هو فى إيه...بالظبط؟؟؟

ضربت الكمبيوتر بالقلم وطلعتله لسانى وانتفضت واقفه معلنه عليه العصيان "لااااا،مش هتضحك علىّ النهارده كمان وتنيمنى متأخره وحشتنى أيام النوم بدرى" وفعلاً قفلته
الساعه كانت حداشر وتلت(11:21)كويس عؤبال معمل "طقوس "قبل النوم و اتلكع شوى ادخل السرير اتناشر غسلت سنانى واتوضيت ،وفتحت الراديو علشان بحب انام على صوته ويا دوب بحُط جنبى على السرير لئيت المذيع بيؤل"الساعه الآن الواحده" إيه؟؟!يا خبر أبيض أنا قعدت فى التواليت ساعه ونُص؟ دا أنا يا دوب غسلت سنانى واتوضيت!يكنش الحمّام بتاعنا فيه فجوه زمنيه زى مثلث برمودا؟ !!يعنى لو كنت اتأخرت شويه كمان كنت طلعت على "رأس السنه"!!!،غيرت المحطه لئيتهم بيؤولو نفس الكلام ...

هو فى إيه؟! أكنش فقدت الذاكره تانى زى يوم "الحد"؟!! بس يوم "الحد" كان علشان صحيت بدرى ساعتين عن ميعادى وأخدت مخى على خوانه قبل ما يدّوَّر الماكينات بتاعته وكمان كان يوم أجازه ،يومها فضلت ساعتين مش عارفه أنا مين ولا فين ولا لئيت حد أسأله لغاية ما ربنا فتح علىّ وافتكرت(والله حصل) بس دى تبآ مصيبه لو كنت هفقد الذاكره "الحد والخميس" كل اسبوع
تكنش المحطات خرَّفِت..طب أسأل مين ،لو اتصلت بحد هأكد لهم فكرة إنى مجنونه، بس خلاص..توصلت أخيراً إنى ابعت رساله لواحده صحبتى بتحب السهر فيها كلمتين وبس "الساعه كام؟؟"الرخمه ردت علىّ بحرف واحد مكرر(هههههههههه)طب كانت هتخسر إيه لو جاوبت؟؟ولا يمكن دى إجابه بس بلغه تانيه؟
المصيبه التانيه إن يا دوب بفكر انام وخلاص.. لقيت المذيع بيؤول تانى"الساعه الآن الثالثه"جرررررررررر(على طريقة مجلة ميكى تعنى "الغضب والغيظ")والله الراجل ده بيهرج ؛يعنى حبة التفكير دول أخدوا ساعتين ولا هو عامل سباق بين عقارب الساعه؟
طب وبعدين ؟دا أنا ظابطه المنبه على 3:45 لصلاة الفجر أنام الشويه اللى فاضلين دول ولا اسهرهم..امرى لله هسهر لأنى لو نمت مش هؤوم غير الصبح.الساعه جت 4 ولا الهوا يظهر انهم مش هيذيعو صلاة الفجر النهارده،المهم انى اخيراً نمت وصحيت الصبح فى ميعادى جهزت نفسى ولبست ولسه محدش صحى، يا بختهم م "الجمعه "اجازه يناموا براحتهم
وصلت الشركه لقيت المكاتب فاضيااااه بتنش،واستنيت ساعه على ما بدأوا يهلوا ، وطبعاً اتصدمو لما شافو وشى على حالة الارهاق دى ،حكيت لهم على إللى حصل وفجأه بئيت مَضْحكَه ؛عندهم حق الغلبه دى كلها لأنهم غيروا الساعه امبارح وانا مش متابعه فعشان كدا تُهت
يا خسارة سهرى والنوم إللى راح علىَّ،لو فكرت شويه كنت عرفت أو استنتجت ودا يثبت نظرية ماما إنى "مديه عقلى أجازه"وآل كان نفسى أنام بدرى..زمان الكمبيوتر شمتان فىَّ دلوأت
-إللى نفسى أعرفه بآ..ليه اللخبطه ووجع الدماغ ده؟؟!! ولزمتها إيه الحكايه دى؟؟!! يعنى اليوم كدا بقا 25ساعه؟

بابا بيؤول ان الموضوع ده كان مفيد زمان بعد الثوره وأيام جمال عبد الناصر ومصانع النصر (لكل حاجه) إللى كانت مليا البلد، لما كان العُمّال بيخلصوا شغل ويلاقو الدنيا لسه نور فيطبؤوا(يطبقوا) كمان ورديه ويزودوا الانتاج...بس دلوأت لا فى مصانع ولا إنتاج يبآ ليييييه؟؟؟
حد عنده إجابات وله الأجر والثواب؟؟
بذمتكو حد يعرف أى دوله فى العالم بتغيَّر الساعه غيرنا؟! وفى سؤال كمان (هى الملائكه هتكتب الساعه دى إزاى وهنتحاسب عليها إزاى؟؟ ....لخبطه

آخر جنان:واستحملونى
لو حد رايح مشوار بياخد ساعه ونزل من بيتهم 11 على ما وصل كانت 1 بذمتكو يجرا له إيه؟؟!! ولا مراته تعمل فيه إيه؟!!ممكن تقف له بالمقشه ورا الباب

طب لو حد كان عنده ميعاد الساعه 12 ومجتش الساعه 12 فى اليوم ده يروح إمتى؟؟!!!
قيس بقا مواقف كتيييير بالشكل ده،،،،،إللى استفاد صحيح هم الطلبه إللى فاعدين على المذاكره بالعافيه؛ طبعاً هيؤلو لأهاليهم دا احنا بقالنا 3 ساعات بنذاكر من 11 لــ 1 ، على العكس بقا واحده تانيه عيطت لما عنيها ورمت علشان الساعه دى راحت أونطه
بيؤلو ان الدقيقه والثانيه بتفرق فى حياة الشعوب ،يا ترى الساعه إللي فرت او اتسرقت مننا دى فرقت أد إيه معانا؟؟؟

إنت متخيل 60 دقيقه بـ 3600 ثانيه تروح ف الهوا..دى ممكن تنقلك من الجنه للنار وبالعكس، وهنتحاسب عليها إزاى؟ هى الحكومه دى بتسرق مننا كل حاجه حتى الوقت؟؟
إللى يغيظ بأه إنى لحد دلوأت كل ما أسأل عن الساعه يرد علىّ بسؤال يـــ...... ولا بلاش السؤال إييييه؟(بالتوقيت القديم ولا الجديد؟؟بذمتكو مش حاجه تفرقع

وكمان ماما مش راضيه تغير ساعات البيت وبتقول بلاش لخبطه و "متعفرتوش" اليوم

عموماً انا إتعقدت من الساعه 11 وكل ما تقرب على 12 بشوف حته استخبى فيها ،،،، حاجه آخر جنان ..مش معناها ان دى إخر مره اتجنن فيها لا سمح الله طول ما انا عايشه وفى "حبيبتى مصر "يبقا الجايات أكتر من الرايحات ،أنا قصدى ان ترمومتر الجنان المره دى داس جامد أوى

هو احنا سنة 2009 ولا سنة (ألفين و ورا؟؟) متخدوش فى بالكو
صدعتكوا معايا معلش بس إحنا صحاب ولازم نفضفض لبعض وإلا هننفجر

سؤال بقا ...هو فى إيه ؟؟ وبالظبط لو سمحتوا من غير تقديم ولا تأخير

تحياتى الجامده أوى للجميع

Sabrina Abu Ali