أروح فين يا ربى بس، ام كلثوم بتوصف حالى "أروح لمين واقول يا مين؟"
العراق متنفعش علشان بقت دِمِل فى جسم الوطن العربى للميكروبات الامريكيه وترسانتها الحربيه دا غير انها ممزقه بين اكراد وشيعه وسنه ورافضه، عاوزيين إللى يساعدهم يعنى....حسبنا الله ونعم الوكيل
والكويت كلها قواعد عسكريه امريكيه، وبم ان اسرائيل هى "قفا" امريكا فى الوطن العربى وامريكا مش هترضى تنضرب على قفاها ولا تعيش من غير قفا ؛يعنى (القاعده مش هتقبل ان قفاها ينضرب) فمش بعيد قبل ما افتح بؤى يكونوا ضربوا مصر من هناك ، اذا كان الامريكان بعد ما وحلونا فى حرب الكويت ووعدوا ان الطيران هيغطى القوات البريه بتاعتنا سابونا ننطحن الأول واتدخلوا بعدها بزمن لما جنودنا قربوا يخلصوا، وحفظاً لجميل مصر من الحكومه الكويتيه سلموا كل مشروعات إعادة اعمار الكويت لشركات امريكيه واوروبيه، وإحنا الله يعوض علينا ،وكفايه على المصريين يشتغلوا عمال مبانى او بوابين للمبانى اللى بناها الاجانب
ايه بقا؟؟ هرجع بخفى حنين يعنى وحتى يمكن من غير الخفين كمان...حافيه
هبص بصه كدا على قطر يمكن الفرج ييجى من عندها، بس افتكرت ان بردوا فيها قواعد عسكريه امريكيه ،وقاعة "السيليه" إللى اتسجن فيها صدام هناك شاهد على الأحداث، وكمان مش هيرضوا يخسروا علاقاتهم مع الكيان الصهيونى ..دى هرياه دلع، تخيل امريكا تكون حاسه بإيه وفى حد طول النهار يلعب فى قفاها ويحسس عليه وعيشه آخر انشكاح، يا عم سيبك، ايكش نولع.
البحرين عامله زى دول الحياد هو و"عُمان" ملهمش فى حاجه، ممكن يتبرعوا بفلوس ومساعدات عينيه، بس معرفش ان كان عندهم جيوش ولا لأ، تقريباً احنا الدوله العربيه الوحيده اللى عندنا التجنيد اجبارى، اصلنا كتير وعاوزيين يخلصوا علينا أول بأول وكمان يعطلوا الشباب شوى عن انهم يطالبوا بالوظيفه او الشقه والزواج.
المهم، معدش باقى غير اليمن والسعوديه والامارات فى الجنب ده، ربنا يسهل؛ بس الأولى الله يعينها، اول مره اشوف ناس مسموح لهم بالمخدرات بأمر الحكومه، يومين فى الاسبوع "يخزنوا" – دا الرسمى وبقيت الايام براحتك- عارفين طبعاً التخزين وكلنا سمعنا عن "القات" والحياه هناك اعتقد انها دايماً بمبى ، مساء الخيييييييييييييييييييييييييييييييييير
السعوديه بردوا فيها قواعد امريكيه ومصالح واقتصاد وبترول عاوز إللى يشتريه حتى لو بتراب الفلوس، مش مهم؛ هيبقوا يتبرعولنا لما نموت ويبنوا البيوت والمدارس اللى اتهدت ومش هتلاقى حد يعيش فيها،المهم يرضوا ضميرهم حتى لو بمليار دولار، اما بقا الأموره الحلوه "الإمارات" فربنا يزيدها من نعيمه وتبقشش على الغلابه الناميين وتشبرقنا بتبرعاتها للتعليم والصحه والأكل وتشوف مصالحها بقا، احنا هننهب،هيشغلوا بالهم بناس فى آخر الدنيا ليه؟؟ خليها فى ابراجها ومنتجعاتها وسعيها للعالميه وتباهيها انها عاصمه اوروبيه فى قلب العروبه ،وسمعنى سلام محمد هنيدى فى الجامعه الامريكيه....أمريكوه أوربوه
جايز الجزء الافريقانى يكون فيه الشفا عن الآسيوى، هناخدهم من تحت،،،،،،،،،،،
"السودان"...جيتك يا عبد المعين تعينى لقيتك عاوز تتعان، شمال وجنوب ودارفور .الصراحه اتكسفت من نفسى ،هؤول لهم ايه بس؟؟! خللى كل واحد بهمه وبلاش اقلب عليهم المواجع
ليبيا....كل ما افتكر موقفهم مع الممرضات البلغاريات اللى سمموا الاطفال الرضع بفيروس الايدز وانهم فرطوا فى حقهم بسهوله كدا مقابل شوية فلوس ووعود فارغه الصراحه دمى بيفور وبيتهيألى انهم ممكن يبيعونا احنا كمان، يعنى اغلى عليهم من ولادهم مثلاً؟؟!!!
تونس والجزائر والمغرب وموريتانيا .........مبعرفش اتكلم فرنساوى كويس، يعنى لغة " الحوار" والتواصل بيننا مفقوده تقريباً
تعبت من اللف بصراحه وعاوزه ارتاح ،وحاسه ان اثار المسكنات بدأت تروح
ألحق ارجع مصر وأحاول أرتب "البيت من الداخل" زى ما بيقولوا
اجتماع عاجل مع كل الوزارات علشان نجهز نفسنا ونشوف محتاجين ايه والخطه هتمشى إزاى
الصراحه مكدبوش خبر واتجمعوا، حتى اللى فى مارينا او دافوس ولا وراه شغل فى واحده من شركاته بردو جه، وياريتهم ما إجو ولا قابلتهم، كركبوا الدنيا فوق راسى
حرب ايييييييييييييييه؟؟ حرب يعنى تعبئه عامه واستدعاء للمتأجلين وشباب "شغال" حاله هيقف والناس هتثور علينا وتموين ومخازن تتملى ، دا قمحنا مش بيكفينا واحنا كده اومال لو حاربنا بقا هنسف التراب، غير بقا مصالحنا والبيزنيس وشكلنا هيبقا وحش مع بتوع السلام والدفاع المشترك و"انت صديق صديقى وعدو عدوى" واالى المفروض بناءً عليها نقف مع الصهاينه مش فلسطين
وكمان الادويه اللى بنستوردها ممكن تتأخر علينا، دا غير ان وزارة الحربيه بقت وزارة "دفاع وانتاج حربى" وكل علاقتها بالجيش ان"المصانع" بتنتج حلل وطاسات "عبور سينا" وبقيت الجيش متوزع على فنادق وقاعات افراح القوات المسلحه واحتفاليتها، والصفوه فيهم طلع لهم كرش واللى فلحوا وراحوا تدريب فى امريكا صادوهم فى الجو زى العصافير ودمهم راح هدر،دا غير العساكر اللى استخدموهم "فرانين" فى افران الحكومه علشان تخبز عيش وتوزع عالناس، اما الباقى فهنلاقيهم "امن مركزى" متوزعين فى كل شوارع وميادين الجمهوريه علشان الأمن يستتب ،تحولوا من جنود فى جيش الوطن علشان تحميه لحراس بتخدم النظام ورجالته
حتى فكرة اننا نعمل معسرات تدريب للمدنيين زى ايام 56 وغيرها بردوا اتلغت ، هيروحوا فلسطين ازاى؟؟ مينفعش نبعتهم علشان شكلنا هيبقا وحش اوى وهيتقال علينا ناس بتوع حرب ومش بنحب السلام
دا غير ان محدش فاضى يروح يتدرب اصلاً
خطه عبيطه وافكار فاشله واحلام ساذجه
وعلى قول الست "عاوزنا نرجع زى زمان..قول للزمان ارجع يا زمان" او على الاقل كل الدول العربيه يكون فيها قاده زى بتوع زمان

لازم كلنا نبدأ مع بعض

وكلمه واحده

وموقف واحد

زى ملك السعوديه زمان (الملك فيصل رحمه الله) لما وقف تصدير البترول لأمريكا، قالها بعلو الصوت " عيشنا واجدادنا على اللبن والتمر وسنعود اليهما" ولما كيسنجر راح يساومه قال" انا رجل طاعن فى السن وامنيتى ان اصلى ركعتين فى المسجد الاقصى" مش يروح يعقد سلام مزيف ويبنى قواعد امريكيه على ارضه
الله يرحم الرجاله

حد قالهالى وبترن فى عقلى " لو احنا نار يبقا الروؤساء والملوك بتوعنا علينا مطر" او حتى سيول علشان نتؤوملناش اؤومه
اللى بيغضبوا زى العيال ودا مش راضى يحضر القمه اللى فين علشان مانا عارفه مين هيحضر يبقا دول فيهم رجا ولا امل بذمتكم؟؟؟!!
" ولا تحسبن الله غافلاً عما يعمل الظالمون إنما يؤخرهم ليوم تشخص فيه الأبصار (42) مهطعين مقنعى رءوسهم لا يرتد إليهم طرفهم وأفئدتهم هواء (43)" سورة ابراهيم

كلمه اخيره ، قال تعالى " يا أيها اللذين أمنوا عليكم انفسكم لا يضركم من ضل اذا اهتديتم" صدق الله العظيم

وخللى الجهاد لناسه إللى بجد

تسلم ايديكم يا رجاله

SABRINA ABU ALI

هناك تعليق واحد:

غير معرف يقول...

تسلم ايدك وسلم فمك والله يا بنتى
اتكلموا خليهم يحسوا على دمهم دا لو كان عندهم دم
حسبنا الله ونعم الوكيل