بييجي وقت لازم تسكت فيه , وعقلك يقولك ( خليها فى القلب تجرح , بدل ما تبان و تفضح ) .. و أوقات تحس إنك لازم تتكلم .. مش قادر تكتم و تخبي .. وإلا هتنفجر .. علشان متكلمش نفسك و الناس تقول إتجننت .. أو تخلق شخصية من خيالك تعيش معاها و تعزلك عن العالم ويقولو عليك براوي ... يبقى الحل إنك تفضفض .. اللى تقدر تتحمله خليه جواك .. و اللى متقدرش عليه .. ويفيض بيه قلبك و عقلك .. وزّعه على اللى حواليك ... هنا مش مجرد كلام و حكايات ... كل رسالة هي فيض من ( فيوض القلب والخاطر ) ....... أنا / صابرين أبوعلي

الخميس، ٢٦ فبراير ٢٠٠٩

هــــــــــى كـــــلــــمـــه

بعد الشر عنكم جميعاً يا رب...مضطره



متخافوش..مش هتكلم عن البلهارسيا لأن بيتهيألى انقرضت من زمان، لكن هتكلم عن حاجه اخطر منها بكتييييير أوى، دا من وجهة نظرى الشخصيه، يعنى ممكن ما تكملوا الكلام للآخر وتمشوا( دا أنا كنت أوريكو شغلكوا لو حد عملها معايا ومشى).
كلامى موجه للشباب أكثر من البنات ،إللى عارفه انهم هيكرمشوا وشهم دلوأت ويبصوا بنظرات غريبه كدا لما يعرفوا الموضوع عن إيه.
من غير ما أطول عليكوا فى المقدمه،أنا بس عاوزه أسأل سؤال خانئنى، إيه الحكمه أو الجمال فى إنك تبآ ماشى ولا قاعد وطالع منك كدا سحابة دخان؟؟ كان نفسك تطلع قطار فحم؟ الحمد لله انهم لغوه علشان بيلوث البيئه. طب إيه؟ نفسك تبآ قريب الرنجه؟! على اساس انها سمك مدخن وحضرتك شخص مدخن بردو من نفس العيله، وتصور ان مع الوقت بيكون فى شبه كبير بين المدخنيين والرنجه! الاتنين مسلوعيين ومسنفين ولونهم غامق وريحتهم مش حلوه،وبردو الاتنين من غير سنان خالص.
مش بؤول لكوا ان الكلام مش هيعجبكوا؟ طب اصبروا شوى واستحملونى للآخر..ممكن؟،،،أشكركم
قريت ان سيدنا محمد عليه الصلاة والسلام عمره ما أكل ثوم أو بصل فى حياته علشان الريحه وكان بيقول :"إن الملائكه تتأذى مما يتأذى منه البشر"وفى ملكين معانا بشكل مستمر دا غير اللى بيحضرونا وقت الصلاه او وقت ما نذكر ربنا؛فمكنش ينفع أبداً انه صل الله عليه وسلم يؤذيهم بالريحه البشعه دى، تخيلوا حَرَم نفسه من حلال ربنا انزله وكمان مفيد جداً للصحه علشان ما يؤذى الملائكه،طب نقول إيه فى إللى بيؤذيهم عن عمد وبريحه فظيعه مش بتروح بسهوله، طب هتعمل إيه لما تيجى تصلى؟؟ لازم تغسل سنانك بالمعجون أو بالسواك أو تتمضمض بالبيتادين ع الاقل، واحتمال الريحه متروحش كمان.حاجه صعبه أوى.خلاص...بَطَل سجاير وأمرك لله

هؤولك على حاجه تانيه...من السُنَه انك لمّا تدخل على أهل بيتك تسلم عليهم وتُقَبِلهُم"تبوسهم يعنى"، طب إزاى وريحتك كدا؟؟ جايز انت مش واخد بالك لأنك اتعودت، بس فعلاً اللى بيقعد جنبك بيلؤطها أوى،تخيل نفسك بآ بتميل على حد تبوسه يروح هو باعد عنك..يا عينى ع الكبسه،ولو ما بعد يبآ بيجاملك وجاى على نفسه. طب هتعمل إيه؟ تحط معجون وفرشه وغيار نضيف عند البواب علشان توضب نفسك قبل ما تدخل البيت،أو تتخلى عن العاده الجميله دى فى الترحيب بأهل بيتك وتفوتك حاجه حلوه زى دى..أو الحل التانى....بردو تبطَّل سجاير وأمرك لله.
أنا بقا لو جوزى طلع بيدخن وما اقتنع يبطل فهضطر "ادخن معاه" ..يا نعيش سوا يا نموت سوا وكمان يمكن اصعب عليه
بحس ان الغير مدخن عايش كدا عادى وعلى راحته، بيبتسم ويضحك أوى،معندهوش سنان صفرا يخبيها او يتكسف منها، أخينا اللى شغال من زمان بآ تلاقيه بيضحك "لجوه" ولو الضحك غلبه أوى وفتح بؤه، تحس ان فى كهف اتفتح فجأه فى وشه وكمان ريحته غريبه، يعنى كهف وساكن فيه تنين كمان.يبآ يا يبطل يضحك يا يبطل سجاير
أنا طبعاً مش بشرب سجاير..بس كل يوم والله أرجع البيت أشم ريحتها فى هدومى كلها،وبتجيلى منين؟؟ مش عارفه، أنا لو مكان ماما كنت شكيت فىَّ ، أومال المدخن الحقيقى بقا حالته إيه؟؟
طب سيبك من الكبار..ممكن يستحملوا،،لكن تعالى بقا ع الصغننيين، لو عندك نونو عسوله كدا فى البيت وهجمت عليه تقطعه م البوس من بؤه بريحتك دى، هيعمل ايه المسكين ولا هيعترض ازاى؟ هيصرخ ويعيط لما ينفطر ومع الوقت هيتعود ويطلع لك مدخن صغنن تربية ايدك يا فندم،، والله حرام،مش هقترح عليك حلول المره دى بس بُص الفقرات اللى فوق
ممكن أسأل حضرتك سؤال..سجايرك مصرى ولا مستورد؟ هم الاتنين اسوأ من بعض بس قضا أخف من قضا.
يعنى السجاير بتاعتنا دى لو الملكه كليوباترا والأميره ميريت يعرفوا ان اساميهم هتتحط عليها كانوا اتبروا منها، اراهنك لو حتى فيها النُص فى الميه نيكوتين اللى بيؤولوا عليه ده، دى جواها نشارة خشب وقش،لو جارت عليك الظروف وقعدت جنب واحد بيدخنها ممكن يغمى عليك،هم مش بيدخنوا علشان يعملوا دماغ؟ يتكيفوا يعنى..دى بقا مافيهاش ريحة المزاج،يعنى لو راح شم دخان قش الأرز المحروق هيعمل دماغ ويتكيف اكتر من كدا.


جايز حضرتك مُرَّتَبَك كبير ومش عارف تعمل بيه ايه ولا إيه فبتدخن مستورد؟؟ يبقا ربنا يسامحك بجد؛لأن 30% من ارباح الشركات دى بيروح للبرامج العسكريه والتسليح فى بلادها وييجوا يجربوها فينا فى فلسطين والعراق وسوريا وايران واحنا بعدهم وجايز معاهم ان شاء الله من غير مقاطعه،يعنى بنتبهدل وننطحن بفلوسك،اؤولك إيه بس؟!؟
بص..لو طالبه معاك أوى ممكن تدخن "سيجار" أهو قيمه وبريستيج وضرره اقل، وكمان السيجار الواحد هيغيب معاك كتير لما يخنقك وتزهق منه وتبطل تدخين من الملل

مسكت علبة سجاير كدا شكلها حلو وبنت ناس ،قلت أشوف ايه بيعجبكوا فيها..احتمال الشكل، طب جايز عقدة الخواجه لأنها مستورده؟ يبآ أكيد بتكره نفسك وحياتك والدنيا علشان دا إللى بتأكده عبارة"التدخين يؤدى إلى الوفاه" ،وكمان المكونات إللى على العلبه آل "قطران ونيكوتين" ،اسمع ان الزفت والقطران دى حاجات بيرصفوا بيها الطريق مش بتتشرب، أمَّا بقا النيكوتين فلو محتاجله أوى ممكن تاكل "بتنجان" باذنجان يعنى،أعلى نسبة نيكوتين طبيعى موجوده فيه، يعنى هيظبط دماغك ومن غير دخان ولا ريحه. وكمان مفيد وكله حديد يا عم

قلبت الموضوع فى عقلى على كل الإتجاهات مش لاقيه ولا حاجه تقنعنى بالتدخين ده ولا إن المُدخِن معذور لأنه اتعود، دا بيبآ شخص مدمن حاجات وحشه وبيتعالج مش حتة سجاره ،ومش هؤولك بآ"قوة إراده" وكلام مستفز من ده علشان معدش بيجيب معاكو فايده. دا بقا بيشجعكم زياده

بينى وبينكوا انا بزعل أوى لما بشوف حد كويس ويعتبر نموذج وقدوه فى حاجات كتيير وعنده العيب الخطير ده، وممكن العيب ده ينزله من درجة الكمال البشرى إللى ممكن يوصل له، يعنى لو حد ناجح أوى أوى ومتميز وأخلاقه فوق الممتازه ومتدين ووسيم بس...بيدخن، هنا بقا ترجع لأول السطر وتنزل درجات كتيير من الصفات إللى فاتت يعنى العباره هتكون (مش ناجح أوى وعادى مش متميز ووسامته فين دى مع اسنانه إللى بتصفر وبشرته إللى بتغمق وصوابعه إللى بتتحرق وعيونه إللى بتغبش من كتر ما اتعود يغمضها والدخان طالع عليها) أنا ما أقدرش أحكم فى الأخلاق والدين..بس كفايه انه عارف ان السجاير "معصيه" بإجماع كل الشيوخ وبردو مصمم عليها، وبيلغى إرادته ويتبع مزاجه يعنى هواه، والإسلام مفيهوش "هوى"، ربنا بيقول:"فإن لم يستجيبوا لك فأعلم أنما يتبعون أهواءهم ومَن أضلُ ممَن اتبع هواه بغيرِ هدىً من اللهِ إنَّ اللهَ لا يهدى القومَ الظالمين" وأُعيذُكُم ونفسى أن نكون منهم أبداً يا رب ، وكمان الايه الكريمه " وأما مَن خاف مقام ربه ونهى النفسَ عن الهوىَ فإن الجنة هى المأوى" يا رب يكون لنا نصيب فيها جميعاً
بتؤول انك بتتعصب لما تبطلها وبتتنرفز بسرعه..طيب فين أخلاقك العاليه وصبرك وحلمك مع الناس ومع نفسك، دى كلها تهيؤات.صدقنى..(مَن ترك شيئاً فى سبيل الله أبدله الله خيراً منه) خليك عندك يقين وواثق فى كدا،وربنا هيساعدك والله.
هؤول حاجه ممكن تزعلكوا بس معلش...اعتقد ان اللى بيدخن لازم يكون حد جاهل-آسفه فى الكلمه- بس مينفعش حد عارف ومتعلم ومثقف وعرف الاضرار بتاعتها وانها حرام ولساه بيدخن..صح؟؟
ابسط حاجه كان عملها عند أول معلومه انه ياخد العلبه وع التوليت عدل يفرفطها ويفتح عليها السيفون ويكون ده مكانها الطبيعى الى الأبد.
أنا مش عاوزه أكون غلست عليكوا بكلامى ،والله غصب عنى لأنى فعلاً بحبكوا وبتمنى لكم الصحه وطولة العمر مع إللى تحبوهم،صحيح كل حاجه بإيد ربنا وفى مدخنين بيوصلوا ال90 سنه بس احنا لازم ناخد بالأسباب.
لو شفت الفرق بين رئة الشخص الطبيعى والمدخن هتترعب، أنا فكرتها صورة صخره فى البحر من الحاجات الخضره والبنى والزرقا اللى مبقعه فيها.ربنا يعافينا جميعاً يا رب
فى واحد وهو بيموت بدل ما يرفع صوبعه السبابه بالشهاده رفع السبابه والوسطى إللى كان بيمسك بيهم السجاره، والله جد، انا ما أتجرأ واقول انه كدا اشرك بالله لا قدر الله، بس الرسول بيقول "من عاش على شئ مات عليه ومن مات على شئ بُعِثَ عليه" هيؤول ايه ده لسيدنا محمد وربنا لما يسألوه هو رافع صوابع الاتنين ليه؟؟حاجه تكسف
ممكن تعمل اتفاق مع نفسك..فلوس السجاير بتاعة كل يوم دى حوشها واكسب بيها ثواب، يا إما تشترى بيها هديه لمامتك او زوجتك اللى كنت بتؤذيهم من غير قصد، او تحطهم كل شهر فى حساب مستشفى سرطان الأطفال كأنك بتؤول لهم "أنا آسف إنى كنت بساهم فى زيادة معاناتكم بدخان السجاير" او فكر انت فى اى حاجه كويسه.
تعرفوا ان "لندن" نجحت فعلاً فى مشروع "لندن بلا دخان" طبعاً دخان السجاير بس، وكمان "مكه المكرمه" والحمد لله بدءوا المشروع ده وان شاء الله يتحقق .يعنى انت كمان ممكن تنجح وبمنتهى السهوله لو "نويت وعقت العزم" وربنا مش هيكسفك ان شاء الله
دى كلمتى..قلتهالكو علشان فعلاً بحبكم فى الله، ربنا يهديكم ويهدينا يا رب ويجعلنا من المهتدين
"إنَّك لا تهدى مَن أحببت ولكن الله يهدى مَن يشاءُ وهو أعلمُ بالمهتدين" يعنى إللى عندهم استعداد "
صحيح هى كلمه بس طويله حبتين،سامحونى لو غلست عليكو،بس انا متعوده افضفض معاكوهكون فى منتهى السعاده لو عرفت انكم اعادتم النظر والتفكير فى الحكايه دى وهتزيد سعادتى أكتر لو جت لكم الجرأه وبطلتوا تدخين فعلاً

تحياتى وتمنياتى ودعواتى ليكم بالصحه والعافيه وطول العمر
صابرين أبو على

ليست هناك تعليقات: