بييجي وقت لازم تسكت فيه , وعقلك يقولك ( خليها فى القلب تجرح , بدل ما تبان و تفضح ) .. و أوقات تحس إنك لازم تتكلم .. مش قادر تكتم و تخبي .. وإلا هتنفجر .. علشان متكلمش نفسك و الناس تقول إتجننت .. أو تخلق شخصية من خيالك تعيش معاها و تعزلك عن العالم ويقولو عليك براوي ... يبقى الحل إنك تفضفض .. اللى تقدر تتحمله خليه جواك .. و اللى متقدرش عليه .. ويفيض بيه قلبك و عقلك .. وزّعه على اللى حواليك ... هنا مش مجرد كلام و حكايات ... كل رسالة هي فيض من ( فيوض القلب والخاطر ) ....... أنا / صابرين أبوعلي

السبت، 21 فبراير 2009

مـــــرض لـــذيــــــذ



تخيلوا ان بعد سنين عمرى دى كلها اكتشف انى مريضه بمرض مزمن !! والغريب ان محدش يعرف بيجى منين وازاى وعلاجه ايه!!! والأغرب انى بجد سعيده ومبسوطه ومتكيفه جداً جداً مع المرض ده وحاسه انه سبب فى "سعادتى" اللامتناهيه وحبى للحياه-------- أحياناً يعنى
رغم انى كنت عايشه بيه ومش عارفه ولا حتى لما اعراضه بتهاجمنى وأكون بتألم من جوايا بجد ما كنت بشك للحظه واحده ان دا "مرض"، واكتشفت انى مصابه بيه بالصدفه لما سمعت الدكتور وهو بيتكلم عنه، ما اتصدمت ولا زعلت بل بالعكس فرحت جداً لأنه فعلاً مرض لذيذ أوى
أنا طلعت "مريضه بالحنين" ،اه والله جد، حاجه نفسيه كدا اسمها "نوستالجيا" يعنى الحنين للماضى واستدعاء الذكريات والعيش عليها.
بذمتكوا فى مرض أحلى ولا ألذ ولا أطعم من كده؟؟! وليه بيسموه مرض اساساً!! هى كل حاجه حلوه فى حياتنا لازم يطلع لنا إللى يشوهها؟؟!! غريبه الناس دى
فعلاً حنينى للماضى أكبر بكتير من شوقى للمستقبل

الماضى بالنسبه لى يعنى أمان وراحة بال وسكينه ومنتهى السعاده، حتى لو فيه احزان فخلاص انتهت ومعدش اخاف منها ، الماضى فيه صورنا وصور إللى بنحبهم متجمعين ،لما تغمض عيونك وترجع لورا بتشوف كل الناس اللى بتحبهم، الصوره مليانه، زحمه ودفاينه وليها مليون ذكرى تستدعى أعذب الابتسامات علشان تداعب شفايفك وتسعد قلبك. لكن المستقبل الله اعلم بيه...مين هيكون موجود ومين هيفارق محدش عارف، ولو غمضت عيونك علشان تحلم بيه هتبقا قلقان ولو اتخيلت اشخاص هتشوف علامات استفهام موجوده بدل الملامح. مين دول؟؟ من زمان ولا من دلوأت ، يبقولك ايه؟؟ ولا جايز تيجى تحلم متلاقيش نفسك هناك وتسألأ سوؤال غريب...هو انا هفضل معاهم علطول؟؟!!

الماضى اطمئنان ودفا لكن المستقبل غموض وقلق وخوف

الحنين حلو لكنه مؤلم بجد؛ لما دايماً تكون مشتاق لحاجات معدش لها وجود واختفت فى زحمة الحياه ، ولما تكون مضطر تعيش وانت مغمض عنيك علشان تفضل فى الماضى وما تصحى على حاضر ومؤلم كمان لما تدور على شريكك فى الذكرى ما تلاقيه او يكون مشغول او حتى ما بقى نفس الشخص بتاع زمان
تفتكر الطفوله والولدنه والمراهقه ولمتك مع اخواتك وزمايلك واولاد الجيران وحركات وشقاوة زمان ، حتى صعوباته بتوحشك من اول الواجب اللى نفضل نكتب فيه لحد ما ايدينا توجعنا لحد شنطة المدرسه الــ10 كيلو
بيتهيألى انا أكتر واحده فى الدنيا محتفظه بـ" فتافيت من الماضى"، واكتر حد عنده علب وصناديق وشنط فيها "كراكيب من زمان" ؛كراسه من ايام المدرسه، او ورقة شيكولاته كسبتها فى رهان، او رباع و انصاص جنيه اخدتها علشان اجابه صح وماضى عليه الاستاذ، وكمان ورقه مكتوب عليها تاريخ ويوم وملفوف فيها خصلة شعر بيبى اتولد فى العيله، او ورقة نتيجه حصل لى حاجه مميزه فى اليوم بتاعها، اصداف من شط بعيد لصيف عائلى رائع ، او قصصنا واحنا اطفال ،لعبه مكسوره، قصقوصه من فستان فرح ماما اللى نفسى ألاقى زيها ،او جواب جالى من زمان ، منديل فيه دموع غاليه، جرايد ومجلات قديمه ،طوابع بريد وعملات من عشرات السنين كانت مع جدى الله يرحمه وادهالى ، صور ابيض واسود لناس حتى ما حضرت وجودهم لكن بحبهم علشان من زمان
بحب الماضى يكون فى خيالى وقلبى وبين ايدياولما امدها ألاقيه،و اشم ريحته فى كل حاجه

مدمنه على الكتب القديمه إللى ورقها اصفر وحتى لو على الرصيف بنزل لها واقعد ادور فيها بالساعات ولا يهمنى ، تعرفوا ان عندى القصه اللى كتبها الريس جمال عبد الناصر وهو فى الابتدائيه وبتوقيعه كمان، وكتب من الثلاثينيات والاربيعينيات بتتفصص لما حد يلمسها ومش عاوزه اعملها اغلفه جديده ولا أرممها علشام جمالها فى انها فعلاً قديمه
شوف كام ايد مسكتها وكام واحد قراها وخط فيها كلمه او ملحوظه،دا كان فرحان وغيره زعلان، دا ضحك وغيره بكى، وياترى وصلتنى ازاى وليه اصحابها باعوها، جايز محتاجين فلوس او يمكن ماتوا والورثه مش بيحبوا القراءه، او جايز مامتهم قالت لهم " يا أنا يا الكراكيب دى فى بيت واحد" واتخلصت منها من وراهم

كل فتفوته او كركوبه بتحكى اكتر من قصه، لو بموت من الخنقه والزعل كفايه افتح حتى علبه واحد علشان اسرح مع إللى فيها وكأنى دخلت "آلة الزمن" إللى لو حقيقى لقيتها هختار أروح بيها للماضى مش للمستقبل


بعشق الأفلام الأبيض واسود وزمانها وادبها، تبقا بتتفرج من غير قلق ان يفاجئك مشهد مقرف او كلمه مقززه، ولما تحصل حاجه كدا ولا كدا يكتفوا "بالتلميح" علشان يعرفونا ان البطله عملت عامله "سوده" يعنى الدنيا تمطر بشكل غريب مع انهم فى الصيف وتلاقى برد ورعد، ولا حاجه تتكسر من غير سبب وتيجى الست "فردوس محمد ولا امينه رزق " تحس ان قلبها انقبض وتقول "يا ساتر يا رب" وانت بقا تستنتج بأدب مش بأباحه وتصريح زى بتوع اليومين دول،طول اليوم مش بفتح غير على "روتانا زمان" أو طرب ،فاتن حمامه وشاديه وماجده ورقتهم الجميله المسهوكه ورشدى وسرحان والشناوى وحمدى ورمزى وسراج منير وسليمان نجيب والنابلسى ومارى منيب والقصرى وزينات صدقى والعسوله ميمى شكيب، وفريد وروعة اغانيه لما يقولك "بنادى عليك" وعبد الوهاب وحليم وثومه واسمهان والرااائعه ليلى مراد والحب جميل وفيروز على شط اسكندريه لما راماها الهوى...يا خبر يا خباااار، حتى الاغانى الشعبيه بتاعة زمان فى منتهى الرقى والجمال، فاكرين محمد قنديل وعبد المطلب ومحرم فؤاد ومحمد رشدى وطه، واحد يقولك يا حلو صبح يا حلو طًل والتانى يعاكس شباك الحلوه وشجرة فكهتها اللى طارحه على خدودها وطِلِب يقولك الوصل جميل حلو يا محلاه واخينا اللى عاوز يعمل لها قلبه ابو الحيارى شارع وحاره ويبنيلها عشه بالنى الاخضر وحبه حبه تصبح عماره.... حل ازمة السكن

فى أحلى من عربيات افلام زمان البويك والكاديلاك والكريسلر؟؟ حاجه جامده آخر حاجه؛كل حاجه بتاعة زمان بترجع تانى، حتى الموضه فى اللبس والاحذيه والشنط ، وممكن البنات يلاحظو دا فى فساتين ماماهاتهم وشنطهم وحتى الالوان، زمان يعنى أصاله ورقى وذوق وفن راقِ، وكمان لبس الرجاله بتاع زمان رجع بألوانه ونقوشه دلوقت
كتير من اللى يعرفونى بيقولوا علىَّ "قديمه أوى"، لما حد يدينى ورده او شجرة الفل تطرح علطول بشبكها فى شعرى زى ممثلات زمان، شعور لذيذ بجد، بحب المتاحف والجاليريهات ومعارض اللوحات والأوبرا وكنت بستنى حفلة السبت بفارغ الصبر واعرف الاوركسترا الضيفه واحياناً كنت بسجل الحفله ، منكم فى حد دلوقت ممكن يليق فى بدلة "الريدنجوت" بتاعة السهره بقميصها التحفه فى سهرات زمان واحياناً تشوفها فى الاوبرا دلوأت؟؟ معدش فى حد يليق فيها، دى عاوزه واحد قيمه وسيمه، حاجه كدا من بتوع زمان، ناس ملامحها فيها رجوله وخشونه مش الهرمونات اللى بوظت الدنيا وخلت الولاد اجمل من البنات وحاجه معيله خالص
حتى فى الديكور والفرش رجعت الأنتيكات والستاير الملس والدرابيه بتاعة زمان ، وتابلوهات الأبيسون والكانافاه، حتى نانسى عامله تسريحه من بتوع زمان فى الكليب الجديد.....بتفهم

زمان كان كل حاجه لها معنى وجمال خاص بيها وطعم تتلذذ فيه، شوارع فاضيه وناس صوتها واطى واخلاقها عاليه ، فنانيين وكُتَّاب وأدباء وشعراء ومطربين وكأن المتميزيين كلهم اجتمعوا فى عصر واحد علشان يستاهلوا بعض واحنا ما نستحق حد منهم، شاورولى كدا على حد زى السباعى ولا عبد القدوس ولا الشرقاوى او الاخوين اباظه او الحكيم او المازنى او ابو شادى، ممكن تعد لحد الصبح وبردوا ما يخلصوا، ولا فى نحات او رسام مشهور زى ناجى او مختار؟؟؟!!
عارفين... انا بكتب وحاسه انى متخدره و مزاجى عالى وانا بفتكر الناس دى وزمنهم الجميل، وبحاول "اتمحك" فيهم واتعرف على ناس كبار السن
لما عرفت ان فى مكان معين فى النادى لكبار السن هم اللى اختاروه على مزاجهم وبقوا يتجمعوا فيه بقيت اتطفل عليهم، كانوا بييجوا الصبح بدرى ويقعدوا فى آخر النادى، بنزل قبل ميعاد الكليه بكتير وادخل من الباب الخلفى واتعرف عليهم وافضل اتكلم معاهم ما افوق غير والوقت سارقنى، جدات بيشتغلوا بالإبره او بيحكولى حاجات ممتعه وجدود فى منتهى الجمال، والله منهم ناس كانوا متطوعين فى حرب 56 وما بعدها وورونى صور من ايام العدوان ،وواحد فيهم ورانى "دعوه ملكيه" من الملك فاروق كان باعتها لوالده لحضور عشاء رسمى،حاجات كنت لما بشوفها أو ألمسها بتسحر وانبهر بيها


من كام سنه كدا طلبت من المصور يعملى صورى ابيض واسود عارفين قال لى ايه " انت عاوزه ترجعينا لأيام الفقر ليه؟؟" بقا زمان بكل ثرائه فى كل المجالات وحتى فى علاقات الناس ببعضها كان فقر؟؟؟!!! اكيد هو مش عارف بيقول ايه

نفسى اعيش أيام زمان، حتى لو فى فيلم ابيض واسود، وابقا واحده من بنات "البيوتات " يعنى اتعلم من منازلهم، الاساسيات وبس، دين وعربى وحساب وانجليزى وفرنساوى، وكمان بيانو- اللى حاولت اتعلمه وفشلت بسبب المدرس، لو سعد عبد الوهاب اللى بيعلمنى كنت اتعلمت- وكمان احترف كل اشغال الإبره والخياطه واعمل فساتين زى بتوع زمان، والله العظيم مره جبت قماش ورسمت وقصيت وخيطت فستان تحفه كنت بقلد مريم فخر الدين وكنت لسه فى الثانوى
بغير من بتوع زمان أوى وعاوزه اقلدهم فى كل حاجه واى حاجه---- جميله وبس

فاكرين يوسف بك وهبى ولغته العربيه الفصحى والريحانى وخفة دمه، ولما حد يؤولك " إذن، يجب ان---أو يتحتم علىَّ مش عارفه ايه كدا" ولا يؤلك " هالبت ما انت ..." حاجات غريبه كدا، تحس ان لهم لغه خاصه بيهم، على رأى اللى قال، لغة الناس المستحميين علطول وشعرهم بيلمع
هتستغربوا لو عرفتوا انى معجبه جداً بفيلم من بتوع اليومين دول "الأستاذ خصوصى" وكل ما يتعرض بشوفه، ويا سلام لما يتكلم بطريقة زمان ولما ويركز على حرف ال"ص" فى كلمة "صدئينى" ويغنى لها تحت الشباك "نهارك سعيد يا خلى" ويعاكسها بقوله " يا فبريكة الكرمله"،،،،عسل

لو الدكاتره محتارين فى سبب "مرض الحنين " ده انا ممكن اساعدهم علشان يعرفوا اسبابه :
** بالنسبه للجماعه القُدام فأكيد علشان اللى جرب طعم حاجه حلوه بيفضل دايماً يفتكرها ويستطعمها فى بؤه ولو بعد 50 سنه مش هيلاقى لها بدل لأن زى ما بيقولوا " إللى يروح مبيجيش أحسن منه" يا بختهم انهم جربوا الحلو

**أما بالنسبه لنا بقا جيل الثمانينات وما بعده او قبله بشوى فدول "المظاليم" التايهيين، كائنات طلعت فى وقت غريب، زمن التيه، لا قدوه ولا مثل أعلى ولا بطولات تغذينا ونتغنى بيها ، مفيش أى حاجه حلوه فى أى حاجه
انفتاح بقا، كله مستورد وهوجة افلام مخدرات او راقصات ، اغانى هابطه ومعانى مقرفه ،وشوارع زحمه وناس صوتها عالى واخلاقها ------ انتوا عارفين
إللى فينا لقى حد ينقذه وياخد بإيده بفضل ربنا ويعرفه الفرق بين الأصل والتقليد وقارن صح أكيد اختار صح وفضل محتفظ بطباع زمان حتى فى سنة 2009 وحتى لو قالوا عليه قديم وعايش بأفكار زمان، أما بقا المساكين إللى تاهوا فهتلاقيهم كتير فى المدارس والجامعات والشوارع "عايشيين وخلاص" مفيش حاجه فى بؤهم ولا قلوبهم لها طعم يتحس، لا عارف هو مين ولا عاوز ايه ولا جه الدنيا ليه--- هى كدا وأيام وبنعيشها
فى حديث عن سيدنا محمد عليه الصلاة والسلام فيما معناه ان إللى يتخلى عن أصله " كالمُنبت فى الصحراء؛ لا أرضاً قطع ولا ظهراً أبقى" يعنى تايه فى صحرا لا وصل لهدفه ولا احتفظ بالدابه اللى هتوصله للهدف ده، دا لو عنده هدف أصلاً

بحس بسعاده لا توصف لما اعرف حد "ذواقه" للفن القديم او بيحب القراءه وعارف قيمة الكتاب ، ولما بشوف حد لسه بيسمع فيروز او نجاة او ورده ، ولا تبان على ملامحه علامات الاستنكار والقرف من شوفته لتقليد اعمى من حد مدعى ما يعرف قيمة ماضيهتحيه منى لكل "عقل حديث" لازال يستطعم كل قديم، ولكل "عقل قديم" يمكنه استيعاب ما هو حديث

تعبتوا مِنى؟؟ معلهش؛ انا كده لما بفتح فى الكلام وخصوصاً عن زمان مش بعرف اسكت وممكن أملا صفحات واعملهالكو مسلسل طويل الأجل
عموماً كفايه عليكو كدا، دى مجرد فكره لحضراتكو عن طريقة تفكيرى علشان ما تستغربوا من ردودى على بعض الرسايل او افكارى "القديمه" فى بعض المواضيع إللى حضراتكم بتطرحوها

اللهم أن لم يكن هناك نصيباً من لقاء الدنيا فأملى ورجائى أكبر فى لقاء الآخره
اللهم الملتقى الجنه...اللهم الملتقى الجنه

مع خالص تحياتى وتمنياتى بدوام التوفيق واستمرار التواصل حتى آخر العمر

،،،، بنتكم واختكم،،،،،،
صابرين أبو على

SABRINA ABU ALI سابقاً

هناك 4 تعليقات:

محمد سيد يقول...

انتي جيتي على الجرح يا صابرين

فكرتينا بجيلنا الموكوس جيل التمانينات اللي فعلا مالوش قيم ولا هدف ولا طموح ولا مثل عليا

جيل معفرت مطحون في الدنيا ومش راضي بنصيبه

يمكن عشان ماشفناش أحداث ضخمة أو ماحصلش تغيير في أي حاجة من ساعة ما اتولدنا (انتي فاهماني طبعا

بس عارفة. أنا شامم ريحة تغيير للأحسن أكيد الجيل ده مش مولود عشان يعيش تايه كدة وخلاص.... أكيد انشاء الله هنعمل حاجات كتير أوي نرجع بيها القيم والأخلاق بتاعة الجيل القديم، بس برضه احنا مش وحشين أوي يعني احنا مثلا أفضل من الجيل اللي قبلنا مباشرة

عايزة الدليل؟... إلقي نظرة على أفلام السبعينات وأواخر الستينات هتلاقي أفكار غريبة وشباب عايز يتحرر من كل حاجة وخلاص

غير معرف يقول...

wish if i were somebody you know, it will be of my great honor
how can i reach you???
shall we try???

غير معرف يقول...

Since the days of gold
There’s a story told by sabrina
The queen of egypt
She was wise and kind
And the good in mind
Of those who am’t to see her


You could hear a dance
We were golden bells
As symbols on her fingers
And the silver light of a man
Without still lingers
sabrina
the queen of egypt


When she rules the land
She make our command
The riches and poor
It will turn for that
She could something
That witch reassess you once more


She was a famous queen
Living in a dream of mystery and passion
And I think she said
" you will never get her all in preson "


All the story ends
But she results sabrina the queen of egypt
Will you close your eyes
And think of her you are plenty with her


u'r still Living in my dreams of mystery and passion
no body on the earth can know ur value exept me

no one can love u gently except me

I might be anonymous now but hope one day to be known fr u

katkota يقول...

عندك حق فى كل حرف وفى كل كلمة قلتيها أعتقد معظم جيلى اللى هو بداية من التمانين علشان محدش يفتكر إنى عجوزة ولا حاجة عايش على الذكريات أغانى زمان الجميلة تصدقى إنى كنت قبل ما أكتب الكمتين دول كنت بسمع أغانى لشادية و صباح مش بنات الأيام دى اللى حتى مش بحفظ أساميها حتى أفلام زمان محدش يقدر ينساها مين ينسى الزوجة رقم 13 ولا مراتى مدير عام ولا ولا ولا .......... وصحيح الماضى دفاء وحنين و المستقبل غامض ومرعب بس لازم نتفاءل بالخير ثم المستقبل إمتدا للحاضر اللى هو كان إمتداد للماضى وعلشان لو حد دخل من الجيل الجديد ميزعلش همه عندهم حاجات حلوة بس إحنا كان عندنا حاجات أحلى بكتير ياه أنا رغيت كل ده معلش إعذرونى بس واضح إنه ظهرت على أعراض المرض و أنا بكتب