بييجي وقت لازم تسكت فيه , وعقلك يقولك ( خليها فى القلب تجرح , بدل ما تبان و تفضح ) .. و أوقات تحس إنك لازم تتكلم .. مش قادر تكتم و تخبي .. وإلا هتنفجر .. علشان متكلمش نفسك و الناس تقول إتجننت .. أو تخلق شخصية من خيالك تعيش معاها و تعزلك عن العالم ويقولو عليك براوي ... يبقى الحل إنك تفضفض .. اللى تقدر تتحمله خليه جواك .. و اللى متقدرش عليه .. ويفيض بيه قلبك و عقلك .. وزّعه على اللى حواليك ... هنا مش مجرد كلام و حكايات ... كل رسالة هي فيض من ( فيوض القلب والخاطر ) ....... أنا / صابرين أبوعلي

السبت، 11 أبريل 2009

نــــــــــورك كــــفــايـــه


تخيلوا....وزير الكهرباء والطاقه اليابانى استقال، آل إيه بسبب مباراه بين اليابان ومش عارفه فريق ايه والكهربا قطعت كام ثانيه من بخته المايل اليابان تحرز هدف فى الفتره دى وطبعاً كدا حرم الشعب انهم "يعيشوا فرحة اللحظه" ونكد على الناس، طلع على التليفزيون "إعتذر" وقدم استقالته من شدة احساسه بالذنب والتقصير...كويس إنه منتحرش
الناس دى عندها دم وإحساس زياده أوى مينفعش يصدروه؟؟!
تخيلوا بقا عندنا كان مفروض وزير الكهربا يقدم استقالته كل كام فيمتو ثانيه مش علشان هدف فى ماتش ولكن علشان مصالح بتتعطل أو حتى تخرب وتبوظ وحياة ناس بتتعرض للخطروفيهم إللى فعلاً ممكن يفقد حياته
تقريباً مفيش يوم بيمر من غير ما الكهربا تقطع،وكتير اتكلموا واشتكوا من أعطال الكهربا، والحال دا مش عندنا بس دا يمكن فى 95% من مدن وقرى ومحافظات مِصر وكأنهم واخدينا بالتتابع أو التوالى، انتوا النهارده وجيرانكم بكره وإللى بعدهم بعد بكره وهكذا وأهو كله "توفير وتخفيف تحميل" على الكابلات !!!!!
الأول كانت الكهربا بتقطع مع الميه يوم الاثنين الأول فى كل شهر ويقولوا "صيانه"...عادى نستحمل 6-7 ساعات فى الضلمه وميه من الخزان مش إشكال؛ دلوأت بقا اليوم ده أساسى ومعاه باقى أيام الشهر ساعه أو أقل أو اكتر كل يوم تقريباً
جبت رقم تليفون شركة الكهربا وبقيت اتصل بيهم ووزعته على كل المعارف والصحاب والجيران علشان يساهموا فى الضغط يمكن يطلع لهم احساس ودم ويبطلوا يقطعوها بس بردو مفيش فايده
فى يوم قررت ابطل عصبيه واتكلم "بسهوكه" يمكن ربنا يهديهم، وإللى رد علىَّ كان باقيلى شوى وهطبطب عليه
-آلو.. شركة الكهربا؟ - معاكى يافندم
- حضراتكم مستقصدينا ولا فى حد موزكم علينا؟
- ليه بس حضرتك بتقولى كدا وإحنا نقدر؟
- أومال ليه كل يوم قاطعين الكهربا واوقات بتقعد ساعات او تروح وتيجى لحد ما فعلاً بعض الأجهزه اتحرقت
- احنا آسفين بس دى صيانه
- صيانه كل يوم وبردو بتقطع مش معقول؟
- أقولك الصراحه، احنا بنخفف التحميل وكمان فى اشاعه منتشره فى الشركه ان مصر باعت خط لـ"ليبيا" وغيره لـ" الأردن" نيجى إحنا على نفسنا شوى وأهو كله مصلحه
- انت بتتكلم جد؟؟!! يعنى ننور عند الجيران واحنا نيجى على نفسنا، والله ونِعم الجيره هو دا الإيثار ولا بلاش ، وأهو كفايه نور السُياح، يظهر الوزارات بتنسق عملها مع بعض ،الكهربا تقطع والسياحه تجيب ناس علشان "تنور مصر"

- وبينى وبينك كمان شكلها سياسه علشان يحسسوا الناس بأهمية الكهربا فلما يخصخصوها ويدفعوا الناس دم قلبهم يبقا محدش يعترض
- آااااااااااااااااااه ،هى الحكايه كدا بقا ، افادكم الله، دا احنا على كدا نبوس ايدينا وش وضهر ،على قول محمد صبحى "إحنا داخلين على أيام سوده" . والنبى بس لى طلب عند حضرتك، متبقوش تقطعوها من 6-7 مساء علشان المسلسل باقى 4حلقات وهيخلص وتبقوا اقطعوها براحتكوا
- انتى تأمرى، خطكوا فين؟
- إحنا جيران، ورا الشركه بالظبط يعنى لولا الضلمه كنت طلعت عالسطوح عملت لحضرتك باى باى

قفلت الخط وأنا هولع من الغيظ ، إيه الاستهتار واللامبالاه دول؟؟!!!
هم مش عارفين ان فى مستشفيات وعيادات ممكن يكون فيها حالات تحت الجراحه واطفال فى الحضَّانات وناس فى مصانع وشركات بشتغل وطلبه وتلاميذ بتذاكر او حد بيخلص شغل مهم ؟؟
خلينا نمشى على فرض ان مفيش حد عنده مولدات احتياطى ولا كهربا خصوصى والكل معتمد على كهربة الحكومه إللى بندفع فيها فلوس وبنمولها من ضرايبنا، يبقا لازم تكون موجوده وقت ما نحتاجها مش وقت ما المسؤلين يحددولنا نحتاجها او منحتاجهاش إمتى
اذا كان من غير خصخصه والفواتير احياناً بتعدى ال100 وال200 وآخر واحده جايه 500 جنيه لما ماما كان هيجيلها انهيار عصبى وبالتحقيق فى الموضوع اتضح ان البهاوات بتوع التحصيل واللى بيطلعوا الفواتير كانو "محوشين لنا كام شهر على بعض" أومال إيه اللى كنا بندفعه طول الشهور دى؟؟ لا....دى مجرد مصاريف إداريه وضرايب!!!!
اسكت يا لسااااانى؛انا همسك لسانى وايدى علشان مقولش كلام...........
مش هتحس بأهمية الموضوع غير لما تجربه فى موقف حرِج بجد وتلاقيك فى قلب مصيبه ملهاش حل بسبب انقطاع الكهربا
مش هؤولك ان مثلاً ممكن ولادك يكونوا نازلين يشتروا حاجه وفجأه كهربة المنطقه كلها تقطع وتبقا مرعوب عليهم وتطلع بالكشاف او على نور الموبايل تدور عليهم او تنزل تدور العربيه وتولع فوانيسها او تستنى لما ربنا يفرجها وتعدى اى عربيه مولعه النور علشان تهتدى بيه فى طريقك
ولا هؤولك ان ابنك يكون صابح عنده امتحان وفجأه الكهربا تقطع وتيجى تكلم الشركه يقولولك "ربنا يسهل" وتقعد تستنى الفرج لما اعصابك تتعب ويجيلك مغص وابنك يغمى عليه من الرعب ؛صحيح ممكن تتصرف فى كشاف او تلم موبايلات البيت كله تنورله او حتى تعمل حسابك وتجيب لمبة جاز، بس بردو هتواجهك مشكله فى العثور على الجاز ولا ممكن نولعها بالبنزين؟؟ ولا أقولكم....نمشيها على أضواء الشموع وتبقا رومانسيه إجبارى وربنا يخلى الحكومه.

كل دا مقدور عليه وممكن نتصرف بإمكانياتنا البسيطه
تعالى بقا على شركه كبيره ومصالح ناس داخل وخارج مصر ومعاملات بمئات الآلاف من الدولارات وتحس انها كلها فى مهب الريح بسبب الاستهتار وعدم الاحساس بالمسؤليه
الــــــــــــمــغــامــــره
صحيت على صوت التليفون وعميل بيكلمنى وهو شوى وهيعيط على الكلاكيع إللى حصلت له فى المستندات وانه مطلوب منه أوراق تانيه وضروريه خاصه بالشحنه ومينفعش تتبعت فاكس ولا إميل لأن لازم التواقيع والأختام تكون "حيه" وكمان المستندات تكون يعنى مختومه من ضهرها كمان بختم الشركه وعلشان مش هتلحق تسافر بالدى اتش إل فهنبعت بيها السواق للمطار يديها لأى مسافر على رحلة الساعه واحده من مطار القاهره وربنا يستر
جريت رتبت حالى ونزلت قبل ميعاد الشغل لأن فى فرق توقيت ساعتين واستدعيت الموظفين والعمال وفتحنا بدرى ولا اجدع "قهوه بلدى" وكانت الصدمه فى انتظارنا كلنا.......الكهربا مقطوعه والمولد الاحتياطى عطلان
وجينا نكلم شركة الكهربا كملوا الصدمه وقالو الكلمه السحريه " صيانه" يعنى مقطوعه فى البلد كلها و مفيش أمل وانسوا انكوا تشتغلوا النهارده، مع ان الصيانه بتكون يوم الاثنين الاول فى الشهر مش يوم الخميس بس هو نحس وخلاص
الدنيا لفت بىَّ، وكنت هفقد الوعى وهتعذرونى لو عرفتوا انه كان يوم خميس، يعنى بالنسبه لمصر آخر يوم فى شغل المصالح الحكوميه وجمعه وسبت أجازه وأيكش تولع ولا تخرب مش مهم
كان لازم نتصرف، على بعد حوالى 400 متر مننا فى "صرح" حكومى عملاق، كفايه اقولكم انه مصنعين دا غير المبانى الاداريه، بعت السواق يسأل عندهم كهربا ولا لأ ،ربنا ستر وطلع عندهم
كل واحد بقا يجرى من ناحيته، فكينا الكمبيوتر والبرنتر والاسكانر، إللى شايل شاشه وإللى شايل ماوس ولوحة مفاتيح وإللى لامم الكابلات ومتخبل فيها وموقف يبكى من كتر الضحك واللخبطه
على فكره...مكنش ينفع نستخدم اللاب توب علشان المستندات وتعريف البرنتر والاسكانر كله على الكمبيوتر الكبير
وصلنا مصنع الجيران وبدأنا نركب الاجهزه واحنا بنرتجف من القلق والخوف ومصالح الناس إللى بتضيع وعلشان تكمل الأزمه لقينا حاجات منفعش تتركب فى الجهاز تانى ؛يظهر إللى كان بيشيلها اتعامل معاها بعنف فـبوظها من مكان التركيب، جريوا يجيبوا ماوس ولوحة مفاتيح غيرهم وعلشان ميكونلناش حجه جديده جابوا بتوع كل الاجهزه الموجوده فى شركتنا
آه...نسيت أقولكم ان "الصرح الحكومى العملاق" دا كله والله العظيم ما فيه ولا جهاز كمبيوتر واحد ولا يعرفوا يعنى ايه تكيف والتكنولوجيا الوحيده الموجوده هى "مروحة مكتب أربعه ريشه" بتدور بقوة الدفع –قصدى النفخ- مش بالكهربا.....أنا قربت اتشل خلاص
أكيد حد دعا علىَّ الصبح بالعطله وحرق الدم، خلاص ركبنا كل حاجه ويادوب هنحط فيشة المشترك فى الكوبس وألاقى القدر ضربنى بحجر على أم راسى، الكوبس أضيق من الفيشه ومفيش أى مشترك جاى عليه، الحل الوحيد إننا نقطع الفيشه ونكتفى بالسلوك إللى جواها والحمد لله ربنا أراد وكملت العمليه بعد ما اعصابى اتحرقت وكان نفسى أعيط من كل قلبى بس استنيت لما أخلص مهمتى
خرجت المستندات واتوقعت واتختمت وحطيتها فى ظرف وقلت للسواق يطير عالمطار مع العلم ان الساعه عدت 11 والطياره ميعادها واحده....يعنى عاوزين معجزه، قولوا يا رب
يادوب السواق مشى وانا "انهرت" بجد كنت بنتفض من الرعشه والدموع ومش قادره اتنفس، منكم لله يللى فى بالى ربنا ينتقم منكم
احنا كدا خلصنا مهمتنا بنجاح، باقى مهمة "العوده" للشركه ونقل كل الحاجات دى ،وطبعاً السواق مشى ومفيش حد فاضى ييجى ينقلنا، رجعنا على رجلينا، والله مشى أكتر من 400 مترعلى الطريق السريع والدنيا بتصفر من الفراغ حوالينا والعربيات ماشيه بآخر سرعتها واحنا ماشيين طابور، كل واحد شايل قطعة غيار شكل وإللى يقع نسيبه ونمشى ، وكل ده بسبب "الصيانه" إللى جت فى غير ميعادها ومن غير أى تنبيه ولا اعتبارات لمصالح الناس وأرواحها

المهم ان الحكومه "توفر" ويخففوا التحميل على حسابنا وكأننا عايشين فيها ببلاش مش بندفع المطلوب مننا واكتر، لو قطعوها بالليل هنقول ماشى أهى الناس نايمه والصاحى نسد نفسه ونخليه هو كمان ينام وكله توفير ،او ممكن يتفقوا مع شركات المحمول اللى عامله عروض مذهله لساعات الليل ،طبعاً لما الكهربا تقطع يبقا مفيش قنوات فضائيه وكله هيتسلى فى التليفون، او نحسن الظن بالحكومه ونقول انها عاوزه تنيم الناس بدرى علشان يصحوا يصلوا الفجر...ربنا يديهم على أد نياتهم جميعاً يا رب
السؤال بقا....بيقطعوها بالنهار لييييييييييييييييييييييييه؟؟؟
لو انا حقوده ونيتى وحشه هقول أنه استفزاز وتزهيق وتطفيش متعمد من الحكومه ضد الشعب
نقول الحكومه حلت مشكلة الإضاءه واكتفت بإعلانات "نوَّرت مصر" لكل سايح ،طب هتحل إزاى مشكلة الطاقه والتشغيل؟؟ خلاص ...مفيش غير انهم يغيروا شعارهم ويبقا " دوَّرت ونوَّرت مصر"
بعد اذنكوا بقا أروح أحضر الشمع علشان الكهربا قربت تقطع، وإللى يلاقى "سايح" يبعتهولى علشان ينور عندنا

ملحوظه....اتضح ان الحكومه بريئه من انقطاع التيار الكهربى ودا بسبب "شقاوة" عمدان الكهربا والضغط العالى، اتاريهم بيحبوا يسلوا نفسهم وينطوا الحبل- قصدى السلك- من وقت للتانى زى ما ممكن تلاحظوا فى الصوره إللى فوق
براءه يا حكومه...طول عمرك مظلومه واحنا بنفترى عليكى
تحياتى ودعواتى ليكم ربنا ينور قلوبكم وعقولكم ونفوسكم ومن غير فواتير ولا كهربا


ليست هناك تعليقات: