بييجي وقت لازم تسكت فيه , وعقلك يقولك ( خليها فى القلب تجرح , بدل ما تبان و تفضح ) .. و أوقات تحس إنك لازم تتكلم .. مش قادر تكتم و تخبي .. وإلا هتنفجر .. علشان متكلمش نفسك و الناس تقول إتجننت .. أو تخلق شخصية من خيالك تعيش معاها و تعزلك عن العالم ويقولو عليك براوي ... يبقى الحل إنك تفضفض .. اللى تقدر تتحمله خليه جواك .. و اللى متقدرش عليه .. ويفيض بيه قلبك و عقلك .. وزّعه على اللى حواليك ... هنا مش مجرد كلام و حكايات ... كل رسالة هي فيض من ( فيوض القلب والخاطر ) ....... أنا / صابرين أبوعلي

الخميس، ٥ نوفمبر ٢٠٠٩

إستخفاف وتكرار وتقليد ماسخ

إستخفاف وتكرار وتقليد ماسخ
الإنسان ده كائن عجيب جداً!! بيدور على إللى يتعبه ويقل راحته او حتى إللى يرعبه علشان يعمله
مش مصدقين؟؟ شم ريحة السجاير إللى فى هدومك والجزمه الكعب عالى فى رجليكى وزياره بسيطه للملاهى تعرفك حجم الرعب اللى بنحبه او حتى بصه صغننه على مكتبة الأفلام إللى عندك وانت تتأكد من حبك لتعذيب ذاتك يا سادى
وانا كمان عارفه إيه بيتعبنى ويرعبنى ويقل راحتى وهنايا ورغم كده بصر عليه وبستناه وبقعد له
حذروا فزروا هو اييييه؟؟
كل واحد يطلع ربع جنيه وانا اقول لكم، ما هو لازم استغل الموقف، اشمعنا انا؟؟جيوبكم مباحه للجميع جت علىَّ يعنى؟
هؤولكم وامرى لله
اقدم لكم الزائر السنوى الجاى من كوكب الأحلام وعالم الفضاء الميتافيزيقى المنبعج من اللاشعور بإللى إحنا فيه....مؤتمر الحزب الوطنى السادس
تصفيق حااااااااد حاااااااااااااااار يا جماعه
مش هطول عليكو علشان اتكلمت فيه كتير السنه اللى فاتت فى نفس الميعاد وفصصتهولكم حته حته ،ودا الرابط بتاعه
http://feyoud-alqalb-walkhater.blogspot.com/2008/11/blog-post_18.html
عنوان الرساله "بيبصولنا من فوق"نوفمبر الفايت
نفس إللى حصل هو هواه......لا جديدماعدا فى بعض التناتيش كده هؤلهالكم دلوأت علشان إللى اسعدهم حظهم وماتبعوهوش بردو لازم انكد عليهم
السنه اللى فاتت عييت وكانت اعراض زبحه السنه دى بقا كانت هتبآ "نؤطه" يعنى نقطه او جلطه او شلل وبالعربيه الفصحى فالج بتعطيش الجيم، بس مكنتش هتبآ نؤطه واحده دى كانت هتبآ نؤط لآآآآآآآآآآآخر السطر


( المؤتمر بإختصااار)

ناس جديده ظهرت كدا يعنى عالماشى،وناس اختفت علشان معادتش مبلوعه وشعبيتها انعدمت فبقا ظهورها يضر ومينفعش واكيد عرفينهم

نفس الكلام ونفس الاستخفاف بعقولنا، تنميه تطوير ازدهار ،مطالبة الحكومه بتوفير 10 مليار لإنعاش الاقتصاد ودى حطوا تحتها 10 مليار خط، هيجيبوهم منين غير من جيوبنا؟؟ ناويين لنا بجد

واتكلم عن السلام...الخطر الذى لن يشغلنا عنه خطر، خطر الفلسطينيين الوحشين إخيه عليهم اللى رفضوا المذكره المصريه طبعاً مش خطر الصهاينه اللى رفضوا يوقفوا الاستيطان

وكمان اقتراح مشروع "الألف قريه" دا على اساس ان معدش فى عشوائيات ولا مشاكل فى المدن الكبرى ومهمتهم خلصت عليها ويلتفتوا بقا للقرى يدهوروها اكتر ما هى متدهوره

غير كمان (مطالبة الحكومه) بالنظر فى احوال المعاشات والتأمين الصحى وتطوير التعليم!!!! وبالمره بردو"مطالبة" نشطاء الحزب وممثلى الشعب فى المجلس الموقر بالتواصل زياده والحوار مع "العامه والبسطاء" ودى بردو نفس كلمة السنه اللى فاتت وستر ربنا ان محدش غلط وقال الدهماء والغوغاء
الحكومه بتاعتنا بتتكلم فى حاجات قديييييييييييييييمه، الناس حوالينا عدتها من زمان أو على الاقل عرفت هتعمل فيها ايه وهتحلها ازى؟؟ لكن إحنا لسه هيه....يا دوب بنقول للمسؤلين يفكروا، وان شاء الله يفكروا بس، ويقترحوا السنه الجايه وبعد اربع سنين يبقوا يفكروا تانى وهكذا كل ما تقرب الانتخابات يبقوا يفكروا وإبقوا قابلونى لو اتحلت

دا غير التأكيد على الديمقراطيه وترسيخ روابط"المواطنه" لدى أفراد الشعب، والمواطنه دى على مدى علمى او على حسب ما بفهم-ايام ما كنت بفهم- انها تعنى"الإنتماء" ودى تتجاب منين فى بلد "بتلفظ" ابناءها وحكومه بتبذل كل جهدها علشان تيأسنا منها وتخلينا نهرب ولو برمى روحنا فى البحر او نستبيع ونركب قطارات كنوع من انواع الانتحار الجماعى ؟؟!!
ونرسخ روابط المواطنه إزاى وإحنا تقريباً مبناخدش حاجه وعلطول يتاخد مننا وباصين لنا فى اللقمه؟؟
ولا انتماء إيه إللى هيجيبوه بأغانى إللى بيغنوها مش حاسين بيها ومتركب عليها صور اقرب إلى الجرافيك منها إلى الواقع معرفش

اما حكاية الديمقراطيه والحريه دى فبجد تعبت علشان ألاقى لها دليل واحد وغلبت ورجعت بخُفى حُنين. دول بيعنوا الرأى والرأى المعارض، كل الناس لها الحريه انها تشارك فى الحياه السياسيه وتظهر احزاب معارضه نحترمها ونعترف بيها ولها اعضاء ظاهريين مش خايفين يعلنوا عن نفسهم
دا حتى احنا من كتر الديمقراطيه إللى عندنا الجرايد الرسميه القوميه التابعه للحكومه الديمقراطيه بتسمى الاخوان المسلمين بـ"الجماعه المحظوره" والله العظيم علطول كده، بغض النظر عن معارضه او مش معارضه أدول بردو ناس ولهم اسم وصفه يتنادوا بيه مش يحقروهم بالشكل ده

اما بقا للحريه والتعدديه الحزبيه فياريت حد يقول لى اسم 10 احزاب من الـ27 حزب الموجودين فى مصر، ويا ريت بالمره يشوف لى حزب الوسط اللى عاوزيين يعملوه كسب قضيته ولا لأ بعد المحكمه الديمقراطيه ما رفضته مرتين

وبالمره كمان حد يقول لى مين ينفع يشارك فى انتخابات الرئاسه سنة 2011بشروط التعجيز إللى حطينها دى ولا تنطبق غير على حد معين ومن غير مقاطعه ناجح ناجح وكلنا هنخرج نهتف فى الشارع " يا جمال طمن ابوك المصراويه هينتخبوك" وأهو بيدى لا بيد التزوير

الديمقراطيه الوحيده إللى اخدت بالى منها ان فى خطاب الريس فى الافتتاح والختام انه كرر كلمة" أطالب" يعنى يكتفى بمطالبة الحكومه مش بأنه يؤمرها أو يجبرها انها تتعدل وتراعى الغلابه، آدينا بنطالب والتساهيل على الله
وكمان وعدونا بإنتخابات حره نزيهه فى مجلس الشعب السنه الجايه وللرئاسه السنه إللى بعدها يحييكوا ربنا

إللى اختلف بقا من حزب مؤتمر السنه الفايته للسنه دى هو الشعار إللى بقا " من أجلك أنت" مع ان الافضل لو كانوا خلوه "أحسنلك" ورسموا جنبه واحد بيزغرلنا بعينه ومكرمش وشه او يحطوا علامة الخطر بتاعة الجمجمه والعضمتين
(حاجات عجبتنى....أوى)

إللى عاجبنى أوى أوى أوى فى المؤتمر ده هو "الإصرار والعزم الراسخ" للحكومه فى بعض الحاجات، زى مثلاً:-

تصميمهم على مواصلة "الاستخفاف" بينا وبعقولنا ومشاكلنا ومعاملتنا على اننا "أغبياااااء" أو عميان او ناكرين للجميل لدرجة انى اقتنعت والله وبدأت اشفق على الحكومه والحزب ولقيت اننا فعلاً مش حاسيين بيهم والدمعه فرت من عينى وانا بسمع الأغنيه فى الختام والكوبليه بتاع "راحتك انتَ اهم عندى كلنا هنكون معاك" عمال يرن فى ودانى ويلح علىَّ يحسسنى زياده بالذنب

ونط اؤودام عينى مشهد الراجل إللى طلع عالمسرح لأم كلثوم وانحنى يبوس رجلها وتخيلت نفسى وانا طالعه اجرى كدا على سيادة الريس وبوطى ابوس رجليه واعييييييييط واصرخ بأعلى صوت " لحم كتافنا من خيرك يا ريس" بس يا ترى كانوا هيسيبونى أوصل لعنده ولا كانوا هيلحقونى بكام رصاصه عالماشى ويقولوا انى كنت ماسكه مبرد الضوافر ورايحه اهاجمه بيه؟؟؟!!

نوع تانى من انواع "الإصرار" ظهر فى تكرارهم لنفس المواضيع، لا جديد، ولسه بردو بيحاولوا يلاقوا حلول ويوعدونا بالإصلاح فى الفتره الجايه واعتقد قصدهم من هنا لحد انتخابات الرياسه، مع انى مش متصوره ان إللى مقدروش يعملوه فى 29 سنه هيلحقوا يعملوه فى سنه، وكل شئ جايز حتى خلفة العجايز، مفيش حاجه بعيد على ربنا، قادر يقويهم وينفخ فى صورتهم وأهو كله لمصلحتنا

وكمان نوع من "الإصرار" كان واضح وبيلمع على رؤوس الجميع وظهر بشده فى نوع "الصبغه" الجامده إللى بيستخدموها للتحايل على الزمن واصرارهم على دعم"روح الشباب"وشركة الصبغه والدماء الجديده داخل صفوف الحزب والحكومه، كله اسود فى اسود ولا شعرايه بيضه هنلاقى شباب اكتر من كده فين يا بترانيين يللى ميعجبكوش العجب؟؟
بس الصراحه دكتور نظيف ودكتور على الدين هلال وكبير الياوران لسه بردو "مصرين ومصممين" على الاحتفاظ بالشعر الابيض، ولا جايز دى تكون صبغه بيضا؟؟ أهو نوع من "التغيير" إللى بقالهم سنين بيوعدونا بيه، مش لازم كله يبقا اسود يعنى

وظهر التجديد بردو فى "حته أمريكانى" كدا عالماشى، قال إيه اول ما الريس خلص كلمته تدافعت عليه الحشود من كل الطوائف، فلاحيين بجلاليب وصعايده وبدو بلبسهم المميز وشاب صغنن وشابه أموره وواحده محجبه واتنين تلاته بشعرهم وفضلوا يتكلموا معاه لحد ما نزل من على المنصه، ولا بلاش "المنصه" علشان التشاؤم وخليها ستادج
stage
علشان الجو الامريكانى يكمل،فكرنى بمناظرات الرياسه الامريكانى وكل مرشح واقف حواليه مؤيديه ومسؤلى الدعايه عن حملته الانتخابيه، مع الفرق طبعاً ان عندنا مفيش مناظرات وان كان عاجبكم، محاولة تقليد بس طلعت ماسخه شويه ،ناقصه فلفل وشطه وملح، ناقصه حراره وصدق

بذمتكوا مش عسوله؟؟

الشئ اللذيذ فى الموضوع ان السيد جمال مبارك مظهرش جنب باباه، وفضل بعيد، حتى وهم خارجين من القاعه خرج مع آخر ناس تقريباً ولوحده وكأنه فى الفتره الجايه مش عاوز ياخد صفة ابن الريس علشان لما آجى يا جماعه يبقا بمجهودى مش توريث وكلام فاضى
وكفايه عليه امانة السياسات فى الحزب وإللى بتحط آخر حته فى البازل علشان الصوره تكمل، متنسوش ان من شروط مرشح الرياسه ان يكون له منصب قيادى فى الحزب إللى بينتمى ليه، يعنى مش اى واحد والسلام.

( المُخرِج غلطااان )

الشئ إللى يزعل بقا فى نقل جلسات المؤتمر السادس للحزب الوطنى هو "الفتووووور" إللى كان ظاهر وبشده على وشوش كل الحضور، زعلت من المخرج أوى إنه كان بيركز على الناس وهم فيهم السرحان وإللى بيتاوب وإللى ايده على خده وإللى قاعد براحته عالآخر فى الكرسى لدرجة ان ركبته كانت قربت تلمس الأرض من شدة الاسترخاء، مكانووش قادرين ييجوا على نفسهم ويفوقوا شويه؟؟ او المُخرِج حتى كان جاب صور تركيب وهم متحمسين لأى حاجه ان شا الله حتى فيلم كرتون، والله العظيم كانوا فى منتهى اللامبالاه والتململ كمان وكأنهم مش مقتنعين بيللى بيتقال او اتعودوا عليه وحفظوه خلاص.

كل سنه وانتم طيبين يا بتوع الحزب، وكل سنه وإنتِ طيبه يا حكوووومه، وعؤبال المؤتمر السابع والتامن والتاسع عشر كمان
ربنا يخليكوا يا رب، لو فيكو حد حزب وطنى وله علاقات واصله مع الكبار يسألهملى كام سؤال:

- يا ترى لو اى حزب تانى فكر يعمل مؤتمر ويعلن عن اهدافه هيسيبوه ولا هيطبقوا عليهم قانون الطوارئ واى عدد يعتبروه تجمهر ويقبضوا عليهم؟؟

- يا ترى بردو أى حزب من حقه يحط شعار ويؤلف اغانى ويعمل اعلانات فى الفضائيات والأرضى ولا دا ممنوع وممكن يعتقلوا المطرب والمؤلف ويقفلوا القناه؟؟

- المؤتمرات السنويه وتكلفتها الرهيبه دى بيتصرف عليها منين؟؟ قطاع خاص ولا حكومه يعنى؟؟ ولا جايز اعضاء الحزب "بيلموا" من بعض علشان يأجروا قاعات ولا يدفعوا لبتوع الفِراشه والصوانات؟؟ والمبانى الرهيييييييييبه بتاعة الحزب الوطنى فى كل محافظه دى مين بيصرف عليها؟؟ عندكوا مشاريع تمولها يعنى ولا دى من فلوس الحاجات إللى خصخصتوها وبعتوها؟؟ واهو جيب البلد وجيب الحزب واحد

- ويا ريت بالمره تسألوهم لو بتوع الحزب بيتكتب لهم فى البطاقه حزب وطنى ولا هم معروفين وبيبان عليهم؟؟

- وكمان يا ترى لما الريس ورجالته بيبقوا رايحين مقر المؤتمر بيعدوا من الشوارع بتاعتنا ويشوفوا الغلابه اللى ضهرهم محنى من الهم والمتسولين والمشردين ولا بيحطولهم شاشات سميولاشن لشوارع تانيه؟؟

- كمان سوؤال بقا...انتوا مزهقتوش؟؟؟ منفسكوش تعيشوا جو المنافسه والتبارى؟؟ الحياه مبقتش ممله وانتوا عايشيين فيها لوحدكوا كده منفصلين عن الواقع؟؟؟

- اما آخر سؤال....مسمعتوش حكاية إللى كدب كدبه وصدقها وعاش فيها من كتر التكرار لحد ما عزلته عن العالم ودمرت حياته؟؟ ولا حد حكى لكم حكاية الراعى اللى كان بيصرخ"ديب ديب"وهو مفيش ديب لحد مبقاش فيه حد يصدقه وفى الآخر لما جه الديب الحقيقى محدش عبره وسابهوله ياكله هَم هَم؟؟

متعبتوش من الاستخفاف بينا والتكرار لأنفسكم والتقليد الماسخ للغير؟؟

على فكره....طول ما ( هم ) شايفين ان "مفيش" مشكله هتفضل دى المشكله إللى بجد

يظهر انه مكتوب عليكى يا مصر، ان اللى يحكمك يستخف بيكى وبعقل ولادك
قال تعالى عن فرعون مصر " فاسْتَخَف قومَه فأطاعوه إنهم كانوا قوماً فاسقين"
يللا بقا...انا كدا عملت إللى عليا ونكدت عليكم،او جايز تكونوا ضحكتوا؟؟
دا لسه...كل ما الانتخابات تقرب المسرحيات هتكتر وهنعيش يا رجاله
تعيشوا وتاخدوا غيرها
سلام بأه

صابرين- أوى- أبو على

هناك ٦ تعليقات:

غير معرف يقول...

أنا مش هعلق على اللي مكتوب .. بس عندي سؤال مهم جداااا.. حضرتك بتجيبي روح منين تكتبي كل ده !!! كتييير أوي

عبد الرحمن

EL-Kalamangiah يقول...

السلام عليكم
والله يا استاذ عبد الرحمن كان هيسعدنى تعليقك لو علقت بس واضح ان حضرتك بتزهق بسرعه...يا بختك
عارفه ان الكلام كتير اومال انا ليه مسميه نفسى "الكلامنجيه"؟؟ حكاية الروح دى بقا فهى بتطلع مع الكلام ده
بتكلم قبل ما انفجر ،بكتب بدل ما اكلم نفسى واتجنن
وبعدين بدل ما اتريق فى سرى ادينى بتريق علنى
عارف حضرتك...."الكتاب" يعتبر مكقاله بس صاحبها لقاها طويله حبتين فحطها فى كتاب لوحدها،اصبر عليا لما اجمع شويه كويسين وهحطهم فى كتاب ومش هتقل عليكم تانى
المهم بقا من الكلام الكتير ده...فى محله ولا لأ؟؟ نفع ولا ما نفع؟؟
متشكره لمرورك وتعليقك

غير معرف يقول...

على فكرة .. ده نق .. مش نقد .. أنا أحياناً كتير بيكون جوايا كلام كتير وبكسل أكتبه وبريح دماغي ، مع إني أعتقد إني بفكر وبتكلم حتى وانا نايم

طريقتك في الكتابة جميلة ، تحسي ان واحدة ست كبيرة مربعة رجليها وبتحكي وأحيانا بتتكلم وترد على نفسها

ربنا يوفقك يا افندم

EL-Kalamangiah يقول...

هههههههههههههههههههه
انت بتقول فيها...والله بكلم نفسى وببقا قاعده مربعه بجد واحياناً اندمج افوء ألاقينى بلطم، واوقات فى وسط الكتابه ارقع بالصوت من كتر الاندماج او اقول يا دهوتيييييييييي
شيبتهم فى البيت وفى الشغل من الخضات كل شويه
والنبى نؤ عليا كمان يمكن ابطل كتابه وتفكير
ميرسى على دعاءك لى بالتوفيق،كويس انه لى مش عليا

غير معرف يقول...

:D

مانا قليل لما بتخيب توقعاتي :)

بنجامين گير يقول...

أدعوكم إلى قراءة ملخص لمجموعة من الدراسات العلمية عن المواطنة والدين والدولة القومية في عدة بلدان في أوروبا والشرق الأوسط.