بييجي وقت لازم تسكت فيه , وعقلك يقولك ( خليها فى القلب تجرح , بدل ما تبان و تفضح ) .. و أوقات تحس إنك لازم تتكلم .. مش قادر تكتم و تخبي .. وإلا هتنفجر .. علشان متكلمش نفسك و الناس تقول إتجننت .. أو تخلق شخصية من خيالك تعيش معاها و تعزلك عن العالم ويقولو عليك براوي ... يبقى الحل إنك تفضفض .. اللى تقدر تتحمله خليه جواك .. و اللى متقدرش عليه .. ويفيض بيه قلبك و عقلك .. وزّعه على اللى حواليك ... هنا مش مجرد كلام و حكايات ... كل رسالة هي فيض من ( فيوض القلب والخاطر ) ....... أنا / صابرين أبوعلي

الثلاثاء، ١٨ نوفمبر ٢٠٠٨

بـــيــبـصــولــنا من فــوق



كتير من العوامل المحيطه بتشير إلى انى ممكن أكون "مش مصريه" تخيلوا دى!!! هم بيقولوا كدا
طب إزاى؟؟!!! والله أنا حاسه انى مصريه جداً، كل الأغانى الوطنيه بتنطبق علىَّ وبعيط لما بسمعها، قلبى بيوجعنى على البلد، وبفرح لفرحها وبتقهر لحزنها، دا غير إنى شربت من نيلها (صحيح من الحنفيه إللى الله أعلم جايه منين بس بردو من نيلها،كله بيصب فى بعضه) وكتير جربت أغنى لها ،وبشكى لها وبسمع منها، ومشيت فى ضواحيها وحواريها واتصورت على نص موانيها ومزارعها وصحاريها،وكبرت واتربيت فيها وهى الصحبه وأهم من الأهل؛ باقى ايه تانى؟؟!!
صحيح أمى وجدتى قالولى زمان ان أصولهم بتمتد لشبه الجزيره العربيه،بس جدى لأبويا صعيدى فلاح مأصل ، وصحيح انى كل ما آكل فول وفلافل بتعب وزمايلى بيقولوا ان دى مش علامات المواطنه المصريه وإنى دسيسه عليهم، بس أنا بقول العيب فى المطعم أو معدتى مش مصريتى.
كنت متأكده من نفسى جداً وبدافع عن مصريتى بشراسه وحجه بالغه، لحد ما جه مؤتمر الحزب الوطنى وقلب دماغى وشككنى فى نفسى، أنا حاولت أتجنبه بس مفيش فايده، كل يوم بث مباشر على المحور وندوات ولقاءات وفاعليات على القنوات المصريه ومحطات الأخبار، دا غير الجرايد والبرامج الحواريه، اتحاصرت ومكنش فى مفر انى اتابعه بالإكراه ، ولقيتنى اتعلقت بيه واستنيت فعالياته وبرامجه وتابعته بالورقه والقلم علشان ما تفوتنى ولا كلمه ولا موقف.
الأول كنت عامله زى معلقين الكوره وبنفعل وأثور واعلق بصوت عالى أو حتى أنهار من الضحك،أو بهتف بصوت عالى "غابت ضمائرهم". وبعدين لقيتها مش مسرحيه والناس دى بتتكلم بجد وعن اقتناع تام بيللى بيقولوه وبيحولوا يقنعونا بيه.
وصلت لحاجه من اتنين؛ اما اننا عايشيين فى مصر التى لا يعرفها الحزب الوطنى أو ان هم عايشيين فى مصر التى لا يعرفها المصريون البسطاء ، إحنا كلنا يعنى بعيداً عن طبقة الحُكَام.
الكلام كبير وجامد أوى أوى؛ وإنجازات المفروض نبوس ايدينا وش وضهر عليها، مع ان ابسطها مش ملموس وهو ارتفاع معدلات التنميه؛ المفروض تبان فى ارتفاع مستوى معيشة الفرد والقضاء على الفقر.
تقريباً كل المشاكل محلوله فى مؤتمر الحزب الوطنى، التعليم زى الفل بغض النظر عن التسرب وسنه سته رايح سنه سته جاى والأميه إللى لسه 28% وانحطاط مستوى المعلم، والاستهزاء بالمدرسه، وانظمة الثانويه العامه الجنان، ومصانع بتتبنى ومجتمعات جديده بتتعمر ومشاريع ناجحه دون ذِكر توشكى وشرق التفريعه والعوينات والشيخ زايد ومئات الملايين إللى راحت هدر نتيجه لعدم التخطيط، والكبارى والطرق المنتشره والصرف الصحى إللى نجاحه بيبان كل ما الدنيا تمطر والعربيات والبيوت تغرق، ووزارة التموين انجزت ورغيف العيش اتوفر والحكومه بتستورد قمح زى الفل مش بتاع حيوانات.
كله كوم بقا وان "النظام" فى منتهى الرضا عن آداء رجاله وان مفيش أى تغييرات وزاريه متوقعه لحد عام 2010-2011 والحكومه زى الفل وكل واحد عمل إللى عليه وزياده ونام ضميره مرتاح. وحاسسين بمعاناة رجل الشارع وقضوا عليها،مفيش جعانيين ولا مشردين فى الشوارع ولا ناس منتظره التعويضات ولا مستحقين للمعاش وإعانة بطاله ما بياخدوا حقهم ، وزارة الماليه سددت كل ديونها وقررت تساعد رجال الأعمال ب (15 مليون جنيه) كنت هتشل، هم رجال الأعمال منتظرين مساعده؟؟!!!! فين شباب الخريجين والعاطلين والمرضى والمعاشات وإللى ما لهم عائل ؟؟!!! فين البياعين المتجوليين والمتسوليين والعشوائيات؟؟!!!

خدوا دى كمان.....قرروا يطبقوا اللامركزيه فى الحكم والإداره، يعنى المحافظ ورئيس مجلس المدينه وأعضاء المجلس المحلى ينفردوا بالسلطه فى محافظاتهم ويعيشوا حياتهم، والسيد جمال مبارك يقول ان من حق عضو المجلس المحلى عمل "استجواب للحكومه"!!! هى الحكومه حد يقدر يستجوبها من نوابنا فى مجلس الشعب الدكاتره وذوى التعليم العالى لما بتوع المحليات المنتخبين "فض مجالس وشكليات" ومعظمهم شهادات متوسطه او ناس عايشه وخلاص دول هيعرفوا يستجوبوا الحكومه وياخدوا قرارات؟؟؟ يظهر اننا عاوزين نقلد امريكا ونبقا فيدراليين وجمهورية مصر العربيه تبقا محافظات أو ولايات مصر المتحده. بذمتكوا ودينكوا ينفع المجلس المحلى عند أى حد فيكوا يحكم وخصوصاً محافظات الأقاليم البعيده عن العين؟؟!! يظهر الحكومه عاوزه تغسل إيدسها مننا وتفكها من مشاكل الناس البيئه وتعيش لطبقة رجال الأعمال ووزارتها ومتطلباتها والباقى يتحرق ولا يغرق ولا يتسمم...مش مهم.

من السنه إللى فاتت وهم بيقولوا "العداله الإجتماعيه" حد فيكوا لمسها أو شافها فى أى حاجه حواليه؟؟ مستعده ابعتلكوا مئات او آلاف الصور لناس عايشه تاكل التراب ، وناس اسمها موظفين وبياخدوا ملاليم وبيشحتوا وغيرهم بردو موظفين مع الاختلاف والفرق، دول من طبقة العبيد وخُدام النظام والباقى ذوى السُلطه والنفوذ ، مدرسين امتحنوهم علشان ياخدوا كادر ويزيد مرتبهم ل500 جنيه ،يادوب ساندوتشين فول وفلافل كل يوم ومن غير طبق سلاطه (لرجل ومراته يعنى 4 ساندويتشات) على اعتبار الواحد بجنيه وربع ومن غير ما يمرضوا ولا يركبوا مواصلات ولا يدفعوا ايجار، وغيرهم مرتبه آلافات بردو فى الحكومه مش قطاع خاص، وغيرهم اتحال معاش مبكر بسبب الخصخصه،وكمان حكومتنا بتساعد رجال الأعمال بالملايين ومؤتمر الحزب اتصرف عليه 5 مليون جنيه فى 3 أيام؟؟؟؟؟؟!!!!!!! صحيح "عداله إجتماعيه" على حق
البلد ممزقه بين "ثراء فاحش وفقر متوحش" وهم بيهتفوا للنجاح والانجازات وبيصقفوا وبينادوا بشعارات ليها العجب، وكأنهم ما يعرفو شئ عن الناس فى الشوارع والمطحونين فى البلد ولا الخنقه إللى بقينا فيها والشباب إللى بيرمى نفسه فى حضن الموت بمنتهى الرضا المهم انه يسيبها ويمشى.
وطلع وزير الاستثمار وقف جنب السيد أمين السياسات فى الحزب وأعلنوا عن "حزمة الأسهم المجانيه" للفقراء فى نظيم جديد مبتكر حصرياً فى مصر، هى الناس لاقيه تاكل لما هتشترى اسهم بـ500 جنيه؟؟؟!!!
وعلى فكره بقا...إللى انا اعرفه ان دول مجرد أفراد الحزب الحاكم (صحيح بعضهم بيعمل فى الحكومه بس مش بيتكلموا بلسان الحكومه، الحكومه يمثلها مجلسى الشعب والشورى ووزرائهاو...)، معظمهم ما له صفه فى الحكومه، ممكن آنهم بيحتلوا مناصب مهمه فى الحزب، لكن بتاع ايه يتكلموا بإسم الحكومه والشعب ويبيعوا ويشتروا فى البلد؟؟؟

ممثليين الحزب فى كل المحافظات صدمونى بجد، بيهتفوا ويهللوا وكأنهم مغيبين، معقول محافظاتهم مافيها الهَم بالكوم؟؟! واحده من الصعيد فرحانه بدور المرأه وبتهتف للديمقراطيه وكان الأجدر والأولى بيها تهتف بحق أهل محافظتها فى الحياه الكريمه بأبسط صورها فى رغيف العيش الآدمى والمياه النظيفه إللى لسه الجمعيات الخيريه بتحاول تدخلها لقُرى الصعيد، جايه تقول للريس "حلمها"، خلطت بين مصباح علاء وأبو علاء.

هم بيضحكوا على مين؟؟!! مفكرينا أغبياء ومش فاهمين بجد؟؟؟!! أو جايز بيتكلموا عن "مِـــصـــر" تانيه غير إللى بنعيش فيها!!!
فين المصداقيه والصراحه والشفافيه؟؟!! المفروض نواجه مشاكلنا علشان نعرف نحلها، مش نهرب منها ، ليه ننيم الناس بدل ما نصحيها ونفوقها؟؟!!
هتجنن، تعرفوا الموقف ممكن يتوصف بالظبط زى واحد جاى من مشوار عدا على كل الصعوبات، من أول الصحرا بحرها وعطشها ووحوشها واخدها مشى لحد الدنيا ما مطرت عليه سيول وغرقته وزودت مرضه وهلكت صحته وواقع فى الطينه وحالته زفت وبيبص له واحد من شباك بيت مكيف محاط بالجمال وفيه كل وسائل الراحه وبين الشخصين لوح زجاجى،الأول بيقول الحياه زفت والتانى ضحكته على آخرها وبيغنى الحياه حلوه. لازم اللوح الزجاج دا ينكسر علشان يكون فى تواصل صح مش إدعاء وتمثيل.
الريس "المبارك" – والله العظيم اللقب ده سمعته بودانى من شيخ الأزهر فى خطبة الجمعه، رجعنا لعصر الألقاب زى المعتصم والمأمون والسفاح- المهم انه بيخاطب أهل الصفوه والحظوه من أعضاء الحزب الوطنى وقال :" احملوا معكم فاعليات المؤتمر واهدافه إلى العامه والبسطاء" الحمدلله اننا مش الغوغاء والدهماء، خلاص،، بتوع الحزب بس هم إللى بيفهموا والباقى لأ، فهمهم على قدهم
حاسه كأنهم بيبصولنا من فوق وبيكلمونا من تراتيف مناخيرهم،بيعاملونا بـ"دونيه وتحقير وإزدراء" مش بقول كلام جامد بس والله تحسه فى كلامهم وطريقتهم،وعلشان بيبصوا من فوق لا هم شايفين ولا سامعين ولا حاسيين ولا حتى شاميين،، عندهم حق، ملوك البلد إللى اتقسمت عليهم، ومنحوا بعض الألقاب
والإمتيازات،
رئيس مجلس الشعب "الشريف" قال للريس بالحرف:" كلامك دستور" واحمد عز قال :" انت قائد ثورة التطوير يا جمال" ليه لأ والسيد جمال مبارك بيتكلم عن أى حد غير الحزب الوطنى بإعتباره "الآخر" وكأنه نوع من التحقير وانهم ما يستحقوا يكون لهم اسم ولا صفه فى بلد يقودها مبارك وينوبه نظيف وبها الشريف والغالى وابن العز، الاستاذ جمال بيقول عن الفكر الاسلامى وإللى بينادوا بيه بالحرف:" الآخر بينادى بالإصلاح إللى بيرجعنا للماضى وإللى كانت سياسته بتصلح بس فى الوقت ده" الدين بقا موده قديمه ودى موديه ومينفعش يتحكم بيه دلوقت، عادى ما إحنا عملنا قوانيين للأسره تخالف الشرع، نسيوا او باين ما مرت عليهم الآيه الكريمه :" ومَن لم يحكم بما أنزل الله فأولئك هم الكافرون" و " ومَن لم يحكم بما أنزل الله فأولئك هم الظالمون" و " ومَن لم يحكم بما أنزل الله فأولئك هم الفاسقون" آخر الآيات رقم 44 و45 و47 من سورة المائده
أنا متلخبطه ومش عاوزه أزود فى الكلام لأنى متأكده انى كتير ما هيصبروا يقروا دا كله، بس بفضفض معاكوا ، جوايا أسئله كتير تعبانى وواجعه قلبى على حالنا، إزاى لنا نِفس نعيش وبنتجاهل إللى حوالينا؟؟!! والله ذنبهم فى رقبتنا
لو مصطفى كامل مؤسس الحزب الوطنى ومحمد فريد كانوا شافوا مستقبل حزبهم وصورته كانوا بردو أسسوه؟؟ يا ترى فى أى حزب فى مصر من حقه يتجمع كدا ويعلن عن نفسه بالشكل ده ولا وقتها هيتهموهم بـ"التجمهر والشغب" ويسجنوهم أو غيرهم يحرقوا عليهم المقر أو يوقعوا بين الأعضاء المهمين فى الحزب علشان يخرب
!!!!

الأغنيه فى آخر جلسه كانت مستفزه لأقصى درجه، بيغنوا " للى ضحى لأجل وطنه لأجل ما يعود النهار وإللى اسم مصر اهم عنده من نفسه وإللى حلمه حلمنا وإللى فرحه فرحنا وإللى.... وإللى.... وإللى....... صفات علشان تنطبق عليك لازم تروح تطلع بطاقة عضويه فى الحزب الوطنى حالاً ، وإلا هتبقا مش "منهم" ولا حلمك حلمهم وفرحك فرحهم

هو مينفعش أكتفى بكونى "مصريه" بتحب بلدها بجد ؟؟؟ ولا هم عندهم "تكون وطنى أو لا تكون على الإطلاق"!!!

الكلام كتير والهم أكتر وحقكوا علىَّ لو كنت قلبت عليكوا المواجع أو أزعجتكم بحاجات وكلمات ربنا رحمكوا انكم ما حضرتوها مباشر....العيب على الفراغ إللى خلانى أفتح التليفزيون وأتابعه أوى كدا
حسبنا الله ونعم الوكيل
sabrina abu ali
هتلاقونى هنا كمان
^
^
^
^
^

هناك تعليقان (٢):

غير معرف يقول...

انتي ماقلبتيش المواجع انتي اتكلمتي بلسانا كلنا بارك الله فبكي


المشكلة فعلا ان هما مش شايفين ان في مشكلة يعني مافيش أمل في تحسن قريب ولا بعيد


بس برصه الأمل في الله كبير والظلم والقهر لا يمكن ان يستمر

غير معرف يقول...

ابنتى العزيزه سابى،
اسمحيلى اقول ابنتى لأن دى اول مره فى حياتى كلها اتمنى تكون لى بنت "خامسه"، ولو اعرف ان البنات ممكن تكون زيك كدا مش سطحيه ولا هايفه ومهتمه لأمر بلدها وناسهاومخها كبير وقلبها اكبر ما كنت عشت عمرى قلقان على البنات وخلفة البنات ونفسى فى صبيان
انا متابعك من زمان جداً على الجروب بس كان فى احراج انى أعلق علي رسايلك ، بس جدو محسن طلع أجرأ منى، انا خفت حد يتصور من تعليقاتى انى شاب صغير وبعاكسك
والله بحترمك وبحبك جداً، انا تجاوزت الخمسين على فكره وبناتى متزوجات وكلنا عايشين برا مصر وانتى من اهم المعالم إللى بتربطنى ببلدى وتطمنى عليها علشان فيها ناس زيك، بقول لنفسى لما لسه فى بنات كدا يبقا اكيد مصر بخير ولسه ولاده
رسايلك متنوعه وجذابه وكلها مفيده ولا تخلو من خفة الدم
زى الفراشه اللى كنتى بتحطيها فى توقيعك، بتتنقلى من زهره لزهره ، البلدى والمستورد والخفيف الرقيق والمعقد حتى الصبار ما بتخافى تقربى منه ولو صابك شئ من شوكه أو أذيتك قسوته
صابرين....ربنا يهديكى ويحميكى ويبارك فيكى ويرزقك الزوج الصالح القوى الأمين وكلنا وقتها هنحسده شوى بس هنبارك له من قلبنا علشان ربنا وفقه واختارك
خدى بالك من نفسك يا بنتى
احفظى الله يحفظك، ومتخافيش على مصر
عدا عليها كتير، كلهم زالوا وبقيت هى بقوه وأصاله وشموخ