بييجي وقت لازم تسكت فيه , وعقلك يقولك ( خليها فى القلب تجرح , بدل ما تبان و تفضح ) .. و أوقات تحس إنك لازم تتكلم .. مش قادر تكتم و تخبي .. وإلا هتنفجر .. علشان متكلمش نفسك و الناس تقول إتجننت .. أو تخلق شخصية من خيالك تعيش معاها و تعزلك عن العالم ويقولو عليك براوي ... يبقى الحل إنك تفضفض .. اللى تقدر تتحمله خليه جواك .. و اللى متقدرش عليه .. ويفيض بيه قلبك و عقلك .. وزّعه على اللى حواليك ... هنا مش مجرد كلام و حكايات ... كل رسالة هي فيض من ( فيوض القلب والخاطر ) ....... أنا / صابرين أبوعلي

الجمعة، 21 نوفمبر 2008

هــــانــم وســت الــهــوانــم




هو أنا قلت لكم إن مامتى بتقول إنى " متخلفه ورجعيه وإلى حد ما مبفهمش"؟، كل دا ليه؟ علشان قلت رأيى بصراحه فى عمل المرأه. إيه يعنى لما اقول ان الست مكانها بيتها مع جوزها وعيالها؟ وفيها إيه لما اكون مؤمنه ان البنت تشتغل قبل الجواز لكن بمجرد ما تتجوز ويكون فى أولاد يبقا تسيب الشغل فوراً؟ وعادى يعنى لما أرفض المساواه بين الجنسين وتفضل الست ست والراجل راجل،العدْل آه لكن المساواه لأ. وبغض النظر عن محاولات غسيل المخ بشعارات "القياده" ودور المرأه إلا إنى مش ممكن اغيَّر رأيى إن اهم دور للست انها تربى ولادها أحسن تربيه وتفنى حياتها فى حياتهم.و تبآ تصنع منهم قاده وزعماء على كيفها.
ورغم إن ماما مش بتشتغل لكن بتزعل أوى لما واحده تسيب شغلها بعد الجواز، بتقول خساره الشهاده وكمان المرأه لازم يكون لها "ذمه ماليه مستقله" تتصرف فيها بحريه من غير إذن زوجها ولا تتعدى على مصروف البيت وعلشان مش كل حاجه تحتاجها تقول لجوزها هات. والأهم إنها بتقول ان فى الزمن ده لاااااازم الست تشتغل علشان تساعد جوزها فى ظروف المعيشه الصعب دى.
إشتعلت المعركه بينا علشان لما اتسحبت من لسانى وأنا بتفرج على المسرحيه الكوميديه إللى اسمها المؤتمر الدولى فى يوم المرأه العالمى وكان السنه دى بعنوان :" المرأه استقرار عالم غير آمن" وله شعارات غريبه كدا زى :" من القياده المحليه إلى القياده العالميه" و" حق المرأه فى القياده وإزالة العراقيل لمساهمتها فى بناء المستقبل" و...... لقيتنى من غير ما احس بقول للمدام إللى بتلقى كلمة الافتتاح وبنبره ساخره :" يا شيخه إتلهى وروحى ربى عيالك" وقعنا فى مثلث خراب..الراجل ومراته وابنه بيبوظوها من كل حته وربنا يعوض علينا.

فضلوا يرددوا فى الكلام ده ويعملوا مجالس وجمعيات للستات علشان يخرجوهم برا بيوتهم ويبهدلوهم. انا مش ضد ان البنت تتعلم وتوصل لأعلى الشهادات والمناصب بس لو ده مش هيأثر على تربيتها لأولادها ورعايتها لجوزها وكمان ما تهمل فى نفسها. إللى تقدر تحقق المعادله المستحيله دى يبآ تشتغل براحتها ولا حد يقدر يقول بِِم.
احسبوها بالعقل...واحده مطلوب منها رعايه لزوج وأولاد، تفطرهم قبل ما يخرجوا وتتمم عليهم وترتب البيت وتلبس وتخرج "جرى" على شغلها تشتغل مش اقل من 6-7 ساعات، ترجع ترتاح وتوضب نفسها علشان جوزها ما يترعبش من منظرها(ويكون له نفس للرومانسيه إللى قلنا عليها قبل كدا) وتحضر غدا يليق بالشقيانيين (ولادها وجوزها) وطبعاً تعمل صنف حلو، وبعد الغدا تنضيف ومواعين تتغسل وترتيب وتتابع مذاكرة الولاد وتتكلم مع جوزها شوى علشان ما يقول انها مطنشاه. دا اليوم العادى، من غير أحداث طارئه ولا عزومات. ومش هؤول كمان انها على الأقل محتاجه ساعتين تلاته تعيش فيهم لنفسها، تقرا، تلعب رياضه، تزور حد، تخرج تشترى حاجه ،تحب تعمل جو رومانسى أو تعتزل الدوشه وتسترخى مع الموسيقى أو......... كل دا من الخيال ولا يمكن يحصل ولو عملت قرد
.
بشوف اى واحده بتشتغل وهى واخده حياتها جرى فى جرى،ومبهدله فى نفسها وتشيخ قبل الأوان بدل ما تكون أجمل أنثى فى الدنيا ومتجدده كل يوم،مفيش اى شئ تقدر تقول عليه "كامل" فى حياتها. كله ناقص ومش واخد حقه. مقصره فى حق أولادها وحق زوجها وحق نفسها. وبلاش نعترض وننفعل من غير ما نفكر.
ممكن كلهم يخرجوا من غير فطار، وكمان الغدا يتعمل من بالليل او الصبح بدرى او حتى أكل الاسبوع كله يتعمل ويتحط فى التلاجه، الولاد ممكن يرجعوا قبل مامتهم ما ترجع ودا بيترتب عليه بلااااوى ومصايب، ممكن يزوغوا بعد المدرسه ويرجعوا قبلها بالظبط، ممكن كمان الطفل يلاقى نفسه لوحده فيعمل اى عمله سوده، ابسطها الحرايق وانه يؤذى نفسه. الأم بتحرم ابنها من انه يعيش "طفوله" صح وبتحمله المسؤليه قبل الأوان، والله شفت ولاد كتير فى ابتدائى ومعلقين مفتاح الشقه حوالين رقبتهم. ابنها هيتحرم من التدليل وانه يلاقى "ماما" تقابله بحب وهو راجع من المدرسه او انها تكون صبوره وبالها طويل معاه وهو بيحكى عن يومه وزملاؤه، وعمرها ما هتكون "صديقه" له. الطفل مش هيحس ب"الإنتماء" لمامته وولاؤه لها، واظن حوادث ضرب الأبناء للآباء والأمهات منتشره وكمان دور رعاية المسنيين مليانه على آخرها...داين تُدان، إزاى تنتظر منه يرعاها وهى اهملته من البدايه؟؟!! وييجوا يشتكوا من عقوق الوالدين،
بقا الأم إللى ملازمه لولادها فى كل صغيره وكبيره وعاشت معاهم كل مراحل عمرهم وسمعت اول كلمه وشافت اول خطوه وطارت من الفرح لما سمعت حاجه بتخبط فى الكوبايه وهى بتشرب ابنها ولقت الحاجه دى سِنه لولى لسه بتشق طريقها فى بؤه، ولما عيى باتت سهرانه عليه واول ما فتح عيونه اطمن لما شاف ابتسامتها تتقارن مع غيرها إللى جابت لإبنها "داده" أو ودته الحضانه وسابت غيرها يربيه وكانت بتسمع اخباره آخر اليوم لما ترجع وما تاخد اجازه غير لما يمرض اوى وبيسموها اجازه عارضه بإذن الحكومه. بنغلط ونرجع نقول يا ريتنا، بس على رأى المثل :" كلمة ياريت ما تعمر بيت".
شايفين نماذج ولاد مش متربيين وبنات ما عندهم حياء ولا أدب وشباب ضايع من غير "قدوه" أوحد فى البيت يحترمه وبردو يخاف منه، وفين وفين لما الأب والأم يفضوا بعد ما يخرجوا معاش تلاقيهم جايين يحاسبوا ولادهم إللى عدوا العشرين ويقولولهم دا صح ودا غلط!!!! بعد إيه؟ خلاص؛ سبق السيف العذل. هى بتحرم نفسها انها تكون أم بكل معانى واحاسيس الكلمه وحرمت ولادها من أحلى وأغلى حاجه...أمهم.
زميلتى فى الشغل جالها تليفون ان ابنها رمى نفسه من البلكونه، أول ما سمعت الخبر أغمى عليا بمجرد ما تصورته، وبعد ما فقت حكولى ان الولد عنده اجازه النهارده وكانت مامته قافله عليه الشقه لواحده وحب يخرج فلقى احسن حل انه ينط وزى ما تيجى تيجى، والله العظيم انا قلبى وجعنى وفضلت اعيط لما اتعدمت وأدينى مش مامته، طب هى يكون حالها إيه؟؟ تانى يوم بسأل على عنوانها علشان أزورها لقيتها جت الشغل!!!!!! واخده الموضوع ببساطه وقالت :" شقاوة عيال، كسور بسيطه وباباه قاعد معاه النهارده" كفايه اقول لكم انى من يومها حتى مش بقول لها صباح الخير....متستاهلهاش.
الست فعلاً ممكن تكون قائد فى غاية الأهميه وفعلاً تحسن المستقبل، بس لو لعبت دور الأمومه صح وربت أولادها على انهم لازم يكون لهم دور حيوى فى مجتمعهم. عارفين حكاية السيده "هند بنت عتبه" لما الوليد ابن المغيره سخر من "معاويه ابن ابى سفيان" ابنها لما عرف انها عاوزاه يكون قائد فى أحد الأيام قال لها " أيسود هذا قريش؟" ردت عليه بمنتهى الحزم :" ثكلته إن لم يسُد العرب كلها" عندها ابنها يموت ولا إنه ميكنش زى ما هى عاوزاه،راجل يملا العين، واظن كلنا عارفين مين "معاويه ابن ابى سفيان" هى دى الأمهــــــــــــــــــــــــــــات إللى تستحق الأمومه، هدفها وغايتها ولادها وبس.
ياما ستات فى مراكز ومواقع قياده وأولادهم فاشلين ومنحلين والسبب......إن مكنش فى حد "فاضى" يربيهم.
ماما بتقول ان فى الزمن ده لازم الست تشتغل، بالعكس خالص؛ دا فى الزمن ده بالذات لازم الست ترجع بيتها وتحاجى على ولادها وتاخدهم فى حضنها، الفلوس إللى بتروح للدادات والحضانات ومصاريف يونيفورم واتوبيسات ومصاريف خروجها هى كمان، كل ده هتوفره لو قامت بالدور كله، على الأقل هتعرف ولادها متربيين إزاى وهتثق فيهم، مفيش فى يوم حد يرجع البيت يقول كلمه وحشه سمعها من زمايله ولا يتكلموا فى حاجات ما تخصهم.
هيتربوا على البراءه والأخلاق الحسنه والدين الصحيح والعادات السليمه، تحفظهم القرآن الكريم وتعلمهم السيره النبويه الشريفه وتديهم لغات وكمبيوتر وتحببهم فى القراءه والعلم، أومال هى واخده شهاده جامعيه ليه؟؟!! كدا بقا لما الولاد يخرجوا للمدرسه فى سن 6 سنين هيكونوا متحصنين من كل شر او غسيل مخ، لا هيعرفوا العيب ولا الصوت العالى ولا يحتاجوا لدروس خصوصيه. يعنى قعدتك فى البيت تربى عيالك هى "استثمار فى مستقبل آمن بجد مش كدا وكدا".
الأم يكون لها الدور الفعال فى حياة أولادها؛ وبردوا تعمل لباباهم بريستيج جامد أوى بس من بعيد لبعيد، يعنى إيه؟ يعنى بابا ده "نصف إله" حاجه كبيره وجامده خالص، عارف كل حاجه بس مش بيبين،هى تحكى له على كل المشاكل بس بعد ما تكون حلتها، إللى يعمل حاجه غلط تهدده انها هتؤول لبابا وانه لو عرف هيزعل مووت، ويكون بابا عارف ورسمين الدور سوا بس علشان يفضل "بابا اللطيف وفى نفس الوقت الأشكيف المخيف" إللى بيظهر وقت الزنقه وبس وكفايه عليه هموم شغله ومصاريف البيت.
الستات إللى عاوزيين يعملوا قاده دول جوازهم وأولادهم خربوا البلد وهم عاوزيين يكملوا معاهم المسيره ويقعدوا على تلها.
إنتى اعظم قائد..بس من وراء الستار، وغير كل ده انت هتكونى هانم وست الهوانم كمان،لا تطلعى ولا تشوفى الشارع إلا فى الضروره، تكونى "فاكهه عزيزه" ع العين والنفس، وإيه كمان... ماما راحت ماما جت ماما قالت، هستأذن ماما، وزوج حضرتك بقا ما يقول إلا "الهانم بتاعتى" ويعاملك كدا كأنك بسكوته مش راجل زيك زيه ولا يسأل فيكى. بس وقت اللزوم عارف انه سايب وراه أسد آخر جدعنه. وعلى رأى المثل " إللى يقول لمراته يا هانم جيرانها يشيلوها من ع السلالم وإللى يقول لها يا عوره يلعبوا بيها الكوره" ولا إيه يا أختى؟ والنبى تفهمها ياخويا وتاخد بالك منها

هو فى أحلى من الست لما تتستت وتعيش "هانم"؟ اللــــــــــه، بحب الكلمه دى أوى "هانم" يا سلام، وفيها ايه لما اتعامل على انى كائن ضعيف محتاج للى حواليه؟؟!! ما تتخيلوا سعادتى لما حد يستضعفنى و يساعدنى ؛مثلاً يعنى يوقفلى تاكسى او يفتح لى باب محل كنت فيه وخارجه شايله اكياس او يشيل معايا. ويا سلام لما اكون فى مكان زحمه او مستنيه اسانسير ويقولوا اتفضلى انت الأول، علشان عايشه دور الستات بجد، مستنيه المساعده ، لا أحشر نفسى فى زحمه ولا أعلى صوتى انادى على تاكسى ولا اجمد على الباب افتحه او اشيل 10 اكياس لوحدى، أومال الرجاله قوامون على النساء ليه؟؟ مش ربنا سبحانه وتعالى بيقول :" الرجال قوامون على النساء بما فضل الله بعضهم على بعض وبما انفقوا من اموالهم" أنا موافقه على القوامه دى، دا اعتراف بحقهم، ويشيلوا هم بقا.
**إنتِ هانم وست الهوانم وأميره وملكه كمان...بس فى بيتك معززه مكرمه من غير بهدله**
بشجع ان البنت تشتغل قبل الجواز. عارفين ليه؟ علشان الشغل بيوسع مداركها وبيديها خبره فى الحياه ويعرفها ان المعيشه مش سهله، وتعرف كمان ان عليها إلتزامات وواجبات لازم توفيها وكلها امور بتسبب ضغوط وعصبيه وزهق وخنقه،لما تجرب كل الحاجات دى هتعذر زوجها ومهما شافت من عصبيه وتكشير هتؤول لنفسها "معلهش...أنا شفت وجربت قبل كدا ومسامحاه" وبالتالى هتخفف عنه مشاكل البيت وتوفره للحاجات إللى تغلب فيها. وكمان لما تشتغل قبل الجواز مش هتحس ان ناقصها حاجه او انها حد عاجز، بالعكس..دى حد ناجح وله أهميه فى موقعه بس فضلت بيتها على شغلها لأنه الأحق بكل جهودها، وزى ما بيقولوا "الأهم فالمهم".
كدا كل مرحله تتلعب وتتعاش صح، وهى صغننه تكون بنوته ودلوعه،فى الكليه آخر جدعنه ولا حد يجرؤ يبصلها، فى الشغل قدها وقدود وتشيل اكبر مسؤليه ولا تتهز، وهى زوجه عارفه إللى ليها وإللى عليها أما بقا وهى أم فمش محتاجه وصايه من حد..كفايه تعرف انها نصف المجتمع وتلد النصف الآخر، يعنى بردو إحنا الأهم -بس بينى وبينكم علشان الرجاله ميزعلوش.
جايز تلاحظوا انى مركزه على دور الست كــ"أم" ومش عاوزه اتكلم فى دورها كزوجه ،مع انه لا يقل عنه فى الأهميه

اكيد ناس كتير زعلانيين منى دلوقت، البنات علشان بقول لهم يقعدوا فى البيت والرجاله علشان ما اتكلمت عن معاناة بعضهم مش كلهم بسبب عمل زوجاتهم واهمالهم فى حقهم. بس دوركم هييجى بعدين فى رساله تانيه ان شاء الله.
عندى اقتراح صغنن...حقيقى ان بعض الستات وحتى لو بعد 50 سنه جواز بيتكسفوا يطلبوا من ازواجهم كل حاجه، فيعنى من باب اللياقه والذوق ممكن الزوج يخصص لزوجته "مرتب" ولو بسيييط أوى غير مصروف البيت،تشترى منه حاجاتها الشخصيه، شاور، شامبو، او تحوش منه علشان لو تحب تجيب هديه لحد احسن ما تطلب تمنها منه وتحس بالإحراج.....دا مجرد اقتراح.
أما بقا بالنسبه للستات بتوع حقوق المرأه والدلع ده، عاوزه اقو لهم كلمه واحده بس" ناس معندهاش دم" مش شايفين الستات فى فلسطين والعراق والفلاحات فى مصر عايشين إزاى؟؟!! على رأى المثل " ناس فى طينه وناس بتشم ورد" لابسيين سينييهات وقاعديين فى التكييف وبيتكلموا عن "معاناة" المرأه العامله ومحدودة الدخل...حاجه تنئط.

وأحب أهدى لهم أغنية "أم اسماعيل" من الفلكلور الشعبى إللى جابت من الآخر وعرفت دور الست الجدعه الصح ولخصت الموضوع كله فى كلمتين وهم: " يا حلاوة أم اسماعيل فى وسط عيالها زى النجفه عم بتلعلط فى جمالها ، تزرع وتجلع فى الغيط جنب راجلها وتعاود تانى لعجينها وغسيلها، تحلب جاموستها..حلاوة كتاكيتها... عالمولوخيه ياختى عليها وعلى طبختها. وما نمدش رجلنا ليه؟؟ على جد "أد" لحافنا يا بيه؟؟ على إيه العنطزه ليه؟؟!!"

ويا رب كل ستات مصر يرجعوا يبؤوا "ام اسماعيل". ويسيبوا اماكنهم للشباب الغلبان إللى مش لاقى شغل ده.
كــالعاده............ .طــــــــولت عليكم، بس اعمل إيه؟ مش بعرف امسك لسانى، والله دا انا كمان رحمتكم من افكار ورغى كتير وامثله مزعجه لستات قابلتهم من النوع ده...ربنا يهديهم.
قصدى "ربنا يهديهن" علشان ترجع لنا "نون النسوه" بالسلامه من عالم الخشونه
،،،،تحياتى وتمنياتى القلبيه للجميع بأسعد وأهنأ حياه،،،،،
sabrina

هناك 5 تعليقات:

Abeer Soliman يقول...

يا أستاذة سابرينا..

سيادتك عايزة تحسى بضعفك ويتفال لك يا هانم وتبقى أم أسماعيل ... دى كلها حقوقك.. انت حرة .. أعملى اللى انت عايزاة.. بس انك تنادى بدعوة عامة ان الستات تشاركك خياللك الخصب أهو دا بقى زيادة شويتين عن حقوقك..

أنا معجبة جدا بالكتير من آرائك بس بصراحة الست والدتك عندها حق...

أنهيار الأخلاق اللى اتكلمتى عنه مش سببه ان الست مش قاعدة فى بيتها.. سببه انعدام الوعى يا أستاذه بمعنى التربية السليمة للأبناء...

مش عايزة أطول أصلى مش بحب الرغى

سلام

محمد سيد يقول...

على فكرة الكلام ده جميل جداً ومش بقول كدة لأن أنا راجل بس عشان هو ده الأصل فعلا

هو مش ضعف خالص بالعكس دي منتهى القوة ماتسمعيش كلام الناس التانية

القوة انك تاخدي الفرار الصح في الوقت المظبوط

ومهما كان الوعي اللي بتتكلم عليه الأستاذة عبير موجود برضه مش هيكفي دور الأم في حياة الأولاد معلش كلنا عارفبن مراحل المراهقة وكلنا مرينا بيها يعني لو الأم مش موجودة ومتابعة باستمرار مافيش أسهل من الانحراف في السن ده

تقبلي تحياتي

غير معرف يقول...

Marry me pleeeeeeeeeeeeeeez

غير معرف يقول...

إنت راااااااااااااااائعه يا بنتى
والله انا بفكر زيك، وزعلانه من قلة احترام الستات لنفسهم ومن قلة احترام الناس لهم، دا كله بسبب الخروج والشغل، فى راجل بقا بيقدم الست عليه فى المواصلات او الاسانسير؟؟؟؟ طبعاً لأ، علشان بقا فى مساواه وتستاهل اللى يجرالها
ربنا بيقول " وقرن فى بيوتكن" شوفتى الكلمه...وقار
تعرفى، بابا بيتحايل علىَّ اكمل دراسات عليا بس انا مش عاوزه
مادمت مش هشتغل لما اتجوز يبقا ابهدل نفسى ليه، كفايه العلم اللى اتعلمته انفع بيه ولادى
الستات اللى بيخرجوا يشتغلوا بيبقوا علشان يخرجوا يغيروا جو ويهربوا من البيت وتتحجج بانها تعبااااااااااانه
وبتشتغل زيها زى البيه
ربنا يخليكى يا رافعه صوتنا
شوفى الاخ اللى عاوز يتجوزك ده...محدش لاقى يا بنتى
نانوسه...اقبلينى صديقه من فضلك يا قمر

EL-Kalamangiah يقول...

السلام عليكم ورحمة الله وبركاته
اسفه انى تأخرت فى الرد على حضراتكم...بعيد عنكم جميعاً الكمبيوتر "ضرب" فى حالة عصيان وتمرد غير مسبوقه وانا حالياً منعزله عن العالم..ربنا يفك أسرىة قريباً ان شاء الله
بالنسبه للأستاذه/ عبير، إللى انا بكتبه مجرد إبداء رأى مش فرض رأى، وعلى فكره، دا مش خيال بدليل انه حصل زماتن وستات كتير عايشه كدا ولسه ما ماتتش وحالها احسن من كتير غيرها
الشاعر قال الأم مدرسه اذا اعددتها اعددت شعباً طيب الأخلاق، طب لما المدرسه دى قافله او مشغوله طول النهار العيال تروح فين ويتعلموا الاخلاق والدين والترابط والانتماء منين؟؟
من المدارس الداخلى والدادات والحضانه والتليفزيون وقرفه...صح؟؟
المرأه الذكيه إللى يكون هدفها اعداد جيل يعرف يعنى ايه حق ويطالب بيه وياخده، ويكون لها زوج فى منتهى السعاده بسمته ما تفارق شفايفه وعيونه ما بتشوف غيرها "تبهره وتسحره" لأنها بالنسبه له رمز الكمال" الأنثوى" بكل معانيه من ضعف وقوه فى جوانب وجوانب
طولت عليكى..أصلى بحب الرغى، كلامنجيه بقا
أستاذ محمد سيد..اشكرك على ذوقك ومحاولاتك المستمره فى رفع معنوياتى
الاستاذ المجهول بقا اللى عارض الزواج..دا ينفع برد؟؟!! كدا من غير ما تسيب اسمك وعنوانك؟!عموماً عندنا بن محوج وساده وشاى وحاجه ساقعه وعصير وكمان جاتوه، بس انت تيجى...ههههه
نانوسه الأموره...من كلامك واسمك يبان بنوته عسوله خالص، ربنا يسعدك ويرزقك الزوج الصالح إللى يحفظك وما يهينك ويخليكى ست الهوانم
بس دا مش معناه انك ما تدرسى انا عن نفسى بطلع من حاجه ادخل فى غيرها حتى لو ما لها علاقه بدراستى وشغلى، المهم اعرف ،وتشغلى وقتك وتتعلمى لغات وتدبير منزلى واشغال يدويه كمان وتنمى قدراتك لحد ما ييجى الوقت ده
علشان تملى عين زوجك، ويلاقيكى حد جدير بالاحترام وتكونى له اقرب من اصدقاءه ، يعرف يتكلم ويناقش، ويلاقيكى كل حاجه هو عاوزها....كل حاجه، حتى نانسى الدلوعه كمان
ويسعدنى اكيد تكونى صديقتى
sabrina abu ali
elkalamangiah